Ine ko in Mol eo Rej Tõbar Jikin ko Retolok

AILIÑ in Tuva ilo Russia ej ber turõktata in Siberia, im Mongolia ej ber iturõk im turear in ailiñ eo. Elõñ armij ro ilo Tuva rej jokwe ilo jikin ko retolok im ebin ñõn tõbar ir ñõn kwalok kin nuuj eo emõn kin Ailiñ eo. Bõtab, jet ien ko remotlok, juõn kumi in armij ro jen jikin ko retolok ilo Tuva rar itok ñõn capital eo etan Kyzyl, ñõn ber ilo juõn kwelok. Juõn pioneer ilo Kyzyl etan Maria, ear roñ kin kwelok in im ear kile bwe ear bellok juõn ien emõn ñõn an kwalok kin nuuj eo emõn iben armij rein.

Maria ej kwalok ta eo ear walok: “Jikuul eo ij jerbal ie einwõt juõn dri kaki, ear karõk juõn kwelok kin wãwen kamarmir abañ eo kin bõk uno ko rekajur im irak drenin karek le jen joñõn. Enañin 50 armij ro jen jikin ko retolok ilo Tuva rar itok ñõn ber ilo kwelok eo. Kumi in ear kitibuj dri kaki ro, taktõ ro rej katak kin wãwen an lemnok ko an armij jelet kõmõn ko air, ro rej etale elañe ridto ro rej jerwane ro nejiir, im bar ro jet.” Ñõn Maria, kwelok in ear juõn ien ebellok ñõn an kwalok nan, bõtab ear jab juõn men enaj kar biruru ñõn e. Ear kemelele: “Kinke ij juõn armij ejokok, ejjab biruru ñõn aõ kwalok nan ilo ien ko remõn. Bõtab, iar jar ñõn Jeova kin beran bwe in maroñ anjo jen aõ mijõk im kajerbal ien in ebellok ñõn aõ kwalok nan.” Ear ke lo tõbrõk?

Maria ej wõnmanlok im ba: “Iar lo juõn buk etan Ruj! (Awake!) im ej konono kin nañinmij in mijõk eo ekajur kin juõn men (phobia). Iar lemnok, ‘buk in emaroñ kaitoklimoen taktõ eo,’ kin men in iar bõk buk in iba ñõn jikuul. Ilo ran eo, juõn ian dri kaki ro rej ber ilo kwelok eo ear itok ñõn rum eo ij jerbal ie, im ke iar lelok buk eo ñõn e, ear mõnõnõ in bõke. Ilo mol, ear ba bwe eor nañinmij in iben. Ilo ran eo tok juõn, iar bõktok juõn an buk kin Kajitõk ko Jodrikdrik ro Rej Kajitõk​—Uak ko Rej Jerbal, Volume 1 (ejelok ilo kajin Majõl) im ear bareinwõt mõnõnõ in bõke. Kinke ear lukkun mõnõnõ in bõk buk eo, iar lemnok bwe dri kaki ro jet remaroñ bareinwõt itoklimo kin buk eo. Kin men in iar bõk juõn box in buk in kab buk ko jet ñõn jikuul.” Ejjabto, ear mat kobõn box eo. Maria ear kwalok ta eo ear walok: “Jet ian dri jerbal ro mõtõn dri kaki eo iar lelok an buk rar itok ñõn rum eo aõ im kajitõk, ‘Ia eo rej leto letak buk ko ie?’” Ear lukkun jejit jikin eo rar itok ñõne!

Ran eo eliktata in kwelok eo kar ilo ran in Jãdede. Kinke eñin kar ran in kakije eo an Maria, ear likit buk ko ion jet ian tebel ko ilo rum eo an. Ilo boot in jeje eo, ear jei: “Yokwe dri Kaki ro! Kom maroñ ebbõk ami buk im ñõn ro mõtami. Buk kein remõn renaj jibõñ kom ñõn lo tõbrõk ilo jerbal eo ami im kakajurlok mour in baamle eo ami.” Kar ta tõbrõk eo? “Ke iar etal ñõn rum eo aõ ilo ran eo, iar lo bwe enañin aolepen buk ko rar maat. Ilo mõkõj, iar bar bõktok buk ko jet.” Ilo jemlokõn kwelok eo, Maria ear lelok 380 Imõniaroñroñ im Ruj! (Awake!), 173 buk ko, im 34 brochure ko. Ke ro rar ber ilo kwelok eo rar jeblak ñõn ijoko jikiir retolok, rar bareinwõt bõk buk ko ibeirlok. Maria ej ba, “Ij lukkun mõnõnõ bwe ine in mol eo emwij an tõbar jikin ko retolok ilo Tuva!”​—Ekk. 11:6.

[Mab eo ilo peij 32]

(Ñan lale pija eo, jouj im lale ilo bok eo)

RUSSIA

TUVA REPUBLIC