A Zezi sẽn wilg tõnd bũmb ninga

Zak pʋgẽ vɩɩmã wɛɛngẽ

Tags-bʋg kãadmã zug n tõe n kɩt tɩ sũ-noog zĩnd zak pʋgẽ?

Kãadem yaa bũmb sẽn tar yõod wʋsg Wẽnnaam nifẽ. Raar a ye b sẽn sok a Zezi tɩ rao sã n tara sor n tõe n bas a paga, a leoka woto: “Yãmb nan ka karem tɩ Naandã naana bãmb dao la pag hal sɩngrẽ, la tɩ bãmb yeelame: ‘A yaa woto yĩnga dao na bas a ba ne a ma n zĩnd ne a paga, la bãmb b yiibã fãa na n yɩɩ yĩng a yembr’ bɩ? Woto yĩnga, bãmb ka leb n ya a yiib yɛs ye, b yaa yĩng a yembre. Dẽ yĩnga, bɩ ned da welg bũmb nins Wẽnnaam sẽn lagem ne taabã ye. . . . Ned sã n bas a pag tɩ ka yoob yĩnga, n dɩk a to, a maanda yoobo.” (Matɩe 19:4-6, 9) Pag ne a sɩd sã n tũud a Zezi sagl-kãngã n pa zãmbd taaba, sũ-noog la bas-yard na n zĩnda b zakã pʋgẽ.

Bõe yĩng tɩ zak neb sã n nong Wẽnnaam bɩ kɩtdẽ tɩ b tar sũ-noogo?

A Zezi yeela woto: “ ‘Nong Zusoabã fo Wẽnnaam ne f sũur fãa, la ne f sɩɩgã fãa, la ne f yam fãa.’ Ada yaa pipi tõogo, la a yaa tõog sẽn yaa kãsenga, n yɩɩd tõodã fãa.” La tõog a yiib-n-soabã la bʋgo? A Zezi yeelame tɩ yaa ‘nong y yak bɩ f to [f zakã neb sẽn naage,] wa f menga.’ (Matɩe 22:37-39) Rẽnd yaa zak neb sẽn na n tar zood sõma ne Wẽnnaam la sũ-noog zĩnded zakã pʋgẽ. Bala b sã n nong Wẽnnaam, na n kɩtame tɩ b nong taaba.

 Wãn to la rapã ne b pagbã tõe n noog taab sũuri?

Pʋg-sɩdbã sã n dɩkd a Zezi togs-n-taare, noogda b pagbã sũyã. A Zezi ra nonga a tigingã b sẽn bool t’a pagã, hal n da sakd n mongd a meng a yĩnga. (Efɛɛz rãmba 5:25) A meng yeela woto: ‘Ninsaal Biigã ka wa tɩ neb sõng bãmb ye, b waame n na n sõng nebã.’ (Matɩe 20:28) A Zezi pa weoog a karen-biisã abada. A pʋd n da yolsd-b lame. (Matɩe 11:28) Rẽnd pʋg-sɩdbã me segd n maana woto, sẽn na yɩl tɩ b zagsã neb tall sũ-noogo.

A Zezi mak-sõngã tõe n nafa pagbã me. Biiblã yetame tɩ “Kiristã zug yaa Wẽnnaam.” La a yetame me tɩ “pag zug yaa a sɩdã.” (1 Korẽnt dãmba 11:3) A Zezi zɩ n tags tɩ yẽ sẽn segd n sak Wẽnnaam sẽn yaa a Zusoabã yaa paoogr ye. A ra pʋd n waoogda a Ba wã wʋsgo. Ad a meng sẽn yeele: “Mam sẽn maand bũmb ninsã tata bãmb yam daar fãa.” (Zã 8:29) Pag sã n sakd a sɩd zu-sobendo, a sẽn nong Wẽnnaam la a waoogd-a yĩnga, sõngdame tɩ sũ-noog zĩnd zakã pʋgẽ.

A Zezi manesem sẽn da yaa to-to ne kambã wilgda roagdbã bõe?

A Zezi ra mi n dɩkda sẽk n sõsd ne kambã, n da wilgdẽ t’a nong-b lame, la a kelgd-b sõma. Biiblã wilgdame t’a Zezi ra mi n boonda kamb tɩ b wat a nengẽ. Daar a ye, a yeela woto: “Bɩ y bas kom-bõonegã tɩ b wa mam nengẽ.” (Luk 18:15, 16) Daar a to me, kamb n kaas n pẽg a Zezi n wilg tɩ b tẽed-a lame, tɩ neb zab kambã. La a Zezi pẽga kambã, n leok sẽn zabd-bã woto: “Yãmb nan ka karem gom-kãens sẽn yeta: ‘Yãmb paama pẽgr sẽn yit kom-bõoneg la kamb sẽn ket n yẽsemda noy pʋsẽ bɩ?’ ”—Matɩe 21:15, 16.

Wãn to la a Zezi mak-sõngã tõe n naf kambã?

A Zezi mak-sõngã wilgda kambã sẽn tõe n bao Wẽnnaam zood to-to. A Zezi sẽn wa n tar yʋʋm 12, a roagdbã ra wa n tɩ ‘yã-a-la Wẽnnaam doogã pʋgẽ t’a zĩ karen-saam dãmbã sʋka, n kelgd-b la a sokd-b bũmb wʋsgo.’ Nebã manesem yɩɩ wãna? “A Zezi bãngrã ne a leokrã yɛɛsa neb nins fãa sẽn wʋmã.” (Luk 2:42, 46, 47) La baa a Zezi sẽn da tar bãngr woto wã, a pa yɩ wuk-n-meng soab ye. Pʋd n kɩtame t’a ra waoogd a roagdbã. Biiblã yeelame t’a kell n “saka bãmb noore.”—Luk 2:51.

Y sã n dat kibay a taaba, bɩ y tɩ ges Biiblã sɩd yetame tɩ bõe? * sebrã sak 14 pʋgẽ.

[Tẽngr note]