Neb kẽer tõe n tagsdame tɩ b sã n lebg Biiblã tɩ gom-biisã tong taab kɛpɩ wa b sẽn da gʋls-a to-to pĩnd buud-goamã pʋsẽ wã, na n sõnga karemdbã tɩ b sẽn wʋmd a võor to-to wã zems ne b sẽn da gʋls-a pipi wã kɛpɩ. La pa wakat fãa la woto yaa sõma ye. Ad bũmb a wãn sẽn wilgd rẽ:

• Buud-gomd fãa gom-biis la a goamã sẽn wʋgd to-to wã yaa toore. Ebre wã bãngd a ye yʋʋr sẽn boond t’a Samuel Driver yeelame tɩ “pa buud-gomd gom-biis bal n kɩt t’a yaa toor ne a to ye. . . . La yaa a nebã sẽn wʋgd a goamã to-to wã me.” Buud-gomd fãa neb sẽn wʋgd goamã to-to wã yaa toor ne buud-gomd a to. Bãngdã paasame: “Rẽ n so tɩ buud-gomd b sẽn gʋls fãa yaa toor ne a to.”

• Buud-gomd kae rũndã-rũndã, t’a gom-biisã la a goamã sẽn wʋgd to-to wã zems kɛpɩ ne Ebre wã, Arameyẽ wã la Gɛrkã sẽn yaa buud-goam nins pʋsẽ b sẽn gʋls Biiblã sɩngrẽ wã ye. Dẽnd d sã n lebg Biiblã n tong goamã taab wa sẽn da yaa to-to buud-gom-kãens pʋsẽ wã kɛpɩ, tõe n kɩtame tɩ b pa wʋmd a võorã sõma ye. Wakat ning mengã tõe n toeema a võorã.

• Goam wʋgb pʋgẽ, gom-bil wall gomd võor tõe n toeemame.

Biiblã lɛbgdb tõe n lebga vɛrse kẽer gom-biis yembr-yembr tɩ zems b sẽn da gʋls-b to-to pipi buud-gomdã pʋgẽ wã, la b segd n maana gũusg wʋsgo.

Ad makr a wãn sẽn wilgd tɩ d sã n tong goamã taab bala, tõe n toeema a võorã: 

• Biiblã pʋgẽ, b mi n pʋda gom-bil ning sẽn yaa “gõeemã,” n gomd ned sẽn sɩd gõe, wall ned sẽn ki yelle. (Matiye 28:13; Tʋʋma 7:60) B sã n pʋd gom-bilã tɩ yaa kũum yell la b gomda, Biiblã lɛbgdb tõe n lebg-a lame tɩ “kũum” sẽn na yɩl tɩ karemdbã wʋm a võore.—1 Korẽnt rãmbã 7:39; 1 Tesalonik rãmbã 4:13; 2 Pɩyɛɛr 3:4.

• Efɛɛz rãmb 4:14 pʋgẽ, tẽn-tʋmd a Poll yeela bũmb tɩ b sã n lebg gom-biisã yembr-yembr bɩ rat n yeel tɩ “neb sẽn lobd lido bila.” Pĩnd wẽndẽ rãmbã ra yeta woto n na n gom ned sẽn zãmbd a to lido bil lobr pʋgẽ. Buud-goam wʋsg pʋgẽ, b sã n lebg gom-biisã yembr-yembre, b pa wʋmd a võorã sõma ye. La b sã n yeel tɩ “zãmbo,” yaa vẽeneg n yɩɩda.

• Rom dãmb 12:11 wã, b pʋda Gɛrkã gomd tɩ b sã n lebg-a bɩ rat n yeel tɩ “vʋʋsem sẽn kaeed pʋgẽ.” La b sã n lebg-a woto ne Moore, a võorã pa vẽeneg ye. Rẽ n so tɩ Biibl-kãngã pʋgẽ, d lebg-a tɩ “bɩ y bas tɩ vʋʋsem sõngã kɩt tɩ y tall yẽesem.”

