1, 2. D sã n bʋgs bõn-makr nins sẽn gomd a Zeova siglgã yellã zugu, wãn to la na n sõng-do?

D SÃ N tẽeg tɩ d yaa siglg sẽn yaa kãseng n be saasẽ la tẽngã zug neba, noogda d sũur wʋsgo. Bõn-makr nins yell b sẽn gomd Ezekɩɛll sak a 1 la Daniɛll sak a 7 pʋgẽ wã bilgda a Zeova sẽn tʋmd to-to a raabã pidsg yĩngã. A Zezi wilgda a Zeova siglgã babg ning sẽn be tẽngã zugã sor t’a lʋɩɩsd koɛɛgã mooneg taoore, n zãmsd koe-moondbã la a kengd b raoodo, tɩ b sõngd neb tɩ b lebgd a Zeova Kaset rãmba. Woto fãa kɩtame tɩ tõnd kɩs a Zeova siglgã sɩda!—Mat. 24:45.

² Rẽ yĩnga d rɩkda siglgã togs-n-taar n tʋmd Wẽnnaam tʋʋmdã wʋsg bɩ? D yẽesmã paasdame bɩ, bɩ a boogdame? D sã n tags sogs-kãensã zugu, tõe tɩ d yã tɩ d yẽesmã boogdame. A buud paama pipi kiris-neba. Yɩɩ tɩlae tɩ tʋm-tʋmd a Poll tẽeg-b mak-sõng ning a Zezi sẽn kõ yẽesmã wɛɛngẽ wã. A Poll yeel-b lame tɩ rẽ segd n kɩtame tɩ b ra “yɛ, la tɩ [b] sũyã da sãam ye.” (Heb. 12:3) Sõsg ning sẽn loogã pʋgẽ, d goma tʋʋm-kãsems nins a Zeova siglgã sẽn tʋmd rũndã-rũndã wã yelle. Wa Kiristã mak-sõngã sẽn keng pipi kiris-nebã raoodã, a Zeova siglgã mak-sõngã me tõe n sõng-d lame tɩ d tõog toog Wẽnnaam tʋʋmdã pʋgẽ, n ket n tar yẽesem.

3. Bõe la d tõe n maan n kell n tall yẽesem, la bõe yell la d na n gom sõs-kãngã pʋgẽ?

³ La d sã n pa rat tɩ yẽesem ning d sẽn tar Wẽnnaam tʋʋmdã pʋgẽ wã booge, siglgã mak-sõngã zug bʋgsg bal pa sek ye. A Poll yeelame tɩ d segd n wɩnga ne “tʋʋm-sõma maanego.” (Gal. 6:9) Bũmb a nu n tõe n sõng-d tɩ d kell n tall yẽesem, la d ket n sakd a Zeova siglgã sor-wilgri. D na n goma bõn-kãens yelle. Rẽ na n sõng-d lame tɩ d  bãng bũmb sã n bee tõnd mengã wall d zakã rãmb sẽn segd n demse.

4. Bõe yĩng tɩ d tõe n yeel tɩ tigissã tara yõod Wẽnnaam tũudmã pʋgẽ?

⁴ Tigissã sɩng n tara yõod ne a Zeova tʋm-tʋmdbã. Saasẽ, a Zeova mi n boola a malɛgsã tɩ b wa tigim a taoore. (1 Rĩm 22:19; Zoob 1:6; 2:1; Dan. 7:10) Pĩnd wẽndẽ, Wẽnnaam da yeela Israyɛll nebã tɩ b tigimd taab sẽn na yɩl n “wʋm la b zãms” a goamã. (Tõo. 31:10-12) A Zezi wakatẽ wã tɩ zʋɩf-rãmbã ra minim n tigimda taab b karen-dotẽ wã n karemd Gʋlsg Sõamyã. (Luk 4:16; Tʋʋ. 15:21) Kiris-neb tigingã luglg poore, tigissã kell n talla yõodo, la b ket n tara yõod Wẽnnaam tũudmã pʋgẽ. Kiris-neb hakɩkã tigimda taab sẽn na yɩl n sõngd taab tɩ b nonglmã paasdẽ, la b wɩngd ne tʋʋm-sõma maanego. D segd n ket n kengda taab raoodo, sẽn yɩɩd fãa, d sẽn ne t’a “[Zeova] daarã kolgdame wã yĩnga.”—Heb. 10:24, 25.

5. Wãn to la d tõe n keng taab raood d tigissẽ wã?

⁵ Bũmb a ye d sẽn tõe n maan n keng taab raood yaa d sẽn na n kõt leoor tigissã sasa. Tõe n yaa d sẽn na n leok sulã sogsgã, wall d wilg vɛrse nins sẽn be sulã pʋsẽ wã yõodo, pa rẽ bɩ d togs kibar sẽn wilgd Biiblã saglsã tũub sẽn nafd ned to-to. (Yɩɩl 22:23; 40:10) Baa d sã n sɩng n kẽnda tigissã, d sã n kelgd kãsembã la kambã sẽn leokd sogsgã to-to wã, kengda raoodo.

