BAIBÕL̦ EO EJ UKOT MOUR KO

Wãween Mour eo Aõ Ear Nanal̦o̦k Wõt

Ekkar ñan Stephen McDowell

IIÕ IN L̦OTAK: 1952

AELÕÑ: AMEDKA

MOUR EO AN M̦OKTA: JUON EO ELÃJ IM EJIDIMKIJ AN ILLU

MOUR EO AÕ M̦OKTA: Iar dik im rũttol̦o̦k ilo Los Angeles, California, ilo Amedka. Iar mour ilo jikin ko me elõñ kumi in rinana ie im ro rej kõjerbal uno ko rekkajjoor. Ear wõr 6 nejin jinõ im jema, im ña kar kein karuo nejierro.

Jinõ ear kijejeto ilo kabuñ eo an im ear kõm̦m̦an bwe kõmin uwaan kabuñ eo. Bõtab, ke iar juon jo̦dikdik, iar jino kõm̦m̦ani men ko renana meñe iar uwaan kabuñ eo. Ñe ej Jabõt, ikõn al ippãn kumi in al eo ilo im̦õn jar eo. Im ilo raan ko jet, ij mour in anemkwõj, kõjerbal uno ko rekkajjoor, im mour in l̦õñ.

Iar juon eo ejidimkij an illu im elãj. Ikõn kõjerbal aolep kain ñan ire kake bwe in wiin jãn ro jet. Men ko iar katak kaki ilo im̦õn jar eo aõ rar jab jipañ ña. Ikõn ba, “Kun̦aan Irooj idenon̦e, im ej kõjerbal ña ñan idenon̦e ñane!” Ke iar high school ilo jem̦l̦o̦kinl̦o̦k 1960 jim̦a ko, ear em̦m̦an ippa kumi eo etan Black Panthers, me rar buñbuñ kõn aer jum̦ae kien eo bwe en wõr aer jim̦we im maroñ. Kõn men in, iar kobal̦o̦k ippãn juon kumi ilo jikuul̦ eo aõ, me rijikuul̦ ro ie rej bait kõn jim̦we im maroñ ko aer. Ewõr iien kõmij jum̦ae, im ilo aolep iien kein, jikuul̦ eo ej kilõk ium̦win jidik iien.

Kõnke iar juon eo elãj, aõ kobal̦o̦k im jum̦ae ear jab kõm̦m̦an bwe en jubũruõ. Kõn men in, iar jino kobal̦o̦k ippãn kumi ko me rej m̦an armej ro redike er. Ñan waanjoñak, juon iien ña im ro m̦õtta kõmar etal ñan juon im̦õn alwõj im alwõje pijain an kar RiAfrica ro jem̦aan eñtaan kõn aer kar kuli ñan ripãlle. Kõn ammim kar lo wãween an kar jab jim̦we aer kõm̦m̦an ñan rein, kõmar m̦an ajri in pãlle ro ilo im̦õn alwõj eo. Innem kõmar etal ñan jikin ko jet repaak bwe kõmin bar kappok ripãlle bwe kõmin m̦an er.

Ke ear 18 ak 19 aõ iiõ, elõñ alen aõ ire ak m̦anm̦an armej. Ejjab ña wõt ak bar l̦adik eo jeiũ im ruo iaan l̦adik ro jatũ. Ear nana etam ilo kien. Juon iaan l̦adik ro jatũ ear uwaan juon kããñ me elukkuun nana, im ikõn kobal̦o̦k ippãer. Wãween mour eo aõ ear nanal̦o̦k wõt.

WÃWEEN AN KAR BAIBÕL̦ EO UKOT MOUR EO AÕ: Ewõr juon m̦õtta me jemãn im jinen rar Ri Kõnnaan ro an Jeova. Rar kũr eõ bwe in etal im kweilo̦k ilo eklejia eo aer, im iar etal. Jãn ke iar jino etal im kweilo̦k, iar kile bwe Ri Kõnnaan ro an Jeova rar lukkuun oktak jãn ro jet. Aolep ear wõr aer Baibõl̦ im rej kõjerbale ilo iien kweilo̦k ko. Ro reddik rar bar kõm̦m̦an katak! Iar bwilõñ ke iar katak bwe etan Anij ej Jeova, im ij roñ aer kõjerbale. (Sam 83:18) Ear lõñ armej ro  jãn aelõñ ko jet ilo eklejia eo. Bõtab, ear alikkar an ejjel̦o̦k kalijekl̦o̦k ibwiljier.

Ilo kar jinoin, iar jab kõn̦aan katak Baibõl̦ ippãn Ri Kõnnaan ro an Jeova, bõtab ear em̦m̦an ippa etal ñan kweilo̦k ko aer. Juon boñ, ke iar kweilo̦k, ro m̦õtta rar etal im alwõj kõjañjañ ippãn doon. Ke rar pãd ijo, rar m̦ane juon likao ñan mej kõn an kar m̦akoko in lel̦o̦k ñan er kopã eo an me kõm̦m̦an jãn kilin menninmour. Raan eo tok juon, rar kakõl kõn aer kar m̦ane likao eo. Joñan, rar kõm̦m̦an kõjak ke rar ekajete er ilo im̦õn ekajet eo. Enañin aolepeer rar kalbuuj ñan mej. Ilukkuun m̦õn̦õn̦õ bwe iar jab pãd ippãer boñõn eo. Jãn tõre in, iar pepe bwe inãj ukot mour eo aõ im iar jino katak Baibõl̦.

