Juon iien ãlikin an kar Kiiñ Nebukadnezar ettõn̦ak kõn ekjab eo el̦ap, ear kiiõ kajutake juon ekjab kileplep kõm̦m̦an jãn gold. Ear kajutake ilo jikin eo etan Dura im ear kũrl̦o̦k ruutiej ro ilo ãneo, ekoba Shadrak, Meshak, im Abednego. Ear ba bwe ren etal im jutak im̦aan ekjab eo. Kiiñ eo ear jiroñ er im ba: ‘Ilo iien eo kom̦ij roñ ainikien jilel ko kab ainikien kein kõjañjañ ko jet, kom̦win m̦õkaj im badikdik ñan ekjab in. Jabdewõt eo ejjab badikdik, naaj jol̦o̦ke ñan lowaan jikin kijeek en̦.’ RiHibru ro jilu renaaj ke badikdik ñan ekjab in, ak renaaj ke kabuñ ñan Jeova wõt?

Innem kiiñ eo ear ba bwe ren kõjañi kein kõjañjañ ko. Aolep armej ro rar bukwelõlõ im badikdik ñan ekjab eo ak Shadrak, Meshak, im Abednego wõt rar jab. Jet iaan armej ro rar loe men in im rar ba ñan kiiñ eo: ‘RiHibru ran̦ jilu rem̦akoko in kabuñ ñan ekjab en̦ am̦.’ Innem Nebukadnezar ear ba bwe ren ãñintok l̦õm̦arein ñan ippãn im ear ba: ‘Ij bar lewaj amijel iien bwe kom̦win kabuñ ñan ekjab en̦. Ñe kom̦ jab kabuñ ñane, inaaj jol̦o̦ke komijel ñan lowaan kijeek en̦. Ejjel̦o̦k juon anij enaaj maroñ lo̦mo̦o̦ren kom̦ jãn ña.’ Ak rar uwaak im ba: ‘Kwõjjab aikuj bar letok iien ñan kõm. Anij eo ammim emaroñ lo̦mo̦o̦ren kõm. Ak jekdo̦o̦n ñe ejab lo̦mo̦o̦ren kõm, ak kõm ban kabuñ ñan ekjab n̦e.’

Kõn men in, Nebukadnezar ear lukkuun illu. Ear ba ñan rijerbal ro an: ‘Kom̦win anõkkaane kijeek en̦ bwe en kajoorl̦o̦k an bwil jimjuon alen jãn kar m̦okta!’ Innem ear jiroñ rũttarin̦ae ro an im ba: ‘Kom̦win lukwõje l̦õm̦aran̦e, im jol̦o̦ke er ñan lowaan kijeek en̦!’  Joñan an kar kajoor kijeek eo, ke rũttarin̦ae rein rar etal ñan iturin, rar kajju bwil im mej. Ak RiHibru ro jilu rar wõtlo̦k ñan lowaan kijeek eo eurur. Ke Nebukadnezar ear etal bwe en reilo̦k im lale lowaan, ear jab loe jilu armej ak ear loe emãn rej etetal lowaan kijeek eo. Kõn men in, ear kor im mijak im ear kajjitõk ippãn ruutiej ro im ba: ‘Ejjab ke kar jilu wõt armej ro jaar jol̦o̦k er ñan lowaan kijeek eo? Etke emãn en̦ armej rej pãd lowaan im juon iaaer ãinwõt juon enjel̦?’

Innem Nebukadnezar ear kepaake kijeek eo im ikkũrl̦o̦k ñan er im ba: ‘Kom̦ rũkarejeran Anij eo Eutiejtata, kom̦win diwõjtok!’ Ke Shadrak, Meshak, im Abednego rej diwõjl̦o̦k, aolep rar bwilõñ ke rej lo bwe ejjel̦o̦k jabdewõt jorrããn ear wal̦o̦k ñan erjel. Ear jab bwil ãnbwinnier, kool̦an bõraer, im nuknuk ko aer. Joñan, rar jab bwiin baat.

Nebukadnezar ear ba: ‘Anij eo an Shadrak, Meshak, im Abednego el̦ap an kajoor im utiej. Ear jilkintok enjel̦ eo an ñan lo̦mo̦o̦ren er. Ejjel̦o̦k bar juon anij ãinwõt Anij eo aer.’

Kwõnaaj ke bar ãinwõt RiHibru rein jilu im kate eok ñan dãpij wõt am̦ tiljek ñan Jeova jekdo̦o̦n ta eo enaaj wal̦o̦k?