Чыла еҥ кумалмаш гоч тудын деке лишемже манын, Юмын кумылжо уло (Псалом 64:3, У Сугынь, 1986). Но Юмо чыла кумалме мутым огеш колышт. Мутлан, пӧръеҥ шке ватыж дене шкем торжан куча гын, Юмо тудын кумалмыжлан огеш вашеште (1 Петрын 3:7). Кунам израильтян-влак осалым ӱскыртланен ыштеныт, Юмо нунын кумалмыштым колыштын огыл. Чынжымак, кумалме мут гоч Юмо дене мутланымаш — тиде кугу чап. Тидын нерген шарнаш кӱлеш. Но еҥ языкым ыштымыжлан ӧкына гын, Юмо тудым колышташ ямде. (Исаия 1:15 *; Апост. пашашт 3:19 лудын лекса.)

«Юмо чыла кумалме мутым колыштеш мо?» видеороликым ончалза.

Кумалаш кӱлеш Иеговалан гына, вет тудо мемнам Ыштышына да ик чын Юмо (Матфейын 4:10; 6:9). Ме чыланат языкан улына, сандене кумалме мутнам Иисус Христос лӱмеш каласыман, вет тудо мемнан языкна верч колен (Иоаннын 14:6). Кумалтыш книга гыч налме да тунемме кумалме мутым уэш-пачаш ойлымынам Иегован колыштмыжо огеш шу. Кумалмына годым шке шижмашнам, шонымашнам тудлан ойлымынам тудо вуча. (Матфейын 6:7; Филиппысе-влаклан 4:6, 7 лудын лекса.)

Йӱкын она кумал гынат, Юмо мемнам колеш (1 Самуила 1:12, 13). Тудо мемнам кеч-кунамат кумалаш ӱжеш. Мутлан: эрдене, малаш вочмо деч ончыч, кочкаш тӱҥалме деч ончыч да йӧсӧ годымат. (Псалом 54:23; Матфейын 15:36 лудын лекса.)

Юмо деке лишемаш куштылго огыл, вет ме илена тыгай жапыште, кунам шукынжо ни Юмылан, ни мландым райыш савыраш тудын сӧрымыжлан огыт ӱшане (2 Тимофейлан 3:1, 4; 2 Петрын 3:3, 13). Садлан кӧра мыланна кӱлеш жапым эртараш нунын дене, кӧмыт мемнан семынак Юмылан ӱшанат, туге ме икте-весынам кумылаҥден кертына. (Еврей-влаклан 10:24, 25 лудын лекса.)

Юмым йӧратыше-влак дене кылым кучымаш Юмо деке лишемаш полша. Иегован Таныкше-влакын вашлиймашышт ӱшанымашым пеҥгыдемдаш сай йӧным пуа. (Римлян-влаклан 1:11, 12 лудын лекса.)

Юмын Мутшо гыч пален налме нерген шонкалымаш Юмо деке лишемаш полша. Шонкалыза тудын пашаже, законжо да сӧрымашыже-влак нерген. Тиде полша тыланда тудын йӧратымыжым, кугу уш-акылан улмыжым шижаш да аклаш. (1 Тимофейлан 4:15, 16 лудын лекса.)

Юмылан чыла шотыштат ӱшанеда гын веле, тудын дек лишемын кертыда. Ӱшанымашым кушкыл дене таҥастараш лиеш. Кушкыл кушшо манын, вӱдым оптыман. Тыгак ӱшанымашна пеҥгыдемже манын, шинчымашым налман. Сандене шукырак шымлаш да шонкалаш кӱлеш, могай амал верч те ӱшанеда. (Матфейын 4:4; Еврей-влаклан 11:1, 6 лудын лекса.)

Иегова тудым йӧратыше-влак верч тырша. Мо ӱшанымашнам пудыртен кертеш да мо верч курымашлык илышлан ӱшаннам йомдарен кертына, чыла тидын деч Юмо мемнам арала (Псалом 90:1, 2, 7—10). Тудо мемнам тыгай паша ыштыме деч шижтарен шога, кудыжо тазалыклан эҥгекым конда але мемнам пиалдымым ышта. Иегова мемнам эн сай илыш корно дене каяш туныкта. (Псалом 72:27, 28; Иаковын 4:4, 8 лудын лекса.)