Kwar Jela Ke?

Etke ran in Jabõt eo an dri Ju ear jino ilo jota?

Ke Jeova ear lelok kien eo kin Ran in Kilajrõk eo ñõn armij ro an, ear ba: “Iomin ran eo komin jab kõmõn jabrewõt jerbal . . . En Sabat in kakije wõt, . . . jen jota ñõn jota, kom naj lale ami Sabat.” (Livitikõs 23:28, 32) Kien in ej kalikar bwe kajuju ran iben dri Ju ear jino ilo jota, elikin tulok in al im jemlok ilo tulok in al ilo ran eo tok juõn, im dri Ju ro rar lore wãwen in.

Wãwen bwinbwin in ran ko ear itok jen Anij. Bwebwenato eo kin ran eo jinointata in kõmõnmõn ej kwalok kake men in: “Im e kar jota im e kar jiboñ, ran eo mokta.” Ej eindrein bareinwõt iben “ran” in kõmõnmõn ko jet, rej jino jen “jota.”​—Jenesis 1:​5, 8, 13, 19, 23, 31.

Ejjab dri Ju ro wõt rar eindrein, kar bar iben dri Atens, dri Numidia, im dri Phoenicia ro bareinwõt. Ak iben dri Babilõn ro ej jino, jinoin juõn ran ñe ej tak al, im iben dri Ijipt im dri Rom ro ej jino ilo 12:00 auõ lukwõn boñ im ej eindrein ilo ran kein bareinwõt. Bõtab, iben dri Ju ro ran kein rej lor wõt wãwen eo kar iben dri Ju ro mokta.

Kar ta melelen nan kein “joñon etal ilo ran in Sabat”?

Dri jilik ro rar jeblak ñõn Jerusalem elikin air lo an Jisõs wõnliñlok ñõn lõñ jen Tol Olivet. Joñõn etolokin ijin jen Jerusalem ej einwõt “joñõn etal ilo ran in Sabat.” (Jerbal 1:​12) Juõn armij emaroñ etetal iomin 20 mail ak elõñlok iomin juõn ran. Bõtab, Tol Olivet ear ebake Jerusalem. Inem kar ta melelen nan kein “joñon etal ilo ran in Sabat”?

Ran in Sabat ear juõn ran me dri Israel ro rar aikwij kakije jen jerbal ko air. Emo air kar kejo kijeek ko ilo moko imwiir ilo ran in Sabat. (Exodus 20:10; 35:​2, 3) Jeova ear kakien ir: “Komin berwõt, jabrewõt iami, ilo jikin, ejelok armij en drioij jen jikin ilo ran eo ken ka jiljilimjuõn.” (Exodus 16:29) Kien in ear lelok juõn ien emõn ñõn an dri Israel ro kakije jen jerbal ko air im kalaplok air ien ñõn kabuñ ñõn Anij.

Kinke jet dri tel in kabuñ ro an dri Ju rar lemnok bwe ejjab alikar kemelele ko kin tibrikin kien eo an Jeova kin ran in Sabat, rar mõke beek ewi joñõn etolokin juõn armij ej aikwij etetal ilo ran in Sabat. Ikijen men in, buk eo ej kemelele kin nan ko ilo Baibel ej ba: “Kinke ran in Sabat ear kitibuj elõñ kien ko, rar bebe bwe ilo ran in Sabat ejelok juõn emaroñ etetal le jen joñõn eo kar naetan, joñon etal ilo ran in Sabat.” Joñõn etolok in me kar karõke, ej 2,000 cubit ak aitoklok jidrik jen jimõtõn mail.

[Pija eo ilo peij 14]

Eñin Jerusalem me kar pijaik jen Tol Olivet