Икана Америкыште самырык-влак коклаште йодыштмашым эртареныт. Нунын кокла гыч 80 процентше эре кумалеш, но пелыже гына тидым кечын ышта. Нунын гыч южыжо, очыни, йодеш: «Кумалтыш мут лыпландарымашым гына пуа але вес пайдамат конда?»

•  Мо тыгай кумалтыш мут?

•  Юмо кумалтыш мут-влакым колыштеш мо?

•  Мо нерген мый кумалын кертам?

•  Мом иктаҥашет-влак ойлат

Кумалтыш мут — тиде чылажымат Ыштыше дене мутланымаш. Шоналте гына, мом тиде ончыкта! Иегова еҥ-влак деч чыла шотыштат сайрак. Туге гынат тудо «мемнан кокла гыч икте дечат тораште огыл» (Апост. пашашт 17:27). Библий эсогыл тарата: «Юмо деке лишемза, тунам Тудат тендан деке лишемеш» (Иаковын 4:8).

Тый Юмо деке кузе лишемын кертат?

• Икымше, кумалтыш мут гоч — тыге тый Юмо дене мутланет.

• Кокымшо, Библийым шымлымаш гоч — тыге Юмо тый денет «мутлана».

Тыгай ваш мутланымаш — кумалтыш мут да Библийым шымлымаш гоч — тыланет Юмо дене лишыл йолташ лияш полша.

«Иегова дене, Кӱшылсӧ Юмо дене, мутланаш — тиде эн кугу чап, могай еҥ-влаклан пуымо лийын кертеш» (Джереми).

«Кунам мый кумалме годым Иеговалан ойлем тудым, мо мыйым тургыжландара, тунам тудын деке лишемам» (Миранда).

Тый Юмылан ӱшанет да тудлан кумалат гынат, тудо тыйым чынжымак колыштеш манын ӱшанаш южгунам куштылго огыл. Туге гынат Библий Иеговам «Кумалтыш мутым колыштшо» манеш (Псалом 65:2, УТ). Библий эсогыл тарата: «Кеч-могай тургыжланымашдам Юмылан ӱшанен пуыза». Молан? «Тудо тендан верч тырша» (1 Петрын 5:7).

Мо нерген шоналташ кӱлеш. Тый лишыл йолташ-влак дене мутланашлан эре жапым ойырет вет? Юмо денат тыгак: кумалтыш мут гоч тудын дене эре мутлане, тугодым Иегова лӱмжым кучылт (Псалом 85:5—7; 87:10). Чынже денак, Библий тыйым эре кумалаш тарата (1 Фессалоникысе-влаклан 5:17).

«Кумалме годым мый кавасе Ачам дене мутланем. Тугодым мый уло шӱмым почам» (Мойзе́с).

«Кузе мый авам але лишыл йолташем дене мутланем, тыгакак Иеговалан чылажымат ойлем» (Карен).

Библийыште возымо: «Кумалын, тауштен да сӧрвален, йодмыдам чыла годымат Юмылан палдарыза» (Филиппысе-влаклан 4:6).

Тугеже, кумалме годым чыла нелылыкна нерген каласкалаш лиеш мо? Конешне, лиеш! Библийыштат возымо: «Тый ойгетым Юмылан пыште, да Тудо тыйым тема» (Псалом 54:23).

Мутат уке, Юмылан кумалме годым проблеме нерген гына ойлаш огеш кӱл. «Тый Иеговам эре полыш нерген гына йодат гын, тыйым тудын йолташыжлан шотлаш ок лий, — Шантель лӱман самырык ӱдырамаш ойла. — Мыйын шонымаште, эн ончыч Юмым таушташ кӱлеш, а шоналташ гын, таум ыштыше лияшлан мыйын шуко амал уло».

Мо нерген шоналташ кӱлеш. Тый Юмым мо́лан тауштынет? Иеговам таушташлан тый таче могай кум амалым муын кертат?

«Кумалме годым Иеговам кеч-моланат таушташ лиеш. Мутлан, ужмо мотор пеледышлан тау мутым каласаш лиеш» (Анита).

«Шонкален нал Юмын иктаж-могай ыштымашыже нерген але Библийысе почеламут нерген, кудыжо тыйын шӱметым тарватен, да тидлан Иеговалан таум каласе» (Брайан).