Luhongbadagidi nahakki anouba imung ama oiba hourabani. Nahakpu pokpiba ima ipabu nungsigadabani amasung ikai khumnagadabani. Adubu houjikti nahakki napuroiba nattraga nupina nahakki punsida khwaidagi maruoiba meesak oirabani. Hairiba waphamsi adomgi mari-mata kharanadi yaningdaba phaoba yai. Imung-manunggi meesingga aphaba mari thamba amasung nouna oirakliba matei-manao anigi mari chetsinnaba hotnaba, anigi maraksida chap mannaba mityeng thamba ngamnaba Biblegi niyamsingna mateng panggani.

BIBLENA KARI HAIRI: “Nama napabu ikai khumnou.” (Ephisa 6:2) Nahak phana ahal oirabasu, nahakpu pokpiriba ima ipabudi matam chuppada ikai khumnagadabani. Nahakki napuroiba nattraga nupisi kanagumba amagi machani maram aduna mahakna mama mapabu yengsinbiba darkar oi. “Nungsibana kallakte” maram aduna nahakki napuroibana nattraga nupina mahakki mama mapaga aphaba mari thambada kallakpa phaobiganu.—1 Corinthiya 13:4; Galatiya 5:26.

NAHAKNA TOUBA YABADI:

• Henjinba waheising khudam oina “nakhoi imungna eibu adum hanthana yeng-ee” nattraga “eina touthorakpa amatta nakhoi imana pamde” haibagumbasi sijinnabiganu

• Oiriba phibam amabu nahakki napuroiba nattraga nupigi mityengdagi yengba ngamnaba hotnabiyu

BIBLENA KARI HAIRI: “Nipana mahakki mama mapa thadoktuna mahakki nupida napsingani, aduga makhoi ani hakchang amata oigani.” (Meihouron 2:24) Luhonglaba matungdasu, nahakki ima ipana nahakpu yengsinba haibasi makhoigi mathoudangni haina khanba yai. Maram asina makhoina nahakki yumban punsida darkar oibadagi henna khut thingjillakpa yai.

Nakhoi anina makhoigi wasing asi kadai phaoba tagani haibadu lepthoklaba matungda, hairiba waphamdu nungsi heiba mawongda makhoida khanghanbiyu. Makhoida akanba wahei wata yaodana iseng sengna phongdokpa yai. (Paorou 15:1) Nollukpa, pukning tappa amasung khaangheibagi gunsing chengadabani. Hairiba gunsing asina mari matasingga aphaba mari thambada amasung ‘nungsibada amana amabu khaangbibada’ mateng panggani.—Ephisa 4:2.

NAHAKNA TOUBA YABADI:

• Nahakki mari matasingna nahakki punsida ka henna khut thingjilli haina khallabadi, matang chabada nahakki napuroiba nattraga nupiga madugi maramda ing tapna wari sannabiyu

• Hairibasingdugi maramda kari tougani haibadu nakhoi ani punna warep loubiyu