1. Nand tɩ sɩlg yɩke, bõe yĩng t’a sofɛɛrã segd n ges bũmb toor-toore?

NAND tɩ sɩlg yɩke, a sofɛɛrã tara sebr sẽn wilgd bũmb toor-toor sẽn yɩɩd bãmb 30 a sẽn segd n ges sã n yaa sõma. A sã n pa maag a yĩng n ges bõn-kãens fãa n yaool n yɩke, tõe n yɩɩ sabab t’a lʋɩ. Baa ned sã n sɩng n wẽnda sɩlg na maan yʋʋma, yaa tɩlae t’a reng n maan woto.

2. Bõe la kiris-ned segd n gũusd n getẽ?

² Wa sɩlg sofɛɛre, bũmb toor-toor la yãmb me segd n get n bãngd y tẽebã sã n na n talla pãng baa zu-loees wakate. D reega lisg tɩ nan pa kaoos wall d tũuda Wẽnnaam na maan yʋʋma, d segd n ket n feesda d tẽebã. D sã n pa gũusd n get d tẽebã pãng sẽn yaa to-to, zu-loɛɛg ning tõe n wa sãama tõnd ne a Zeova zoodã. Biiblã sagend-d-la woto: “Ned ning sẽn tẽed t’a yasame, bɩ a gũus n da wa lʋɩ ye.”—1 Kor. 10:12.

3. Bõe la Galat kiris-nebã ra segd n maane?

³ Galat kiris-nebã ra segd n feesda b mens n get b tẽebã sã n tara pãnga, la b wilg tɩ b nanda lohorem ning Wẽnnaam sẽn kõ-bã. A Zezi maoongã paka sor tɩ sẽn tar-b tẽeb ne Wẽnnaamã tõe n paam n lebg Wẽnnaam kamba. (Gal. 4:9) La sẽn na yɩl n kell n tall zood sõma ne Wẽnnaam, Galat kiris-nebã ra segd n basa zʋɩf-rãmbã sẽn tẽed bũmb ninsã. B ra tẽedame tɩ b segd n tũ a Moiiz tõogã. La bu-zemsã neb ra zɩ n tũ tõogã meng ye. Zʋɩf-rãmbã ne bu-zemsã neb fãa ra segd n mao n bãnga Wẽnnaam n paase. B ra segd n sak n deegame tɩ Wẽnnaam pa le baood tɩ ned tũ a Moiiz tõogã n yaool n yɩ tɩrg a nifẽ ye.

4, 5. Sagl-bʋg la a Poll kõ Galat kiris-nebã, la bõe yĩng t’a saglgã tar yõod ne-do?

⁴ Saglg ning tʋm-tʋmd a Poll sẽn kõ Galat kiris-nebã a lɛtrã pʋgẽ wã tẽegda tõnd fãa tɩ d pa segd n bas zãmsg ning d sẽn paam Biiblã pʋgẽ wã tũub ye. D pa segd n le bao bũmb nins d sẽn bas poorẽ wã ye. Lɛt-kãng a Zeova sẽn vẽneg tʋm-tʋmd a Poll t’a gʋlsã tõe n sõnga tõnd fãa tɩ d kell n tũ Wẽnnaam sõma.

⁵ Segdame tɩ tõnd ned kam fãa tẽegd a sẽn maan to-to n lebg a Zeova Kaset soabã. Sẽn na yɩl n maan dẽ, bɩ d sok d mens woto: Rẽ yĩnga mam ket n tẽra bũmb nins m sẽn maan n tõog n deeg lisgã bɩ? Rẽ yĩnga m tẽra m sẽn maan to-to n bãng Wẽnnaamã, la m sũur sẽn yɩ noog to-to m sẽn wa n bãng tɩ Wẽnnaam mi maamã bɩ?

6. Bõe yell la d na n gome?

⁶ Tõnd ned kam fãa maana bũmb toor-toor a 9 n yaool n tõog n bãng Wẽnnaam. Ges-y zĩ-gũbr ning gom-zug sẽn yaa:  “D sẽn maan nand tɩ d reeg lisgu, la d sẽn ket n maandẽ” wã. D sã n tẽegd bõn-kãens yelle, na n sõng-d lame tɩ d kell n tall d tẽebã, n da le bao bũmb nins d sẽn basã ye. Baa sɩlg sofɛɛr sẽn tar minim segd n deng n gesa a sebrã sõma. Tõnd me segd n feesda d mense, n get d tẽebã sã n ket n tara pãnga.

