Yãmb yɩta pipi n waoogd y tẽed-n-taasã bɩ?

“Bɩ y nong taab wʋsg ne ba-biis nonglem. Yɩt-y pipi n waoogd taaba.”—ROM 12:10, NW.

1, 2. a) Sagl-bʋg la a Poll kõ lɛtr ning a sẽn tool Rom kiris-nebã pʋgẽ? b) Sogs-bʋs la d na n leoke?

TƲM-TƲMD a Poll sẽn gʋls lɛtr ning n tool Rom kiris-nebã pʋgẽ, a wilgame tɩ tõnd sẽn yaa kiris-nebã, tara yõod wʋsg tɩ d nong taab tigingã pʋgẽ. A wilgame tɩ d segd n nonga taab “tɩ zãmbg kaẽ ye.” A goma “ba-biir nonglem” yell me, n wilg tɩ d segd n “nonga taab wʋsgo.”—Rom 12:9, 10a, NW.

² La nong saam-biisã pa d sẽn na n nong-b d sũurẽ wã bal ye. Yaa ne d tʋʋmã la d segd n wilg nonglem kãnga. Yaa vẽeneg tɩ d sã n nong neda, a soabã pa tõe n bãnge, d sã n pa wilg rẽ ne d tʋʋm ye. Rẽ n so t’a Poll paas sagl-kãngã: “Yɩt-y pipi n waoogd taaba.” (Rom 12:10b, NW ) Waoogd taabã rat n yeelame tɩ bõe? Bõe yĩng tɩ tar yõod tɩ d yɩt pipi n waoogd d tẽed-n-taasã? Wãn to la d tõe n maan woto?

Waoogd f taabã rat n yeelame tɩ bõe?

3. Hebre wã ne gɛrkã gom-biis nins b sẽn lebg tɩ “waoogrã” rat n yeelame tɩ bõe?

³ Hebre wã gom-bil ning b sẽn lebg tɩ “waoogrã” võor meng yaa “zɩslem.” Ned b sẽn waoogd yaa ned b sẽn get t’a zɩsame, rat n yeel t’a tara yõodo. B mi n lebgda hebre wã gom-bi-kãng me tɩ “naam” bɩ ziiri, tɩ woto wilgd tɩ b sɩd nanda ned ning b sẽn waoogdã. (Sɩng. 45:13) Gɛrkã gom-bil ning b sẽn lebg tɩ “waoogrã” me rat n yeelame tɩ nanebo, yõodo, sẽn yaa sõma. (Luk 14:10) Vẽenega, neb nins tõnd sẽn waoogdã yaa neb sẽn tar yõod wʋsg tõnd nifẽ.

4, 5. Wãn to la naneb ne waoogr tũud taaba? Rɩk-y makr n wilg rẽ.

⁴ Waoogd d taabã rat n yeelame tɩ bõe? Sɩngda ne d sẽn get d taabã to-to wã. Tõnd sẽn get d taabã to-to wã n na n kɩt tɩ d waoog-b wall d pa waoog-ba. D tõe n yeelame tɩ d sã n deng n nand d saam-biisã, d na n tõog n waoogd-b lame.

⁵ Rẽ yĩnga, kiris-ned tõe n talla waoogr hakɩk ne a tẽed-n-taasã, waoogrã sã n pa yit a sũurẽ sɩda? (3 Zã 9, 10) Sẽn na yɩl tɩ tɩɩg tõog n bɩ sõma la a kaoose, a segd n kɩɩ yẽg sõma la a be zĩ-sõngẽ. D waoogrã me sã n pa yit d sũurẽ, pa waoogr hakɩka, la a pa na n kaoos me ye. Wala tɩɩg sẽn pa be zĩ-sõngẽ sẽn tõe n wa kʋɩ wã, d waoogrã sã n pa yit d sũurẽ wã, kaoosg zugẽ, d wat n basa d taabã waoogre. Rẽnd a Poll sẽn yeel bũmb ning nand t’a saglg kiris-nebã tɩ b waoogd taabã pa lingr ye. A reng n yeela woto: “Bɩ nonglem zĩnd tɩ zãmbg kaẽ ye.”—Rom 12:9; karm-y 1 Pɩɛɛr 1:22.

D waoogd d taabã Wẽnnaam sẽn naan wa b meng wẽnegã

6, 7. Bõe yĩng tɩ d segd n waoogd d taabã?

