4 Modg-y tɩ y sãmbsã sa

“Tẽeb bilf soaba, yaa bõe tɩ fo yam yoaada?”—Matɩe 14:31.

BÕE N KƖT TƖ PA NANA? A Zezi karen-biisã meng maana sãmbs wakat ninga. (Matɩe 14:30; Luk 24:36-39; Zã 20:24, 25) Biiblã wilgdame tɩ tẽeb kaalem yaa “yel-wẽn sẽn gɩdgd tõnd naana.” (Hebre dãmba 12:1) Tʋm-tʋmd a Poll yeelame tɩ pa nebã “fãa n tar tẽeb ye.” (2 Tesalonik rãmba 3:2) Woto pa rat n yeel tɩ neb n be n pa tõe n tall tẽeb ye. Rat n yeelame tɩ neb wʋsg pa modgd sẽn na yɩl n paam tẽeb ye. La Wẽnnaam na n ninga neb nins sẽn modgd n dat n paam tẽebã barka.

BÕE LA Y SEGD N MAANE? Bao-y n bãng bũmb ning sẽn kɩt tɩ y sãmbdẽ wã. Wala makre, a Zezi karen-biig a Toma yam ra yooda ne a Zezi sã n sɩd vʋʋgame, baa ne karen-biis a taabã sẽn yeel-a t’a vʋʋgame tɩ bãmb yã-a wã. A Toma ra baooda kaset n na n yaool n tẽ. La a  Zezi vẽnega a meng n wilg-a a nusã ne a lʋgrã t’a sak n tẽ. Rẽ masã a paama tẽeb sẽn tar pãnga.—Zã 20:24-29.

Wẽnnaam a Zeova kõo tõnd Biiblã n na n sõng tõnd tɩ d ra maan sãmb-sãmb ye. Bala neb wʋsg tẽedame tɩ yaa Wẽnnaam n kɩt tɩ zabã, wẽnemã, la namsgã beẽ, tɩ rẽ kɩt tɩ b tẽebã menemdẽ. La bõe la Biiblã yet yel-kãngã wɛɛngẽ?

Pa Wẽnnaam n kõt dũniyã nanambsã b naamã ye. A Zezi yeelame tɩ yaa malɛg-wẽng b sẽn boond t’a Sʋɩtãanã la “dũniyã naaba.” (Zã 14:30) A Sʋɩtãan yeela a Zezi t’a sã n wõgemd n waoog yẽ, a na n kõ-a-la dũniyã naam. A yeel-a-la woto: “Mam na n kõo yãmb pãng kãngã ne soolem kãensa fãa naam; tɩ bõe, b kõo maam fãa tɩ m sooge la mam kõta mam sẽn dat-a soaba.” A Zezi pa kɩɩs tɩ yaa a Sʋɩtãan n so dũniyã ye. La a yeel-a-la woto: “A gʋlsame: ‘Waoog Zusoaba fo Wẽnnaam, la f sak bãmb bala.’ ” (Luk 4:5-8) Yaa a Sʋɩtãan ne dũniyã nanambsã n kɩt tɩ namsgã beẽ wã, lakae pa Wẽnnaam ye.—Wilgri 12:9, 12.

Ka la bilfu, Wẽnnaam a Zeova na n kɩtame tɩ namsgã sa. A zoe n lugla Rĩung bɩ goosneema t’a biig a Zezi Kirist yaa Rĩma, n na n dɩ naam ninsaalbã zugu. (Matɩe 6:9, 10; 1 Korẽnt dãmba 15:20-28) Wẽnnaam Rĩungã koe-noogã moonda dũniyã gill zugu, tɩ pidsd Biiblã sẽn pĩnd n togsã. (Matɩe 24:14) Ka la bilfu, Wẽnnaam Rĩungã na n menemsã a bɛɛbã fãa, la a kɩt tɩ namsgã sa.—Daniɛll 2:44; Matɩe 25:31-33, 46; Wilgri 21:3, 4.

A NAFRÃ YAA BÕE? Neb nins sẽn maand sãmb-sãmbã yaa wa kamb sẽn sakd “neba belgre,” la sẽn sakd “kareng buud toor-toore.” (Efɛɛz rãmba 4:14; 2 Pɩɛɛr 2:1) La neb nins sẽn na n bao n bãng yɛlã võor sõma Biiblã pʋgẽ wã na n tõogame n “yals kãn-kãe tẽeb pʋgẽ.”—1 Korẽnt dãmba 16:13.

A Zeova Kaset rãmbã, rat n yeel tɩ neb nins sẽn yiis seb-kãngã wã rat n sõnga yãmb tɩ y paam sogsg nins sẽn kɩt tɩ y maand sãmb-sãmbã leokre. B boonda yãmb tɩ y wa b tigissã, n bãng b sẽn zãmsd nebã bũmb ninsã y toore. Y sã n maan woto, y na n paama tẽeb sẽn tar pãnga.

Y sã n dat kibay n paase, bɩ y ges Biiblã sɩd yetame tɩ bõe? * sebrã sak a 8 soabã: “Wẽnnaam Rĩungã yaa bõe?” la sak 11 soabã: “Bõe yĩng tɩ Wẽnnaam bas tɩ namsgã beẽ?”

[Tẽngr note]

[Foto, seb-neng a 9]

Neb nins sẽn paamd b sogsgã leoorã tẽeb paamda pãng wa roog sẽn yẽbg sõma