7. Bõe mamsg la d segd n tũ, la bõe yĩnga?

⁷ Sebr ning sɩlg sofɛɛr sẽn tarã tẽegd-a lame tɩ bũmb toor-toor n be a sẽn segd n deng n maag a yĩng n gese. Tõnd me lisgã tɛka, bũmb toor-toor n be d sẽn tõe n feesd wakat fãa n getẽ. A Poll yeela a Tɩmote woto: “Tall gom-sõma nins fo sẽn deeg mam nengẽ wã mamsgo, la tẽeb ne nonglem a Kirist Zezi maasem yĩnga.” (2 Tɩm. 1:13) “Gom-sõma” wã bee Wẽnnaam Gomdã pʋgẽ wã. (1 Tɩm. 6:3) Bũmb mamsg tõe n sõng-d lame tɩ d bãng bũmbã meng sẽn yaa to-to. Woto me, “gom-sõma” wã sõngd-d lame tɩ d bãng a Zeova sẽn dat tɩ d maanã. Bɩ d gom bũmb nins d sẽn maan n tõog n deeg lisgã yelle, la d ges d sã n ket n maanda bõn-kãens tɩ d tẽebã pãng paasdẽ.

8, 9. a) Tẽebã la bãngrã wɛɛngẽ, bõe la d segd n maane? b) Rɩk-y makr n wilg ned sẽn bɩt to-to tẽebã pʋgẽ.

⁸ Pipi bũmb tõnd sẽn maane, d baoa bãngre, tɩ bãngrã kɩt tɩ d tall tẽebo. La d segd n ket n baooda bãngrã sẽn na yɩl tɩ d tẽebã pãng paasdẽ. (2 Tes. 1:3) D lisgã reegr poore, segdame tɩ d ket n paasd tõnd ne Wẽnnaam zoodã pãnga. Rẽ la d na n ket n bɩt tẽebã pʋgẽ.

⁹ D tõe n maka d tẽebã sẽn paasd to-to wã ne tɩɩg bɩʋʋngo. Tɩɩg tõe n bɩɩme n koge, sẽn yɩɩd fãa, a yẽgã sã n kẽ tẽngã sõma. Wala makre, Libã sɛɛdr tɩɩsã kẽer woglem tõe n taa metr 37, tɩ b yẽgã kẽ tẽngã sõma. Tɩɩg fãa sɛɛg bedrem tõe n taa metr 12. (Sal. Yɩɩl. 5:15) F sã n sel tɩɩga, a yikda tao-tao. A yẽgã sã n paamd pãng n kẽed tẽngã sõma, tɩɩgã zẽkdame t’a sɛɛgã me lebgd bedre. La kaoosg zugẽ, wat n yaa wa a pa le bɩt ye. Kiris-ned bɩʋʋng me yaa woto. Ned sã n sɩng Biiblã zãmsgo, a tõe n toeema bũmb wʋsg  a vɩɩmã pʋgẽ tao-tao, n tõog n deeg lisgu. Tigingã neb tõe n ne a tẽebã sẽn bɩt to-to wã tɩ noom-ba. Tõe meng t’a lebga so-pakd wall a paam tʋʋm a taab tigingã pʋgẽ. La kaoosg zugẽ, nebã tõeeme n wa pa le neẽ t’a tẽebã bɩtame ye. Baasgo, sẽn na yɩl n dɩk Kiristã togs-n-taar sõma, tõnd fãa segd n modgame n paasd d bãngrã la d bɩɩsd d tẽebã. (Ef. 4:13) Dẽnd d sã n bɩɩsd d tẽebã, d lebgda wa tɩɩg b sẽn sele, t’a bɩtẽ n wa lebg tɩ-bedrã.

10. Bõe yĩng tɩ kiris-ned bɩʋʋng pa tar tɛka?

¹⁰ La d bɩʋʋngã pa segd n tek woto ye. Wa tɩɩg yẽg sẽn tar pãng sẽn kɩtd t’a pa vigsdẽ wã, bãngr ning d sẽn paamd Wẽnnaam Gomdã pʋgẽ wã ne d tẽebã kɩtdame tɩ d yals kãn-kãe. (Yel. 12:3) D tẽed-n-taas wʋsg modgd n paasda b tẽebã pãnga. Wala makre, saam-biig sẽn yaa kãsem-soab hal yʋʋm 30 la zak yeelame t’a ket n paasda a bãngrã, la a bɩɩsd a tẽebã. A yeela woto: “M nanda Biiblã n yɩɩd pĩndã. Mam sã n karem Biiblã fãa, m yãta a noyã la a saglsã sẽn tõe n sõng ned to-to yɛl toor-toor pʋgẽ. Sũ-noog ning m sẽn paamd koe-moonegã pʋgẽ wã me tara paasgo.”

