A Luk yeela a Evãnzillã pʋgẽ t’a Zeezi laka a Ezayi sebrã n karme, la a lebs n pili. Rẽ wilgdame tɩ ra yaa seb-pindem. Wẽnnaam da yeela no-rɛɛs a Zeremi me t’a rɩk seb-pindem n gʋls yẽ goamã.—Zeremi 36:2; Zã 20:30; 21:25.

Ne bõe la b ra maand seb-pindmã? B ra maand-b-la ne rũms gãnd b sẽn tong taab tɩ lebg woko, wall ne moog b sẽn boond tɩ papirus. B vinda seb-pindmã ne raoogo, tɩ gʋlsmã sẽn be neng ningã be pʋgẽ. Sebrã gʋlsda yĩngr n sig tẽnga, n leb goabg n gʋls yĩngr n sig tẽnga. Seb-pindmã sã n yaa wok wʋsgo, b ningda raoog kɩrems a yiibã. Dẽ ned sã n dat zĩig n karme, a pilgda sebrã ne nug a ye, tɩ nug a to wã pindẽ.

B sẽn wa n sigl maan-kʋʋrã tʋʋmd Israyɛll nebã wakatẽ wã, rao la b ra yãkd t’a lebg maan-kʋʋdbã kãsem a yõor tɛka. (Sõdbo 35:25) A Aarõ la b yãk pipi. Maan-kʋʋd kãsem kũum poore, a bi-kãsengã n deegd a zĩiga. A Aarõ yagens wʋsg sẽn yaa kom-dibli yɩɩ maan-kʋʋdba, la sẽn yɩ-b maan-kʋʋdb kãsem-dãmb pa waoog ye.

Tẽns a taab nanambs sã n da wa zab n deeg Israyɛll nebã tẽnse, lebgda bãmb n yãkd maan-kʋʋdb kãsmã, la b tõe n toeem-a-la wakat ning b sẽn date. Wõnda yaa sẽn tar-b ziirã sʋk la-b ra get n yãkdẽ, la naoor wʋsgo, yaa a Aarõ yagensã sʋka. “Maan-kʋʋdbã kãsem-dãmbã” yaa neb nins sẽn da lʋɩt taoor maan-kʋʋrã tʋʋmd pʋgẽ wã. B ra pʋɩɩ maan-kʋʋdbã sul 24, tɩ sull fãa tar taoor-soaba. Taoor-soab fãa ra yaa maan-kʋʋdb kãsma, t’a zakã neb nins me sẽn tar ziirã yaa maan-kʋʋdb kãsem-dãmba. Sẽn paase, ned sã n da pa le yaa maan-kʋʋdb kãsma, b ra ket n boond-a lame tɩ maan-kʋʋdb kãsma, wala makre a Ãnde.—1 Kibayã 24:1-19; Matye 2:4; Mark 8:31; Tʋʋmã 4:6.