Kõn aõ kar dik im rũttol̦o̦k ilo jikin ko el̦ap kalijekl̦o̦k ie, men ko rar wal̦o̦k ibwiljin Ri Kõnnaan ro an Jeova rar lukkuun kabwilõñ ña. Ñan waanjoñak, ke juon ripãlle me ej Ri Kõnnaan ro an Jeova ear etal ñan juon jikin ettol̦o̦k, ear likũti ajri ro nejin bwe juon baam̦le in ri kilmeej ren lale er. Bareinwõt, juon baam̦le in ripãlle ear kõtl̦o̦k bwe juon likao in ri kilmeej en jokwe ippãer kõnke ear aikuj jikin an jokwe. Kõn aõ lo men in ibwiljier, iar tõmak bwe naan ko an Jijej ilo Jon 13:35 rejejjet ñan Ri Kõnnaan ro an Jeova. Eoon in ej ba: “Ilo men in armej otemjej renaaj jel̦ã bwe kom̦ij rũkal̦oora, el̦aññe kom̦ij yokwe doon.” Iar jel̦ã bwe em̦õj aõ loe ro im rej m̦oolin m̦õtta me rej watõk doon ãinwõt jemjein jemjati.

Ke iar katak Baibõl̦, iar jino kile bwe ij aikuj ukot wãween aõ l̦õmn̦ak. Iar aikuj kõkããl l̦õmn̦ak ko aõ bwe in jab baj aenõm̦m̦an wõt ippãn ro jet ak in bar kile bwe eñin wãween mour eo em̦m̦antata. (Rom 12:2, UBS) Jidik kõn jidik iar jino kõm̦m̦an oktak ko. Ilo kar Jãnwõde 1974 eo, iar peptaij im erom Ri Kõnnaan ro an Jeova.

Bõtab, meñe ãlikin aõ kar peptaij, iar aikuj katak wõt ñan dãpij aõ illu. Ñan waanjoñak, juon iien ke iar kwal̦o̦k naan jãn em̦ ñan em̦, iar kõpl̦e juon rũko̦o̦t me ear ko̦o̦te retio eo nejũ jãn ilowaan wa eo waõ. Ke iar epaakel̦o̦k armej in, ear jol̦o̦k retio eo im ko. Ke iar bwebwenato ñan ro jet kõn wãween aõ kar bõk retio eo nejũ, juon iaan em̦m̦aan ro rej lale eklejia me ear pãd ijo ear kajjitõk im ba, “Stephen, ta eo kwõnãj kar kõm̦m̦ane ñe kwõn kar jibwe l̦eo?” Kajjitõk in ear kõm̦m̦an aõ l̦õmn̦ak im ear jipañ eõ bwe in kate ña ñan katak kilen aenõm̦m̦an ippãn ro jet.

Ilo kar Oktoba 1974 eo, iar kal̦apl̦o̦k kun̦aõ ilo jerbalin kwal̦o̦k naan ilo aõ jol̦o̦k 100 awa kajjojo allõñ ñan katakin ro jet kõn Baibõl̦. Tokãlik, iar bõk jeraam̦m̦an eo ñan jerbal ilo ejjel̦o̦k on̦ãn ilo ra eo el̦ap an Ri Kõnnaan ro an Jeova me ej pãd ilo Brooklyn, New York. Ilo kar 1978 eo, iar ro̦o̦l ñan Los Angeles bwe in lale lel̦l̦ap eo jinõ kõnke enañinmej. Ruo iiõ tokãlik, iar m̦areik Aarhonda. Ear l̦ap an jipañ im rejetak ña ilo am̦ro lale lel̦l̦ap eo jinõ m̦ae iien eo ear mej. Ejjabto tokãlik, kõm̦ro Aarhonda kar etal im jikuul̦ ilo Jikuul̦ in Mijinede im kar jitõñ kõm̦ro bwe kõm̦ro en etal ñan Panama. Ñan kiiõ, kõm̦ro ej jerbal wõt in mijinede ilo jikin in.

Jãn ke iar peptaij, elõñ wãween ko iar iiooni me remaroñ kar kõm̦m̦an aõ illu im kwal̦o̦k aõ lãj. Iar katak ñan etal jãn armej ro me rej kajjioñ kallu ña im kate ña ñan kadikl̦o̦k aõ illu ilo wãween ko jet. Elõñ armej, ekoba lio ippa, rej nõbar ña kõn aõ jel̦ã ta ko in kõm̦m̦ani ñe ij iioon wãween rot kein. Ibar bwilõñ kõn ña make! Ejjab ña make eo iar ukot kain armej rot ña. Ij tõmak bwe Baibõl̦ eo ear maroñ ukot eõ.​—Hibru 4:12.

WÃWEEN AÕ KAR BÕK TOKJÃN: Baibõl̦ eo ear maroñ jipañ eõ bwe en wõr aõ kõjatdikdik im katakin eõ bwe in jel̦ã aenõm̦m̦an ippãn ro jet. Ejako aõ ire im m̦an ro jet. Kiiõ, ij jipañ er bwe ren epaake Anij. Joñan, iar katak Baibõl̦ ippãn juon iaan ro me ikõn dike er ilo high school! Ãlikin an kar l̦ein peptaij, kõm̦ro kar jokwe ippãn doon ium̦win jidik iien. Rainin, kõm̦ro lukkuun epaake doon. Kiiõ, em̦õj am̦ro kõrã e ippa katak im jipañ elõñl̦o̦k jãn 80 armej bwe ren erom Ri Kõnnaan ro an Jeova.

Ij lukkuun kam̦m̦oolol Jeova kõn an kar letok juon wãween mour me ewõr mel̦el̦ein im kõn aõ lo m̦õn̦õn̦õ ibwiljin rũttõmak ro m̦õtta.

[Naan ko ilo peij 11]

Iar aikuj kõkããl l̦õmn̦ak ko aõ bwe in jab baj aenõm̦m̦an wõt ippãn ro jet ak in bar kile bwe eñin wãween mour eo em̦m̦antata