• Sõsg ning a Zeezi sẽn sõs tãngã zug tɩ neb wʋsg mi-a sõma wã sasa, a pʋda gomd b sẽn wae n lebgdẽ tɩ “Bark bee sik-m-mens rãmbã zutu.” (Matiye 5:3, Wẽnnaam Sebre, 2014) La b sẽn lebg-a tɩ sik-m-mens rãmbã pa zems ne a võorã sẽn yaa a soab Gɛrkã pʋgẽ wã ye. Bala pa sik-m-meng yell la a Zeezi sẽn da gomda ye. A ra rat n wilga nebã tɩ yaa b sẽn na n sak n deeg tɩ b segd n bao n bãnga Wẽnnaam daabã la b na n paam sũ-noogo. Pa b sẽn na n baood bũmb toor-toor b sẽn dat ye. (Luk 6:20) La b sẽn lebg-a tɩ “neb nins sẽn mi tɩ b segd n baoo Wẽnnaamã,” gomdã võor yaa vẽeneg n yɩɩda.—Matiye 5:3.

• Zĩis kẽere, Ebre wã gom-bil ning b sẽn lebg tɩ “sũ-kiirã” zemsa ne Moorã gomd sẽn dat n yeel tɩ yik f sũur f zoa sẽn pa maan sɩd ne-f yĩnga, wall f sẽn tʋll f to paoongo. (Yel-bũnã 6:34; Ezayi 11:13) La zĩis a taaba, b tõe n pʋda Ebre wã gom-bi-kãng t’a bilgd bũmb sẽn yaa sõma. Wala makre, b mi n pʋd-a lame n gomd a Zeova “yẽesmã,” wall a sẽn kogend a nin-buiidã ne a sũur fãa to-to wã yelle, pa rẽ bɩ a “sẽn dat tɩ b tũ yẽ a ye tãa balã” yelle. (Yikri 34:14; 2 Rĩm-dãmbã 19:31; Ezekɩyɛll 5:13; Zakari 8:2) B mi n pʋd-a lame me n na n bilg “yẽesem”  ning Wẽnnaam nin-buiidã sẽn tar a yĩng la a tũudmã yĩngã, la b sẽn ‘dat n waoog yẽ a ye tãa balã.’—Yɩɩn-sõamyã 69:9; 119:139; Sõdbo 25:11.

• Ebre wã gom-bil ning sẽn wae n bilgd ninsaal nugã tara võor toor-toore. Zĩis kẽere, a võorã tõe n yɩɩ zu-sobendo, maan-neer wall pãnga. (2 Sãmwɛll 8:3; 1 Rĩm-dãmbã 10:13; Yel-bũnã 18:21) Sɩd me, Dũni-paalgã lebg-kãngã pʋgẽ, b lebg-a-la zĩis wʋsg t’a võorã yaa toor-toore.

Woto fãa yĩnga, Biiblã lebgr pa baood tɩ b lebg buud-goam nins pʋsẽ b sẽn da gʋls Biiblã pipi wã pʋgẽ gom-bil ne gom-bi-yɛng zĩig zãng ye. Ned sã n lebgd Biiblã buud-gomd pʋgẽ, a segd n tũusa gom-biisã ne yam, t’a võorã zems ne Biiblã sẽn da gʋls buud-goam nins pʋsẽ wã. Sẽn paase, a segd n wʋga goamã tɩ zems b sẽn gomd to-to a buud-gomdã pʋgẽ wã, sẽn na yɩl tɩ karengã yɩ nana.

B segd n gũusame me n da paas goam ye. Ned sẽn lebgd Biiblã sã n bas a yam n lebg-a wa yẽ mengã sẽn wʋmd-a to-to wã, n paas goam a taab wall a boog goama, tõe n toeema a võorã. Bõe yĩnga? Sẽn lebgd-a Biiblã tõe n wa tudgame n paas yẽ mengã tagsgo, wall a yĩm yel-bõoneg kẽer sẽn tar yõodo. Woto yĩnga, ned sã n lebg Biiblã n paas goam wall a boog goama, karengã tõe n yɩɩ nana, la rẽ tõe n kɩtame tɩ karemdã pa bãng koɛɛgã sẽn sɩd rat n yɛɛlgã ye.

