1, 2. (1) Etke armej ro an Ilaija rar eñtaan? (2) Wõn ro Ilaija ear jelm̦aik er ilo Tol̦ Karmel?

 ILAIJA ej reilal̦l̦o̦k im lale an jarlepju eo wanlõñtak ñan ippãn ilo Tol̦ Karmel. Ejimmarok iien in im meñe ej emmarokrok wõt ak elukkuun alikkar an armej rein eñtaan kõn aer jeram̦õl im pãd ilo aikuj. El̦o̦k de jilu jimattan iiõ in an jañin wõt im men in ear kõm̦m̦an an armej rein jorrããn.

² Rũkanaan ro 450 an Beal rar bar pãd ibwiljin armej rein. Rũkanaan rein rar lukkuun utiej bũrueer im dike Ilaija, rũkanaan eo an Jeova. Meñe Lerooj Jezebel ear m̦an elõñ iaan rũkarejar ro an Jeova, ak Ilaija ear jutak pen wõt im jum̦aik kabuñ eo an Beal. Ak ewi toon an naaj kõm̦m̦ane men in? Eokwe ilo iien in, bõlen bũrij rein an Beal remaroñ kar l̦õmn̦ak bwe Ilaija enaaj mijak er im bõjrak kõnke e wõt juon ñan er aolep. (1 Kñ. 18:4, 19, 20, UBS) Kiiñ Ehab ear bar itok ñan Tol̦ Karmel ak ear uwe tok ilo jariot eo waan. L̦ein ebar dike Ilaija.

3, 4. (1) Etke Ilaija emaroñ kar mijak ke ear jino erraananl̦o̦k ilo raan eo? (2) Ta kajjitõk ko jenaaj etali?

³ Ilo raan eo, elõñ men ko rar pojak in wal̦o̦k ñan Ilaija. Ejjel̦o̦k juon raan ilo mour eo an Ilaija me joñan wõt an kar nana im pen in wõt raan eo. Ke ej lale an armej ro wanlõñl̦o̦k ñan ippãn ilo Tol̦ Karmel, ear jel̦ã bwe ejjabto jãn iien eo armej ro renaaj loe kõn mejãer wõn eo ekajoorl̦o̦k, armej ro renana ke ak Anij. Ta kar eñjake eo an Ilaija ke ear jino erraananl̦o̦k? Bõlen emaroñ kar ikkũm̦kũm̦ im mijak jidik kõnke “ear bar juon armej ãinwõt kõj.” (Riit Jemes 5:17, UBS.) Ilo iien in, Ilaija ear lukkuun l̦õmn̦ak bwe emake iaan. Emaroñ kar bõk l̦õmn̦ak in kõnke el̦ak lale aolep armej ro ijo rar jab tiljek ñan Jeova, ekoba kiiñ eo aer me ear oktak im rijum̦ae, im kab bũrij ro me rar m̦anm̦an armej.​—1 Kñ. 18:22, UBS.

⁴ Ak ta eo ear kõm̦m̦an menin an RiIsrael ro jorrããn ñan joñan in? Im etke bwebwenato in em̦m̦an ñan kõj kajjojo? Eokwe, jen etale bwebwenato in kõn wãween an kar Ilaija kwal̦o̦k an tõmak ilo Anij im lale ta ko jemaroñ katak jãn joñak eo an.

5, 6. (1) Ta eo RiIsrael ro rar ajkup kake? (2) Ewi wãween an kar Kiiñ Ehab kallu Jeova?

⁵ Ilo aolepen mour eo an Ilaija, ekar loe an jorrããn men eo ej make wõt em̦m̦antata kõn aelõñ eo an im armej ro an. Ear loe aer kõjekdo̦o̦ne im ko̦kkure kabuñ eo em̦ool, bõtab ekar ejjel̦o̦k an maroñ ñan kõm̦m̦an jabdewõt. Eto an kar RiIsrael ro ajkup ikõtaan ruo l̦õmn̦ak, rar jaje ren kããlõt kabuñ eo em̦ool ke ak kabuñ eo ewaan. Enañin aolepeer rar kabuñ ñan ekjab im anij ko rewaan an riaelõñ ko im kõjekdo̦o̦n Jeova Anij. Ear l̦apl̦o̦k wõt an men in nana im ajeeded ilo kar tõre eo an Ilaija.

