BIIBLÃ SAGLGA: ‘Ra maan-y yɩɩr ne y vɩɩmã yell ye.’—Matye 6:25.

Saglgã võore: A Zeezi kõo saglgã a sẽn wa n sõsd ne neb tãng zugu. Sebr a yembr wilgame tɩ gɛrkã gom-bil ning b sẽn lebg tɩ ‘maan yɩɩrã’ bilgda “ned manesem sẽn mi n yaa to-to zu-loees taoore. Wala makre, kom, naongo, pa rẽ bɩ yɛl a taaba.” Ned sẽn maand yɩɩr wae n yɛɛsda zu-loees sẽn tõe n wa yĩnga. D sã n maand yɩɩr bũmb kẽer sẽn yaa tɩlɛ ne-d yĩnga, wall neb d sẽn nong yĩnga, pa wẽng ye. (Filip-rãmbã 2:20) La a Zeezi sẽn sagl a karen-biisã tɩ b ‘ra maan yɩɩrã,’ a ra rat n yeel-b lame tɩ b ra maan yɩɩr tɩ looge, bɩ tɩ b ra sidg beoog yell yĩnga, tɩ wa menes b sũ-noogã ye.—Matye 6:31, 34.

Saglgã ket n tara yõod bɩ? Yɩta sõma tɩ d tũ a Zeezi saglgã. Bõe yĩnga? Bala, sɛb kẽer wilgame tɩ ned sã n maand yɩɩr wʋsgo, tõe n kɩtame t’a bẽ bãas wala ilsɛɛre, sũur bãaga, wall asem.

A Zeezi wilga d sẽn pa segd n maan yɩɩr tɩ loogã võore. A wilgame tɩ pa tar yõodo, n yeele: “Yãmb ned a bõe n tõe n paas a vɩɩmã woglem kãntɩɩg a yembr tãa a sẽn maand yɩɩr yĩnga?” (Matye 6:27) D sã n maand yɩɩre, pa tõe n paas tõnd vɩɩmã woglem baa bilfu, pa manegd d vɩɩmã me. Sẽn paase, yɛlã pa wae n yɩt wa d sẽn da magã ye. Bãngd a yembr yeela woto: “Ned sã n maand yɩɩr beoog yĩnga, a namsda a meng zaalem. Naoor wʋsgo, d sẽn sidgd bũmb ning yĩngã pa yɩt wẽng wa d sẽn da tagsdã ye.”

Bõe n tõe n sõng-d tɩ d ra maan yɩɩre? Pipi, d teeg Wẽnnaam. Wẽnnaam sẽn get liuuli wã yelle, la a nagsd fɩlɛɛr-dãmbã, sãmbg kae t’a na n gesa neb nins sẽn lʋɩɩsd a raabã taoorã yell n yɩɩda. (Matye 6:25, 26, 28-30) Yiib-n-soaba, d bʋ rũndã yell bala. A Zeezi yeela woto: “Bɩ y ra maan yɩɩr ne beoog yell ye, tɩ bõe, beoog na n gesa a meng yelle.” Rẽ yĩnga, y pa sak n deeg tɩ ‘daar fãa tara a meng yell tɩ sek’ sɩda?—Matye 6:34, Wẽnnaam Sebre, 1983.

Tõnd sã n tũ a Zeezi saglgã, na n sõng-d lame tɩ d gil zu-loees sẽn tõe n wa ne bãase. Sẽn paase, d paamda sũur pʋgẽ bãane, rat n yeel tɩ “Wẽnnaam laafɩ wã.”—Filip-rãmbã 4:6, 7.