DAAR a ye, b yõka a Etɩyɛn n kẽng Sãnedrẽ wã taoore. Yaa Israyɛll bʋ-kaoodb sull ning sẽn tar noor n yɩɩdã. Ra yaa rap 71 sẽn yaa tẽngã nin-kãsemse. Yaa maan-kʋʋdbã kãsem a Kayɩf n tigim-ba. Kiis a wãn woto, yɩɩ yẽ n lʋɩ b sullã taoor tɩ b bʋ a Zeezi, n yeel t’a segda ne kũumã. (Mat. 26:57, 59; Tʋʋ. 6:8-12) B waa ne ziri kaset rãmb toor-toor tɩ b rõd a Etɩyɛn. Baa ne rẽ, bũmb n ling-b a Etɩyɛn nengẽ. B yãame t’a “nengã wẽnda wa malɛɛk nenga.”—Tʋʋ. 6:13-15.

A Etɩyɛn maana wãn n kell n tall sũur pʋgẽ bãane, baa ne yel-kãngã sẽn sek rabeemã? Nand tɩ b wa yõk-a n kẽng Sãnedrẽ wã taoorã, a ra zoe n yaa ned sẽn pid ne vʋʋsem sõngã, n tʋmd tũudmã tʋʋmd ning b sẽn kõ-a wã ne a sũur fãa. (Tʋʋ. 6:3-7) Kɩtame t’a sẽn wa n be bʋ-kaoodbã taoorã, vʋʋsem sõngã kell n sõng-a lame, n bels-a la a tẽeg-a bũmb kẽere. (Zã 14:16) Tʋʋm sak a 7 wã pʋgẽ, b togsda a sẽn yeel bũmb ning b sẽn wa n kõ-a sor t’a na n gomã. A sẽn wa n gomdã, vʋʋsem sõngã kɩtame t’a tẽeg sẽn yɩɩd Biiblã babg ning b sẽn da gʋls ne ebre wã vɛrse-rãmb 20. (Zã 14:26) La a tẽebã maneg n paama pãnga, a sẽn wa n paam vẽnegre, n yã a Zeezi sẽn yas Wẽnnaam rɩtgã.—Tʋʋ. 7:54-56, 59, 60.

Tõe tɩ b wa namsd tõnd me, wall b rat n maan-d yell d tũudmã yĩnga. (Zã 15:20) D sã n pidsd d yamã wakat fãa ne Wẽnnaam goamã, la d wɩngd ne tũudmã tʋʋmã, na n kɩtame tɩ Wẽnnaam vʋʋsem sõngã be ne-do, n sõngd-do. Na n kɩtame me tɩ d paam raood n yals kãn-kãe, la d kell n tall sũur pʋgẽ bãane, b sã n wa namsd tõnd d tũudmã yĩnga.—1 Pɩy. 4:12-14.