A ZEZI vʋʋgrã pa bũmb sẽn maan pĩnd wẽndẽ bala, la sẽn pa tar yõod ne tõnd rũndã-rũndã ye. Ad tʋm-tʋmd a Poll sẽn yeel dẽ wɛɛngẽ: “Kirist vʋʋgame, bãmb yaa kũum vʋʋgr dẽenem soaba. Tɩ bõe, a wa ned a yembr sẽn wa ne kũumã, woto me, ned a yembr waa ne kũum vʋʋgre. La a wa fãa sẽn kiid a Ãdem pʋgẽ wã, woto me, fãa na n paama vɩɩm Kirist pʋgẽ.”—1 Korẽnt dãmba 15:20-22.

A Zezi vʋʋga yʋʋmd 33 Nizã kiuug rasem 16 daarã. Yʋʋmd fãa, ra-kãng sã n da ta, zʋɩf-rãmbã segd n yãka b koodã dẽenem biis n tɩ kõ a Zeova Zerizalɛm wẽnd-doogẽ wã. A Poll sẽn bool a Zezi tɩ dẽenem soabã wilgdame tɩ neb a taab n na n vʋʋge.

A wilga bũmb ning sẽn na n maan a Zezi vʋʋgrã maasem yĩngã me n yeel woto: “Wa ned a yembr sẽn wa ne kũumã, woto me, ned a yembr waa ne kũum vʋʋgre.” A Ãdem yel-wẽndã sẽn long tõndã kɩtame tɩ d fãa kiidẽ. La a Zezi sẽn yɩ ned sẽn zems zãng n ki ãdem-biisã yel-wẽn yĩngã, a paka sor tɩ ne kũum vʋʋgrã maasem, b tõe n wa paam b mens ne yel-wẽnã la kũumã. A Poll kʋmsa woto fãa Rom dãmb 6:23 wã pʋgẽ n yeel woto: “Yel-wẽnã yaood yaa kũum, la Wẽnnaam kũunã yaa vɩɩm sẽn ka sɛta, tõnd Zusoab a Kirist Zezi maasem yĩnga.”

A Zezi meng bilga a kũumã la a vʋʋgrã sẽn tõe n naf tõnd to-to wã, n yeel woto: “Wa a Moiiz sẽn zẽk waafã weoogã pʋgẽ wã, woto me, a yaa tɩlae tɩ b zẽk Ninsaal Biigã, tɩ ned ning fãa sẽn tẽed bãmb paam vɩɩm sẽn ka sɛta. Tɩ bõe, Wẽnnaam nonga dũniyã, hal tɩ b kõ b Biig sẽn ka to, tɩ ned ning fãa sẽn tẽed bãmb kõn sãam ye, la a na paam vɩɩm sẽn ka sɛta.”—Zã 3:14-16.

Mams-y n ges-y yãmb sẽn na n paam n vɩ wakat sẽn kõn sa, tɩ toog la namsg wall sũ-sãoong pa le beẽ ye. (Wilgri 21:3, 4) Ad na yɩ sũ-noog tɛkẽ! Biibl-mit a yembr yeela woto: “D sã n yã yaado, d tõe n tẽegame tɩ vɩɩmã yaa koɛɛga, la kũum vʋʋgrã wilgdame tɩ kũum me tara tɛka.” Vẽenega, a Zezi vʋʋgrã na n waa ne vɩɩm!