1, 2. a) Bõe yĩng tɩ d tõe n yeel tɩ dũni-kãngã yaa wa bi-bɛɛg b sẽn tar n debd kʋʋbo? (Ges-y fotã sẽn be yĩngrã.) b) Dũniyã sãoong poore, bõe n na n maane?

MAMS-Y wa b sẽn na n yõk bi-bɛɛg n kao a bʋʋdo, n yeel t’a segda ne kũum. Bãensã roog gũudb gãd-a lame, n tar-a n debd zĩig ning b sẽn na n tɩ kũ-a wã. Baa bi-bɛɛgã sẽn nan ket n vɩ la a tar keelmã, yaa wa a zoe n kiime, bala pa na n kaoos la b kʋ-a ye.

² Rũndã-rũndã, dũniyã wõnda bi-bɛɛgã b sẽn tar n debd kʋʋbã. Hal sẽn kaoose, a Zeova kaoo dũni-kãngã bʋʋdo, n yeel tɩ ka bilfu, a na n sãam-a lame. Ad Biiblã sẽn yeele: “Dũni loogdame.” (1 Zã 2:17) Sãmbg sẽn kae, dũniyã pa na n põs ye. La bũmb n kɩt tɩ dũniyã sãoongã ne bi-bɛɛgã b sẽn tar n debd kʋʋbã pa yembr ye. Neb kẽer tõe n tagsdame tɩ bi-bɛɛgã bʋʋd yɩɩ kɛgre, n yik n yeel tɩ bãmb pa sake, hal n dat meng tɩ b bas-a. La a Zeova yaa bʋ-kaood sẽn maand tɩrg wakat fãa. A pa tudgd ye. A sẽn yeel t’a na n sãama dũniyã zemsame. (Tõo. 32:4) Dũniyã sãoong daar pa na n viig me ye. A sãoongã poore, sẽn be-b saasẽ la tẽngã zugã fãa na n sak n deegame  t’a Zeova sẽn maanã zemsame, la tɩ yaa sõma zãnga. Pʋd n na n waa ne yolsg hakɩɩka!

3. Wilg-y yɛl a naas sẽn pa na n le zĩndi, Wẽnnaam Rĩungã sã n wa?

³ La b sẽn yeel tɩ “dũni loogdame” wã, yaa bõe la sẽn na n loogã? Yaa bõn-wẽns nins fãa sẽn be rũndã-rũndã wã. Ka la bilfu, bõn-kãens fãa na n loogame. Tõnd sẽn moond ‘Wẽnnaam soolmã koe-noogã,’ d gomda rẽ yelle. (Mat. 24:14) Sõs-kãngã pʋgẽ, d na n goma yɛl a naas yelle. Wẽnnaam Rĩungã sã n wa, yel-kãens pa na n le zĩnd ye. Yaa nin-wẽnsã, sigls nins sẽn maand zãmb la b wẽgd nebã, tʋʋm-beedã, la bũmb nins sẽn kɩt tɩ vɩɩmã yaa toogã. D na n yãa yel-kãensã 1) sẽn namsd tõnd to-to rũndã-rũndã, 2) a Zeova sẽn na n maan rẽ wɛɛngẽ, la 3) bũmb ning sẽn na n zĩnd rẽ loogr poore.

4. Nin-wẽnsã sẽn be rũndã-rũndã wã, wãn to la namsd tõndo?

⁴ Nin-wẽnsã sẽn be rũndã-rũndã wã, wãn to la namsd tõndo? Tʋm-tʋmd a Poll da yeelame tɩ “yaoolem wakate, tood na n zĩndame,” la a paas tɩ “nin-wẽnsã ne bɛlgdbã na n kell n kẽeda wẽngã pʋgẽ n paasdẽ.” (2 Tɩm. 3:1-5, 13) Yãmb gũus n gesame tɩ sɩd yaa woto bɩ? Nin-wẽns zoe n namsa tõnd sʋkã neb kẽere. Sãnda pʋd n pa solgd n tʋmd b tʋʋm-wẽnsã ye. La kẽer yẽ maanda wa b rat n sõnga nebã, la b yaool n yaa nin-wẽnse. Baa nin-wẽns sã n nan pa maan-d wẽng vẽeneg-vẽenega, b tʋʋm-wẽnsã namsd-d lame. Sɩd me, d sã n mi n wʋm b sẽn namsd kambã, sẽn kʋʋl-bã la sẽn ka tar-b pãngã, d sũur sãamda hal wʋsgo. Nin-wẽnsã tʋʋm-beedã kɩtame tɩ b yaa wa we-rũms wall zĩn-dãmb menga. (Zak 3:15) La a Zeova Gomdã kɩtame tɩ d miẽ tɩ manegr n wate, tɩ kengd d raood wʋsgo.

