Jet armej rej l̦õmn̦ak ippãer make im ba, ‘El̦aññe Anij ejel̦ã kadede kõn men otemjej, ekoba l̦õmn̦ak im kõn̦aan ko aõ, etke ij aikuj jar?’ Em̦m̦an kajjitõk in. Etke jejaam̦ jar ke Jijej ear ba bwe Anij ‘ejel̦ã men ko jej aikuji m̦okta jãn ad kajjitõk ippãn?’ (Matu 6:8) Kiiñ Devid ear bar kile men in. Ear ba ñan Anij: “M̦okta jãn aõ kõnono etto wõt ke kwaar jel̦ã men eo inaaj ba.” (Sam 139:4, UBS) Innem etke jej aikuj jar ñan Anij? Ñan uwaake kajjitõk in, jen etale ta ko Baibõl̦ ej ba kõn jar ko an ro me rej kabuñ ñan Anij. * (Lale kõmel̦el̦e eo itulal̦.)

Meñe Baibõl̦ eo ej ba bwe Jeova Anij ejel̦ã kõn men otemjej, bõtab ej bar kwal̦o̦k bwe Anij ejjab baj kõn̦aan wõt jel̦ã kõn ro rej kabuñ ñane. * (Lale kõmel̦el̦e eo itulal̦.) (Sam 139:6, UBS; Rom 11:33, UBS) Anij ejjab ãinwõt kampiutõr ko kõnke ejjab baj kakkon̦ wõt mel̦el̦e kõn kajjojo armej. Anij elukkuun kõn̦aan jel̦ã kõn aolepen bũruod im l̦õmn̦ak ko ad kõnke ekõn̦aan bwe en epaak kõtaan eo ad ippãn. (Sam 139:23, 24, UBS; Jemes 4:8) Eñin unin Jijej ear ba ñan rũkal̦oor ro an bwe ren jar, meñe ejel̦ã bwe Jemãn ejel̦ã kadede kõn aolep aikuj ko aer. (Matu 6:6-8) El̦aññe enaaj l̦apl̦o̦k wõt ad jar im kwal̦o̦k bũruod ñan Ri Kõm̦anm̦an eo ad, jenaaj epaakel̦o̦k wõt e.

Jet iien jejaje jen ba ta ñe jej jar ñan Anij. Meñe ej ãindein, ak Anij emaroñ lo aolepen bũruod im eñjake ko ad meñe jejaje kilen kwal̦o̦ki ilo naan. Im kõnke Anij ejel̦ã kõn men otemjej ippãd, enaaj kõjerbal jel̦ã in an ñan jipañ kõj kõn men ko jej aikuji. (Rom 8:26, 27, UBS; Epesõs 3:20, UBS) El̦aññe jej kile bwe Anij ej jipañ kõj, meñe ilo wãween ko me rejjab alikkar, men in ej kõm̦m̦an bwe jen epaakel̦o̦k wõt e.

Baibõl̦ ej kwal̦o̦k bwe Anij eo Ekajoor Bõtata ej uwaake jar ko an rũkarejar ro an me rej tiljek ñane. Bõtab, Baibõl̦ ej bar kwal̦o̦k unin an Anij jab roñjake jet armej ñe rej jar. Ñan waanjoñak, juon iien ekar l̦ap kowadoñ ilo kar aelõñ in Israel. Anij ear jiroñ rũkanaan eo an etan Aiseia bwe en ilo̦k ñan ippãn Ri Israel ro im ba: “Ñe kom̦ij kõm̦m̦an elõñ jar, Ijãmin eo̦roñ; peimi rellõñ kõn bõtõktõk.” (Aiseia 1:15) Elukkuun alikkar bwe Anij ejjab roñjake jar ko an ro me rejjab l̦oori kien ko an ak ro me rej jar kõn un ko rejekkar.​—Jabõn Kõnnaan 28:9, UBS; Jemes 4:3, UBS.

Baibõl̦ ej ba: “El̦aññe jej kajjitõk ippãn [Anij] kõn jabdewõt men eo ekkar ñan ankilaan, Ej roñjake kõj.” (1 Jon 5:14) Mel̦el̦ein ke men in bwe ñe rũkarejar ro an Anij rej kajjitõk kõn jabdewõt men, Anij enaaj kajju lel̦o̦k ñan er men ko rekõn̦aan? Ejjab. L̦õmn̦ak m̦õk kõn men eo ear wal̦o̦k ñan rijjilõk Paul. Jilu alen an kar kajjitõk ippãn Anij bwe en jol̦o̦k juon nañinmej ak ‘utam̦we ilo ãnbwinnin.’ (2 Korint 12:7, 8, UBS) Bõlen nañinmej  in an Paul ear juon nañinmej me ear jelõt mejãn. Joñan in el̦ap an kar Paul eñtaan im inepata kõn nañinmej in an! Em̦õj an kar Anij lel̦o̦k maroñ ñan Paul bwe en kõmour armej jãn nañinmej ko aer im juon iien ear kõmour juon rimej. Bõtab, meñe ewõr maroñ kein ippãn Paul, ak ear jaje kilen kõmouri make jãn nañinmej in an. (Jerbal 19:11, 12, UBS; 20:9, 10, UBS) Meñe Anij ear jab uwaake jar eo an Paul ilo wãween eo Paul ear kõtmãne, bõtab Paul ear kwal̦o̦k wõt an kam̦m̦oolol Anij kõn an uwaake ilo wãween ko jet.​—2 Korint 12:9, 10, UBS.

