NA MAAN yʋʋm 2500 woto, Gɛrɛs kʋdemd yɛl-mit a Herodot togsa kibare, n gom Ezipt nebã yell n yeel woto: “Rakãag-rãmb sã n da maan kibsa, b sẽn wat n dɩ n sa, rao n yikd ne koglg n gilg n wilg nebã. Koglgã pʋgẽ, b sagenda raoog b sẽn pees n ning pãntiir tɩ wõnd ninsaala. A woglmã zemsda metr wall metr pʋɩ-sʋka. Raoã wilgda ned fãa rẽ n yet woto: ‘Yũ la f kɩdme. La ges yãoã tɩ f sã n ki, f lebgda woto.’”

Pa Ezipt nebã bal n tagsd woto vɩɩmã la kũumã zug ye. Rũndã-rũndã, tẽns kẽer pʋsẽ, nebã wae n wẽeda yel-bũnd n yetẽ tɩ d “rɩ la d yũ, la d kɩdme.” La sã n mik tɩ ned sã n ki, saame, sẽn são yaa a sẽn na n noog a yõor tɩ seke. Rẽnd ka yõod tɩ d mao n yɩ nin-sõng ye. Kũum sã n yaa bũmb fãa tɛka, sẽn vɩ-b n pa tagsd beoog yellã bee bʋʋm. Yaa wa tʋm-tʋmd a Poll sẽn yeelã. A goma tagsg ning sẽn pa tẽed-b kũum vʋʋgrã sẽn tarã yelle, n yeel woto: “Kũum sã n ka vʋʋgdẽ, ‘bɩ d rɩ la d yũ, tɩ bõe, beoogo, tõnd na n kiime.’”—1 Korẽnt dãmba 15:32.

Yaa vẽeneg t’a Poll da pa tẽed tɩ ned sã n ki, a yell saa wakat fãa yĩng ye. A ra kɩsa sɩd tɩ ned sẽn ki tõe n vʋʋgame, n tõe n paam n vɩɩmd wakat sẽn kõn sa. Yaa bũmb sẽn maan tɩ ned pa tõe n kɩɩs n kɩt t’a Poll da tẽed woto: Yaa a Zezi Kirist vʋʋgrã. * Sɩd me, a Zezi vʋʋgrã n yɩ bõn-kãseng ning sẽn keng pipi kiris-nebã tẽeb n yɩɩda.

La wãn to la a Zezi vʋʋgrã tõe n naf tõndo? Bõe n kɩt tɩ d miẽ t’a sɩd vʋʋgame? D sã n ges a Poll sẽn gom dẽ yell to-to ne Korẽnt kiris-nebã, d paamda sogs-kãensã leoore.

Korẽnt tigingã neb kẽer n da pa wʋmd b sẽn segd n tẽ kũum vʋʋgrã võor sõma, tɩ b  sãnda pʋd n pa tẽed vʋʋgrã ye. Tʋm-tʋmd a Poll pipi lɛtr ning a sẽn tool-bã pʋgẽ, a wilg-b lame tɩ kũum vʋʋgr sã n kae, sɩd yaa bʋko, n yeel woto: “Kũum vʋʋgr sã n ka be, dall Kirist me ka vʋʋg ye. La Kirist sã n ka vʋʋge, tõnd koe-moonegã yaa zaalem, la yãmb tẽebã me yaa zaalem. Kũum sã n ka vʋʋgdẽ, dall tõnd lebga Wẽnnaam ziri kaset-dãmba. . . . Yãmb tẽeb yaa zaalem, la yãmb ket n be y yel-wẽnã pʋgẽ, la neb nins sẽn ki Kirist pʋgẽ wã me menemame.”—1 Korẽnt dãmba 15:13-18.

Ned pa tõe n kɩɩs a Poll sẽn togs bũmb ningã ye. A yeelame tɩ kũum vʋʋgr sã n ka be, dall Kiristã sẽn ki wã me ka vʋʋg ye. La Kiristã sã n pa vʋʋge? Sã n yaa rẽ, koe-noogã mooneg pa tar yõod ye. Bala na n yɩɩ ziri yagbo. Sẽn paase, Kirist vʋʋgrã bee bõn-kãsems nins kiris-nebã sẽn tẽed sʋka. Kiristã sã n da pa vʋʋge, Biiblã zãms-kãsemsã kẽer pa na n tall võor ye. Wala makre, Biiblã sẽn yet bũmb ning Wẽnnaam naamã wɛɛngẽ wã, a yʋʋrã, a Rĩungã, la tõnd fãagrã wɛɛngẽ wã. Koɛɛg ning a Poll ne tʋm-tʋmdb a taabã sẽn moonã me ra na n yɩɩ zaalem.

La pa rẽ bal ye. Kiristã sã n da pa vʋʋge, kiris-nebã tẽeb me ra na n yɩɩ zaalem, bala ra na n tika bũmb sẽn pa sɩd zugu. Sẽn paase, a Poll ne a taabã sẽn da moond t’a Zezi vʋʋgame la tɩ yaa Wẽnnaam a Zeova n vʋʋg-a wã ra na n yɩɩ ziri. B sẽn yeel tɩ Kiristã “kii tõnd yel-wẽnã yĩngã” me ra na n yɩɩ ziri, bala Fãagdã meng sã n pa vʋʋge, a yɩta wãn n fãag a taaba? (1 Korẽnt dãmba 15:3) Rẽnd kiris-neb nins sẽn ki, tɩ kẽer yaa b tẽebã yĩng la b kʋ-bã belga b mense.

