Jisõs ear Juõn Joñok Emõntata ñõn Anõke

KWOKÕNAN ke bwe kwon juõn armij elukkun emõn, im elaplok an mõnõnõ? Dri jilik Piter ej kemelele kin wãwen jemaroñ kõmõne men in. Ej je: “Kraist e ar iñtan kin kom, im likit joñok ñõn kom, bwe komin anõke jenkwon ne ko neen.” (1 Piter 2:​21) Elõñ men ko jemaroñ katak jen Jisõs Kraist kinke ear mour ilo juõn wãwen ejej uan. Jemaroñ kakõmõnmõnlok mour eo ar ikijen ar katak kin Jisõs im anõke wãwen mour eo an. Jen etale jet ian karkar ko karkarin armij in elap im lale ewi wãwen jemaroñ bõk tokjen jen joñok eo an.

Jisõs ear mour ilo jokkin wõt juõn. Meñe Jisõs ear ba bwe “ejelok jikin An kababu bõran,” ear jab rejañ ro jet ñõn bõk mour eo ejeramel im kamakelok iair jen ro jet. (Matu 8:​20) Ear ber ilo kwojkwoj ko iben armij ro. (Luk 5:​29) Menin kabwilõñlõñ eo an jinointata kin an kar ukot dren ñõn wain eo ennotata ilo juõn kwojkwoj in mare, ear kwalok bwe emõnõnõ in kobalok iben armij ro. (Jon 2:​1-​11) Ak, Jisõs ear kalikar ta eo elukkun aurõk ñõn e. Ear ba: “Kijiõ bwe In kõmõnmõn ankil an Eo e ar jilkintok Iõ, im bwe In kamwijlok jerbal eo An.”​—Jon 4:​34.

□ Kwonañin etale ke elañe kwoj jokkin wõt juõn ñe kwoj jibarek men ko ilo kõniek im kadrek juõn kõtan ebak iben Anij?

Ear biruru kebake Jisõs. Baibel eo ej kalikar Jisõs einwõt juõn armij ejoij im yokwe. Ear jab makoko ke armij ro rar kebak e kin abnõnõ ko air. Juõn ien ke juõn jar in armij rar kabol e, juõn kõra me ear nañinmij iomin 12 yiõ ear uñir nuknuk eo an im kõtmene bwe enaj bõk jibõñ ñõn jolok nañinmij eo an. Jisõs ear jab buroñe kõra eo kin men eo ear kõmõne me jet armij remaroñ kar watõk bwe ewãlok, ak ear ba ilo joij: “Nejiõ, am tõmak e ar kemour yuk; kwon ilok im ainemõn, im mour jen am nañinmij.” (Mark 5:​25-​34) Ajiri ro bareinwõt rar jab mijõk in ber iben. (Mark 10:13-​16) Ear mõnõnõ in bwebwenato bajjek iben dri kalor ro an im rar jab ãliklik in kebak e.​—Mark 6:​30-​32.

□ Ebiruru ke an armij ro jet kebak yuk ak bwebwenato ibam?

Ear tiriamokake im jela kin iñjake ko an armij. Juõn ian karkar ko relaptata karkarin Jisõs ej an jela kin iñjake ko an ro jet, im jibõñ ir ilo juõn wãwen ejejit ñõn ir. Dri jilik Jon ej kwalok bwe ke Jisõs ear lo an Meri jõñ kin mij eo an jein im jãtin man, Lazerõs, Jisõs “limõ ilo an, im buromõj” im “jõñ.” Armij ro rar kile bwe Jisõs ear lukkun ebake baamle eo an Lazerõs im ear jab jook in kwalok iñjake eo an iman mejeir. Ear lukkun kwalok an tiriamokake ilo an kar kajerkakbiji eo jeran jen mij!​—Jon 11:33-​44.

Ilo bar juõn ien, juõn eman ear bõk nañinmij in leper, eo ekauwatata im ear  kajenolok e jen armij ro jet, ear akwelap ñõn Jisõs: “Iroij, elañe kwo kõnan, kwoj maroñ karreo iõ.” Jisõs ear uak ilo yokwe: “Ej erlokwe pein, im uñir e, im ba, I kõnan, kwon erreo.” (Matu 8:​2, 3) Jisõs ear jab kemour armij ro ñõn baj kajejit kanan ko. Ak ear kõnan kõmõraik dren in kemjalal ko jen turin mejeir. Men otemjej ear kõmõni rar berber ion juõn ian nan ko an reaurõk: “Einwõt kom kõnan bwe armij ren kõmõn ñõn kom, ein drein ami kõmõnmõn bareinwõt ñõn ir.”​—Luk 6:​31.