Ewõr jet armej ilo Baibõl̦ me Anij ear uwaaki jar ko aer ilo kabwilõñlõñ. (2 Kiiñ 20:1-7) Bõtab, ejeja an Anij kõm̦m̦ane men in ñan armej ro, ekoba armej ro ilo Baibõl̦. Jet iaan rũkarejar ro an Anij ilo iien ko etto rar inepata ke rar l̦õmn̦ak bwe Anij ear jab uwaake jar ko aer. Ñan waanjoñak, Kiiñ Devid ear kajjitõk ippãn Anij im ba: “O Jeova ewi toun? Kwõnaaj mel̦o̦kl̦o̦k eõ ñan indeeo ke?” (Sam 13:1) Bõtab, ke Devid ear kile bwe elõñ alen an kar Jeova jipañe im lo̦mo̦o̦rene, ear bar kwal̦o̦k an lõke Anij. Ilo lukwõl̦pãnl̦o̦k jar eo an, ear ba: “A ña, iar lõke Am̦ jouj.” (Sam 13:5) Rũkarejar ro an Anij rainin rej aikuj ãinwõt Devid im kijenmej wõt im keini aer jar ñan Anij m̦ae iien Anij ej uwaake jar ko aer.​—Rom 12:12.

Anij ej uwaake kõj ñe jej jar kõn men ko jej lukkuun aikuji.

Ejjab aolep iien jemãn im jinen ajri ro rej lel̦o̦k ñan ajri ro nejier men ko me ajri ro rej kajjitõk ilo iien eo wõt me rej kajjitõk. Jet iien, Anij eban uwaaki jar ko ad ilo iien eo me jej kõtmãne ak ilo wãween eo me jej kõtmãne. Bõtab, jej aikuj tõmak bwe Ri Kõm̦anm̦an eo ad enaaj uwaaki jar ko ad ilo iien eo ejejjet im ilo wãween eo ejim̦we. Ej kõm̦m̦ane men in kõnke ej yokwe kõj ãinwõt an juon em̦m̦aan yokwe ajri ro nejin.​—Luk 11:11-13.

Jet iien Anij ej uwaaki jar ko ad ak jejjab kile.

Ta el̦aññe jaar jar bwe Anij en jipañ kõj kõn juon apañ jej iioone me eto an wal̦o̦k? Jej aikuj ke kajju ba bwe Jeova ejjañin uwaake jar eo ad im eban uwaake? Ejjab. Jej aikuj keememej bwe Anij emaroñ kar uwaake jar eo ad ilo wãween ko me jejjab kile. Ñan waanjoñak, bõlen ear wõr juon m̦õttad me ear itok im jipañ kõj ilo iien eo me jaar lukkuun aikuj jipañ. (Jabõn Kõnnaan 17:17) Bõlen Jeova ear kõjerbal armej in m̦õttad bwe en itok im jipañ kõj ilo iien eo. Bõlen Anij emaroñ kar bar uwaake kõj ke jaar riiti naan ko an ilo Baibõl̦. Naan ko an Anij ilo Baibõl̦ eo remaroñ jipañ kõj kõn apañ ko jej iiooni.​—2 Timote 3:16, 17.

Ekkã an Anij jab kajju jol̦o̦k apañ ko jej iiooni. Bõtab, ej letok maroñ ñan kõj bwe jen kijenmej wõt kõn apañ ko jej iiooni. (2 Korint 4:7) Ñan waanjoñak, juon iien ear wal̦o̦k juon apañ ñan Jijej im ear ekkõl ñe apañ in enaaj kõm̦m̦an bwe armej ro ren kananaik etan Anij. Kõn men in, ear kajjitõk ippãn Anij bwe en jol̦o̦k apañ eo. Ta eo Anij ear kõm̦m̦ane? Ear jab jol̦o̦k apañ eo, ak ear jilkinl̦o̦k juon enjel̦ bwe en kakajoore Jijej. (Luk 22:42, 43) Jet iien, Anij ej jilkintok juon iaan ro m̦õttad im repaake kõj bwe en kakajoor im kaenõm̦m̦ane kõj ñe jej aikuj jipañ. (Jabõn Kõnnaan 12:25, UBS) Ñe Anij ej uwaaki jar ko an armej ro ilo wãween kein, jej aikuj keememej bwe jet iien ej uwaaki jar ko ad ak jejjab kile.