Ned sẽn lebgd Biiblã tõe n kɩtame t’a sẽn tẽed bũmb ninsã puk a lebgrã pʋgẽ. Wala makre, Matiye 7:13 yetame tɩ “so-yalengã tar n dabda sãoong zĩigẽ.” Biiblã lɛbgdb kẽer ninga sãoong zĩigẽ wã tɩ “bug-tẽnga,” tɩ tõe tɩ yaa b sẽn tẽed tɩ bug-tẽng beeme wã yĩnga. Gɛrkã gom-bilã võor yaool n yaa “sãoongo.”

Ned sã n lebgd Biiblã, a segd n tẽegame tɩ sɩngrẽ wã, b gʋlsa Biiblã t’a goamã zems ne neb wʋsg sẽn da minim n gomd to-to wã, wala makre, ka-koaadbã, rũm-kɩɩmbã, la zĩm-yõgdbã. (Neemi 8:8, 12; Tʋʋma 4:13) Woto wã, b sã n lebg Biiblã tɩ yaa sõma, pʋ-peelem dãmbã wʋmda a koɛɛgã võore, baa b sẽn yaa neb ninsi, la b sẽn yit zĩis ninsã. Yɩta sõma tɩ b tũus gom-biis pʋdb sẽn yaa nana tɩ neb wʋsg wʋmd b võorã, la b bas b rãmb nins nebã sẽn pa wae n pʋtẽ wã.

 Rũndã-rũndã Biibl-dãmb wʋsg pʋsẽ, lɛbgdbã sooga b mens n yãk Wẽnnaam yʋʋrã sẽn yaa Zeova wã, baa a sẽn da be pĩnd Biiblã sɛb nins b sẽn da gʋls ne nusã pʋsẽ wã. (Ges-y vẽnegr ning sẽn yaa A4.) Biibl-dãmb wʋsg pʋsẽ, b ledga Wẽnnaam yʋʋrã ne naam yʋʋr wala “Zu-soaba,” tɩ Biibl sãnda meng kɩt tɩ nebã pʋd n pa miẽ tɩ Wẽnnaam tara yʋʋr ye. Wala makre, Biibl-dãmb kẽer pʋgẽ, a Zeezi pʋʋsg ning sẽn be Zã 17:26 pʋgẽ wã b yeelame: “Mam kɩtame tɩ b bãng yãmba.” Zã 17:6 pʋgẽ b yeelame: “Mam kɩtame tɩ neb nins yãmb sẽn kõ maamã bãng yãmba.” B sã n lebg bũmb ning a Zeezi sẽn yeel a pʋʋsgã pʋgẽ wã tɩ zemse, yaa: “Mam kɩtame tɩ b bãng fo yʋʋrã,” la “mam kɩtame tɩ neb nins fo sẽn . . .  kõ maamã bãng fo yʋʋrã.”

Ãngilindã Dũni-paalgã pipi lebgrã sɩngr-goamã pʋgẽ, b yeelame: “Tõnd pa paas wall d boog goam Gʋls-sõamyã pʋgẽ ye. D modgame n na n lebg gom-biisã yembr-yembr tɩ zems wa b sẽn gʋlsã. La yaa zĩis nins d sẽn tõe n maan woto tɩ pa tiis ãngilindã sẽn gomd to-to wã, la zĩis nins lebgr a woto sẽn pa na n kɩt tɩ goamã võor pa yɩ vẽenegã.” Rẽnd Dũni-paalgã lebgr sull nebã modgame n tũus gom-biis la goam sẽn zems ne Biiblã sẽn da gʋls to-to sɩngrẽ wã, n yaa goam la gom-biis võor wʋmb sẽn yaa nana, n pa toeemd koɛɛgã võor me ye. Woto kɩtame tɩ Biiblã kareng yaa nana, t’a karemdbã me tõe n bas b yam tɩ b lebga a koɛɛgã sẽn yit Wẽnnaam nengẽ wã tɩ zems kɛpɩ.—1 Tesalonik rãmbã 2:13.