Ñããt Enaaj Wal̦o̦k Tarin̦ae in Armagedon?

“Iar lale, im lo, jar el̦ap, eo ejjel̦o̦k armej ej maroñ in bwiniir, jãn aolep kain armej, bwij, aelõñ, im kajin, . . . rar itok jãn eñtaan eo el̦ap.”​—REVELESÕN 7:9, 14.

EJEJJET im pojak iien eo ñan an wal̦o̦k tarin̦ae in Armagedon. Etke jej ba men in?

Ewõr juon doulul in armej ipel̦aakin lal̦ in me rej karejar ñan Jeova im rej mour ekkar ñan kien ko ilo Baibõl̦. Elõñ milien armej ro jãn elõñ aelõñ ko, bwij ko, im kajin ko rej bõrokuk ippãn doon ãinwõt juon doulul in jimjãn jimjãtin me rej yokwe doon. Anij ej jipañ rein ñan kõm̦m̦ane men in. Doulul in armej rein me rej yokwe doon ej wal̦o̦k ibwiljin Ri Kõnnaan ro an Jeova.​—Jon 13:35.

M̦õttan jidik Setan enaaj kakuktok jarin tarin̦ae ko an im ilo iien in enaaj l̦aptata an kajjioñ in ko̦kkure armej rein me reaenõm̦m̦an im ãinwõt ejjel̦o̦k aer maroñ ñan jojomare er make. (Ezekiel 38:8-12; Revelesõn 16:13, 14, 16) Ewi wãween kwõmaroñ jel̦ã bwe men in em̦ool? Eokwe Baibõl̦ eo ej kalikkar ta men ko renaaj wal̦o̦k me enaaj jipañ kõj ñan jel̦ã ñããt enaaj wal̦o̦k tarin̦ae in Armagedon. Elõñ iaan men ko me Baibõl̦ ear ba bwe renaaj wal̦o̦k rej kiiõ jejjet kitieer.

Men ko Kwõj Lo an Jejjet Kitieer

Rũkal̦oor ro rar kajjitõk ippãn Jijej kõn ewi wãween an naaj armej ro jel̦ã kõn ñããt enaaj wal̦o̦k “iien eo ãliktata.” (Matu 24:3, UBS) Jijej ear uwaake kajjitõk in aer ilo an kar jiroñ er kõn iien eo ñe “ri aelõñ renaaj jutak n̦ae ri aelõñ, aelõñ in kiiñ n̦ae aelõñ in kiiñ; im enaaj wõr ñũta im m̦akũtkũt lal̦ ilo jet ãne.” Innem ear wõnm̦aanl̦o̦k im ba ñan er: “Men kein otemjej rej jinoin eñtaan ko.” (Matu 24:7, 8) Rijjelõk Paul ear ba bwe iien in ej “raan ko ãliktata” im bwe eñin ej “iien ko re nana.” (2 Timote 3:1) Kwõj ke kile im lo bwe kanaan kein rej kwal̦o̦k kõn men ko me rej wal̦o̦k rainin?

Etke enaaj lukkuun nana im pen iien kein? Rijjelõk Jon ear kwal̦o̦k taunin an naaj ãindein. Ear kanaan bwe enaaj wõr “jidik wõt  iien” ippãn Setan im enjel̦ ro an renana ioon lal̦ in. Im ear kwal̦o̦k bwe ilo iien in enaaj ‘l̦ap an illu’ Setan. (Revelesõn 12:7-12) Kwõj ke kile bwe enañin aolep armej ro ipel̦aakin lal̦ in rej illu im lãj?

Jijej ear bareinwõt ba bwe ilo iien in me enaaj kanooj in pen, enaaj jejjet im tõprak juon jerbal me eaorõk. Ear ba, “naaj kwal̦o̦k gospel in an aelõñ in lañ i aolepen lal̦ kõn men in kõnnaan ñan aelõñ otemjel̦o̦k, ilo iien eo enaaj itok jem̦l̦o̦kin.” (Matu 24:14) Rainin, Ri Kõnnaan ro an Jeova rej kwal̦o̦k naan kõn nuuj eo em̦m̦an kõn Aelõñ in Anij ilo elõñl̦o̦k jãn 235 ãne ko. Im rej kõm̦m̦an bok ko ilo elõñl̦o̦k jãn 500 kajin ko. Bok kein rej pedped wõt ioon Baibõl̦. Ruo iaan bok ko me el̦aptata aer kwal̦o̦k naan kaki im ajeji ipel̦aakin lal̦, ej bok eo etan Naan in Keeañ (ãt eo m̦okta Imõniaroñroñ) im bok eo juon etan Awake! * (Lale kõmel̦el̦e eo itulal̦.) Rar bareinwõt ukote Baibõl̦ eo ñan tarrin 100 kajin ko. Jerbal in kwal̦o̦k naan eo Ri Kõnnaan ro an Jeova rej kõm̦m̦ane ej wõnm̦aanl̦o̦k ikijjeen jabawõt ko an ro im rej m̦õn̦õn̦õ in jaba. Im ro rej kõm̦m̦ane jerbal in rej kõm̦m̦ane ilo ejjel̦o̦k on̦ean. Emaroñ ke bwe jerbal in kwal̦o̦k naan in ej kajejjete kitien kanaan eo an Jijej?