5. a) Bõe la nin-wẽnsã ket n tar weer n tõe n maane? b) Bõe n na n paam nin-wẽns nins sẽn pa na n sak n toeemã?

⁵ Bõe la a Zeova na n maane? A Zeova basa weer tɩ nin-wẽnsã tõe n toeeme. (Eza. 55:7) Baa a Zeova sẽn na n sãam dũni-kãngã ka la bilfã, a nan pa kao nin-wẽnsã bʋʋd ye. La b sã n pa sak n toeeme, n kell n teel dũniyã n tãag to-kãsengã sasa, bõe n na n paam-ba? A Zeova pʋlmame t’a na n sãama nin-wẽnsã fãa. (Karm-y Yɩɩn-sõamyã 37:10.) Nin-wẽnsã tõe n tẽedame tɩ b na n põsa sãoong ning sẽn watã. B wʋsg mii b sẽn tõe n maan to-to n solg b tʋʋm-wẽnsã. Naoor wʋsg menga, b pa paamd sɩbgre, la tõe n wõnda wa b põsda b tʋʋm-wẽnsã biisi. (Zoob 21:7, 9) La d tẽeg tɩ Biiblã yetame: “Wẽnnaam geta nebã fãa manesem. Bãmb geta bũmb nins fãa nebã sẽn maandã. Lik bida wall zĩ-libsg ka be yel-wẽn maandb sẽn tõe n kẽ n soond ye.” (Zoob 34:21, 22) Dẽnd zĩig kae ned sẽn tõe n solg tɩ Wẽnnaam pa yã-a ye. A nee bũmb nins fãa nin-wẽnsã sẽn maandã. Armagedõ loogr poore, d na n gesa b sẽn da be zĩis ninsã, la d pa na n yã b baa a yembr ye. B pa na n tol n le zĩnd ye!—Yɩɩn. 37:12-15.

6. Nin-wẽnsã sã n wa pa le beẽ, ãnd dãmb n na n zĩnd dũniyã zugu, la bõe yĩng tɩ rẽ yaa koe-noogo?

⁶ Nin-wẽnsã sã n wa pa le beẽ, ãnd dãmb n na n zĩnd dũniyã zugu?  Ad a Zeova sẽn pʋlme: “Sik-m-mens rãmbã n na n soog tẽngã, la b na n paama vɩ-bãane, ne sũ-noog meng-menga.” A paasame: “Nin-tɩrsã na n sooga tẽngã, la b na n paa beenẽ wakat sẽn kõn sa.” (Yɩɩn. 37:11, 29) Yaa ãnd rãmb la “sik-m-mens rãmbã” la “nin-tɩrsã”? Sik-m-mens rãmbã yaa neb nins sẽn baood n bãngd a Zeova la b maand a raabã. Nin-tɩrsã yaa neb nins sẽn maand sẽn yaa tɩrg a Zeova nifẽ wã. Rũndã-rũndã, nin-wẽnsã sõor yɩɩda nin-tɩrsã hal zĩig sẽn zãre. La dũni-paalgã sẽn watã pʋgẽ, yaa neb sẽn yaa sik-m-mens rãmb la nin-tɩrs bal n na n zĩndi. B na n manega tẽngã t’a lebg arzãna.