⁶ Sẽn mik tɩ yaa d sẽn na n nand d taabã ne d sũur fãa la na n kɩt tɩ d waoog-bã yĩnga, d pa segd n yĩm Wẽnnaam Gomdã sẽn wilg bʋʋm nins sẽn kɩt tɩ d segd n waoogd d saam-biisã fãa wã ye. Bɩ d gom bʋʋm kãens a yiib yelle.

⁷ Ninsaalbã pa wõnd bõn-naands a taabã sẽn be dũniyã zugã ye. B naana ninsaal “wa  Wẽnnaam wẽnego.” (Zak 3:9) Rẽ n so tɩ d tõe n dɩk Wẽnnaam togs-n-taar nonglmã, yamã la tɩrlmã wɛɛngẽ wã. D ges bũmb a to d Naandã sẽn kõ-do. Yɩɩl-gʋlsdã ra yeela woto: “Zusoaba, . . . , yãmb [n] kɩt tɩ y waoogr loog saase. . . . Yãmb n kɩt tɩ [ninsaal] paoog bilf bala n ka ta yãmb ye. Yãmb fõgna yẽ zug ne ziir la waoogre.” (Yɩɩl 8:2, 5, 6; 104:1) * Wẽnnaam naana ninsaala, n kɩt t’a segd ne waoogr la ziiri. Rẽnd d sã n waoog d to, rat n yeelame tɩ d sak n deegame tɩ yaa a Zeova n kõ ninsaalbã waoogr la ziiri. Masã, d tara bʋʋm kãsems sẽn kɩt tɩ d segd n waoogd nebã fãa. La rẽ yĩnga, d pa segd n waoogd d tẽed-n-taasã n yɩɩd sɩda?—Zã 3:16; Gal. 6:10.

D yaa zak a ye neba

8, 9. Bʋʋm bʋg sẽn kɩt tɩ d segd n waoogd d tẽed-n-taasã la a Poll wilg-yã?

⁸ A Poll wilga bʋʋm a to sẽn kɩt tɩ d segd n waoogd taabã. Nand t’a sagl kiris-nebã tɩ b waoogd taabã, a yeela woto: “Bɩ y nong taab wʋsg ne ba-biis nonglem.” Gɛrkã gom-bil ning b sẽn lebg tɩ “nong taab wʋsgã” gomda zak neb sẽn zemsd taaba, n nong taab la b teend taab yelle. Rẽnd a Poll sẽn tũnug ne gom-bi-kãnga wã, a wilgame tɩ tigingã nebã zems-n-taarã segd n yɩɩ wa zems-n-taar sẽn be zak a ye neb sẽn nong taab sʋka. (Rom 12:5) Sẽn paase, d pa segd n yĩm t’a Poll ra gomda ne kiris-neb sẽn paam vʋʋsem sõngã zaeebo, n lebg a Zeova sẽn yaa b fãa Ba wã kamb ye. Rẽnd d tõe n yeelame tɩ nin-kãensã sɩd yaa zak a ye neba. Woto kɩtame t’a Poll wakatẽ kiris-neb nins sẽn da paam vʋʋsem sõngã zaeebã ra tar bʋʋm n na n waoogd taaba. Yaa woto me ne rũndã-rũndã kiris-neb nins sẽn paam vʋʋsem sõngã zaeebã.

⁹ La yaa wãn ne neb nins b sẽn boond tɩ “piis a taabã” yẽ? (Zã 10:16) Baa b sẽn nan pa paam n lebg Wẽnnaam kambã, b tõe n boonda taab tɩ saam-biis la saam-bi-pogse, bala b yaa kiris-neb sẽn be dũniyã gill zug n zemsd taab wa zak a ye neba. (1 Pɩɛ. 2:17; 5:9) Nin-kãensã sã n wʋmd b sẽn boond taab tɩ “saam-biis” bɩ “saam-bi-pogsã” võore, rat n yeelame tɩ bãmb me tara bʋʋm n segd n waoogd b tẽed-n-taasã ne b sũyã fãa.—Karm-y 1 Pɩɛɛr 3:8.

Bõe yĩng tɩ tar yõod tɩ d waoogd d taabã?

10, 11. Bõe yĩng tɩ tar yõod tɩ d nand d taabã la d waoogd-ba?

