Neb nins sẽn sakd Wẽnnaamã paamda barka
No-rɛɛs a Moyiiz yeelame tɩ d sã n sakd Wẽnnaam noyã, d paamda Wẽnnaam barkã. (Tõodo 10:13; 11:27) D pa sakd Wẽnnaam d sẽn zoet a sẽn na n sɩbg tõnd yĩng ye. D sẽn sakd Wẽnnaamã yaa a zʋg-sõma wã yĩnga. Bala d nong-a lame, n pa rat n maan bũmb sẽn na n sãam a sũur ye. Wẽnnaam Gomdã yetame: “Ad Wẽnnaam nonglmã sẽn dat n yɛɛlga: Yaa tɩ tõnd sak bãmb noyã.”—1 Zã 5:3.
La d sã n sakd Wẽnnaam noyã, bark-bʋs la d paamda? D gom bark a yiib yelle.
1. D SÃ N SAKD WẼNNAAM, D PAAMDA YAM
“Maam a Sẽn-Ka-Saab n yaa fo Wẽnnaam, mam na n zãmsa foom f meng sõngr yĩnga, maam n tɛt foom sor ning fo sẽn be wã zugu.”—EZAYI 48:17.
A Zeova sẽn yaa d Naandã mii tõnd sõma, la a wilgd tõnd sore. D sã n dat t’a sõng-d tɩ d bãngd n yãkd yam-sõngo, d segd n karemda a sebrã n bãng a sẽn dat tɩ d maane, la d modg n tũ d sẽn bãngã.
2. D SÃ N SAKD WẼNNAAM, D PAAMDA SŨ-NOOGO
“Sũ-noog rãmb la neb nins sẽn wʋmd Wẽnnaam goamã la b tũudẽ wã!” —LUK 11:28.
Rũndã-rũndã, neb milyõ-rãmb sẽn sakd n tũud Wẽnnaam sebrã sẽn yetã tara sũ-noog hakɩɩka. Wala makre, rao n be Ɛspayn n da yaa ned sũur sẽn yikd tao-tao, n da nong n weoogd nebã, baa a pagã menga. Daar a ye, a karma Wẽnnaam sebrã, n yã no-rɛɛs a Moyiiz sẽn yeel bũmb ning a Zakoob biig a Zozɛf sũ-maasmã wɛɛngẽ wã. B yõka a Zozɛf n koos t’a lebg yamba, la b kao a bʋʋd kɛgr n kẽes-a bãens roogo. Baa ne rẽ, a kell n yɩɩ sug-kõata, sũ-maasem soaba, la ned sẽn baood laafɩ. (Sɩngre, sak 37-45) Raoã yeelame: “M sẽn tags a Zozɛf kibarã zugã, kɩtame tɩ m modg n na n yɩ sũ-maasem soaba, yõk-m-meng soab la m maand nebã neere, tɩ kɩt tɩ m tar sũ-noog hakɩɩk masã.”
Wẽnnaam sebrã kõta sagls wʋsgo, sẽn wilgd d sẽn segd n tall manesem ning ne nebã. D na n goma rẽ yell sõsg ning sẽn pʋgdã pʋgẽ.
Découvrez aussi…
SOGSG BIIBLÃ SẼN LEOKDE
Biiblã tõe n sõnga maam tɩ m zakã pʋgẽ vɩɩm yɩ noog bɩ?
Sagl-sõma sẽn tik Biiblã zugu, la sẽn zoe n sõng pagb la rap milyõ-rãmb tɩ b zagsã pʋsẽ vɩɩm noome.