7. Wãn to la sigls nins sẽn maand zãmb wall n wẽgd nebã sẽn be wã namsd tõndo?

⁷ Sigls nins sẽn maand zãmb wall n wẽgd nebã sẽn be wã, wãn to la namsd tõndo? Wẽng ning sẽn maand dũniyã zugã wʋsg yaa sigls sabaab yĩnga. Tũudmã sigls fãa la bal yagda ziri, n tudgd neb milyõ-rãmba. Wala makre, b pa togsd sɩd Wẽnnaam zugu, la b yetame tɩ d pa tõe n tẽ Biiblã goam ye. Tẽngã sẽn na n yɩ to-to beoog daarã, la bũmb ning sẽn na n paam ãdem-biisã wɛɛngẽ me, b yagda ziri. Goosneema-rãmb kẽer yikda zaba, wall b pirsd b soolmã buud toɛy-toɛyã tɩ b zabd taaba. Rẽ fãa kɩtame tɩ naong rãmbã la neb nins sẽn pa tar tɛɛndbã namsdẽ. Goosneema-kãens bakda neb n sõngdẽ, la b reegd kũun n zãmbd bʋʋm dãmba, n paamd arzɛka. Sosiete-rãmb wʋsg tʋʋm sãamda tẽn-gãongã, la rẽgemd pemsmã la koomã. Sosiete-kãens me belgda nebã tɩ b raad b teedã, tɩ kɩt tɩ b taoor dãmbã kãagd ligd n samdẽ, tɩ neb milyõ-rãmb yaool n be naong pʋgẽ. Vẽenega, sigls nins sẽn zãmbd nebã wall n wẽgd-bã yaa sabab tɩ ãdem-biis wʋsg namsd rũndã-rũndã.

8. Biiblã yeelame tɩ bõe n na n paam sigls nins fãa sẽn wõnd b tara pãng neb wʋsg nifẽ wã?

⁸ Bõe la a Zeova na n maane? Dũniyã politik siglsã na n wa yika zabr ne tũudum sigls nins fãa sẽn pa togsd sɩd Wẽnnaam zugã. Rẽ n na n yɩ to-kãsengã sɩngre. Biiblã pʋgẽ, b maka tũudum kãens fãa ne pʋg-yoodre, n bool-a tɩ Babilon-kãsengã. (Vẽn. 17:1, 2, 16; 18:1-4) B na n sãam-a-la fasɩ. La bõe n na n paam sigls a taabã sẽn wẽgd nebã? Biiblã maka sigls kãens ne tãmse, la ne tẽns sẽn gũbg ne koom, b sẽn wõnd b tara pãng nebã nifẽ wã yĩnga. (Karm-y Vẽnegr 6:14.) La Biiblã wilgame tɩ Wẽnnaam na n sãama goosneema-rãmb la sigls nins fãa sẽn pa teend yẽ Rĩungã. Woto n na n yɩ to-kãsengã baasgo. (Zer. 25:31-33) Rẽ poore, siglg baa a ye sẽn maand zãmb wall n wẽgd neb pa na n le zĩnd ye.

9. Bõe yĩng tɩ d tõe n bas d yam tɩ dũni-paalgã pʋgẽ, bũmba fãa na n sigla sõma?

⁹ Sigls nins sẽn maand zãmb wall n wẽgd nebã sã n wa pa le beẽ, bõe n na n zĩndi? Armagedõ poore, siglg na n le bee dũniyã zug bɩ? Ad Biiblã sẽn yeele: “Tõnd gũuda Wẽnnaam sẽn pʋlem saasẽ paalg la dũni paalgã, tɩ tɩrlem na n zĩnd a pʋgã.” (2 Pɩy. 3:13) Pĩnd saasã makda goosneema-rãmb sẽn maand zãmb wall n  wẽgd nebã, tɩ pĩnd dũniyã makd neb nins goosneema-kãens sẽn so wã. B sã n wa pa le beẽ, bõe n na n led b zĩigẽ? Yaa “saasẽ paalg la dũni paalgã.” Saasẽ paalgã makda Wẽnnaam Rĩungã. Yaa goosneema sẽn be saasẽ, t’a Zeezi la Rĩmã, n tar na-rɩt-n-taas 144000. Dũni-paalgã makda neb nins Wẽnnaam Rĩungã sẽn na n soogã. A Zeezi ne a na-rɩt-n-taasã na n dɩka a Zeova sẽn yaa Wẽnnaam sẽn pa zũnd-zãnd soabã togs-n-taare. (1 Kor. 14:40) Rẽnd ‘dũni-paalgã’ pʋgẽ, bũmba fãa na n siglame. B na n yãka rap tɩ b get bũmb kẽer yelle. (Yɩɩn. 45:17) A Zeezi ne a na-rɩt-n-taas 144000 n na n wilgd-b sore. Mams-y n ges-y vɩɩmã sẽn na n yɩ noog to-to, sigls nins sẽn maand zãmb wall n wẽgd nebã sã n wa pa le beẽ, tɩ yaa siglg a ye tãa sẽn pa na n tol n zãmb nebã n be!