6. Wãn to la tigissã nafd tõndo?

⁶ D tigissã la d tigis-kãsemsã leb n tara nafa a taaba. Wala makre, b sõngd-d lame tɩ d tõe n moon koɛɛgã ne raoodo, baa nebã sã n pa kelgdẽ wall b namsd tõndo. (Tʋʋ. 4:23, 31) Bũmb nins d sẽn kelgd be wã kengda d pɛlg la paasd d tẽebã pãnga. (Tʋʋ. 15:32; Rom 1:11, 12) D sẽn paamd n be ne d saam-biisã la d saam-bi-pogsã kõt-d-la sũ-noog la belsgo. (Yɩɩl 94:12, 13) Yaa siglgã sull ning sẽn get a Zeova nin-buiidã zãmsg yellã n segend sõssã d sẽn kelgd tigissẽ wã la tigis-kãsemsã sasa wã. D sũur nooma wʋsg ne zãmsgã d sẽn paamd d tigissẽ wã semen fãa wã!

7, 8. a) Sẽn yɩɩd fãa, bõe yĩng tɩ d kẽnd tigissã? b) Wãn to la tigissã nafd yãmba?

⁷ La d pa kẽnd tigissã nafa nins d sẽn paamdã yĩng bal ye. Sẽn yɩɩd fãa, yaa a Zeova waoogr yĩnga. (Karm-y Yɩɩl Sõamyã 95:6.) D sẽn paam n yɩɩnd tigissã sasa n pẽgd Wẽnnaamã noom-d lame. (Kol. 3:16) D leb n pẽgda a Zeova ne d sẽn leokd sogsgã sõssã sasa wã. Yaa vẽeneg t’a segda ne bũmb nins fãa tõnd sẽn maand n waoogd-a wã. (Wil. 4:11) Rẽnd d wʋmda b sẽn sagend-d tɩ d kẽnd tigissã wakat fãa wã võore.—Heb. 10:25.

⁸ D tigissã yaa bũmb a Zeova sẽn sigl n na n sõng-d tɩ d tõog toogo, n tãag wakat ning a sẽn na n sãam dũni-kãngã wã. Sã n yaa woto la yãmb get tigissã, baa y tʋʋmã yaa wʋsg tɩ y pa tar sẽka, y na n modgdame n kẽnd tigissã fãa. (Fil. 1:10) Sã n pa bʋʋm tɩrg yĩnga, d pa na n vaal tigsg baa a yembr ye.

9. Bõe n kɩt tɩ d miẽ tɩ koe-moonegã tara yõodo?

⁹ D sã n dat n sak a Zeova siglgã sor-wilgri, segdame tɩ d moond koɛɛgã ne yẽesem. Yaa a Zezi n sɩng koɛɛgã  mooneg a sẽn wa n be tẽngã zugã. (Mat. 28:19, 20) Rẽ tɛk n tãag masã, koɛɛgã mooneg la karen-biisã maaneg n yaa tʋʋmd ning a Zeova siglgã sẽn lʋɩɩsd taoorã. Kibay wʋsg wilgdame tɩ malɛgsã teend-d-la d tʋʋmdã pʋgẽ, n sõngd tõnd tɩ d yãt “neb nins fãa sẽn dat vɩɩm sẽn-kõn-sa wã.” (Tʋʋ. 13:48, MN; Wil. 14:6, 7) A Zeova siglgã babg ning sẽn be tẽngã zugã tʋʋmd yaa sigl koe-moonegã sẽn tar yõodã, la ges a yelle. Koe-moonegã tara yõod ne yãmb me bɩ?

10. a) Rɩk-y makr n wilg bũmb d sẽn tõe n maan n ket n nong sɩdã. b) Wãn to la koe-moonegã sõng yãmb tɩ y ket n nong sɩdã?

¹⁰ D sã n moond koɛɛgã ne yẽesem, kɩtdame tɩ d ket n nong sɩdã. Ad kãsem-soab sẽn kaoos a tʋʋmdã pʋgẽ la sẽn yaa wakat fãa so-pakd t’a yʋʋr la a Mitchel sẽn yeele: “Mam nonga koɛɛgã moonego. Mam sã n karem Gũusg Gasgã wall Réveillez-vous ! wã sõs-paalle, n yã b sẽn gʋls-a to-to t’a kõt yam la bãngrã, la a wilgd yɛlã vẽeneg la ne zemsgã, m sũur yaa noogo. Mam yãgd n dat n yii koe-moonegã n kãab nebã sõs-kãnga, la m ges b manesem sẽn na n yɩɩ to-to, la m baood m sẽn tõe n yeel bũmb ning n kɩt tɩ b tʋlg n karm-a. Koe-moonegã sõnga maam tɩ m lʋɩɩsd bũmb nins sẽn tar yõod n yɩɩdã taoore. M maoodame n pa basd baa fʋɩ tɩ gɩdg-m tɩ m pa moon koɛɛgã ye.” Tõnd me  sã n tʋmd Wẽnnaam tʋʋmdã wʋsgo, na n sõng-d lame tɩ d kell n tõog toog yaoolem wakatã pʋgẽ.—Karm-y 1 Korẽnt dãmb 15:58.

11. Bõe yĩng tɩ d segd n karemd d sɛbã la d bʋgsd d sẽn karemdã zugu?

¹¹ A Zeova kɩtdame t’a siglgã yiisd sɛb wʋsg sẽn na yɩl n keng d raoodo. Tõe tɩ y tẽra y sẽn karem d sebr ning n sa, n yeel woto: ‘Yaa bũmb ning mam sẽn da ratã bal kɛpɩ! Yaa wa a Zeova kɩtame tɩ b gʋls-a mam yĩnga!’ Woto pa lingr ye. A Zeova zãmsda tõnd la a wilgd-d sor ne sɛbã maasem. Sɩd me, a yeela woto: “Mam na n zãmsa foom n wilg foom sor ninga fo sẽn tog n tũ.” (Yɩɩl 32:8) Rẽ yