Anij ear kõm̦m̦ane ãnbwinnid ilo juon wãween eo im emaroñ make mo. Ñe ekinejnej ak ejar ãnbwinnin juon armej eo em̦m̦an an mour, ãnbwinnin enaaj “ilo kabwilõñlõñ jino kõm̦m̦an bwe en make mol̦o̦k kinej ko jekdo̦o̦n ñe reddik ak rel̦l̦ap.” (Johns Hopkins Medicine) Ãnbwin eo ej make kõm̦m̦ane juon men ilo m̦õkaj bwe en bõjrak an to̦o̦r bõtõktõk, ej kakilepl̦o̦k ial̦an bõtõktõk, kamol̦o̦k kinej eo, im ej kõkajoorl̦o̦k kanniõk eo.

L̦ÕMN̦AK KÕN MEN IN: Rũkõm̦anm̦an eo ear kõm̦anm̦ane ãnbwinnid bwe en make mol̦o̦k kinej ko ie. El̦aññe emaroñ kõm̦m̦ane men in, innem jemaroñ ke tõmak kallim̦ur eo an bwe enaaj jipañ kõj ñan an em̦m̦anl̦o̦k ad mour ak em̦m̦anl̦o̦k eñjake eo ad kõn men ko ear rup bũruod kaki? Rijeje sam ear ba: “Ej kãjmour ro erup bũrueer; Ej kũtimi kinej ko kinjaer.” (Sam 147:3) Ak ñe ej nana am̦ mour kõn juon men ejjab em̦m̦an ear wal̦o̦k ñan kwe, ak kwõj iioone juon apañ kiiõ, ewi wãween am̦ maroñ tõmak bwe Jeova enaaj jipañ eok kiiõ im ilo raan ko rej pãd im̦aan?

Anij ej kallim̦ur im ba: “Kwõn jab mijak, bwe ña ippam̦; kwõn jab lõl̦ño̦ñ, bwe ña am̦ Anij; inaaj kõkajoor eok, aet, inaaj jipañ eok.” (Aiseia 41:10) Juon eo ejel̦ã bwe Jeova ej kaorõke, eineem̦m̦an im ewõr an maroñ ñan kõm̦adm̦õdi apañ ko kajjojo ej iiooni. Rijjilõk Paul ear ba bwe ineem̦m̦an in itulowa ej “aenõm̦m̦an jãn Anij, eo ej el̦l̦ã jãn jel̦ã otemjej.” Ear bar ba: “Imaroñ in kõm̦m̦an men otemjej ilo Eo ej kõkajoor eõ.”​—Pilippai 4:4-7, 9, 13.

Eoon ko rej jipañ kõj ñan kõkajoor ad tõmak ilo kallim̦ur ko an Jeova ñan kõj armej kõn ilju im jekl̦aj. Ñan waanjoñak, ilo Revelesõn 21:4, 5 ej kwal̦o̦k ta eo Anij enaaj kõm̦m̦ane im etke jemaroñ lõke e:

• “Enaaj kõm̦õrãik jãn mejãer dãnnin kõmjaal̦al̦ otemjej.” Jeova enaaj jol̦o̦k aolep eñtaan im inepata ko jej iiooni, ekoba men ko ro jet rej watõki bwe reddik im ejjel̦o̦k tokjãer.

• Irooj eo Ekajoor Bõtata iioon men otemjej “ej jijet ioon tũroon eo” ilo aiboojoj ilañ, enaaj kwal̦o̦k an kajoor im ewõr an maroñ ñan jol̦o̦k eñtaan im ej jipañ kõj ilo men ko jej aikuji.

• Jeova ej kam̦ool bwe enaaj lukkuun jejjet men ko ej ba, joñan ej kallim̦ur kõn ãt eo etan.

“‘Im enaaj kõm̦õrãik jãn mejãer dãnnin kõmjaal̦al̦ otemjej, im enaaj ejjel̦o̦k bar mej, im rejãmin bar liaajlo̦l̦, ak jañ, ak eñtaan; bwe men ko m̦okta rejako.’ Im Eo ej jijet ioon tũroon eo ej ba, ‘Lo, ij kõm̦m̦an men otemjej bwe ren ekããl.’ Im ej ba, ‘Kwõn jeje, bwe naan kein retiljek im rem̦ool.’”​—Revelesõn 21:4, 5.