11. Bõe la d tõe n maan n paas tõnd ne a Zeova zoodã pãnga?

¹¹ Sẽn na yɩl n paasd d tẽebã pãnga, segdame me tɩ d paas tõnd ne a Zeova zoodã pãnga. A ratame tɩ d bãng t’a nonga tõndo, la t’a kogend-d lame, tɩ d bas d yam ne-a wa biig sẽn be ne a roagd wall ned sẽn be ne a zoa hakɩk sẽn pa maand rabeemã. La d pa wat n tiig n bas d yam t’a Zeova nonga tõndo, la t’a kogend-d lame ye. Baooda sẽk la modgre. Woto, bɩ d karemd Biiblã daar fãa, la d karemd periodik-rãmbã, la siglgã sɛb a taabã.

12. D sã n dat n kell n yɩ Wẽnnaam zoa, bõe la d segd n maane?

¹² D sã n pelgd d pʋg n pʋʋsdẽ la d tar tũud-n-ta-sõma, tõe n paasa tõnd ne Wẽnnaam zoodã pãnga. (Karm-y Malaki 3:16.) A Zeova “wʋmda [a zo-rãmbã] pʋʋsgo.” (1 Pɩɛ. 3:12) D sã n kot a sõngre, a kelgd-d-la wa ba sẽn kelgd a kamba. Woto yĩnga, bɩ d “pʋʋs n da bas ye.” (Rom 12:12) D pa tõe n kell n yɩ Wẽnnaam zoa tɩ pa tũ  ne a sõngr ye. Zu-loees nins tõnd sẽn segd dũniyã pʋgẽ wã sẽn waoogã, d pa tõe n mao ne d meng pãng ye. D sã n bas pʋʋsgo, d mongda d meng pãng ning Wẽnnaam sẽn dat n kõ-do, la a sẽn tõe n kõ-dã. Rẽ yĩnga yãmb pʋʋsda a Zeova wa ned sẽn gomd ne a zoa to-to wã bɩ, bɩ y getame tɩ y segd n manega y pʋʋsgã?—Zer. 16:19.

13. Bõe yĩng tɩ d sã n dat tɩ tõnd ne Wẽnnaam zoodã ket n tar pãng bɩ d segd n kẽnd tigissã?

¹³ A Zeova sũur sẽn noom ne ‘neb nins sẽn teeg-a’ wã yĩnga, baa d sẽn bãng-a wã poore, d segd n ket n kẽnda tigissã, n be ne d tẽed-n-taasã. (Nah. 1:7) Bũmb wʋsg sẽn be dũniyã pʋgẽ n tõe n koms d raoodã, yɩta sõma tɩ d nong n be ne tẽed-n-taasã tɩ b kengd d raoodo. D tõe n sõnga taaba, tɩ d fãa tẽebã ket n paamd pãnga. D tẽed-n-taasã na n sõng-d lame tɩ d wilg nonglem la d tʋm tʋʋm-sõma. (Heb. 10:24, 25) Yaa d sẽn na n kẽnd tigissã bal la d tõogd n tũ a Poll saglgã. Woto yĩnga, bɩ y ra vaand tigissã ye. Y sã n kẽng me bɩ y kẽes y menga.

14. Bõe yĩng tɩ pa vugr la d tekd yam n kos sugri?

¹⁴ Nand tɩ d lebg kiris-neda, d teka yam n kos sugri, la d toeem d vɩɩmã. La tek yam n kos sugrã pa bũmb d sẽn maand vugr bal ye. D sẽn yaa neb sẽn pa zems zãnga yĩnga, d tõe n wa maana yel-wẽnd nana-nana. Yel-wẽndã yaa wa waaf sẽn zẽk a zug n gũud ned n na n kɛ. (Rom 3:9, 10; 6:12-14) Bɩ d ra yĩm tɩ d yaa pãn-komsem dãmb ye. Zu-noogo, d sã n wa maood ne d pãn-komsem, a Zeova maanda sũ-mar ne-do. (Fil. 2:12; 2 Pɩɛ. 3:9) Bũmb sẽn tõe n sõng-d yaa d sẽn na n tʋmd a Zeova tʋʋmdã, n da pʋgd yɛl sẽn noom tõnd bal n sãamd d sẽkã la d tarmã ye. Saam-bi-poak sẽn dog n mik t’a roagdbã tũuda a Zeova ra tara tagsg sẽn pa zems a Zeova zoeesã wɛɛngẽ. A ra tagsdame tɩ yẽ pa tol n tõe n ta a yam ye. A ra pa tara a Zeova zoodo, n da maand yel-kɛg me. Ad a sẽn yeele: “Pa tɩ mam da pa nong a Zeova ye. Yaa m sẽn da pa mi-a sõma yĩnga.” Rẽ n so t’a pʋʋs Wẽnnaam n kos sõngr la a toeem yɛl kẽere. A paasa woto: “Mam yãame t’a Zeova ra bee ne maam n wilgd-m sor ne bʋgsem wa ned sẽn maand to-to ne biiga, tɩ m tõog n welg m zu-loeesã yembr-yembre.”

