Katak eo Ejjab Mol Ken Kemen: Anij Ej Jilu ilo Juõn

Ewi wãwen an kar katak in ejjab mol jino walok? “Elõñ armij remaroñ bõk lemnok in bwe katak eo kin jilu anij ilo juõn (Trinity) ear jino walok 1,600 jima yiõ ko remotlok. Ilo juõn wãwen, men in ej mol . . . Karõk ak katak eo kin ‘juõn Anij ilo jilu Armij’ ear jab juõn tõmak ebin, emol ear jab mõttan mour im tõmak eo an dri Kristian ro mae enañin 300 yiõ ko elikin an mij dri jilik ro.” *

Juõn encyclopedia * ear ba: “Ilo Mei 20, ilo yiõ eo 325, Kumi eo an Nicaea rar kwelok iben dron. Constantine ear tel kwelok eo im ear bõk kwonan ilo men ko rar konono kaki. E eo ear bõkmantak lemnok in . . . bwe Anij im Kraist rej juõn wõt. Eñin kar tõmak eo me kumi in ear jeje kake.  . . Kinke dri tel ro reutiej ilo kabuñ eo (ak bishop ro) rar mijõk Iroij eo, enañin aolepeir, ijellokin wõt ruo, rar signi katak in, meñe elõñ iair rar jab errã.”

Ta eo Baibel ej katakin kake? “A [Stipen] ej obrõk kin Jitõb Kwojarjar, im ej kalimjeke lõñ, im lo aibujuij an Anij, im Jisõs ej jutõk i anbijmaroñõn Anij, im e ba, Lo, ij lo lõñ ebellok, im Nejin armij ej jutõk i anbijmaroñõn Anij.”​—Jerbal 7:​55, 56.

Ta eo vis̃õn in ej kalikar? Ke ear obrõk kin kajur eo an Anij, Stipen ear lo an Jisõs “jutõk i anbijmaroñõn Anij.” Inem, alikar bwe Jisõs ear jab erom Anij elikin an kar jerkakbiji im wõnliñlok ñõn lõñ, ak ej juõn jitõb ejenolok jen Anij. Ilo bwebwenato in ej kwalok bwe ejelok bar juõn armij ijellokin wõt Jisõs ej jutõk iturin Anij. Meñe Dominican pris eo etan Marie-Émile Boismard ear kajeoñ in bukot eon ko ilo Baibel eo ñõn jurake katak in Trinity, ear je ilo buk eo an etan “Jinoin Kabuñ in Kristian im Wãwen an kar Katak ko Jino Walok” (À l’aube du christianisme​—La naissance des dogmes): “Nan ko bwe eor jilu armij ilo juõn Anij . . . ejjab walok ilo jabrewõt eon ko ilo Kalimur eo Ekãl.”

Katak eo Constantine ear kowõnmanloke, ear kõmõne ñõn an kabwijrõk jibil ko me rar walok ilo Kabuñ eo ilo ien eo. Bõtab, ilo mol, men in ear bõkmantak bar juõn katak: Meri, kõra eo me ear keutak Jisõs, ear ke “Jinen Anij”?

[Kamelele eo itulal]

Keiri eon kein ilo Baibel: Matu 26:39; Jon 14:28; 1 Dri Korint 15:27, 28; Dri Kolosse 1:​15, 16

MOL EO:

Katak eo kin jilu anij ilo juõn ear jino walok enañin 300 yiõ ko elikin an mij dri jilik ro

[Kamelele in juõn pija ilo peij 7]

Museo Bardini, Florence