¹⁰ Bõe yĩng tɩ tar yõod tɩ d waoogd d taabã? Ad bʋʋm a ye: D sã n waoogd d saam-biisã la d saam-bi-pogsã, d sõngdame tɩ zems-n-taar be tigingã pʋgẽ, t’a pʋgẽ zĩndg me be yamleoogo.

¹¹ D sak n deegame tɩ d sẽn yaa kiris-nebã, yaa d sẽn na n tar zood sõma ne a Zeova, t’a vʋʋsem sõngã me sõngd tõnd la d paamd pãng tẽebã pʋgẽ n yɩɩda. (Yɩɩl 36:8; Zã 14:26) La d sã n paam me tɩ d tẽed-n-taasã wilg tɩ b nand-d lame, kengda d raoodo. (Yel. 25:11) Ned sã n maan bũmb wall a yeel gomd ne pʋ-peelem tɩ wilgd t’a waoogd-d lame, noom-d-la wʋsgo. Paasd-d-la pãng tɩ d rat n ket n kẽnd vɩɩmã sor zug ne sũ-noogo. Yaa vẽeneg tɩ yãmb zoe n yãa a buudu.

12. Bõe la tõnd ned kam fãa tõe n maan tɩ kɩt tɩ nonglem la zems-n-taar zĩnd tigingã pʋgẽ?

¹² A Zeova sẽn mi tɩ d fãa ratame tɩ d taabã waoogd-dã yĩnga, a sagendã tõnd a Gomdã pʋgẽ tɩ d ‘waoogd taaba.’ (Rom 12:10; karm-y Matɩe 7:12.) Kiris-neb nins fãa sẽn sakd sagl-kãngã sẽn tar yõod wakat fãa wã sõngdame tɩ kiris-nebã zems-n-taarã la b nonglmã pãng paasdẽ. Rẽnd yɩta sõma tɩ ned kam fãa sok a meng woto: “Wakat  bʋg la m yeel gomd wall m maan bũmb sẽn wilgd tɩ m waoogda saam-biig wall saam-bi-poak ning ne m sũurã fãa?”—Rom 13:8.

D fãa segd n yɩta pipi n waoogd d taabã

13. a) Tigingã pʋgẽ, ãnd dãmb n segd n yɩt pipi n waoog b taabã? b) Bõe la a Poll goam nins sẽn be Rom dãmb 1:7 wã wilgda?

¹³ Ãnd dãmb n segd n yɩt pipi n waoogd b taabã? Biiblã wilgame tɩ tigingã pʋgẽ kãsem dãmbã segd n yɩɩ “mamsg” n kõ tigingã neba. (1 Pɩɛ. 5:3) Sɩd me, kãsem dãmbã kõta mak-sõng tʋʋm toor-toor pʋsẽ. B sẽn yaa bãgrã pe-kɩɩmbã yĩnga, b segd n kõta mak-sõngo, n yɩt pipi n waoogd b tẽed-n-taasã, la kãsem dãmb a taabã me. Wala makre, b sã n wa tigim taab n na n welg yell sẽn be tigingã pʋgẽ, b segd n maagda b yĩns n kelgd b ned kam fãa, tɩ wilgdẽ tɩ b waoogda taaba. Sẽn paase, b sã n wa rat n dɩk sardo, b fãa segd n nanda b taabã tagsgã, tɩ wilgdẽ tɩ b waoogda taaba. (Tʋʋ. 15:6-15) La d segd n tẽegame tɩ pa Rom tigingã kãsem dãmbã bal la a Poll gʋls a lɛtrã n tool ye. Yaa tigingã neb fãa yĩnga. (Rom 1:7) Rẽnd saglg ning sẽn yet tɩ d yɩt pipi n waoogd d taabã paka tõnd fãa rũndã-rũndã.

14. a) Rɩk-y makr n wilg welgr ning sẽn be waoog f to ne yɩ pipi n waoog f to wã sʋka. b) Sok-bʋg la d segd n sok d menga?