A Poll paasa woto: “Sã n yaa vɩ-kãngã pʋgẽ yĩng bal la tõnd be ne Kiristã, ned ka be t’a nimbãaneg le ta tõnd ye.” (1 Korẽnt dãmba 15:19, Kãab-paalgã Koe-noogo) A Poll ne kiris-neb a taab sẽn da tẽed kũum vʋʋgrã la bark ning rẽ sẽn na n wa ne wã yĩnga, b sak n bõna b paoongo, b paama namsg la zu-loees a taaba, la b gẽneg b yõy menga. Kũum vʋʋgr sã n da kae, woto fãa ra na n yɩɩ faoore!

A Poll da kɩsa sɩd tɩ kiris-nebã sẽn tẽed bũmb ninsã fãa yaa sɩda. A ra miime t’a Zezi vʋʋgame, n wilg Korẽnt kiris-nebã bũmb ning sẽn kɩt t’a tẽed rẽ wã, n yeel woto: “Kirist kii tõnd yel-wẽnã yĩnga, a wa Gʋlsg Sõamyã sẽn yetã. La b muma bãmba, la rasem a tãab raare, bãmb vʋʋga wa Gʋlsg Sõamyã sẽn yeelã. La bãmb vẽnega b meng ne a Sefas n yaool n vẽneg b meng ne piig la a yiibã. * Rẽ poore, bãmb vẽnega b meng ne ba-biis sẽn yɩɩd kobs-nu, la sẽn yɩɩd pʋɩ-sʋk ket n vɩɩme, la kẽer kiime. Dẽ poore, bãmb vẽnega b meng ne a Zak n yaool n vẽneg b meng ne tʋm-tʋmdbã fãa. La sẽn pʋgl bãmb fãa, b yaool n vẽnega b meng ne maam.”—1 Korẽnt dãmba 15:3-8.

A Poll reng n wilgame t’a kɩsa sɩd tɩ Kirist kii tõnd yel-wẽnã yĩnga, tɩ b mum-a lame, la t’a vʋʋgame. Bõe yĩng t’a ra bas a yam ne rẽ? Pipi, yaa tɩ neb wʋsg n maan kaset t’a Zezi vʋʋgame. A vʋʋgrã poore, a vẽnega a meng ne neb kẽere, baa a Poll menga. A le vẽnega a meng ne neb sula, la kʋʋng sẽn ta neb 500 menga. Nin-kãens wʋsg sẽn wa n wʋm t’a Zezi vʋʋgame wã, b ra pa tẽed ye. (Luk 24:1-11) A Poll sẽn wa n gomdã tɩ sẽn maan-b kasetã wʋsg ra ket n vɩɩme, tɩ sẽn dat-a tõe n tɩ sok-ba. (1 Korẽnt dãmba 15:6) Nin-yɛng bɩ neb a yiib kaset kɩɩsg yaa nana. La ãnda n tõe n kɩɩs sẽn yɩɩd neb 500 goama?

Tẽeg-y me t’a Poll yeelame t’a Zezi kũumã, a mumbã la a vʋʋgrã fãa yɩɩ “wa Gʋlsg Sõamyã sẽn yeelã.” Yɩɩ bãngr-goam sẽn gomd Mesi wã yell n pidsi, tɩ wilgd vẽeneg t’a Zezi la Mesi wã.

 Baa neb wʋsg sẽn maan kaset t’a Zezi vʋʋgame tɩ Gʋlsg Sõamyã me wilgd rẽ wã, neb n kɩɩse, tɩ kẽer ket n kɩɩsdẽ. Sãnda yeelame t’a karen-biisã soos n dɩka kũumã n tɩ solge, n yaool n yetẽ t’a vʋʋgame. La Rom sodaasã sẽn da gũud yaoogã, karen-biisã ra pa tõe n maan-b pãng wall b zems ne-b n dɩk kũumã ye. Kẽer me yeelame tɩ pa a Zezi mengã la nebã sẽn yã wã, tɩ yaa bõn-makr bala. La sẽn yet-b rẽ wã yĩmame t’a Zezi vẽnega a meng ne neb wʋsgo, la tɩ pa yɩ wakat yɛng bal ye.

Ne rẽ fãa, neb n ket n yetẽ t’a Zezi karen-biisã yagame n belg wʋsg tɩ b tẽ. La woto maaneg ra pa nafd karen-biisã ye. B sẽn da kõt kaset t’a Zezi vʋʋgame wã ra kɩtame tɩ nebã yaand-ba, n namsd-b la b kʋ kẽer menga. Sã n da yaa ziri, b na ket n moondẽ sɩda? Sẽn paase, yɩɩ Zerizalɛm la b sɩng kasetã kũuni. Be me la b bɛɛbã sẽn da baood bʋʋm baa yaa bilf n na n sɩbg-bã ra be.

Yaa karen-biisã sẽn da kɩs sɩd tɩ b Zusoabã vʋʋgame wã la b sẽn da tar raood n moondẽ, baa b sẽn da namsd-b wʋsgã. Kũum vʋʋgrã tẽeb tara yõod wʋsg ne kiris-nebã. Pipi kiris-nebã pa gẽneg b yõyã n na n kõ kaset tɩ b kʋʋ karen-saam-sõng bal ye. B maana woto n na n wilg t’a Zezi vʋʋgame, la tɩ rẽ wilgdame t’a yaa Kiristã sẽn yaa Wẽnnaam Biigã, ned sẽn sɩd zĩnd n tall tõog wʋsgo, n teel-b la a wilg-b sore. A vʋʋgrã yaa kaset tɩ bãmb me kũum poore, b na n wa vʋʋgame. Vẽenega, a Zezi sã n da pa vʋʋge, kiris-neb ra pa na n zĩndẽ ye. A sã n da pa vʋʋge, tõe tɩ d ra pa na n wʋm a kibar meng ye.

La wãn to la Kiristã vʋʋgrã tõe n naf tõnd rũndã-rũndã?