Karemdbã sogsgo
Bõe yĩng tɩ b yeel 2 Sãmwɛll 21:7-9 wã tɩ rĩm a Davɩɩd basame n pa kʋ a Mefibosɛte, la a yaool n dɩk a Mefibosɛt n kɩs tɩ b kʋ-a?
D sã n karem kibarã yĩngr-yĩngr bala, d tõe n soka d meng sok-kãnga. La bãng-y tɩ vɛrse kãensã pʋgẽ, b gomda rap a yiib yelle, tɩ b fãa yʋy yaa Mefibosɛt. La d sã n lebg n ges bũmb ning sẽn maanã, tõe n sõnga tõnd tɩ d rɩk yam yellã pʋgẽ.
A Sayull sẽn da yaa Israyɛll rĩmã ra tara kom-dibli a yopoe, la kom-pugli a yiibu. A Zonatã n da yaa a pipi biiga. Rẽ poore, a Sayull paama bi-ribl a to ne a pʋg-rɩkdg a Ritspa n pʋd a yʋʋr t’a Mefibosɛt. A Zonatã me ra tara bi-ribl t’a yʋʋr boond t’a Mefibosɛt. Dẽnd rĩm a Sayull ra tara biig yʋʋr sẽn boond t’a Mefibosɛte, la yageng me yʋʋr sẽn boond t’a Mefibosɛt.
A Sayull naamã sasa, a wa n yikame n kis Gabawõ nebã sẽn da vɩ Israyɛll nebã sʋkã, hal n mak n na n menes b fãa. Wõnda b tõog n kʋʋ b neb kẽere. Woto ra pa zems baa bilfu. Bõe yĩnga? Bala a Zozuwe wakatẽ wã, Israyɛll nanambsã ra maana laafɩ kaool ne Gabawõ nebã.—Zoz. 9:3-27.
A Sayull sẽn wa n dɩt naamã tɩ kaool-kãng ketame. La a baoome n na n kʋ Gabawõ nebã, tɩ yaool n yaa bũmb sẽn kɩɩsd kaool-kãnga. Woto kɩtame t’a Sayull ne a roogã rãmb ra tar zɩɩm samde. (2 Sãm. 21:1) Rẽ poore, a Davɩɩd n wa n lebg Israyɛll rĩma. Gabawõ neb nins sẽn põsã togs-a-la yel-beed ning sẽn paam-bã. A Davɩɩd sok-b lame n gese bõe la a tõe n maan n dol yel-beed ning a Sayull sẽn maanã, tɩ kɩt t’a Zeova ning soolmã barka. Gabawõ nebã ra tõe n kosa ligdi, la b pa kos rẽ ye. B kos-a lame t’a yãk a Sayull kambã la a yagensã sʋk neb a yopoe n kõ-b tɩ b luul-ba. A Davɩɩd maana wa b sẽn kosã.—2 Sãm. 21:2-6; Sõd. 35:30, 31.
Rẽ t’a Sayull ne a Zonatã fãa ra kii zabrẽ, la a Zonatã bi-ribl a Mefibosɛt ra ket n vɩɩme. A lebga koams a sẽn wa n yaa biigã. A pa tũ a yaab-raoog n tɩ zab ne Gabawõ nebã ye. A Davɩɩd ra maana zood kaool ne a Zonatã, tɩ kaool-kãng ra na naf a Zonatã kambã la a yagensã, a biiga Mefibosɛt sẽn naage. (1 Sãm. 18:1; 20:42) Kibarã pʋgẽ, b yeelame yaa: “La rĩmã basa a Sayull biig a Zonatã biig a Mefibosɛt n ka kʋ, wẽeneg ning yẽnda sẽn dag n wẽen ne a Zonatã Sẽn-Ka-Saab taoorã yĩnga.”—2 Sãm. 21:7.
La a Davɩɩd saka Gabawõ nebã kosgã. A rɩka a Sayull kom-dibli a yiibu, t’a ye yʋʋr boond t’a Mefibosɛte, n paas a Sayull yagens a nu n kõ Gabawõ nebã. (2 Sãm. 21:8, 9) A Davɩɩd sẽn maan woto wã kɩtame tɩ zɩɩm samd ra pa le be Israyɛll nebã zug ye.
Yel-kãngã pa kibar sẽn zĩnd bal ye. Wẽnnaam tõogã pʋgẽ, b ra yeela vẽeneg yaa: “B ka tog n kʋ kamb b ba-rãmb yĩng ye.” (Tõo. 24:16) A Zeova ra pa na n sak tɩ b kʋ a Sayull kom-dibli a yiibã la a yagens a nu wã, sã n da mikame tɩ b pa tar taal ye. Tõogã pʋgẽ, b paasame yaa: “B tog n kʋʋ ned kamb fãa a meng yel-wẽnd yĩnga.” Wõnda a Sayull kamb a yiibã ne a yagens a nu wã sẽn ki wã ra tara taal Gabawõ nebã kʋʋb pʋgẽ. Rẽnd b kii b sẽn maan wẽng ningã yĩnga.
Kiba-kãngã wilgdame tɩ ned pa tõe n kõ a meng bʋʋm n maan wẽnga, n tagsdẽ bɩ n yetẽ t’a ra tũuda noor b sẽn kõ-a ye. Yel-bũn sebrã pʋgẽ, b yetame yaa: “Maneg sor ning fo sẽn tũudã, tɩ f soayã fãa tõe n yɩ sõama.”—Yel. 4:24-27; Efɛ. 5:15.