¹⁴ A Poll saglgã leb n wilgda tõnd bũmb a to. A pa sagl a tẽed-n-taas nins sẽn da be Rommã tɩ b waoogd taab bal ye. A yeelame tɩ b yɩt pipi n waoogd b taabã. Bõe yĩng tɩ waoog f to yaa toor ne yɩ pipi n waoog f to? D rɩk makre. Rẽ yĩnga karen-saamb na n sagla karen-bi-bɛd tɩ b zãms sebr kareng sɩda? Ayo. Bala b zoe n mii karengo. A sẽn na n maan bũmb ning yaa a sõng-b tɩ b bãng kareng sõma n paase. Woto me, kiris-neb hakɩkã sẽn nong taabã zoe n yaa bũmb sẽn kɩt tɩ b yaa toor ne neb a taabã. Woto kɩtame tɩ b waoogd taaba. (Zã 13:35) La wala karen-bi-bɛd sẽn tõe n modg n bãngd kareng sõma n paasdẽ wã, tõnd me tõe n modgame n yɩt pipi n waoogd d taabã tɩ d nonglmã paasdẽ. (1 Tes. 4:9, 10) Yaa tõnd ned kam fãa la b sẽn yet tɩ d yɩt pipi n waoogd d taabã. Woto yĩnga d segd n soka d meng woto: ‘Mam yɩta pipi n waoogd m taabã tigingã pʋgẽ bɩ?’

D waoogd “naong rãmbã”

15, 16. a) D sã n wilgd tɩ d waoogda d taabã, ãnd dãmb la d pa segd n yĩmi, la bõe yĩnga? b) Bõe n na n wilg d sã n sɩd waoogda d saam-biisã la d saam-bi-pogsã ne d sũy fãa?

¹⁵ D sã n dat n wilg tɩ d waoogda d taabã, ãnd dãmb la d pa segd n yĩm tigingã pʋgẽ? Wẽnnaam Gomdã yeta woto: “Ned sã n sõng naong rãmba, a bĩngda Zusoabã nengẽ. Yaa bãmb n na n yao a tʋʋm sõma wã fãa.” (Yel. 19:17) Gom-kãensã segd n kɩtame tɩ d maan bõe, d sẽn modgd n dat n yɩt pipi n waoogd d taabã?

¹⁶ Yaa vẽeneg tɩ neb wʋsg waoogda neb nins tarem bɩ b naam sẽn yɩɩd bãmb rẽndã, n yaool n pa nand neb nins bãmb sẽn tagsd tɩ b pa ta bãmbã, wall b pʋd n paoogd-ba. La a Zeova yẽ pa woto ye. A meng yeela woto: “Mam waoogda neb nins sẽn waoogd maamã.” (1 Sãm. 2:30; Yɩɩl 113:5-7) A Zeova waoogda neb nins fãa sẽn maand a raabã la b waoogd-a wã. A pa paoogd “naong rãmbã” ye. (Karm-y 1 Sãmwɛll 2:8; 2 Kib. 16:9) Yaa vẽeneg tɩ d rat n dɩka a Zeova togs-n-taare. Rẽnd d sã n dat n bãng d sã n sɩd waoogda d taabã ne pʋ-peelem, d ned kam fãa segd n soka a meng woto: “Manesem bʋg la mam tar ne neb nins sẽn pa tar tʋʋmd tigingã pʋgẽ, wall tarem sẽn pa waoogã?” (Zã 13:14, 15) D sẽn na n leok sok-kãngã to-to wã n na n wilg d sã n sɩd waoogda d taabã ne d sũyã fãa.—Karm-y Filip dãmb 2:3, 4.

 D rɩk d sẽkã n kẽnd n get d taabã n wilg tɩ d waoog-b lame

17. Sẽn yɩɩd fãa, wãn to la d tõe n yɩt pipi n waoogd d taabã, la bõe yĩng tɩ yaa woto?

¹⁷ Sẽn yɩɩd fãa, wãn to la d tõe n yɩt pipi n waoogd tigingã nebã fãa? Yaa d sẽn na n dɩkd d sẽkã n kẽnd n get-ba. Bõe yĩng tɩ yaa woto? Tõnd sẽn yaa kiris-nebã, d tara tʋʋm wʋsgo, tɩ tigingã pʋgẽ tʋʋm toor-toorã sẽn tar yõodã tʋmb me rɩkd d sẽka. Rẽnd d bee bʋʋm la d sẽn pa reemd ne d sẽkã. D miime me tɩ d pa segd n dat tɩ d saam-biisã wall d saam-bi-pogsã rɩk b sẽkã fãa sẽn na yɩl n sõng tõnd ye. D sã n paam me tɩ d tẽed-n-taasã ning b yamẽ tɩ b sã n wa rat tɩ tõnd sõng-ba, b pa segd n gũud tɩ d rɩk d sẽkã fãa, noom-d lame.