Menin kõm̦anm̦an ko ilañ im ilal̦ im Baibõl̦ eo rej kwal̦o̦k kõn kadkad ko kadkadin Jemãdwõj ilañ im kõn kain Anij rot e. Menin kõm̦anm̦an ko rej kaalikkar bwe jemaroñ jel̦ãl̦o̦k kajjien Anij ãinwõt juon Jerad. Ijoke Baibõl̦ ej kajju jiroñ kõj bwe jen kõm̦m̦ane men in, ej ba: “Kom̦win ruwaakl̦o̦k ñan Anij, im enaaj ruwaakwaj ñan kom̦.” (Jemes 4:8) Ilo Jerbal 17:27 (UBS) ej ba: “Anij ejjab ettol̦o̦k jãn kajjojo iaad.”

Ilo am̦ bok iien ñan jel̦ãl̦o̦k kajjien Anij, enaaj l̦apl̦o̦k am̦ tõmak bwe “kwõaorõk ippãn.” (1 Piter 5:7) Ta jeraam̦m̦an ko ro rej lõke Jeova renaaj loi?

Jen lale bwebwenatoun Toru jãn Japan. Ear rũttol̦o̦k ippãn jinen, eo im ear juon Kũrjin, bõtab l̦ein ear kobal̦o̦k ilo juon kumi elãj ilo Japan etan yakuza. Ear ba, “Iar tõmak bwe Anij ear dike eõ, im bwe ej kaje eõ ilo an kõm̦m̦an bwe ro ijel̦ã kajjier el̦aptata ro rejitõnbõro ippa ren mej.” Toru ear ba bwe ilo an kar bõk l̦õmn̦ak rot in ekoba an aetõl ro renana, men kein rar kõm̦m̦an bwe en erom “juon eo ear ejjel̦o̦k an kea im tũriam̦o kõn armej.” Eñin men eo ear kõn̦aan, ear ba, “Iar kõn̦aan mej ke iar juon jo̦dikdik ãlikin wõt aõ kar m̦ane juon eo  el̦apl̦o̦k an buñbuñ jãn ña, kõnke in kõm̦m̦an bwe eta en buñbuñ.”

Bõtab, Toru im lio pãleen etan Hannah rar katak Baibõl̦, im Toru ear kõm̦m̦an oktak ilo mour eo an im wãween an l̦õmn̦ak. Hannah ej ba, “Iar lukkuun lo kõn meja an l̦eo pãleõ kõm̦m̦an oktak ko.” Kiiõ, Toru ej ba ilo an tõmak: “Ewõr juon Anij im ej lukkuun kaorõk kõj kajjojo. Ejjab kõn̦aan bwe jabdewõt en mej, im ej pojakin jol̦o̦k bõd ko an ro rej lukkuun m̦oolin ukel̦o̦k. Ej roñjake men ko jej kwal̦o̦k ñane me jejjab maroñ ba ñan ro jet im ejjel̦o̦k en̦ emaroñ mel̦el̦e kaki. Ilo raan ko rej pãd im̦aan, Jeova enaaj jol̦o̦k aolep apañ ko, eñtaan ko ekoba men ko rej kõmetak armej ro. Ejjab men in wõt ak ej bar jipañ kõj kiiõ ilo elõñ wãween ko jejjab kõtmãne kake. El̦ap an yokwe kõj im ej jipañ kõj ñe ej lukkuun nana ad mour.”​—Sam 136:23.

Ãinwõt an alikkar ilo bwebwenato in an Toru, ad jel̦ã bwe Anij enaaj im ewõr an maroñ ñan jol̦o̦k aolep jorrããn ko im dãnnin kõmjaal̦al̦ otemjej, men in ej letok ad kõjatdikdik kõn juon ilju im jekl̦aj. Ejjab men in wõt ak ej bar kõm̦m̦an bwe en em̦m̦an wãween ad mour kiiõ. Em̦ool bwe meñe lal̦ in eobrak kõn menin kaeñtaanan ko, bõtab ewõr tokjãn ko rem̦m̦an kwõnaaj bũki jãn an Anij kaorõk eok.