Baibõl̦ ej juon bok ejejuwaan. Jemaroñ loi naanin rõjañ im kakapilõklõk ko an Rũkõm̦anm̦an eo ad ie. (2 Timote 3:16, UBS) Naan ko ie remaroñ lukkuun jipañ kõj ilo mour ko ad. Baibõl̦ make ej ba: “Naanin Anij ej mour im jerbal wõt.” (Hibru 4:12) Ewõr ruo wãween ko Baibõl̦ ej jipañ kõj kaki. Ej kakõm̦anm̦anl̦o̦k mour ko ad ilo an letok naanin kakapilõklõk ko rej jipañ kõj kajjojo raan, im ej kal̦apl̦o̦k ad jel̦ã kõn Anij im kallim̦ur ko an.​—1 Timote 4:8; Jemes 4:8.

Kakõm̦anm̦anl̦o̦k wãween ad mour kiiõ. Baibõl̦ emaroñ jipañ kõj ilo mour ko ad. Ej letok naanin rõjañ im kakapilõklõk ko kõn wãween ko ilo peij eo juon.

•   Kõtaan eo ad ippãn ro jet.​—Epesõs 4:31, 32; 5:22, 25, 28, 33.

• Eñjake im ãjmour ko ad.​—Sam 37:8, UBS; Jabõn Kõnnaan 17:22, UBS.

• Wãween m̦wilid.​—1 Korint 6:9, 10.

• Wãween kabwe aikuj ko ad.​—Jabõn Kõnnaan 10:4; 28:19, UBS; Epesõs 4:28. * (Lale kõmel̦el̦e eo itulal̦.)

Ruo rippãlele ilo Eijia etaer Vicent im Annalou me rej kab m̦are rar kile aorõkin naanin kakapilõklõk ko ilo Baibõl̦. Ãinwõt rippãlele ro jet me rej kab bar m̦are, erro kar jab lukkuun jel̦ã kilen kwal̦o̦k bũrueerro ñan doon im mour ippãn doon kõn aerro oktak jãn doon. Bõtab rar jinoe l̦oore ta ko rar riiti ilo Baibõl̦. Ewi wãween an kar men in jipañ erro? Vicent ej ba: “Men ko iar riiti ilo Baibõl̦ rar jipañ eõ ñan jel̦ã kõm̦adm̦õdi apañ ko rar wal̦o̦k ñan kõm̦ro ilo yokwe. Kõm̦ro l̦ak mour ekkar ñan ta ko Baibõl̦ ej ba, men in ekõm̦m̦an bwe en em̦m̦an im lem̦õn̦õn̦õ pãd e am̦ro.” Annalou, lio ippãn Vicent, ej errã ilo men in im ba: “Am̦ro riit kõn armej ro em̦m̦an joñak ko aer ilo Baibõl̦ ear l̦ap an jipañ kõm̦ro. Kiiõ elukkuun aenõm̦m̦an im lem̦õn̦õn̦õ pãd e am̦ro im im̦õn̦õn̦õ kõn men ko kõm̦ro ej kõm̦m̦ani ilo mour e am̦ro.”

Kal̦apl̦o̦k ad jel̦ã kõn Anij. Vicent ear bar ba: “Ilo aõ riit Baibõl̦, men in ear jipañ eõ bwe in lukkuun epaakel̦o̦k Jeova jãn kar m̦okta.” Men in Vicent ej ba ej kaalikkar bwe Baibõl̦ emaroñ jipañ eok bwe en l̦apl̦o̦k am̦ jel̦ã kõn Anij. El̦aññe kwõnaaj jel̦ã kõn e, enaaj l̦ap am̦ bõk tokjãn jãn naanin kakapilõklõk ko an. Ejjab men in wõt, ak kwõnaaj lukkuun epaake e ãinwõt juon m̦õttam̦. Kwõnaaj bareinwõt jel̦ã kõn kallim̦ur ko an kõn juon ilju im jekl̦aj em̦m̦an ak “mour eo em̦ool” me enaaj ejjel̦o̦k jem̦l̦o̦kin. (1 Timote 6:19) Ejjel̦o̦k bar juon bok enaaj jipañ eok kõn men in.

El̦aññe kwõj jino riit Baibõl̦ im ekkeini wõt am̦ riit, kwe bareinwõt kwõmaroñ loi tokjãn kein. Baibõl̦ enaaj jipañ eok bwe en em̦m̦anl̦o̦k wãween mour eo am̦ kiiõ im bwe kwõn jel̦ã kajjien Anij. Ijoke, ñe kwõnaaj riit Baibõl̦, emaroñ naaj lõñ men ko kwõban lukkuun mel̦el̦e kaki ak kajjitõk ko kwõnaaj kõn̦aan jel̦ã uwaakier. El̦aññe men in enaaj wal̦o̦k, keememej waanjoñak eo em̦m̦an an ruutiej in Itiopia eo me ear mour 2,000 iiõ ko remootl̦o̦k. Ekar lõñ men ko ilo Baibõl̦ ear jab lukkuun mel̦el̦e kaki im ear kõn̦aan jel̦ã. Ke kar kajjitõk el̦aññe emel̦el̦e men ko ear riiti, ear ba: “Iaan aõ nãj mel̦el̦e ñe ejjel̦o̦k en̦ ej kõmel̦el̦eik eõ?” * (Lale kõmel̦el̦e eo itulal̦.) Innem ear m̦õn̦õn̦õ in kõtl̦o̦k bwe juon eo ejel̦ã kobban Baibõl̦ en kõmel̦el̦eiki. Armej in ear kajjitõk jipañ ippãn ej Pilip, juon iaan kar ro rũkal̦ooran Jijej. (Jerbal 8:30, 31, 34, UBS) Kõn men in, el̦aññe kokõn̦aan kal̦apl̦o̦k am̦ jel̦ã kobban Baibõl̦, kõmij rõjañ eok bwe kwõn kanne form eo ilo www.mr1310.com/mh ak jejel̦o̦k ñan juon iaan atõrej ko repaake eok me repãd ilo bok in ñan kajjitõk bwe juon en iwõj im katak ippam̦. Kwõmaroñ bareinwõt kajjioñ tõpar Ri Kõnnaan ro an Jeova me repaake ijo kwõj jokwe ie ak etal ñan juon iaan Im̦õn Kweilo̦k ko aer. Kõmij rõjañ eok ñan jino riiti Baibõl̦ kiiõ im kõtl̦o̦k an tõl im jipañ eok bwe kwõn maroñ lo m̦õn̦õn̦õ ilo mour n̦e am̦.