10. Bõe la nebã maand yãmb sẽn beẽ wã tɩ yaa tʋʋm-beedo, la wãn to la rẽ namsd yãmb ne y zakã rãmba?

¹⁰ Wãn to la nebã sẽn tʋmd tʋʋm-beedã namsd tõndo? Dũni-kãngã pida ne yoobo, pʋ-lika, nen-kɛglem, la tʋʋm-beed a taaba. Filim-dãmbã la reem buud a taab kɩtame tɩ nebã nong tʋʋm-beedo, n pʋd n maand b toor kae ne noy nins a Zeova sẽn kõ sõma ne wẽngã wɛɛngẽ wã. (Eza. 5:20) Roagdbã segd n maoo sẽn na yɩl tɩ bãmb ne b kambã ra rɩk dũniyã nebã togs-n-taar ye. La pʋd n yaa kiris-neb hakɩɩkã fãa n segd n mao tɩ bũmb da sãam bãmb ne a Zeova zoodã ye.

11. A Zeova sẽn sãam Sodom ne Gomoorã wilgda bõe?

¹¹ Bõe la a Zeova na n maane? Tẽeg-y bũmb ning a Zeova sẽn maane, tʋʋm-beedã sẽn da wa n piuug Sodom ne Gomoor soolmẽ wã. (Karm-y 2 Pɩyɛɛr 2:6-8.) Tʋʋm-beedã sẽn da be zĩig fãa wã ra sãamda a Lot ne a zakã rãmb sũy hal wʋsgo. A Zeova sãama tẽn-kãensã fãa. La pa sẽn na n kɩt bal tɩ nebã tʋʋm-beedã sa ye. Yaa sẽn na yɩl me tɩ “yɩ mamsg wẽn-kɩɩsdb nins sẽn na n pʋgl n wa wã yĩnga.” A Zeova na n kɩtame tɩ tʋʋm-beedã sẽn be rũndã-rũndã wã sa, wa a sẽn maan a Lot wakatẽ wã.

12. Tʋʋm-bʋs la y yãgd n dat n wa tʋm dũni-paalgã pʋgẽ?

¹² Tʋʋm-beed sã n wa pa le beẽ, bõe n na n zĩndi? Dũni-paalgã pʋgẽ, d na n tʋma tʋʋm ka tɛk sẽn be yamleoogo. Wala makre, d na n tʋmame n kɩt tɩ tẽngã gill lebg arzãna, la d me zags tõnd ne d nebã yĩnga. Sẽn paase, d na n paam n deega neb milyõ-rãmb sẽn na n vʋʋge, la d sõng-b tɩ b bãng a Zeova la bũmb nins a sẽn maan ãdem-biisã neer yĩngã. (Eza. 65:21, 22; Tʋʋ. 24:15) Wakat kãnga, d na n paam n tʋma tʋʋm wʋsg sẽn na n kõ-d sũ-noogo, la sẽn na n pẽg a Zeova!

13. A Sʋɩtãan ne a Ãdem la a Awa sẽn kɩɩs a Zeova wã, waa ne bõe?

¹³ Wãn to la vɩɩmã sẽn yaa toogã namsd tõndo? Dũniyã sẽn pid ne nin-wẽns la sigls sẽn maand zãmb la b wẽgd nebã, kɩtame tɩ vɩɩmã yaa toogo. Sɩd me, zabã, naongã, bu-welsgã, bãasã, kũumã la yɛl a taab n namsd nebã fãa. Yaa a Sʋɩtãan ne a  Ãdem la a Awa sẽn kɩɩs a Zeova wã n wa ne woto fãa. Tõnd ned baa a ye pa tõe n põs yel-kãensã ye.

