Поро увер пиалан Иегова Юмо деч лектеш. Чыла ешым тудо пиаланым ужнеже (1 Тимофейлан 1:11). Лач тудлан кӧра мужыраҥмаш лийын. Еш пиалан лийже манын, пӧръеҥ ден ӱдырамашлан возалташ кӱлеш. Возалтмаш — пиалан ешын негызше, тудо аралтышым пуа, йоча-влакым ончен кушташ сай условийым ышта. Христианлан мужыраҥмаш шотышто верысе законым шотыш налман. (Лукан 2:1, 4, 5 лудын лекса.)

Мужыраҥмаш шотышто Юмын ончалтышыже могай? Тудын шонымыжо почеш ӱдырамаш ден пӧръеҥ ӱмыр мучкылан мужыраҥшаш улыт. Вате ден марий ваш-ваш ӱшанле лийшаш улыт (Еврей-влаклан 13:4). Юмо ойырлымашым ужмышудымо (Малахия 2:16). Но христианын пелашыже яжарланен гын, Юмо тудлан ойырлаш да угыч мужыраҥаш эрыкым пуа. (Матфейын 19:3—6, 9 лудын лекса.)

Иегован шонен пыштымыж почеш марий ден вате икте-весыштым ешарышаш улыт (Тӱҥалтыш 2:18). Марий — ешын вуйжо. Тудо ешыжлан мо кӱлешым ситарышаш да еш дене пырля Библийым шымлышаш. Марий шке нерген огыл, а ватыж нерген шонышаш да тудын верч тыршышаш. Пелаш-влак икте-весыштым йӧратышаш да пагалышаш улыт. Чыла еҥ языкан, сандене лишылна-влакын титакыштым кудалташ тунемаш чот кӱлеш. Тиде моштымаш ешлан пиалан лияш полша. (Ефесян-влаклан 4:31, 32; 5:22—25, 33; 1 Петрын 3:7 лудын лекса.)

Мужыраҥмаште йӧсылык лектеш гын, марий ден ватылан икте-весым йӧратымым пеҥгыдемдаш тыршыман (1 Коринфян-влаклан 13:4, 5). Юмын Мутшо еш нелылыкым посна-посна илыме дене сеҥаш огеш тарате. (1 Коринфян-влаклан 7:10—13 лудын лекса.)

Иегова илышлан куанымыдам ужнеже. Тудым колыштыда гын, шуко йӧсылык деч кораҥын кертыда да пиалан лийыда. Тыгак тудо тендан деч ача-авадам колыштмым вуча, вет нунын уш-акыл да илыш опытышт шукырак уло (Колоссян-влаклан 3:20). А эше Иегова тудын да Эргыжын кӱштымыжым шуктымыдам вуча. Вет тиде тыланда куаным конда манын, тудо пала. (2 Тимофейлан 3:14, 15; Матфейын 19:13—15; 21:15, 16 лудын лекса.)

Йочадан кочкыш, вургем да илыме верже лийже манын, тыланда тыршаш кӱлеш (1 Тимофейлан 5:8). Но эше йочам Юмым йӧраташ да тудым колышташ туныкташ кӱлеш (Второзаконие 6:4—7). Тиде шотышто тендан примерда кугу рольым модеш. Йоча Юмым йӧратымыдам ужеш гын, шкежат тудым йӧраташ таратыме лиеш. Юмын Мутшо йочадан койыш-шоктышыжым да шонымашыжым шуараш полша. (Притчи 22:6 *; Ефесян-влаклан 6:4 лудын лекса.)

Йоча-влакым мокташ да йӧратымаште ӱшандараш чот кӱлешан. Но тыгак нуным тӧрлаташ да кӱлеш годым наказатлаш кӱлеш. Тиде нуным кызытсе да ончыкылык илышыште эҥгекым кондышо уда паша деч арален кода (Притчи 22:15). Но наказатлымаш торжа лийшаш огыл. (Колоссян-влаклан 3:21 лудын лекса.)

Ача-ава ден йоча-влаклан полшаш манын, Иегован Таныкше-влак икмыняр книгам савыктен луктыныт. Нине книга-влак Библиеш негызлалтше улыт. (Псалом 18:8, 12 лудын лекса.)