Elõñ armej rej ãinwõt Alex kõnke rejjab itoklimo in jerbal. Juon mechanic etan Aron ej ba: “Elõñ armej rejjab m̦õn̦õn̦õ in kõm̦m̦ani jerbal ko ‘rettã im el̦ap jerbali.’” Bõtab, ej ba bwe rej wõnm̦aanl̦o̦k wõt im jerbal kõnke rej ba bwe rej kõttar wõt an pel̦l̦o̦k jerbal ko rem̦m̦anl̦o̦k.

Etke elõñ armej rejjab kõn̦aan kate er jerbal? Bõlen kõnke el̦ap aer roñjaki ak alwõji bũrookraam̦ ko ilo tipi, retio, ak Internet. Men kein rej kõm̦m̦an an armej ro l̦õmn̦ak bwe wãween mour eo “em̦m̦antata” ej ñe relukkuun m̦weiie im em̦m̦an kõjeiier. Juon em̦m̦aan etan Matthew me jerbal eo an ej ñan karreo im kõkããli men ko rejorrããn, ej ba: “Armej rej l̦õmn̦ak bwe ñe el̦ap am̦ kate eok jerbal ñan pukot am̦ mour, mel̦el̦ein bwe kwõjjab juon eo ejeraam̦m̦an.” Juon rũkarreo etan Shane ej bar kile men in. Ej ba: “Ejako an armej m̦õn̦õn̦õ in kate er jerbal bwe en jejjet ekkar ñan joñan on̦ãn eo rej bõke.”

Meñe elõñ armej rejjab kõn̦aan jerbal, ak ebar lõñ armej ro me jekdo̦o̦n ñe rejeraam̦m̦an ak em̦m̦an ippãer jerbal. Juon rũkkal etan Daniel me 25 an iiõ ej ba: “Elõñ tokjãn ko rem̦m̦an rej wal̦o̦k ñe jej kate kõj jerbal, el̦aptata ñe ejim̦we unin ad kõm̦m̦ani jerbal kein.” Bar juon likao etan Andre me 23 an iiõ ej errã ilo men in. Ej ba: “Jerbal ej kõm̦m̦an ad m̦õn̦õn̦õ im lañlõñ. Ñe edik ad jerbal im ejjel̦o̦k men en̦ jej kõm̦m̦ane, eban to kitien ad m̦õn̦õn̦õ ilo mour ko ad. Enaaj l̦ap wõt ad jãlimo!”

Ta eo ear kõm̦m̦an bwe en em̦m̦an wãween an Daniel im Andre l̦õmn̦ak kõn jerbal? Unin ej kõnke erro ej l̦oori naanin kakapilõk ko ilo Baibõl̦. Baibõl̦ ejjab rõjañ kõj bwe jen jab kate kõj jerbal. Bõtab, ej rõjañ kõj ñan niknik im kijejeto ilo jerbal. Ejjab baj rõjañ wõt kõj ñan jerbal, ak ej bar kwal̦o̦k ta ko remaroñ jipañ kõj bwe jen m̦õn̦õn̦õ in jerbal.

Ta naanin kakapilõk ko ilo Baibõl̦ me remaroñ jipañ eok bwe kwõn lo m̦õn̦õn̦õ ilo jerbal eo am̦? Jouj im lale jet iaaer ilo katak in tok juon.