18. D sã n sakd ne yamleoog n dɩkd sẽk n kẽnd n get d tẽed-n-taasã, bõe la rẽ wilgda?

¹⁸ La baasgo, tõnd fãa (sẽn yɩɩda, neb nins sẽn yaa pe-kɩɩmb tigingã pʋgẽ wã) miime tɩ d sã n sak ne yamleoog n bas yɛl a taab maaneg n kẽnd n get d tẽed-n-taasã, d wilgdame tɩ d waoogd-b lame. Bõe yĩnga? Bala d sã n maan woto, yaa wa d sẽn yet d saam-biisã woto: “Yãmb tara yõod wʋsg mam nifẽ, tɩ kɩt tɩ m get tɩ tara yõod wʋsg tɩ m bas m sẽn da maand bũmb ningã sẽn na yɩl n wa ges-yã.” (Mark 6:30-34) Tõnd sã n pa rat n sak n bas d tʋʋmã sẽn na n yɩl n tɩ ges d saam-biisã, tõe n kɩtame tɩ b tags tɩ b pa tar yõod tõnd nifẽ ye. La yaa sɩd tɩ wakat ninga, d tõe n maanda bũmb sẽn tar yõod wʋsgo, tɩ d pa segd n bas bõn-kãng maaneg ye. La baasgo, yaa d sẽn na n sakd ne yamleoog n basd yɛl a taab maaneg n kẽnd n get d taabã wall d sẽn pa na n sakd n maand woto wã n wilgd tõnd sã n sɩd waoogda d saam-biisã la d saam-bi-pogsã ne d sũurã fãa bɩ d pa waoogd-ba.—1 Kor. 10:24.

D yãk yam n yɩt pipi n waoogd d taabã

19. Tõnd sẽn na n kẽnd n get d tẽed-n-taasã toor sẽn ka be, bõe la d tõe n maan n wilg tɩ d waoogd-b lame?

¹⁹ Yɛl a taab n be sẽn tar yõod wʋsg tõnd sẽn tõe n maan n wilg tɩ d waoogda d tẽed-n-taasã. Wala makre, d sã n wa rɩk sẽk n tɩ get d tẽed-n-taasã, d segd n maaga d yĩng n kelg-b me. Rẽ wɛɛngẽ, a Zeova kõo tõnd mak-sõngo. Yɩɩl-gʋlsd a Davɩɩd ra yeela woto: “Zusoabã geta nin-tɩrse, la bãmb tʋb wʋmda bãmb kelems b sẽn dat sõngr wakate.” (Yɩɩl 34:16) D sã n gũusd n get d tẽed-n-taasã yɛl sẽn yaa to-to wã, la d maagd d yĩng n kelgd-ba, sẽn yɩɩd fãa, d saam-biig sã n wa kõs-d sõngre, wilgdame tɩ d modgdame n dɩkd a Zeova togs-n-taare. D sã n maand woto, d waoogd-b lame.

20. Waoogd d taabã wɛɛngẽ, bõe la d pa segd n yĩmi?

²⁰ Wa d sẽn yã wã, d pa segd n yĩm bʋʋm nins sẽn kɩt tɩ d segd n waoogd d tẽed-n-taasã ne d sũur fãa wã ye. Sẽn paase, d baood weer n maand bũmb n wilgd tɩ d yɩta pipi n waoogd nebã fãa, baa naong rãmbã. D sã n maand woto, d kɩtame tɩ zems-n-taar la nonglem ning sẽn be tigingã pʋgẽ wã pãng paasdẽ. Woto yĩng bɩ d fãa modg n waoogd d taabã, la sẽn yɩɩd fãa, d yɩt pipi n maand woto. Yãmb yãka yam n na n maand woto bɩ?

[Tẽngr note]

Y tẽrame bɩ?

• Wãn to la naneb ne waoogr tũud taaba?

• Bʋʋm bʋs n kɩt tɩ d segd n waoogd d tẽed-n-taasã?

• Bõe yĩng tɩ tar yõod tɩ d waoogd taaba?

• Wãn to la d tõe n waoogd d tẽed-n-taasã?

[Zãmsgã sogsgã]