Bõe yĩng tɩ nebã maand wẽnga?

YAA sɩd tɩ neb wʋsg sak n deegame tɩ d fãa yaa koangdba, n mi n tudg n maan kɛgr n wa maand d bãngẽ. La rẽ yĩnga d tõe n yeelame tɩ yaa d sẽn yaa koangdbã yĩng la neb wʋsg sẽn maand wẽng buud toor-toore, tɩ d mi n yãt wall d wʋmdẽ, pa rẽ bɩ d karemd sɛbã pʋsẽ wã bɩ?

Baa ne ãdem-biisã sẽn yaa koangdbã, neb wʋsg sak n deegame tɩ yɛl n be d sẽn pa segd n maan lae-lae, la tɩ ãdem-biig fãa tõe n modga a meng n da maan-b ye. Wʋsg me na n sak n deegame tɩ ned sẽn yeel bũmb n pa miẽ tɩ pa sɩda, ne ned sẽn yãk yam n yag ziri pa a yembr ye. Leb n yaa vẽeneg me tɩ ned sẽn yãk yõor ne yĩdgu, la ned sẽn yãk yam n kʋ a to pa yembr ye. Naoor wʋsgo, sẽn tʋmd-b tʋʋm-wẽnsã yaa neb sẽn vɩ ne b taabã, n wõnd b pa tar yell ye. La bõe yĩng tɩ b sakd n maand woto? Bõe yĩng tɩ nebã maand wẽnga?

 Biiblã wilgda rẽ võore. A wilgda bʋʋm toor-toor sẽn kɩt tɩ nebã maand yɛl b sẽn mi vẽeneg tɩ yaa wẽngã. Ad bʋʋm kẽer Biiblã sẽn wilgdi:

▪ “Pãng kɩtdame tɩ yam soab lebg yalma.”—KOƐƐG SOABA 7:7.

Biiblã gom-kãensã wilgdame tɩ wakat ninga, b sã n maan ned pãng tɩ loog noore, wall yell sã n sãag neda, tõe n kɩtame t’a maan a sẽn pa rate. Naongã la wẽgbã tõe n kɩtame tɩ kẽer wa sak n maan wẽng hal tɩ loog nugu, n tagsdẽ tɩ rẽ la yellã tɩɩm. Sebr a yembr (Terrorisme urbain [ãngil.]) yeelame tɩ “naoor wʋsgo, bʋʋm kãseng ning sẽn kɩtd tɩ ned wa lebg teeroristã, yaa a sẽn ne politikã taoor dãmba, nin-kãsems a taab la ra-kãag rãmbã sẽn namsd nebã tɩ wõnd tɩɩm kae, tɩ sãamd sũur wʋsgã.”

▪ “Ligdã nonglem yaa bõn-wẽnsã fãa yẽgre.”—1 TƖMOTE 6:10, KÃAB-PAALGÃ KOE-NOOGO.

Neb wʋsg yetame tɩ b sã n kõ ned ligd wʋsg n tʋlg t’a maan wẽnga, a pa tõe n pa sak ye. Neb kẽer sẽn wõnd b yaa nin-sõma sã n yã ligdi, wall b mik b na n bõna ligd wʋsgo, b tõe n tiig n toeema zʋg n lebg nin-wẽnse. Tags-y ligdã raab wʋsgã sẽn kɩtd tɩ nebã sakd n tʋmd tʋʋm ninsã fãa yelle. Kẽer fãadame, b zuudame wall b sakd n yãgsd yõy menga, pa rẽ bɩ b tʋmd tʋʋm-beed a taaba.

▪ “B ka yãgd n kao tʋʋm wẽns bʋʋd tao-tao ye. Yaa rẽ yĩng n kɩt tɩ ninsaalbã keng b sũyã n maand wẽngã.”—KOƐƐG SOABA 8:11.