⁶ Kiiñ Ehab ear lukkuun kallu Jeova. Ear m̦areiki Jezebel, lio nejin kiiñ eo an Saidon. Jezebel ear kõn̦aan bwe en jako an armej ro kabuñ ñan Jeova. Eñin unin an kar kõm̦m̦an bwe aolep armej in Israel ren kabuñ ñan Beal. Liin ear oktak im irooj ioon Ehab. Kõn men in, Ehab ear kalõk juon tampel̦ ak im̦õn kabuñ ñan Beal. Im ear kõm̦m̦ane juon lokatok im likũti ilowaan im̦õn kabuñ in. Innem ear tõl armej ro ñan l̦oore im badikdik ñan anij in an ripegan ro.​—1 Kñ. 16:30-33, UBS.

7. (1) Etke an kar armej ro kabuñ ñan Beal ear juon men elukkuun nana im̦aan mejãn Jeova? (2) Etke jemaroñ ba bwe ejjab kapokpok an Baibõl̦ kwal̦o̦k kõn joñan aetokin an kar jab wõt ilo tõre ko an Ilaija? (Kobaik  bo̦o̦k eo.)

⁷ Etke ear lukkuun nana kabuñ in Beal? Kõnke kabuñ in ear kareel RiIsrael ro ñan el̦l̦o̦k jãn Anij eo em̦ool. Bareinwõt, kabuñ in ear kõm̦m̦ani men ko relukkuun kajjõjõ im lãj. Ilo aer kar kabuñ ñan Beal, em̦m̦aan im kõrã ro rar l̦õñ ilo tampel̦ eo. Rar kõm̦m̦ani m̦anit ko rettoon im rekajjõjõ ke rar pãd ippãn doon im rar katok kõn ajri ro nejier. Kõn men in, Jeova ear jilkinl̦o̦k Ilaija ñan ippãn Ehab bwe en kõjjel̦ãik e bwe eban wõtlo̦k wõt m̦ae iien eo Ilaija enaaj ba bwe en wõt. (1 Kñ. 17:1, UBS) Jet iiõ tokãlik, Ilaija ear jepl̦aak ñan ippãn Ehab im ba ñane bwe en ko̦kweilo̦ktok armej ro im rũkanaan ro an Beal ñan Tol̦ Karmel. a​—Lale kõmel̦el̦e eo itulal̦.

8. Ewõr ke mel̦el̦ein kabuñ in Beal ñan kõj ilo raan kein?

⁸ Ewõr ke mel̦el̦ein kabuñ in Beal ñan kõj ilo raan kein? Jet remaroñ l̦õmn̦ak bwe ejjel̦o̦k mel̦el̦ein bwebwenatoun Beal ñan kõj ilo raan kein. Unin ej kõnke rej ba ejjel̦o̦k an Beal tampel̦ im lokatok ipel̦aakid. Ak bwebwenato in ejjab baj juon bwebwenato in etto wõt. (Rom 15:4, UBS) Naan in “Beal” ej mel̦el̦ein “irooj” ak “juon eo ewõr an rũkarejar.” Ke Jeova ear ba ñan armej ro an bwe ren kããlõt e bwe en ‘l̦eo pãleer’ rej karejar ñane, ear kõjerbal naanin  Hibru eo me ej mel̦el̦ein “beal.” Kõn men in, Jeova ear ba bwe armej ro an ren kããlõte bwe en aer beal. (Ais. 54:5, UBS) Kwõj errã ke bwe ilo raan kein elõñ kain irooj ak anij ko me armej rej karejar ñani ijello̦kun aer karejar ñan Anij eo Ekajoor Bõtata? Eokwe jabdewõt men armej rej kamaat aer maroñ ñane im likũti m̦oktata ilo mour ko aer, eñin ej anij eo aer. Ñan waanjoñak, elõñ armej el̦ap aer kõttõpar bwe en wõr aer jããn im en utiej jerbal eo aer. Bar jet, el̦ap aer jol̦o̦k iien ñan iukkure ko im menin kam̦õn̦õn̦õ ko im ñan kajejjet kõn̦aan ko aer rettoon. Aolep men kein im men ko ãierl̦o̦k wõt rej ãinwõt anij ak irooj ñan armej rein kõnke el̦ap aer kamaat aer iien im maroñ ñani, ijello̦kun aer karejar ñan Jeova. (Matu 6:24; riit Rom 6:16, UBS.) Kõn an armej ro kõm̦m̦ani men kein, jemaroñ ba bwe ej wõnm̦aanl̦o̦k wõt kabuñ ñan Beal ilo raan kein. Ñe jenaaj kõl̦mãnl̦o̦kjen̦ kõn iien eo kar kam̦ool wõn Anij eo em̦ool ilo Tol̦ Karmel, Jeova ke ak Beal, men in enaaj jipañ kõj ñan kããlõt pepe eo ejim̦we kõn wõn eo jen karejar ñane.