□ Kõmõn ko am rej kalikar ke bwe kwoj tiriamokake ro rej iion wãwen ko rebin?

Jisõs ear jela kajen armij im kwalok lolokjen. Meñe ear juõn armij ewãppen, Jisõs ear jab kõtmene bwe armij ro jet ren wãppen. Ear jab kwalok bwe emõnlok jen armij ro jet ak ear lukkun jela kin ta eo ear ber iburuen armij. Juõn ien “juõn kõra . . . e dri jerawiwi” ilo jikin kwelok eo ear kwalok an tõmak im kamolol ikijen an kar kwal neen Jisõs kin dren in kemjalal in mejen. Jisõs ear kõtlok an kõmõn men in, ak dri mweo ear ilbõk, im ilo buruen ear ekajete lio ilo jab jime. Kin an kile bwe emol buruen kõra eo, Jisõs ear jab liakelok kõra eo kin jerawiwi ko an. Ak ear ba: “Am tõmak e ar kemour yuk: kwon ilok im ainemõn.” Kin an Jisõs kwalok joij ñõn e, men in ear kamakit kõra eo bwe en ellok jen jerawiwi eo an.​—Luk 7:​37-​50.

□ Kwoj ke juõn armij emõkõj in nebar armij im erumij an ekajet?

Ear koutiej armij im jab kwalok kalijeklok. Jisõs ear ebake Jon jen dri kalor ro jet bwelen kinke karkar ko karkar irro rar einlok wõt juõn im baamle ko air remaroñ kar lukkun ebake dron. * Meñe eindrein, Jisõs ear jab kwalok kalijeklok ak laplok an kaurõke jen dri kalor ro jet. (Jon 13:23) Ilo mol, ke Jon im Jemes, leo jein, rar kajitõk ñõn jijõt ilo jikin eo emõntata iturin Jisõs ilo Ailiñ eo an Anij, Jisõs ear uak: “A kin jijõt i anbijmaroñiõ im i anmiñiõ, e jab Aõ bwe In lewoj.”​—Mark 10:35-40.

Ien otemjej Jisõs ear kwalok koutiej ñõn ro jet. Ke ear ber ion lõl, ear jab kwalok kalijeklok ñõn armij meñe ro ibelakin rar kalijeklok. Ñõn wanjoñok, rar watõk bwe eman ro rar laplok air utiej jen kõra ro. Bõtab, Jisõs ear koutiej kõra ro. Ien eo jinoin tata ear kwalok bwe e Messaia eo, ear jab kwalok ñõn juõn dri Ju ak  ear kwalok ñõn kõra in Sameria eo me dri Ju ro rar drike. (Jon 4:​7-​26) Jisõs ear koutiej kõra ro ilo an kõtlok bwe en ir eo moktata rej lo an jerkakbiji.​—Matu 28:​9, 10.

□ Kwoj ke koutiej armij ro jet meñe rej eman ak kõra, im eoktõk kil ko kiliir, kajin ak ailiñ eo air?

Ear inek erro ko an einwõt juõn nejin im jein. Josep jemen Jisõs, ear mij ke Jisõs ear juõn likao wõt. Alikar, bwe Jisõs ear jerbal einwõt juõn dri karpenter ñõn kabwe aikwij ko an jinen im ladrik ro im ledrik ro jãtin. (Mark 6:3) Mokta wõt jen an kar mij, ear kalimuri Jon ñõn lale im kejbãrok jinen.​—Jon 19:26, 27.

□ Einwõt kar Jisõs, kwomaroñ ke kajeoñwe e ilo am ineki erro ko am ilo baamle eo?

Ear tiljek ñõn ro jeran. Jisõs ear juõn jeran emõntata. Ilo wãwen it? Ke ro jeran rar kõmõn bwir ear jab kejekron ir, meñe elõñ alen air kar kõmõn ejja bwir ko wõt. Bwelen ejjab aolep ien dri kalor ro an rar emmakit ilo juõn wãwen ear buñburuen kake. Ak ear kamol ñõn ir bwe ej juõn jeran eo emol ilo an kalimjek wõt karkar ko remõn karkariir jen an ba bwe kõnan ko air rar nana. (Mark 9:​33-​35; Luk 22:24-​27) Jen an jibed ir ñõn bõk lemnok eo an, ear rejañ ir bwe ren jab mijõk in kwalok lemnok ko air.​—Matu 16:13-​15.

Ilõñin men otemjej, Jisõs ear yokwe ro jeran. (Jon 13:1) Ewi joñõn? Ear ba: “Ejelok yokwe iben armij elap jen yokwe in, bwe armij en lelok an mour kin ro jeran.” (Jon 15:13) Juõn armij emaroñ ke lelok juõn men elaplok an aurõk jen mour eo an?