15. Bõe la a Zezi ne a Ba wã ne-yã?

¹⁵ Ket-y n ‘togsd-y nebã’ koe-noogã. Yaa woto la malɛk ning sẽn yiis a Pɩɛɛr ne tʋm-tʋmdb a taabã bãens roogẽ wã yeel-b tɩ b maane. (Tʋʋ. 5:19-21) Bũmb a to d sẽn segd n ges yaa d sã n moonda koɛɛgã semen fãa, bala paasda d tẽebã pãnga. A Zezi ne a Ba wã nee tõnd tẽebã, la d sẽn moond koɛɛgã to-to wã. (Wil. 2:19) Rẽnd d segd n moona koɛɛgã ne d sũur fãa.

16. Bõe yĩng tɩ d segd n tẽegdẽ tɩ d rɩka d meng n kõ Wẽnnaam?

¹⁶ Tẽegd-y tɩ y rɩka y meng n kõ Wẽnnaam. Ne tõndo, bũmb ning sẽn tar yõod n yɩɩd yaa tõnd ne a Zeova zoodã. A Zeova mii neb nins sẽn yaa yẽ rẽndã. (Karm-y Ezai 44:5.) Pʋʋsd-y-yã a Zeova la y feesd y meng n get zood ning y sẽn tar ne-a wã sã n sɩd tara pãnga. Tẽegd-y y lisgã me yelle, n da tol n yĩm a sẽn yɩ daar  ningã ye. Rẽ na n sõng-y lame tɩ y ra yĩm tɩ y sẽn deeg lisg n wilg tɩ y rɩka y meng n kõ a Zeova wã la y yam-yãkr ning sẽn tar yõod n yɩɩdã ye.

17. D sã n dat n kell n yɩ a Zeova zoa, bõe yĩng tɩ d segd n tõog toogo?

¹⁷ A Poll ra sagla Galat kiris-nebã tɩ b tõog toogo. (Gal. 6:9) Tõnd me segd n tõoga toogo, bala d pa tõe n pa seg zu-loees ye. La a Zeova na n sõng-d lame. Pʋʋsd-y n kot vʋʋsem sõngã tɩ rẽ la a Zeova na n sõng-y tɩ baa y zu-loɛɛg sã n wa tõt saabo, bɩ y yamã gãe bãan tɩ y ket n tar sũ-noogo. (Mat. 7:7-11) Tẽeg-y t’a Zeova geta liuuli wã yelle. Rẽ yĩnga a kõn ges yãmb sẽn dɩk y meng n kõ-a wã yell n yɩɩd sɩda? (Mat. 10:29-31) Baa y sã n wa tar zu-loees wʋsg bɩ y ra tol n koms raood ye. Ra n tol-y n bas-y sɩdã ye. Ra yĩm-y t’a Zeova sẽn mi tõndã, d paamda bark wʋsg ye.

18. Bõe la sẽn mi-b Wẽnnaamã fãa segd n maane?

¹⁸ Y sã n bãnga Wẽnnaam n deeg lisg tɩ nan pa kaoose, bõe la y segd n maane? Ket-y n baood-y n bãngd a Zeova, la y paasd y tẽebã pãnga. La y sã n deega lisg sẽn na maan yʋʋm yẽ? Yãmb me segd n ket n baood n bãngda a Zeova. D ra wa tol n tags tɩ bũmb pa tõe n sãam tõnd ne Wẽnnaam zoodã ye. Woto yĩnga, bɩ d lebgd n get d sã n maanda bũmb nins yell d sẽn gom sõs-kãngã pʋgẽ wã, n bãngd tõnd ne a Zeova sẽn yaa d Wẽnnaam la d Ba wã zoodã sã n ket n tara pãnga.—Karm-y 2 Korẽnt dãmb 13:5, 6.