Хүнд яг тохирсон бэлэг олно гэдэг амаргүй ажил. Тэгээд ч бэлэг авч байгаа хүн л бэлгийн үнэ цэнийг тодорхойлно. Бэлэг нэг хүний хувьд үнэ цэнтэй байхад, нөгөөгийнх нь хувьд тийм биш байж болох юм.

Жишээ нь, арван хэдэн настай хүүхэд гар утас, таблет гэх мэтийг гоё бэлэг гэж бодох байх. Харин насанд хүрсэн хүний хувьд сэтгэлд дотно санагдах, үе удам дамжсан зүйлийг үнэ цэнтэй бэлэг гэж тооцох биз ээ. Зарим оронд, дуртай юмаа авч болдог учраас ямар ч насны хүнд мөнгө өгвөл дээр гэж үздэг.

Дотны хүндээ тохирох бэлэг олох нь хэцүү байлаа ч, эрэл сурал болдог хүн олон байдаг. Яг тохирсон бэлэг тэр бүр олдохгүй юм шиг санагдаж болох юм. Бэлэг сонгоход анхаарах ёстой дөрвөн хүчин зүйл байдаг. Тэдгээрийг мэдвэл эрэл амжилттай болно. Ямар дөрвөн хүчин зүйл байдаг юм бол?

Хүсэл сонирхолд нь нийцүүлэх. Хойд Ирландын Белфаст хотод амьдардаг нэгэн залуу арав гаруй настайдаа унадаг дугуй бэлгэнд авчээ. Энэ нь түүний хувьд хамгийн үнэтэй бэлэг ажээ. Яагаад тэр вэ? Тэрээр: «Би яг дугуйтай болмоор байсан юм» гэжээ. Бэлэг тухайн хүний хувьд үнэ цэнтэй эсэх нь хэр зэрэг хүсэж байгаагаас нь шалтгаалдаг байх нь. Бэлгээ хэнд зориулж байгаагаа бодоорой. Тэр хүний хувьд юу үнэ цэнтэй вэ? Юу хүсэж байж болох вэ? Жишээ нь настайчуудын хувьд үр хүүхдүүдтэйгээ хамт байх мөч үнэ цэнтэй. Тэд ач зээ нартайгаа аль болох үргэлж хамт байхыг хүсдэг. Тиймээс гэр бүлээрээ амарч зугаалахаар болбол настай аав ээжийгээ авч яваарай. Энэ нь тэдний хувьд үнэ цэнтэй бэлэг болно.

Хүний юу хүсэж байгааг мэдье гэвэл яриаг нь сайн сонсоорой. «Сонсоход бэлэн бай. Ярих гэж бүү яар» гэж Библид байдаг  (Яаков 1:19). Найзууд тань, гэрийнхэн тань өдөр тутамдаа юу ярьж байгааг анхааран сонсоорой. Тэгвэл юунд дуртайг нь мэдэж болно. Тэднийгээ баярлуулах хамгийн сайн бэлэг сонгож чадна.

Хэрэгцээ шаардлагад нь нийцүүлэх. Хэрэгцээг нь хангаж байвал энгийн зүйл ч үнэ цэнтэй бэлэг болно. Хүнд юу хэрэгтэй байгааг яаж мэдэх вэ?

Юу хэрэгтэй, юу хүсэж байгааг өөрөөс нь асуучихвал амар юм шиг санагдаж болох юм. Гэхдээ бусдад хэрэгтэй зүйлээр нь гэнэтийн бэлэг барьж, өгөхийн жаргал эдлэхийг хүсдэг хүмүүст энэ арга тохирохгүй. Ер нь хүн юунд дуртай, юунд дургүйгээ хэлдэг ч юу хэрэгтэй байгаагаа хэлдэггүй.

Ажигч гярхай байж, тухайн хүний нөхцөл байдлыг харгалзан үзээрэй. Залуу хүн үү? Настай хүн үү? Ганц бие үү? Гэрлэсэн үү? Салсан уу? Бэлэвсэн үү? Ажил хийдэг үү? Тэтгэвэрт гарсан уу? Тухайн хүнд юу хэрэгтэй байж болохыг, тэр тусмаа юу онцгой хэрэгтэй байж болохыг бодоорой.