□ Kwonaj jeraik wõt ke ro jet meñe rej kaillu ak kalõkatip yuk?

Ear beran im juõn armij ekajur. Jisõs ear jab juõn armij emõjino einwõt an jet armij lemnok ñe rej jiñaik e ilo pija ko. Gospel ko rej kalikar bwe Jisõs ear juõn eo ekajur. Ruo alen an kar Jisõs kadrioij dri wia ro im jolok men ko mweieir jen tempel eo. (Mark 11:15-​17; Jon 2:​14-​17) Ke juõn jar in armij rar bukot “Jisõs dri Nazeret” eo, ear wõnmanlok im kwalok e mõke im ñõn kejbãrok dri kalor ro an, ej ba ilo beran: “Ña E: inem elañe komij bukot Iõ, kõtlok rein bwe ren ilok.” (Jon 18:​4-9) Ejjab menin bwilõñ ke Pailat ear watõk Jisõs einwõt juõn armij ekajur im beran ke rar kalbuji im kaiñtan e.​—Jon 19:​4, 5.

□ Kwoj beran ke im kabin bebe eo am ñe kwoj lo men eo kwoj aikwij in kõmõne?

Karkar kein remõn im ko jet rej kõmõn bwe Jisõs en joñok eo emõntata ñõn kij. Elañe jej kõtlok bwe mwil eo mwilin en jelet kij, jenaj erom armij ro relukkun emõn im enaj laplok ar mõnõnõ. Eñin unin dri jilik Piter ear rejañ dri Kristian ro ñõn anõk jenkwon ne ko neen Jisõs. Kwoj ke kate yuk joñõn wõt am maroñ bwe kwon anõk jenkwon ne ko neen Jisõs?

Ear Jab baj juõn Joñok Wõt ñõn Anõke

Bõtab, Jisõs ear jab baj juõn joñok wõt ñõn anõke. Ear ba: “Ña ial, im mol, im mour: ejelok armij ej itok ñõn Jema, elañe jab kin Iõ.” (Jon 14:6) Ijellokin an kar katakin kin mol eo kin Anij, im kebellok juõn ial bwe jen druaklok ñõn Anij, Jisõs ear letok mour eo an bwe ro retiljek ren maroñ bõk mour in drio.​—Jon 3:​16.

Ikijen un in kin an kar itok ñõn lõl, Jisõs ear ba: “Nejin armij e ar jab itok bwe  armij ren jerbal ñõn E, a bwe En jerbal ñõn ir, im lelok An mour bwe En binmour ñõn ro relõñ.” (Matu 20:28) An kar letok mour eo an einwõt juõn menin katok, Jisõs ear likit juõn berber bwe armij ro ren bõk mour in drio. Ta eo kij kajuju jej aikwij kõmõne bwe jen maroñ bõk tokjen jen jerammõn in? Jisõs ear kemelele: “Im men in mour in drio, bwe ren jela Kwe juõn wõt Anij emol, im Jisõs Kraist, eo Kw’ar jilkintok.”​—Jon 17:3.

Aet, bõk jelalokjen eo kin Jisõs, kajeoñwe wãwen mour eo an, im jerbale tõmak ion katok in mij eo an rej menin aikwij ko ñõn bõk mour in drio. Kimij kir yuk ñõn bõk ien im katak Baibel eo, me ej berberin jelalokjen in, im kate yuk ñõn jerbale men ko ej ba, einwõt kar Jisõs. *

Joñok eo an Jisõs ej katakin kij kin kain armij rot eo jej aikwij in einwõt. Mij eo an emaroñ kanemkwoj kij jen jerawiwi im men eo wõnan, mij. (Dri Rom 6:23) Elañe en kar jab kin joñok eo an Jisõs bwe jen lore, emaroñ kar juõn men ekaburomõjmõj ñõn kij! Jab kõtlok bwe inebata im wuj wan an mour in ren kamad yuk jen am lore joñok eo an eman eo elaptata eo ear mour, Jisõs Kraist.

[Kamelele Ko Itulal]

[Bo̦o̦k eo ilo peij 23]

◼ Ear koutiej armij im jab kwalok kalijeklok

◼ Ear tiljek ñõn ro jeran ñõn jemlokõn

◼ Ear beran

Kwoj ke kate yuk joñõn wõt am maroñ bwe kwon anõk jenkwon ne ko neen Jisõs?

[Pija ko ilo peij 21]

Jisõs ear mour ilo jokkin wõt juõn . . .

ear biruru kebake . . .

ear tiriamokake