9. (1) Etke Tol̦ Karmel ear jikin eo ejejjet ñan kaalikkar bwe Beal ej riabin anij? (Bar lale kõmel̦el̦e jidikdik eo.) (2) Ta eo Ilaija ear ba ñan armej ro?

⁹ Ke armej ro rar pãd ioon Tol̦ Karmel, emaroñ kar alikkar aer reilo̦k im loe jikin ko jet ipel̦aakin tol̦ in. Remaroñ kar reilal̦l̦o̦k im loe Lom̦al̦o El̦ap im tol̦ jiddik ko ilo Kaishon. Remaroñ kar bar reilo̦k ñan tuiõñin tol̦ eo im loe tol̦ ko ilo Lebanon. b (Lale kõmel̦el̦e eo itulal̦.) Bõtab, ke ear jino tak al̦ ilo raan eo, ear alikkar an jorrããn ãneo im m̦õrã bwidejin. Det eo ear ko̦kkure ãne in me ekar em̦m̦an bwidejin ñan kallib ilo jinoin ke Jeova ear lel̦o̦k ñan ro nejin im jibwin Ebream. Ak kiiõ, elukkuun jorrããn kõn an armej ro jab pokake! Ke armej ro rar kuktok ippãn doon, Ilaija ear kepaake er im ba: “Ewi toon ami naaj aepedped ikõtaan l̦õmn̦ak kein ruo: el̦aññe [Jeova] ej Anij, kom̦win kabuñ ñane, ak el̦aññe Beal ej anij, innem kom̦win kabuñ ñane.”​—1 Kñ. 18:21, UBS.

10. (1) Ewi wãween an kar armej ro an Ilaija “aepedped ikõtaan ruo l̦õmn̦ak”? (2) Ta kien eo armej ro rar mel̦o̦kl̦o̦ke?

 ¹⁰ Ta mel̦el̦ein an kar Ilaija ba bwe armej ro rar “aepedped ikõtaan ruo l̦õmn̦ak”? Eokwe, armej rein rar l̦õmn̦ak bwe remaroñ kar kabuñ ñan Jeova im Beal jim̦or. Bõtab, rar jab kile bwe rar aikuj kããlõt juon wõt iaaer, kabuñ ñan Jeova ke ak kabuñ ñan Beal. Rar l̦õmn̦ak bwe remaroñ kõm̦m̦ani m̦anit ko rettoon im kajjõjõ ñan Beal bwe en jab illu ippãer im bar kajjitõk jipañ jãn Jeova Anij. Bõlen rar l̦õmn̦ak bwe rej aikuj kabuñ ñan Beal kõnke enaaj kajeraam̦m̦an jikin kallib ko aer im bwijjin menninmour ko aer. Im ilo ejja iien eo wõt, rar l̦õmn̦ak bwe rej aikuj bar kabuñ ñan Jeova kõnke “Ekajoor Bõtata” im enaaj kõjparok er ilo iien tarin̦ae. (1 Sa. 17:45, UBS) Rar mel̦o̦kl̦o̦k kien eo ekanooj aorõk an Jeova me elõñ armej rainin rejjab kile joñan an aorõk. Jeova ejjab kõn̦aan bwe armej ren kabuñ ñan bar juon ijello̦kun wõt e. Em̦õj an kakien bwe jen kabuñ wõt ñane im e wõt ej tõllo̦kũn ad lel̦o̦k aiboojoj im nõbar ñane. Kõn men in, elukkuun dike ñe armej ro rej l̦oore m̦antin kabuñ ko  jet ilo aer kabuñ ñane. Im el̦ap an illu ñe rej kõm̦m̦ane men in.​—Riit Exodus 20:5, UBS.