Хэрэгтэй зүйлийг нь өгье гэвэл тухайн хүнтэй адил нөхцөл байдалд орж байсан хүнээс асуугаарай. Хэн хүний мэдэхгүй хэрэгцээтэй зүйлийг тэр хүн мэдэж байж болох юм. Ийнхүү та хэрэгцээтэй зүйлийг нь бэлэглэж чадна.

Цагаа олсон байх. Библид «Цагаа олсон үг юутай сайхан бэ!» гэж байдаг (Сургаалт үгс 15:23). Энэ зүйл цагаа олсон үг их чухал болохыг харуулж байна. Үйл хэрэг маань ч бас тийм байх учиртай. Цагаа олж хэлсэн үг хүнд таатай сонсогддог шиг тохирсон үед өгсөн бэлэг хүнийг баярлуулна.

Гэрлэх гэж байгаа найздаа, сургуулиа төгсөх гэж байгаа хүүхдэд, хүүхэдтэй болох гэж байгаа хосод бэлэг өгч болох юм. Өөр олон тохиолдолд бэлэг өгч болно. Зарим хүн дараагийнхаа жилд болох онцгой үйл явдлыг жагсааж бичдэг. Энэ нь ямар бэлэг өгөхөө урьдчилан төлөвлөхөд тусалдаг. *

Заавал баярт үйл явдлыг тохиолдуулж бэлэг өгөх албагүй. Өгөхийн жаргалыг хэзээ ч эдэлж болно. Гэхдээ анхаарах хэрэгтэй зүйл бас бий. Жишээ нь, нэгэн залуу, нэгэн бүсгүйд тодорхой шалтгаангүйгээр бэлэг өгчээ гэж бодъё. Өөрт нь талтай, илүү дотно танилцахыг хүсэж байгаа юм байна гэж бүсгүй бодож магадгүй. Ямар нэг шалтгаангүйгээр бэлэг өгвөл хүнд буруу ойлголт төрүүлнэ. Тэгэхлээр ямар сэтгэлээр бэлэг өгөхөө бодох нь чухал.

Ямар сэтгэлээр өгөх вэ? «Энэ бэлгийг тэр хүнд өгвөл буруу ойлголт төрүүлэх юм биш биз? Ер нь би яагаад бэлэг өгөх гэж байгаа билээ?» гэж бодох хэрэгтэйг дээрх жишээ харуулж байна. Ихэнх нь сайхан сэтгэлээр бэлэг өгдөг байхад зарим нь жилийн онцгой үед арга буюу бэлэг өгдөг. Хариу харж, тал засаж бэлэг өгдөг хүн ч бий.

Зөв хандлагаар бэлэг өгье гэвэл яах хэрэгтэй вэ? Библид «Та нар бүхнийг хайрын сэтгэлээр хийцгээ» гэж байдаг (1 Коринт 16:14). Бусдыг хайрлаж, санаа тавьж бэлэг өгдөг бол авч байгаа хүнээ баярлуулна. Та өөрөө өгөөмөр байхын жаргалыг эдэлнэ. Чин сэтгэлээсээ бэлэг өгвөл та бас тэнгэрийн Эцгээ баярлуулна. Иудейд байгаа итгэл нэгтнүүддээ чин сэтгэлээсээ тусламж үзүүлсэн Коринт хотын, Христийн дагалдагчдыг элч Паул магтан сайшаасан байдаг. Тэгээд тэдэнд «Бурхан  дуртайяа өгдөг хүнийг хайрладаг» гэж хэлсэн (2 Коринт 9:7).

Та дээр дурдсан дөрвөн зүйлийг бодож үзээд хүнийг баярлуулах бэлэг сонгож чадах биз ээ. Бурхан хүн төрөлхтөнд эдгээр болон бусад хүчин зүйлд үндэслэн хамгийн агуу бэлэг өгсөн. Ямар агуу бэлэг өгснийг нь дараагийн өгүүллээс уншаарай.