M̦okta jãn an kar Jesus mej, ear bwebwenato ippãn emãn iaan rũkal̦oor ro an. Etan l̦õm̦arein ej Piter, Jemes, Jon, im Andru. Ilo an kar Jesus kanaan kõn kakõl̦l̦en iien eo me enaaj jino Kiiñ ilo raan ko ãliktata, ear ba: “Wõn ri karejar eo etiljek im mãlõtlõt? Ej armej eo irooj eo an ear likũt bwe en bõk eddon ri karejar ro jet, bwe en kajejjet iien an lel̦o̦k kijeir.” (Matu 24:3, 45, UBS; Mark 13:3, 4) Ta mel̦el̦ein men in? Eokwe, Jesus ear kõkkar kõn katak ko an Anij ãinwõt m̦õñã. Ear kalikkar ñan rũkal̦oor ro an bwe ãinwõt “irooj” eo aer, enaaj jitõñ jet bwe ren lel̦o̦k wõt katak ko an Anij ñan rũkal̦oor ro an ilo raan ko ãliktata. Wõn ro ri karejar in etiljek im mãlõtlõt ej kõkkar kake?

Ej juon kumi edik an em̦m̦aan ro rej rũkkapit im rej rũkal̦ooran Jesus. “Ri karejar eo etiljek im mãlõtlõt” ej jitõñl̦o̦k ñan Kumi eo Ej Lale Aolep Eklejia ko an Ri Kõnnaan ro an Jeova. ‘Ri karejar in’ ej poub ilo an letok m̦õñã ko ilo kõkkar ak katak ko jãn Baibõl̦ eo ñan ro m̦õttaer me rej kabuñ ñan Jeova. El̦ap ad aikuji ri karejar in etiljek im mãlõtlõt, kõnke kumi in ej letok katak kein me rej ãinwõt ‘kijed ilo iien eo ejejjet.’​—Luk 12:42, UBS.

Kumi in ej lale ro doon Anij. (1 Timote 3:15) Jesus ear jitõñ kumi in bwe en lale aolep jerbal ko an doulul eo an Jeova ilo lal̦ in. Ñan waanjoñak, kumi in ej lale aolep men ko m̦weien doulul in an Anij ilo lal̦ in. Ej bareinwõt tõl jerbal in kwal̦o̦k naan. Kumi in ej bar katakin kõj ikijjeen katak ko rej wal̦o̦k ilo eklejia ko ad. Bwe en maroñ letok ñan kõj katak ko jej aikuj ilo iien eo jej aikuji, “ri karejar in etiljek im mãlõtlõt” ej kõm̦m̦ani elõñ bok ko ñan jipañ kõj. Bareinwõt, ej letok katak ko rem̦m̦an ilo iien kweilo̦k ko ad im iien kweilo̦k ko rel̦l̦ap.

Ri karejar in elukkuun tiljek kõnke ejjab ilo̦k jãn katak ko rem̦ool jãn Baibõl̦. Ej bar tiljek wõt ilo an kwal̦o̦k kõn ennaan eo em̦m̦an me kar kakien bwe en kõm̦m̦ane. Ri karejar in elukkuun mãlõtlõt kõnke el̦ap an jim̦we im kapeel ilo wãween an lali aolep men ko an Christ ilo lal̦ in. (Jerbal 10:42) Jeova ej kõm̦m̦an bwe en lõñl̦o̦k wõt uwaan armej ro doon im ej jipañ ri karejar in etiljek im mãlõtlõt bwe en letok elõñ katak ko jãn Baibõl̦.​—Aiseia 60:22; 65:13.

• Wõn ro Jesus ear jitõñ er bwe ren lel̦o̦k katak ko an Anij ñan rũkal̦oor ro?

• Etke jemaroñ ba bwe ri karejar eo ej juon eo etiljek im mãlõtlõt?