11. Etke naan ko an Ilaija remaroñ jipañ kõj ñan etale kõj make?

¹¹ RiIsrael ro rar “aepedped ikõtaan ruo l̦õmn̦ak.” Rar ãinwõt juon armej ej pãd ikõtaan ruo ial̦. Im ejaje ia eo en etal iel̦o̦k kõnke ekõn̦aan etal ilo ial̦ kein ko ruo ilo juon wõt iien. Elõñ armej ro ilo raan kein rej kõm̦m̦ane ejja bõd eo wõt armej ro ilo tõre ko an Ilaija rar kõm̦m̦ane. Rej kõtl̦o̦k bwe men ko rej ãinwõt beal ak anij ilo raan kein ren del̦o̦ñtok ilo mour ko aer im kapañ aer kabuñ ñan Anij. Ad pokake naan kein an Ilaija ñan jab ajkup ak aepedped ikõtaan ruo l̦õmn̦ak enãj jipañ kõj ñan bar etale kõj make im lale ta ko el̦apl̦o̦k ad kaorõki. Bareinwõt, enãj jipañ kõj ñan bar etale el̦aññe ejim̦we wãween ad kabuñ ñan Jeova.

12, 13. (1) Ta eo Ilaija ear ba armej ro ren kõm̦m̦ane me enaaj kar kaalikkar wõn Anij eo em̦ool? (2) Ta eo jemaroñ kõm̦m̦ane ñan kwal̦o̦k ad lukkuun lõke Jeova ãinwõt kar Ilaija?

¹² Ãlikin an kar Ilaija kõnnaan ñan armej ro, ear jom̦aanl̦o̦k juon an l̦õmn̦ak me enaaj kaalikkar ñan armej ro wõn Anij eo em̦ool. Ear ba ñan rũkanaan ro an Beal bwe ren kõm̦m̦ane juon aer lokatok im likũt menin katok eo aer ioon. Innem ren jar ñan anij eo aer bwe en tile kijeek eo im kein katok eo aer. Ilaija ear bar ba bwe ñe em̦õj an rũkanaan ro an Beal kõm̦m̦ane men in, enaaj baj kõm̦m̦ane juon an lokatok im jar ñan anij eo an bwe en tile menin katok eo an. Ear ba bwe “anij eo ej uwaak kõn an jilkintok kijeek, e eo ej Anij.” Ilaija ear jel̦ã kadede wõn Anij eo em̦ool. Joñan an kar kajoor tõmak eo an, ear jab mijak in kõtl̦o̦k bwe rũkanaan ro an Beal ren m̦okta kam̦oole el̦aññe anij eo rej kabuñ ñane ej m̦oolin anij. Kõn men in, rũkanaan rein rar kõpooj kau eo renaaj katok kake im rar jino kũr ñan Beal. c (Lale kõmel̦el̦e eo itulal̦.)​—1 Kñ. 18:24, 25, UBS.