Vɛrse kãngã tẽegd-d-la ãdem-biisã sẽn wae n tagsdẽ tɩ f sã n tõe n kɩɩs noor tɩ b pa yã n sɩbg-fo, yell kaeyã. Yaa woto la neb nins sẽn pa yaasd soayã zut bug-miidẽ wã bɩ ɛstop rãmbẽ wã, sẽn maand-b zãmb ɛgzame rãmbã sasa wã, sẽn zuud-b goosneema wã ligd wall b maand yɛl wẽnem sẽn yɩɩd rẽ wã fãa tagsda. Neb kẽer sã n kɩɩsd noyã tɩ b pa sɩbgd-ba, wall b pa yɛɛsd b na n wa yõk-ba, kɩtdame tɩ neb nins sẽn da sakd n tũud noyã me wa keng b sũy n kɩɩse. Sebr a ye (Arguments and Facts) yeela woto: “Wõnda yaa nin-wẽnsã sẽn mi n maan wẽng tɩ b pa sɩbg-bã n kɩtd tɩ neb kẽer sẽn da pa maand a buud wa maan yɛl wẽnem sẽn loog noorã.”

▪ “Ned kam fãa tara makr a meng wẽngã ratem sẽn makd yẽnda, n bẽt yẽnda. La wẽng ratem sã n dɩk pʋga, a rogda yel-wẽna.”—ZAK 1:14, 15.

Ned kae n pa mi n tar tags-wẽns ye. Daar ne a to fãa, d wʋmdame wall d yãt yɛl toɛy-toɛy sẽn tõe n kɩt tɩ d tʋlg n maan wẽnga. B ra yeela pipi kiris-nebã woto: “Yãmb nan ka paam makr baa a yembr sẽn nan ka mak ninsaal ye.” (1 Korẽnt dãmba 10:13) La baasgo, d sẽn na n yãk yam n maan a soabã bee ne ned kam fãa. D tõe n yɩɩ tao-tao n yiis tags-wẽngã d yamẽ, wa d sẽn tõe n bas-a be n tall a yell tagsg tɩ wa kɩt tɩ d maan wẽngã. A Zak sebrã vɛrse ning d sẽn sõdg zugẽ wã keoogd-d lame tɩ d sã n bas wẽng ratem t’a “rɩk pʋga,” d pa tõe n pa maan wẽng ye.

 ▪ “Ned sã n tũud yam dãmba, a na n lebga yam soaba. La ned sã n tũud yalma, a na n paama toogo.”—YELBŨNA 13:20.

Neb nins d sẽn tũudã tõe n maaneg-d lame wall b wã-do. Naoor wʋsgo, sãnda taab wall b tũud-n-taas sabab yĩng kɩtame tɩ b sak n maan bũmb b sẽn da pa na n maane, tɩ wa ne zu-loe-kãsemse. B sẽn bool tɩ “yalem” vɛrse ning d sẽn sõdg zugẽ wã pʋgẽ wã pa ned sẽn ka yam ye. Yaa ned sẽn pa tũud Wẽnnaam Gomdã saglse. D yaa kãsem tɩ d yaa biig wall bi-bɩɩg me, d sã n pa tũus d zo-rãmbã ne yam, dat n yeel tɩ d sã n pa tũ Biiblã saglsã n yãk-ba, yaa vẽeneg tɩ d na n wa “paama toogo.”

Vɛrse kãensã la b taab sẽn be Biiblã pʋgẽ wilgda bũmb ning sẽn kɩt tɩ neb wʋsgo, la baa neb sẽn wõnd b pa tar yell mi n tʋmd tʋʋm-wẽnse, tɩ pʋd n tõe n yɩ tʋʋm sẽn sãamd sũur wʋsgã. Yaa sɩd tɩ d sã n bãng bũmb ning sẽn tusd nebã tɩ b tʋmd tʋʋm-beed a woto wã, sõngdame. La rẽ yĩnga, d tõe n tẽeme tɩ wakat n wat tɩ wẽng pa na n le zĩnd bɩ? N-ye. Biiblã pa wilgd bũmb ning sẽn kɩt tɩ nebã maand wẽngã võor bal ye. A tara pʋlems toor-toor me sẽn wilgd tɩ rẽ fãa na n wa saame. Pʋlem-kãens la bʋse? Rẽ yĩnga wakat n sɩd wat tɩ wẽng ning fãa b sẽn maand dũniyã zugã na n sa bɩ? Sõsg ning sẽn pʋgdã leokda sogs-kãensã.