Sõng-taab sõngda zagsã neb tɩ b tũ Wẽnnaam sõma

KIRIS-NED sã n dat t’a zak rãmb wa nong a Zeova la b tũud-a sõma, rẽnda b sõng taaba. A Zeova sẽn wa n naan d yaab a Ãdem ne Hawa wã, a wilgame tɩ sõng-taab yaa tɩlae zak pʋgẽ. Bala, a yeelame t’a Hawa na n yɩ a Ãdem “sõngda.” (Sɩng. 2:18) Kãadmã pʋgẽ, pagã ne a sɩdã segd n sõngda taaba. (Koɛ. 4:9-12) Roagdbã la kambã segd n sõnga taaba, n tõogd n pidsd tʋʋm nins a Zeova sẽn bobl-bã.

Naagd-y taab n zãmsd Biiblã

A Barry ne a Heidi tara kamb a nu. B yãame tɩ b zakã neb sẽn sõngd taab tɩ b tõogd n zãmsd Biiblã n pa vaandẽ wã kɩtdame tɩ zood ning b sẽn tar ne a Zeova wã paasdẽ. A Barry yeela woto: “Mam mi n deng n kõo kambã tʋʋm-bõoneg Biiblã zãmsg yĩnga. Wala makre, m mi n kosame tɩ b reng n karem Réveillez-vous ! wã sõsg a ye, n wa togs b sẽn wʋm bũmb ningã. Sẽn paase, d mi n segenda koɛɛgã moonego, n makd d sẽn na n kãab nebã sɛbã to-to wã n wilgdẽ tɩ sõngd biig fãa.” A Heidi paasa woto: “Tõnd ned kam fãa gʋlsa bũmb nins a sẽn dat n wa maan a Zeova tʋʋmã pʋgẽ wã, tɩ Biiblã zãmsg sasa bɩ d mi n naagd taab n get d sẽn zoe n tõog n maanã.” A Barry ne a Heidi leb n yãame tɩ b sẽn yãk daar a ye semennã pʋgẽ tɩ zakã ned baa a ye pa get tele wã, kɩtame tɩ b fãa paamd sẽk n karemd sɛbã tɩ tiisg kaẽ ye.

Sõngd-y taab tigissã kẽnd yĩnga

A Mike ne a Denise tara kamb a naase. Wãn-wãn la bãmb ne b kambã sõng taab zakã pʋgẽ tɩ naf b fãa? A Mike yeela woto: “Baa tõnd sẽn segend d mens sõma sẽn na yɩl n ta Rĩungã roogẽ pĩndã, sasa ninga, d ra pa tõogd ye. La d wa n mikame tɩ d sã n sõng taaba, d tõogdame.” A Denise wilga b sẽn sõng taab to-to. A yeela woto: “Tõnd kambã sẽn wa n lebg bɛd bilfã, d ra kõta ned kam fãa tʋʋmde. Tõnd bi-pugl a Kim n da segend rɩɩbã, la a vaag n tɩ rɩgl taablã zugu.” B bi-ribl a Michael yeela woto: “Tigissã ra maanda tõnd zakẽ wã talaat daar fãa. Woto kɩtame tɩ tõnd da segd n pɩɩs zĩigã la d yiis zaoosã.” A Matthew sẽn yaa b bi-ribl a to wã me yeela woto: “Tigisg daare, m baaba sã n da sig tʋʋma, a modgdame n ta yir pĩnda, n sõng tõnd tɩ d segl n sa tɩ tigisgã nan pa sɩng ye.” Wãn-wãn la woto naf zakã rãmba?

B modgrã pa yɩ zaalem ye

A Mike yeela woto: “Yʋʋmd 1987 soabã pʋgẽ, maam ne a Denise lebga so-pakdba. Wakat kãng tɩ tõnd kamb a tãab n da ket ne-do. D kamb a yiib n wa n lebg so-pakdba, tɩ komdibli a yiib paam n tɩ sõng n me Betɛlle. Bũmb a to sẽn kõ tõnd fãa sũ-noog me yaa tɩ d tõog n sõnga neb 40 tɩ b wa rɩk b mens n kõ a Zeova n deeg lisgu. Sẽn paase, tõnd fãa wa n paama zu-noog n sõng n me siglgã rot tõnd tẽngã pʋgẽ la hal baa tẽn-zẽms pʋsẽ menga.”

Sõng-taabã sẽn nafd zagsã nebã yĩnga, sɩd segdame tɩ d modgd n sõngd taab d zagsã pʋsẽ. Rẽ yĩnga yãmb zakã neb tõe n baoa soay n sõng taab sõma n paas bɩ? Y tõe n kɩsa sɩd tɩ y sã n sõng taab woto, y fãa na n tõog n maana Wẽnnaam daabã neere.

[Foto, seb-neng 29]

D sã n segend koe-moonegã yiri, sõngda kambã tɩ b tõogd n moond sõma