¹³ Jeova ejjab kõm̦m̦an menin bwilõñ ko ilo raan kein ãinwõt an kar kõm̦m̦ane ilo iien ko etto. Bõtab, ejjañin oktak jãn an jipañ armej ro an. Jen lukkuun lõke Jeova ãinwõt an kar Ilaija lõke. Ñan waanjoñak, el̦aññe armej ro rejjab errã kõn katak ko ilo Baibõl̦, jen jab mijak in kõtl̦o̦k bwe ren m̦okta kwal̦o̦k l̦õmn̦ak ko aer. Jemaroñ ãinwõt Ilaija ilo ad lõke Anij eo em̦ool bwe enaaj kajim̦we armej rein. Jej kwal̦o̦k ad lõke Jeova ilo ad jab atartar ioon jel̦ã eo ad  make ak jej kõtl̦o̦k bwe Baibõl̦ en jipañ armej ro kõnke kar kõm̦m̦ane ñan “kajim̦we bõd ko.”​—2 Ti. 3:16, UBS.

14. Ta ko Ilaija ear ba ke ear kajjirere kake rũkanaan ro an Beal, im etke?

¹⁴ Rũkanaan ro an Beal rar kõpooj kein katok eo aer im kũr ñan anij eo aer. Elõñ alen aer kar kũr e im ba: “O Beal, kwõn eo̦roñ kõm!” Rar wõnm̦aanl̦o̦k im kũri ium̦win elõñ awa, ak Baibõl̦ ej ba bwe “ejjel̦o̦k en̦ ear uwaak.” Ke ej raelepl̦o̦k, Ilaija ear kajjirere kake er im ba bwe bõlen Beal epoub im ejjab maroñ eo̦roñ er, ak bõlen emoot in kõppojak, ak bõlen ekiki im juon ej aikuj ko̦ruji. Ilaija ear ba ñan rũkanaan riab rein: “Kom̦win kal̦apl̦o̦k ainikien ami jar.” Ealikkar an kar jel̦ã bwe Beal ej juon riabin anij im ear kõn̦aan bwe RiIsrael ro ren bar kile men in.​—1 Kñ. 18:26, 27, UBS.

15. (1) Ta eo ear wal̦o̦k ke rũkanaan ro an Beal rar kũr im jar ñane? (2) Ewi wãween an men in kaalikkar bwe ej juon menin bwebwe ñan kabuñ ñan bar juon anij ijello̦kun Jeova?

¹⁵ Ãlikin an kar Ilaija kajjirere im ba ñan bũrij ro an Beal bwe ren kal̦apl̦o̦k ainikier, rej kab baj kũtõtõl̦o̦k wõt im “kal̦apl̦o̦k ainikien aer jar.” Ejjab men in wõt ak “rar kakinejnej er make kõn bakbõk im jãje ko m̦ae iien ej to̦o̦rl̦o̦k bõtõktõkier.” Rar kõm̦m̦ani men kein im m̦õk ak ejjel̦o̦k men en̦ ear wal̦o̦k! “Ejjel̦o̦k en̦ ear uwaak, im ejjel̦o̦k ainikien en̦ rar roñ.” (1 Kñ. 18:28, 29, UBS) Men in ear kam̦ool bwe Beal ej juon riabin anij. Setan ear ejaake l̦õmn̦ak in bwe Beal ej juon anij kõnke ekõn̦aan bwe armej ro ren ettol̦o̦k jãn Jeova. Bõtab ilo m̦ool, jabdewõt eo enaaj kabuñ ñan bar juon anij ijello̦kun Jeova, enaaj bũrom̦õj im jook tokãlik.​—Riit Sam 25:3; 115:4-8.

16. (1) Ke Ilaija ear kõkããle lokatok eo ilo Tol̦ Karmel, ta eo men in emaroñ kar kakeememej er kake? (2) Ewi wãween an kar Ilaija kwal̦o̦k an tõmak bwe Anij enaaj jipañe?

