Neb nins sẽn sokd sogs-kãensa wã wʋsg neb la b kʋ-yã, tɩ b sẽn baoodã pa sogsgã leoor bal ye. Yaa belsgo. Neb kẽer yetame tɩ Nazi-rãmbã sẽn kʋ Zʋɩf-rãmbã n yaa bũmb ninsaalbã sẽn maan tɩ yaa wẽng n yɩɩda, tɩ rẽ kɩt tɩ yaa toog ne-b tɩ b tẽ Wẽnnaam.

  Tags-kɛgre: Pa zems tɩ ned baood n na n bãng Wẽnnaam sẽn bas tɩ Nazi-rãmbã kʋ Zʋɩf-rãmbã võor ye.

 Sɩdã: Neb tẽeb sẽn da tar pãng n bao n na n bãng Wẽnnaam sẽn bas tɩ wẽnemã beẽ wã võore. Wala makre, no-rɛɛs a Habakuk soka Wẽnnaam yaa: “Bõe yĩng tɩ yãmb bas tɩ m yãt tʋʋm-wẽnsã, bõe yĩng tɩ y get tõnd tɩ d be namsg pʋga? Sãoong ne wõr-taabã gũbga maam.” (Habakuk 1:3) Wẽnnaam pa zab a Habakuk rẽ yĩng ye. A pʋd n kɩtame tɩ b gʋls a sogsgã Biiblã pʋgẽ nebã fãa yĩnga.

  Tags-kɛgre: Nebã sẽn namsdã pa pak Wẽnnaam ye.

 Sɩdã: Wẽnnaam kisa wẽnemã ne namsg ning wẽnemã sẽn wat ne wã. (Yel-bũnã 6:16-19) A Nowe wakatẽ wã, nen-kɛglmã sẽn da piuug dũniyã zugã kɩtame tɩ Wẽnnaam “sũur sãam wʋsgo.” (Sɩngre 6:5, 6) Sãmbg sẽn kae, Nazi-rãmbã sẽn kʋ Zʋɩf-rãmbã me sãama Wẽnnaam sũur wʋsgo.—Malasɩ 3:6.

  Tags-kɛgre: Nazi-rãmbã sẽn kʋ Zʋɩf-rãmbã yɩɩ Wẽnnaam n sɩbg Zʋɩf-rãmbã.

 Sɩdã: Pipi kiris-nebã wakate, Wẽnnaam basame tɩ Rom nebã sãam Zerizalɛm. (Matye 23:37–24:2) La rẽ tɛka, Wẽnnaam pa welgd buud baa a ye n ning bark wall n sɩbg ye. Wẽnnaam nifẽ, welgr ka be Zʋɩf ne bu-zẽng ned sʋk ye.—Rom-dãmbã 10:12.

  Tags-kɛgre: Wẽnnaam sẽn yaa nonglem la sẽn yaa pãng sẽn ka koak soab sã n da beẽ, a ra na n gɩdgẽ-la Nazi-rãmbã tɩ b ra kʋ Zʋɩf-rãmbã ye.

 Sɩdã: Baa Wẽnnaam sẽn zɩ n wa ne namsgã, a mi n basame tɩ nebã nams wakat bilf pʋgẽ.—Zak 1:13; 5:11.

 Bũmb ning sẽn kɩt tɩ Wẽnnaam bas tɩ Nazi-rãmbã kʋ Zʋɩf-rãmbã yaa a ye ne bũmb ning sẽn kɩt t’a bas tɩ ninsaalbã namsdẽ wã: Yaa sẽn na n welg no-koɛɛm sẽn sɩng hal daar zãra. Biiblã wilgda vẽeneg tɩ rũndã-rũndã, dũniyã bee a Sʋɩtãan nugẽ, pa Wẽnnaam nugẽ ye. (Luk 4:1, 2, 6; Zã 12:31) Baa sõsg ning sẽn be zĩig ning b sẽn gʋls tɩ “Y sã n dat n bãng n paasã” sẽn wilgd Wẽnnaam sẽn bas tɩ namsgã beẽ wã võor sõma wã, d na n wilga bũmb a yiib sẽn be Biiblã pʋgẽ, n tõe n sõng tɩ d bãng Wẽnnaam sẽn bas tɩ Nazi-rãmbã kʋ Zʋɩf-rãmbã võore.

1.   Nazi-rãmbã sẽn kʋ Zʋɩf-rãmbã yaa ãnda yelle? Wẽnnaam wilga d yaab a Ãdem ne a Awa a sẽn dat tɩ b maan bũmb ninga, la a pa modg-b tɩ b sak-a ye. B yãka yam n na n soog b mens n bao n bãng sõma ne wẽng n bake. B yam-yãkrã sẽn pa yɩ sõma wã waa ne yel-beed ninsaalbã fãa zutu. Hal pĩnd wẽndẽ n tãag rũndã, neb n yãkd b yamã buudu, tɩ rẽ me wat ne yel-beed wʋsgo. (Sɩngre 2:17; 3:6; Rom dãmbã 5:12) Yaa wa sebr a yembr (Statement of Principles of Conservative Judaism) sẽn yeelã. A yeelame: “Namsg ning sẽn be dũniyã zugã wʋsg yaa tõnd sẽn pa tar tõog ning Wẽnnaam sẽn kõ tõnd tɩ d tõe n yãk d toorẽ yamã n maand sẽn zemsã yĩnga.” La Wẽnnaam pa reeg tõog ning d sẽn tar n tõe n yãk d toorẽ yamã ye. A basa ninsaalbã weer tɩ b soog b mens n ges b mens yell b toore.

2.   Wẽnnaam tõe n yẽesa sũ-sãams nins Zʋɩf-rãmbã kʋʋbã sẽn wa ne wã, la a na n maana woto. Wẽnnaam pʋlmame t’a na n vʋʋga neb milyõ-rãmb sẽn ki. Wala makre, Nazi-rãmbã sẽn kʋ Zʋɩf-rãmb ninsã. Bũmb a to me la a na n maan tɩ sũ-sãams nins Zʋɩf-rãmbã kʋʋbã sẽn wa ne wã sa. A na n kɩtame tɩ sẽn põs-bã yĩm yel-beed nins b sẽn yã wã. (Ezayi 65:17; Tʋʋma 24:15) Wẽnnaam sẽn nong ninsaalbã yaa kaset t’a na n pidsa pʋlem-kãensã.—Zã 3:16.

 Zʋɩf-rãmb nins sẽn põs Nazi-rãmbã nusẽ wã wʋsg tõog n kell n talla tẽebo, la b paam vɩɩm sẽn tar barka, b sẽn bãng Wẽnnaam sẽn bas tɩ wẽnemã beẽ wã yĩnga, la b sẽn bãng a sẽn na n maan to-to n yẽes sũ-sãams nins wẽnemã sẽn wat ne wã yĩnga.