Emaroñ Bwijrõk jen An Karek

 “Aikwij kõmõn juõn bebe: Bwijrõk jen kadrek im mour, ak karek wõt im mij.”−Nan ko an juõn kar dri karek.

BAJ lemnok mõk, ilo idriñ kwoj ruj juõn boñ im lo bwe ebwil mweo imõm. Jet minit tokelik, armij ro rej itok im jibõñ kune kijeek eo. Kwonaj ke bar dreloñ ñõn loan mweo im lemnok bwe ejelok men en ear walok? Alikar jab. Kinke elukkun jorran mweo, aikwij bar kõkãle bwe kwon maroñ bar jokwe ie.

Eindrein iben juõn dri karek ñe ej jino jolok an karek. Ear lukkun ekarekrek iomin elõñ yiõ ak kiõ ebwijrõk an karek. Kiõ ebwijrõk, ak ej aikwij kõkãle lemnok eo an, mwilin im jerbal ko an bwe en drebij wõt e jen an bar karek. Nan in jiroñ kein itulõl remaroñ jibõñ juõn eo ekarekrek bwe en lukkun bwijrõk jen karek.

1. Kile Dri Kijirãt Eo

Baibel eo ej ba bwe kõnan ko ilo kõniek “rej tõrinaek ami.” (1 Piter 2:11) Ilo kajin Grik ej kemelele bwe “tõrinaek ami” ej lukkun melelen “jerbal ilo jikin tõrinae,” im ej bar jitõñlok ñõn lemnok eo kin juõn tõrinae elap an kokkure.​—Keiri Dri Rom 7:23-25.

Einwõt an dri tõrinae ro bõk ien ñõn katak kin makõtkit ko an dri kijirãt ro air, eindrein juõn eo ekarekrek ej aikwij jela kin wãwen eo drenin karek ej jelet mour eo an im kokkure kõtan eo an iben baamle eo an.​—Dri Hibru 5:14.

2. Oktõk jen Karek im Ukot Am Lemnok

Juõn taktõ ej ba, “Jab karek ej melelen bwe kwon jolok boto eo im niñniñ eo.” Melelen nan kein bwe elañe kwokõnan lukkun bwijrõk jen am karek kwoj aikwij jolok “niñniñ eo” ak kõnan eo am iloa kin drenin karek.

Baibel eo ej letok nan in kakabilek kein emeletlet: “Kõkãle ami lolãtãt.” (Dri Rom 12:2) “Wutik armij eo mokta kab jerbal ko an.” (Dri Kolosse 3:9) Elañe kwoj bwijrõk wõt ak kwojjab ukot lemnok eo am kin drenin karek, enaj biruru am bar jeblak ak kajerbali kein karek ko jet.

3. Bukot Juõn Dri Jibõñ Emeletlet

Juõn jabõnkennan ilo Baibel eo ej ba: “Eo ej mõkelok ian, ej kabukot kõnan eo an, im ej lej nae meletlet otemjej e keie.” (Jabõn Kennan Ko 18:1) Meñe ej bwijrõk jen an karek, ak emaroñ kowãnik lemnok ko an mõke. Kin men in, ej aikwiji juõn dri jibõñ emeletlet im beran. Emõn ñe dri jibõñ eo en juõn eo me ekin kar ekarekrek im ear lo tõbrõk ilo an anjo jen abañ in. (Keiri Jabõn Kennan Ko 27:17.) Im dri jibõñ in ej aikwij koutiej tõmak eo an eo ekarekrek im ej aikwij jolok ien im maroñ ko an ñõn an jibõñ ak jurake e ien otemjej.​—Jabõn Kennan Ko 17:17.

4. Kwon Meanwõr

Ej bõk elap ien ñõn jolok drenin karek im ukot mour eo an juõn eo ekarekrek. Emaroñ iion inebata ko kin jããn, ak jelmae abañ ko ilo jikin jerbal im ilo mweo imõn. Anemkwoj jen karek ejjab melelen bwe kwoban bar iion abañ. Ilo jinoin, ñe eo ekin ekarekrek ej iion abañ ko emaroñ inebata kin an jab irak drenin karek ñõn kainemõn e. Ñe abañ ko an rej laplok wõt im ejjab maroñ anjo ioir, ej aikwij kememej nan ko an dri jeje sam: “Kwon jolok inek eo am ion Jeova, im E naj baur yuk: E jamin likit ro remõn bwe ren makõtkit.”​—Sam 55:22.