¹⁶ Ilo raelepenl̦o̦k raan eo, Ilaija ear kiiõ pojak in kõm̦m̦ane kein katok eo an. Ear kõkããle lokatok eo ear jorrããn kõn an kar armej ro redike kabuñ eo em̦ool ko̦kkure. Ear bõk 12 dekã im kõm̦m̦ane lokatok eo kake. Bõlen unin an kar kõjerbal 12 dekã ej ñan kakeememej bwij ko 10 an Israel bwe rej pãdwõt ium̦win kien ko Anij ear lil̦o̦k ñan aolep bwij ko 12 an Israel. Ãlikin, ear likũt menin katok eo an im jauni aolepen lokatok eo kõn dãn. Bõlen dãn eo ear lutõke n̦a ioon lokatok eo ear itok jãn Lom̦al̦o El̦ap kõnke ear  epaak. Ear bar kũbwij tõrerein lokatok eo im teiñi kõn dãn. Ke ear kõtl̦o̦k bwe rũkanaan ro an Beal ren kõm̦m̦ane lokatok eo aer, ear kapidodoikl̦o̦k ñan er. Ak ke ej iien ñan an kõm̦m̦ane lokatok eo an, ear katutuik aolepen lokatok eo bwe armej ro ren l̦õmn̦ak bwe enaaj pen an bwil. Ear kõm̦m̦ane men in kõnke el̦ap an kar tõmak bwe Anij enaaj uwaake im tile lokatok eo an meñe etutu.​—1 Kñ. 18:30-35, UBS.

17. (1) Ewi wãween an kar jar eo an Ilaija kaalikkar ta ko ej kaorõki ilo mour eo an? (2) Ewi wãween ad maroñ anõk joñak eo an Ilaija ñe jej jar?

¹⁷ Ke aolep men ko rar pojak, Ilaija ear jar. Jar eo an Ilaija ear kaalikkar ta ko ej kaorõki ilo mour eo an. Ta ko ear kaorõki? M̦oktata, ear kõn̦aan kwal̦o̦k bwe Jeova eo ej “Anij an RiIsrael” im ejjab Beal. Kein karuo, ear kõn̦aan bwe aolep ren jel̦ã bwe ej baj juon rũkarejeran Jeova im ej l̦oore men ko ear ba, mel̦el̦ein bwe aolep nõbar rej aikuj etal ñan Jeova wõt. Ãliktata, ear kwal̦o̦k bwe ear kea wõt kõn armej ro kõnke ear kõn̦aan loe an Jeova bar “ukot bũrueer.” (1 Kñ. 18:36, 37, UBS) Meñe rar kõm̦m̦ani men ko renana kõn an kar dikl̦o̦k aer lõke Jeova, bõtab Ilaija ear yokwe wõt er. Innem, ñe jej jar jemaroñ bar ãinwõt Ilaija ilo ad kwal̦o̦k ettã bõro, kaiboojoj etan Jeova, im jar kõn ro rej aikuj jipañ.

18, 19. (1) Ewi wãween an kar Jeova uwaake jar eo an Ilaija? (2) Ta eo Ilaija ear jiroñ armej ro, im etke ear ejjel̦o̦k unin tũriam̦okake bũrij ro an Beal?

¹⁸ M̦okta jãn an kar Ilaija jar, bõlen armej ro rar l̦õmn̦ak bwe Jeova ejjab bar m̦oolin Anij ãinwõt Beal. Ak ãlikin wõt an Ilaija kar jar, ear alikkar ñan aolep bwe Jeova ej m̦oolin Anij. Unin kõnke Baibõl̦ ej ba: “[Jeova] ear jilkinlal̦tak kijeek, im ear tile menin katok eo im kane ko im dekã ko, im bwidej eo ium̦win, im jorome dãn eo ilo jukur eo.” (1 Kñ. 18:38, UBS) Jeova ear uwaake jar eo an Ilaija ilo kabwilõñlõñ! Kiiõ ta eo armej ro rar kõm̦m̦ane ãlikin aer kar lo men in?