Baibõl̦ eo ej bareinwõt kwal̦o̦k kõn men ko me renaaj tõll̦o̦k ñan an wal̦o̦k tarin̦ae eo ikõtaan Jeova Anij im ro rej jum̦ae e. Jen etale jilu kanaan ko kõn men in me kwõnaaj lo an jejjet kitieer.

Kanaan ko M̦õttan Jidik Kwõnaaj Lo Aer Wal̦o̦k

Kanaan 1. Baibõl̦ eo ej kwal̦o̦k bwe ri tõl ro an lal̦ renaaj keeañ im ba “aenõm̦m̦an im ejjel̦o̦k unin lõl̦ño̦ñ.” Rein remaroñ l̦õmn̦ak bwe m̦õttan wõt jidik renaaj n̦amejal̦an aolep apañ ko rel̦l̦ap. Bõtab, men ko renaaj wal̦o̦k ãlikin aer ba men in reban bõktok aenõm̦m̦an.​—1 Tessalonika 5:1-3.

Kanaan 2. Ãlikin men in, elõñ kien ko renaaj pepe in jol̦o̦k doulul in kabuñ ko. Ilo Baibõl̦ eo, ej kwal̦o̦k kõn juon kidu awiia im kõn juon kõrã ej uwe ioon. Kidu awiia in ej kõkkar kõn kien ko im kõrã in ej kõkkar kõn kabuñ ko reriab. (Revelesõn 17:​3, 15-18) Kien ko renaaj ko̦kkure kabuñ ko me rej riab im ba bwe rej jutak kõn Anij. Ilo aer naaj kõm̦m̦ane men in, kien ko rejjab jel̦ã bwe rej kõm̦m̦ane men eo Anij ekõn̦aan bwe ren kõm̦m̦ane.

Rijjelõk Jon ej kwal̦o̦k kake men in ilo an ba: “Doon ko joñoul kwaar loi, im kidu eo, renaaj kõjdate kõrã e kijoñ eo, im renaaj kõm̦m̦an bwe en make iaan im keelwaan, im renaaj kañ kanniõkin, im naaj kanooj tile ilo kijeek. Bwe Anij ear likũt ilo bũrueer bwe ren kõm̦anm̦an Ankilaan.”​—Revelesõn 17:16, 17.

Kanaan 3. Ãlikin an naaj kien ko lo tõprak ilo aer ko̦kkure kabuñ ko reriab, Setan enaaj ko̦kweilo̦ktok kien ko im jarin tarin̦ae ko ippãn doon bwe ren kiiõ ko̦kkure ro rej kabuñ ñan Jeova Anij.​—Revelesõn 7:14; Matu 24:21.

Ewi Wãween Men in Enaaj Jelõt Eok?

El̦aññe ejañin kar wõr juon iien epel̦l̦o̦k ñan am̦ liñõri Baibõl̦ eo, eokwe emaroñ pen ñan am̦ tõmak bwe men ko kar kwal̦o̦k kaki ilõñ renaaj wal̦o̦k. Bõtab, ewõr unin ad lõke bwe aolep kõmel̦el̦e ko renaaj jejjet kitieer im bwe m̦õttan jidik kanaan kein jilu renaaj wal̦o̦k. Bwijin kanaan ko ilo Baibõl̦ me em̦õj aer jejjet kitieer rej kam̦oole men in. * (Lale kõmel̦el̦e eo itulal̦.)

Etke kwõjjab kõm̦m̦an iien ñan am̦ jel̦ã etke Ri Kõnnaan ro an Jeova rej tõmak bwe m̦õttan jidik enaaj wal̦o̦k ‘tarin̦ae in raan eo el̦ap an Anij e kajoor otem kajoor’? Im etke kwõjjab aikuj lõl̦ño̦ñ kake raan in? Kajjitõk ippãer bwe ren kwal̦o̦k ñan eok ta eo Baibõl̦ ej ba kwõj aikuj kõm̦m̦ane bwe kwõn maroñ juon iaan ro im Jeova Anij enaaj kõjparoke. (Revelesõn 16:14) Men eo kwõj katak emaroñ ukot wãween am̦ l̦õmn̦ak kõn raan ko rej pãd im̦aan.

[Komel̦el̦e ko itulal̦]

[Pija eo ilo peij 8]

Emaroñ ke bwe jerbal in kwal̦o̦k naan eo Ri Kõnnaan ro an Jeova rej kõm̦m̦ane ej kajejjet kitien kanaan eo ilo Baibõl̦?