 5. Kõmao Iben Ro Remol

Eo ekarekrek ej aikwij kajitõkin e mõke: ‘Ro ij kõmao ibeir rej ke rejañ iõ ñõn jolok karek ak rej ke wõnmanlok wõt im kennan kin “ien ko kim kar limo iben dron,” im kõmõn aõ iñjake bwe mour eo aõ kiõ ejjab kamõnõnõ?’ Jabõn Kennan Ko 18:24 ej ba: “Eo ej jeraik elõñ, ej kõmõn men in ñõn an jorran; a eor juõn jera ej edrep wõt jen juõn jein im jãtin.” Aikwij kajerbal lolokjen ñõn kile wõn ro rej lukkun mol air mõtaik kij im wõn ro rejjab.

6. Bõprae Am Liki Kwe Mõke Le jen Joñõn

“Emõn aõ mour, ejelok aõ kõnan ñõn irak ñõn jidrik.” Juõn eo ekarekrek im ej ba nan kein, ej lemnok le jen joñõn kin tõbrõk ko an im jab lukkun lemnok kin mõjino eo an kin drenin kadrek. Mõnõnõ eo kwoj loe kin am jino bwijrõk jen karek, ejjab to an ber. Juõn buk etan, Ejabwe Kajur Eo Am Mõke (ejelok ilo kajin Majõl), ej ba: “Bõk juõn lemnok ejokkin wõt juõn. Elañe kwojjab, kwonaj buñ.”​—Keiri Jabõn Kennan Ko 16:18.

7. Kejbãrok jen Ar Atartar Iion Men ko Jet

Elõñ rar bwijrõk jen air karek, ak rar jino mõña im jerbal le jen joñõn, ikkure kin jããn im wãwen ko eierlok wõt. Eo ekin ekarekrek emaroñ lemnok, ‘Etke enana men kein? Emõnlok ñe ij kõmõni men kein jen aõ karek.’ Emol bwe jet ian men kein remaroñ emõn ñõn kij. Bõtab, ñe kwoj kõmõni mõnit kein ñõn jolok am lemnok kin inebata ko am, kwomaroñ lemnok bwe rej kõmõn am jokõne ak ilo mol rejjab.

8. Kõmõn Oktõk ilo Baamle Eo

Ñe elõñ dri karek ro rej lo bwe ejokolok air ekarekrek, kiõ remaroñ bar kabañ mour eo air. Etke? Kinke an joko air karek emaroñ kãl ñõn ir. Remaroñ iñjake kiõ bwe rekõnan jolok ien ko air iben baamle ko air. Bareinwõt, ñe ejoko air karek remaroñ jino kabañ ro uan baamle eo. Kin men in, kajjojo uan baamle eo rej aikwij kõmõn oktõk ko kin erro ko air ilo baamle eo. Juõn buk etan, Jibõñ ñõn Aolep Ro Uan Baamle Eo (ejelok ilo kajin Majõl), ej ba, “Aolep ro uan baamle eo rej aikwij kõkãle makõtkit ko air.” Kin men in, aolep ro uan baamle rej aikwij bõk kwonair ñõn kõmõne men in.​—Keiri 1 Dri Korint 12:26.

9. Kejbãrok jen Am Bar Jeblak ñõn Karek

Le jen joñõn ar liki kij mõke, kõmao iben ro mõtar rejjab mol, men ko jej lukkun kõnan kõmõni le jen joñõn, im kamakelok iar, men kein remaroñ kõmõn ar bar jeblak ñõn karek. Wõnmanlok wõt im konono iben dri jibõñ eo am kin jabrewõt abañ ko am.

Juõn eo ekin karek ej ba: “Aolep dri karek ro rej bwijrõk jen karek. Jet iar jej jerammõn bwe jar bwijrõk jen karek kiõ ke jej mour wõt.”

[Bo̦o̦k eo ilo peij 22]

Ñe Kwoj Aikwij Irak Uno Ko

Ñe kwoj irak jabrewõt uno me armij remaroñ karek kaki, remaroñ kõmõn an juõn dri karek bar añũr drenin karek im kõmõn an bar kõnan karek. Aolep uno ko armij remaroñ karek kaki, ebiruru an jelet juõn dri karek. Ñe juõn dri karek ej aikwij irak kain uno rot in, ej aikwij . . .

1. kajitõk iben eo ej lale jikin uno eo elañe ekauwatata ñõn an irake uno eo.

2. mokta jen am irake juõn uno, kwon kejelaik dri jibõñ eo am.

3. kõmõn am lajrõk kin joñõn uno ko kwoj iraki.

4. mõkõj im bwijrõk jen am bõk uno eo.

5. jolok bween uno ko ñe kwojjab aikwiji.