7 УРОК
Мо тыгай Юмын Кугыжаныш?
1. Мо тыгай Юмын Кугыжаныш?
Молан Иисус — эн сай Кугыжа? (МАРКЫН 1:40—42).
Юмын Кугыжаныш — тиде кавасе правительстве. Тудо чыла айдеме правительствым алмашта да Юмын эрыкшым каваштат, мландыштат шукта. Юмын Кугыжаныш нерген увер — тиде поро увер. Вет ме эре сай правительствым вучена. Вашке Юмын Кугыжаныш тиде кумылнам шукта. Тудо чыла айдемым уша. (Даниил 2:44 *; Матфейын 6:9, 10; 24:14 лудын лекса.)
Кеч-могай кугыжанышын кугыжаже уло. Иегова кавасе Кугыжанышыште Кугыжалан шке Эргыжым, Иисус Христосым, шогалтен. (Почмаш 11:15 лудын лекса.)
«Мо тыгай Юмын Кугыжаныш?» видеороликым ончалза.
2. Молан Иисус — эн сай Кугыжа?
Юмын Эргыже — эн сай Кугыжа, молан манаш гын тудо поро да чыным ыштыше (Матфейын 11:28—30). Тыгак, тудын кугу вийже уло, вет тудо кава гыч вуйлата. Ылыжмеке, Иисус кавашке пӧртылын да Иегован пурла могырышкыжо шинчын (Еврей-влаклан 10:12, 13). Жап шумеке, Юмо Иисуслан властьым пуэн, да тудо вуйлаташ тӱҥалын. (Лукан 1:32, 33 лудын лекса.)
3. Иисус дене пырля кӧ вуйлаташ тӱҥалеш?
Библий дене келшышын, каваште Иисус дене пырля «святой» манме еҥ-влак вуйлаташ тӱҥалыт (Даниил 7:27). Нуным Иегова шке ойыра. Эн ончыч тиде тӱшкаш Иисусын ӱшанле апостолжо-влак пуреныт. Иегова таче мартеат «святой-влакым», тудлан ӱшанле пӧръеҥ ден ӱдырамаш-влакым, пога. Нуно Иисус семын ылыжыт да нунылан шӱлыш кап пуалтеш. (Иоаннын 14:1—3; 1 Коринфян-влаклан 15:42—44 лудын лекса.)
Кавашке мыняр еҥ кая? Иисус нуным «изи кӱтӱ» манын (Лукан 12:32). Чылаже тушто 144 000 еҥ лиеш. Нуно Иисус дене пырля мландым вуйлаташ тӱҥалыт. (Почмаш 14:1 лудын лекса.)
4. Вуйлаташ тӱҥалмеке, Иисус эн ончыч мом ыштен?
Юмын Кугыжаныш 1914-ше ий гыч вуйлата *. Вуйлаташ тӱҥалмеке, Иисус эн ончыч Сатанам да тудын демонжо-влакым мландыш сӱмырал шуэн. Сатанам ажгынымаш авалтен да, тудо чыла еҥлан осалым ышташ тӱҥалын (Почмаш 12:7—10, 12). Сатанам сӱмырал шуымо годсек чыла еҥ орлана. Сар, шужымаш, чер да мланде чытырналтмаш — чыла тиде Иисусын каласыме «палдарыше палын» ужашыже, кудо шижтара: вашке Юмын Кугыжаныш уло мландым вуйлаташ тӱҥалеш. (Лукан 21:7, 10, 11, 31 лудын лекса.)
5. Юмын Кугыжаныш мом шукта?
Мланде мучко поро уверым шаркалымылан кӧра Юмын Кугыжаныш уже таче тӱрлӧ наций гыч шуко еҥым ик калыкыш чумыра. Миллионло ӱҥышӧ еҥ Юмын Кугыжанышын велке лие. Тиде осал тӱням пытарыме годым Юмын Кугыжаныш нуным арален кода. Сандене Юмын Кугыжанышын вуйлатымыжым ужаш шонышо айдеме Иисусым колышташ тунемшаш. (Почмаш 7:9, 14, 16, 17 лудын лекса.)
Христосын Тӱжем ий вуйлатымыж годым Кугыжаныш айдеме тукым шотышто Юмын шонен пыштымашыжым шукта. Уло мланде райыш савырна. Пытартышлан Иисус Кугыжанышым шке Ачажлан пуа (1 Коринфян-влаклан 15:24—26). Юмын Кугыжаныш нерген кӧлан каласкалымыда шуэш? (Псалом 36:10, 11, 29 лудын лекса.)
^ абз. 1 Даниил 2:44: «Саде кугыжа-влакын вуйлатыме кечылаште кавасе Юмо кугыжанышым шогалта, кудыжо нигунамат шалатыме огеш лий. Тиде кугыжаныш вес калыклан пуымо огеш лий. Тудо чыла нине кугыжанышым шалата да пытара, а шкеже курымеш шогаш тӱҥалеш».
^ абз. 6 1914-ше ий нерген пророкла ойлымашым «Библийын туныктымашыже могай?» манме книгаште 248—251 страницылаште умылтарыме.