14. Bõe la a Zeova na n maan tɩ bũmb nins fãa sẽn kɩt vɩɩmã yaa toogã sa?

¹⁴ Bõe la a Zeova na n maane? D gom bũmb a wãn yelle. A Zeova pʋlmame t’a na n wa kɩtame tɩ zabã fãa sa. (Karm-y Yɩɩn-sõamyã 46:9, 10.) La bãasã? A na n kɩtame me tɩ bãas ra le zĩnd ye. (Eza. 33:24) La kũumã yẽ? A Zeova na n sãama kũum wakat sẽn ka sɛt yĩnga. (Eza. 25:8) A na n kɩtame tɩ naongã sa. (Yɩɩn. 72:12-16) A Zeova na n kɩtame me tɩ yɛl a taabã sẽn kɩt tɩ vɩɩmã yaa toog rũndã-rũndã wã fãa sa. A pʋd n na n kɩtame t’a Sʋɩtãan ne a zĩn-dãmbã ra le tõog n pirs nebã tɩ b tʋm tʋʋm-beed ye.—Efɛ. 2:2.

15. Armagedõ poore, bõe n pa na n tol n le zĩndi?

¹⁵ Mams-y n ges-y vɩɩmã sẽn na n yɩ to-to, zaba, bãas la kũum sã n wa pa le beẽ ye! Sodaase, zab-teedo, logtor yiya, logtoɛɛmba, la yaad pa na n le zĩnd ye. Bi-be-tʋʋmã sẽn na n sa wã, polɩɩs me pa na n le zĩnd ye. Tõe meng tɩ pa na n le yɩ tɩlɛ tɩ d pagd d rotã wall d zagsã ye! Bũmb nins fãa sẽn kɩt tɩ vɩɩmã yaa toogã fãa na n saa wakat fãa yĩnga.

16, 17. a) Armagedõ poore, sẽn na n põs-bã na n paama b mens ne bõe? Rɩk-y makre. b) Bõe la y tõe n maane, n wa paam n põs dũni-kãngã sɛɛbã sasa?

¹⁶ Bũmb nins sẽn kɩt tɩ vɩɩmã yaa toogã sã n wa pa le beẽ, vɩɩmã na n yɩɩ wãna? D pa tõe n mams sẽn na n yɩ to-to wã takɩ ye. D sẽn be dũni-kãngã sẽn pid ne zu-loeesã pʋgẽ hal sẽn kaoosã, tõe tɩ d pa le gũusd n get rẽ sẽn namsd ãdem-biisã to-to wã ye. Wala makre, ned zak sã n pẽ tẽr gaare, pa rẽ bɩ tãmpʋʋre, tarẽ-n-tarẽ, bʋʋrã wall yũugã wat n pa le namsd-a ye. La a Zeova na n wa kɩtame tɩ bũmb nins fãa sẽn kɩt tɩ vɩɩmã yaa toogã sa. Sɩd na n yɩɩ yolsg tɛkẽ!

¹⁷ La bũmb nins fãa sẽn kɩt tɩ vɩɩmã yaa toogã sã n wa pa le beẽ, bõe n na n zĩndi? Yɩɩn-sõamyã 37:11 wã yeelame tɩ wẽn-sakdbã “na n paama vɩ-bãane, ne sũ-noog meng-menga.” Woto pa kengd raood sɩda? A Zeova ratame tɩ y wa paam dẽ. Bɩ y maan y sẽn tõe fãa n kell n yɩ a Zeova zoa, la y kell n pa a siglgã pʋgẽ. Y sẽn mi tɩ beoog na n yɩɩ neerã yaa bũmb sẽn tar yõod wʋsgo. Bɩ y bʋgsd rẽ zug neere, tɩ yɩ vẽeneg y yamẽ, la y sõng y taabã tɩ bãmb me bãng tɩ manegr n wate. (1 Tɩm. 4:15, 16; 1 Pɩy. 3:15) Woto, y tõe n kɩsa sɩd tɩ dũni-kãngã sɛɛbã sã n ta, y na n põsame n vɩɩmd ne sũ-noog wakat sẽn kõn sa!