Rũkõm̦anm̦an eo ear kõm̦anm̦an lal̦ in bwe aolep men ko ie ren mour. Ewõr dãn ñan jipañ menninmour ko, kein eddek ko, im armej ro bwe ren mour. Bareinwõt em̦m̦an joñan an lal̦ in erro̦o̦lol, im joñan ettol̦o̦kin jãn al̦. Men in ej kõm̦m̦an bwe en jab kwõj ak lukkuun bwil dãn ko ilo lo̦jet. Mejatoto eo im kajoor eo me ej itok jãn mããl eo ibul̦õn lal̦ in ej bareinwõt jipañ ñan kõjparok kõj jãn baijin ko ilo mejatoto. Elukkuun kabwilõñlõñ wãween an kein eddek ko im menninmour ko wawa ioon doon bwe ren maroñ mour. Elõñ armej rej l̦õmn̦ak kõn men kein im kile bwe ewõr unin an kar Rũkõm̦anm̦an eo kõm̦anm̦an lal̦ in.​—Riit Aiseia 45:18, UBS.

Bõtab, kwõmaroñ l̦õmn̦ak ippam̦ make im ba: Eñin ke karõk eo an Anij bwe en l̦ap eñtaan im nana ilo lal̦ in?​—Riit Duteronomi 32:4, 5, UBS.

Rũkõm̦anm̦an eo ear kõm̦anm̦an lal̦ in bwe armej ro me rej kautiej doon im rej yokwe e ren mour im m̦õn̦õn̦õ ie. Eñin unin, armej ro reoktak jãn kein eddek ko im menninmour ko. Ewõr ad maroñ ñan mel̦el̦e kõn Rũkõm̦anm̦an eo ad im anõke e ilo ad kwal̦o̦k yokwe im kõm̦m̦ani men ko rem̦m̦an.​—Riit Ekklisiastis 12:13, UBS; Maika 6:8.

Ewõr an Rũkõm̦anm̦an eo ad maroñ ñan kajejjet aolep karõk ko an kõn lal̦ in. Kõn men in, jemaroñ tõmak im lõke bwe enaaj jol̦o̦k aolep men ko renana im kõm̦m̦an bwe lal̦ in en juon jikin em̦m̦an ñan an armej ro mour im m̦õn̦õn̦õ ie.​—Riit Sam 37:11, 29; Jabõn Kõnnaan 2:21; Aiseia 55:11, UBS.