I homai e Ihowa te whenua ki te tangata. Ko tō tātou kāinga tenei. Nō reira, kāhore a Ārama rāua ko Īwi, i hangā ai kia whānau tamariki mō te rangi​—kua oti i te Atua te hanga i ngā anahera kia noho ki te rangi. (Hopa 38:4, 7) Engari, kawea ana e te Atua te tangata tuatahi, whakanohoia ana ki te pararaiha ātaahua i hua nei ko te kāri o Ērene. (Kēnehi 2:15-17) Ka hoatu e Ihowa ki a ia me āna uri, te tūmanako o te ora mutunga kore ki te whenua.​—Pānuitia Ngā Waiata 37:29; 115:16.

I te tīmatanga, ko te kāri o Ērene anake te pararaiha. Me whakakī e te tokorua tuatahi te whenua ki ā rāua tamariki. Nā, me huri i a rātou te ao katoa hei pararaiha. (Kēnehi 1:28) E kore te whenua e whakangaromia. Ka tū ake tonu atu hei kāinga mō te tangata.​—Pānuitia Ngā Waiata 104:5.

Kāhore a Ārama rāua ko Īwi i whakarongo ki te Atua, ka peia rāua e Ihowa i roto i te kāri. Ka ngaro te pararaiha, kāhore hoki i taea e te tangata te whakahoki. E kī ana te Paipera: “Kua hoatu te whenua ki te ringa o te tangata kino.”​—Hopa 9:24.​—Pānuitia Kēnehi 3:23, 24.

Kua mahue rānei i a Ihowa tōna whakaaro tuatahi mō te tangata? Kāore! He kaha rawa ia. E kore tāna kupu e taka. (Ihaia 45:18) Ka whakahoki ia i te tangata ki tāna i whakaaro ai.​—Pānuitia Ngā Waiata 37:11, 34.

Ka whakahokia te Pararaiha ki te whenua i te wā e Kīngi ai a Ihu mō te Atua. Hei te whawhai e kiia nei ko Aramākerona, ka ārahi a Ihu i ngā anahera o te Atua, ka whakangaro i ngā hoariri o te Atua. Kātahi ka mauheretia  a Hātana e Ihu mō ngā tau 1,000. Ka ora te iwi o te Atua i taua whakangaromanga i te mea ka arahina, ka tiakina rātou e Ihu. Ka hari rātou i te ora tonu i Pararaiha ki te whenua.​—Pānuitia Whakakitenga 20:1-3; 21:3, 4.

Hei āwhea whakamutua ai e te Atua te kino ki te ­whenua? I homai e Ihu he “tohu” hei whakaatu kua tata te mutunga. E mōrearea ana te oranga o te tangata i ngā āhua­tanga i te ao ināianei, otiia he tohu ēnei mea kei “ngā rā o te whakamutunga” tātou.​—Pānuitia Matiu 24:3, 7-14, 21, 22.

I te wā o tōna kīngitanga 1,000-tau ki te whenua, ka whakamutua e Ihu te mamae katoa. (Ihaia 9:6, 7; 11:9) Tāpiri ki tāna mahi hei Kīngi, ka tū hoki a Ihu hei Tohunga Nui, ka whakakore i ngā hara o rātou katoa e aroha ana ki te Atua. Nā wai, mā roto i a Ihu, ka whakamutu te Atua i te māuiui, te koroheketanga, me te mate.​—Pānuitia Ihāia 25:8; 33:24.

Ko ngā tāngata ka whakarongo ki te Atua, e ora ki Pararaiha. (1 Hoani 2:17) I tono a Ihu i āna kaiaru kia kimi i ngā tāngata māhaki, kia ākona hoki rātou me pēhea rātou ka āhuarekatia ai e te Atua. Ināianei, e whakaritea ana e Ihowa he mano tini tāngata kia ora āpōpō ki te whenua Pararaiha. (Tepania 2:3) I ngā Hōro Kīngitanga o ngā Kaiwhakaatu a Ihowa, e ako ana ngā tāngata kia pai ake hei tāne, hei mātua, hei wāhine, hei whaea. Ka karakia tahi ai ngā mātua me ngā tamariki, me te ako he pēhea e riro ai he painga i te rongo pai.​—Pānuitia Mika 4:1-4.