Jet iien Anij ejjab kijer in uwaaki jar ko ad m̦ae juon iien eo ejejjet.

Baibõl̦ ej ba bwe Anij eo Ekajoor Bõtata ej kwal̦o̦k jouj “ilo iien ekkar” ñan armej ro me ettã bũrueer. (1 Piter 5:6) El̦aññe jej l̦õmn̦ak bwe erum̦wij an Anij uwaaki jar ko ad im jipañ kõj, jen jab bõk l̦õmn̦ak in bwe Anij ejjab yokwe kõj im kaorõk kõj. Jej aikuj keememej bwe Ri Kõm̦anm̦an eo ej lukkuun etali jar ko ad im enaaj uwaake kõj ilo wãween eo em̦m̦antata ñan kõj.

Jen lale juon waanjoñak: Jen ba bwe ewõr juon nejũm̦ l̦addik jidikdik im ekõn̦aan juon waan baajkõl̦. Kwõn kar ke kajju katõprak kõn̦aan in an meñe kwõj kile bwe ejjañin pojak bwe en wõr waan baajkõl̦? Ealikkar bwe kwõban kar kajju wia waan l̦addik eo baajkõl̦. Kwõnaaj kar kõttar m̦ae iien eo kwõj kile bwe epojak im ejejjet bwe en wõr waan baajkõl̦. Ãindeinl̦o̦k wõt, el̦aññe kwõj wõnm̦aanl̦o̦k wõt im jar, Anij enaaj uwaake jar eo am̦ ak ‘lewaj men ko el̦ap am̦ kõn̦aan’ ilo iien eo ejejjet.​—Sam 37:4, UBS.

Baibõl̦ ej rõjañ Kũrjin ro rem̦ool bwe ren tõmak im lõke bwe Anij ej roñjake jar ko aer. Jet armej remaroñ ba, ‘Epen ñan tõmak men in kõnke Anij ejjab uwaaki jar ko ad.’ Bõlen aolep iien kwõj jar ñan Anij bõtab eto an wal̦o̦k wõt apañ ko im men ko renana ñan kwe. Ñe kwõj iioon wãween in, men in emaroñ kõm̦m̦an am̦ l̦õmn̦ak bwe Anij ejjab uwaake jar ko am̦. Ñe kwõj bõk l̦õmn̦ak rot in, kwõj aikuj keememej waanjoñak eo me Jijej ear kwal̦o̦ke kõn aorõkin ad aikuj keini ad jar.

Jijej ear kwal̦o̦k juon waanjoñak kõn juon kõrã me ejerata im aolep iien ej etal im kajjitõk jipañ ippãn juon riekajet nana. (Luk 18:1-3, UBS) Ilo kar jinoin, riekajet in ear m̦akoko in jipañ kõrã eo. Bõtab, tokãlik riekajet eo ear ba: “Kõn an kõrã in kaabn̦õn̦õik eõ inaaj pukot kilen bwe en bõk ijoko an; bwe ñe ijjab, enaaj ãindein an itok wõt im ilukkuun m̦õk kake!” (Luk 18:4, 5, UBS) Ilo kar Baibõl̦ eo m̦oktata, naan ko ilo eoon in rar kaalikkar bwe unin an kar riekajet eo jipañ kõrã eo ej kõnke ear jab kõn̦aan bwe en nana etan ippãn armej ro kõn an kalijekl̦o̦k. * (Lale kõmel̦el̦e eo itulal̦.) Meñe riekajet eo ear juon armej nana, ak ear jipañ kõrã eo. Anij elukkuun oktak jãn riekajet in enana im jemaroñ lõke bwe enaaj jipañ kõj ñe jej kajjitõk jipañ ippãn. Em̦õn̦õn̦õ in jipañ ro rej “kũr ñane raan im boñ”! Jijej ear make ba bwe Anij “enaaj rejetak er im enaaj m̦õkaj kake.”​—Luk 18:6-8, UBS.

Meñe jet iien jemaroñ m̦õk in kajjitõk jipañ, bõtab jen jab ebbeer. El̦aññe jej niknik wõt ilo ad jar, jej lukkuun kaalikkar ñan Anij bwe em̦ool ad kõn̦aan bwe en jipañ kõj. Jenaaj bar kile wãween an Anij uwaaki jar ko ad im men in enaaj kõm̦m̦an bwe en epaakl̦o̦k wõt kõtaan eo ad ippãn. Jen wõnm̦aanl̦o̦k wõt im lõke bwe Anij enaaj uwaaki jar ko ad el̦aññe jej jar ñane ilo tõmak.​—Luk 11:9.