¹⁹ Ke armej ro rar loe men in, rar ba: “[Jeova] ej ad Anij; [Jeova] wõt ej Anij!” (1 Kñ. 18:39, UBS) Kiiõ rar lo kõn mejãer wõn eo ej Anij eo em̦ool. Bõtab, rejjañin lukkuun kwal̦o̦k aer tõmak. Ilo m̦ool, ejabwe aer kar ba bwe Jeova ej Anij eo em̦ool ãlikin aer kar loe an uwaake jar eo an Ilaija im jilkinlal̦tak kijeek jãn lañ. Kõn men in, ewõr juon men Ilaija ear kajjitõk ippãer bwe ren kõm̦m̦ane ñan lukkuun kaalikkar aer tõmak. Ear ba bwe ren pokake kien ko an Jeova. Men eo in ren kar kõm̦m̦ane elõñ iiõ ko m̦oktal̦o̦k. Ekkar ñan Kien  eo, rũkanaan ro reriab im ro rej kabuñ ñan ekjab rej aikuj mej. (Dt. 13:5-9, UBS) Rũkanaan ak bũrij ro an Beal rar rũkõjdat ro an Jeova Anij im rar lukkuun jum̦ae kien im karõk ko an. Ewõr ke unin ñan tũriam̦o kõn rein? Eokwe, keememej bwe bũrij rein rekõn tile ajri ro ke rej mour wõt im katok kake er ñan Beal. Rar jab tũriam̦okake ajri rein ñan jidik. Kõn men in, ejjel̦o̦k unin tũriam̦okake er. (Riit Jabõn Kõnnaan 21:13; Jer. 19:5) Joñan an kar tarjen joñan aer nana, rekkar wõt ñan mej! Eñin unin Ilaija ear jiroñ armej ro bwe rũkanaan rein an Beal rej aikuj mej. Im ilo iien eo wõt kar m̦an aolepen rũkanaan rein.​—1 Kñ. 18:40, UBS.

20. Etke armej ro ilo raan kein remaroñ illu im ba enana bwebwenatoun an kar Ilaija m̦an bũrij ro an Beal?

²⁰ Armej ro ilo raan kein remaroñ illu im ba bwe enana men eo ear wal̦o̦k ilo Tol̦ Karmel. Jet rej inepata bwe armej ro rekijejeto kõn kabuñ eo aer remaroñ jekpen kõn bwebwenato in im ba bwe em̦m̦an ñan m̦an armej in kabuñ ko jet. Im ekabũrom̦õjm̦õj bwe elõñ rej matõrtõr im m̦an ro jãn kabuñ ko jet kõnke rej l̦õmn̦ak bwe em̦ool kabuñ eo aer jãn kabuñ eo an armej rein. Bõtab, Ilaija ear jab armej rot in. Ekar jim̦we men eo ear kõm̦m̦ane. Unin an kar m̦an bũrij ro an Beal bwe ren mej ej kõnke ear juon kien jãn Jeova. Kũrjin ro rem̦ool rejel̦ã bwe rejjab maroñ l̦oore men in Ilaija ear kõm̦m̦ane im m̦an armej ro renana. Ijello̦kun aer m̦an ro jet, rej kate er ñan l̦oore kien eo an Jijej ñan aolep rũkal̦oor ro an me ej alikkar ilo kar naan ko an ñan Piter. Ear ba: “Kwõn likũt jãje n̦e n̦a ijo jikin, bwe ro otemjej rej kõjerbal jãje renaaj mej kõn jãje.” (Matu 26:52, UBS) Ej kun̦aan wõt Jeova ñan ekajete armej ro renana im m̦an er. M̦õttan jidik enaaj kõjerbal Nejin ñan kõm̦m̦ane men in.

21. Etke em̦m̦an joñak eo an Ilaija ñan Kũrjin ro rem̦ool ilo raan kein?

²¹ Aolep Kũrjin ro rem̦ool rej aikuj kwal̦o̦k aer tõmak ilo aolep men ko rej kõm̦m̦ani ilo mour ko aer. (Jon 3:16) Juon wãween remaroñ kaalikkar men in ej ilo aer l̦oor joñak ko an ro rar tiljek ñan Jeova, ãinwõt Ilaija. Ilaija ear peran in kwal̦o̦k ñan armej ro bwe eriab kabuñ in Beal. Setan ear kõjerbale kabuñ in ñan kapo armej ro im kattol̦o̦k er jãn Jeova. Ilaija ear lõke Jeova bwe enaaj kar kõm̦adm̦õde apañ eo ear wal̦o̦k, im ear jab lõke e make. Ilaija ear jojomare kabuñ eo em̦ool im jen bar l̦oore joñak in an!