2 Bao-y n bãng Wẽnnaam sõma

“Vɩɩm sẽn ka sɛta yaa woto, tɩ bãmb na bãng yãmb sẽn yaa sɩd Wẽnnaam sẽn ka to la a Zezi Kirist yãmb sẽn tʋm a soabã.”—Zã 17:3.

BÕE N KƖT TƖ PA NANA? Neb kẽer yetame tɩ Wẽnd kae ye. Kẽer tẽedame t’a yaa pãng sẽn be zĩig fãa. Neb nins sẽn tẽed tɩ Wẽnnaam sɩd beeme wã zãmsda nebã yɛl wʋsg Wẽnnaam wɛɛngẽ tɩ kɩɩsd taaba.

BÕE LA Y SEGD N MAANE? Bũmb y sẽn tõe n maan n bãng Wẽnnaam yaa y sẽn na n ges bũmb nins a sẽn naanã. Tʋm-tʋmd a Poll yeela woto: “Bũmb nins sẽn naan hal dũniyã naanega wakatã pukda Wẽnnaam zemsgo nin sẽn ka tõe n yã ye, la bãmb pãnga sẽn ka sɛta la bãmb wẽnego.” (Rom dãmba 1:20) Y sã n maag y yĩng n ges bũmb nins Wẽnnaam sẽn naanã, y na n yãame t’a sɩd tara yam la pãng wʋsgo.—Yɩɩl Sõamyã 104:24; Ezai 40:26.

 La y sã n dat n bãng Wẽnnaam sẽn yaa a soabã sõma, yãmb mengã segd n laka Biiblã sẽn yaa Wẽnnaam Gomdã n karem y toore. Da sak-y neb a taabã tagsg yaar woto ye. Tũ-y Biiblã saglgã. A yeta woto: ‘Bɩ y ra yɩ wa dũniyã rãmb ye, bɩ y bas tɩ Wẽnnaam tek yãmb yamã n maneg-y zãnga tɩ y bãng Wẽnnaam daab sẽn yaa sõma, la sẽn tat bãmb yam, la sẽn zems zãnga.’ (Rom dãmba 12:2) Bɩ d ges Biiblã sẽn yet bũmb ning Wẽnnaam zugu.

Wẽnnaam tara yʋ-peelle. Biiblã dãmb wʋsg pʋsẽ, Wẽnnaam yʋ-peellã bee be naoor tusa. Biibl dãmb kẽer pʋsẽ, yʋ-kãng bee Yɩɩl Sõamyã 83:18 pʋgẽ. Be b yeta woto: “Tɩ nebã bãng tɩ fo yʋʋr sẽn yaa a Zeova wã, foo f yembr bal n yaa Zãntlem sẽn ka to Soab tẽngã fãa zugu.”—Traduction du monde nouveau.

Nebã manesem tõe n nooga Wẽnnaam a Zeova sũur bɩ n sãam a sũuri. A Zeova sẽn fãag Israɛll nebã yembd Eziptã poore, wakat n zĩnd tɩ b tõdg a saglsã. Woto ‘sãama a sũuri.’ B manesmã kɩtame tɩ Wẽnnaam sũur yiki.—Yɩɩl Sõamyã 78:40.

A Zeova geta ned kam fãa yelle. A Zezi yeela a karen-biisã woto: “B ka koosd yirs a yiib sou bɩ? La baasgo, a yembr ka lʋɩt tẽng tɩ yãmb Ba ka yã ye. La baa yãmb zoobda fãa sõdame. Dẽ yĩnga, bɩ y da zoe rabeem ye. Yãmb bee yõod n yɩɩd yirs wʋsgo.”—Matɩe 10:29-31.

Wẽnnaam pa tũusd buud ye. Tʋm-tʋmd a Poll yeela gɛrk rãmb sẽn da be Atɛn tɩ Wẽnnaam “naana ninsaalb buud fãa ne ned a yembre, n zĩndg bãmb dũniyã faa zugu.” A leb n yeelame tɩ Wẽnnaam “ka zãr ne tõnd fãa ye.” (Tʋʋma 17:26, 27) Tʋm-tʋmd a Pɩɛɛr me yeelame tɩ “Wẽnnaam ka tũusd neb ye. La buud fãa sʋka, ned ninga sẽn zoet bãmba la sẽn maand tɩrga, yẽ soab tata bãmb yam.”—Tʋʋma 10:34, 35.

A NAFRÃ YAA BÕE? Neb kẽer “wɩngda ne Wẽnnaam tʋʋmde, la bãmb ka tar vẽnegr [bɩ bãngr] ye.” (Rom dãmba 10:2) Yãmb sã n mi Biiblã sẽn sɩd yet bũmb ning Wẽnnaam zugã, ned pa na n tõog n tudg yãmba, la y na n tõogame n “kolg Wẽnnaam.”—Zak 4:8.

Y sã n dat kibay n paase, bɩ y ges Biiblã sɩd yetame tɩ bõe? * sebrã pipi sakã: “Sɩdã Wẽnnaam zug la bʋgo?”

[Tẽngr note]

[Foto, seb-neng a 6]

Sẽn na yɩl n bãng Wẽnnaam sõma, d tõe n gesa a sẽn naan bũmb ninsã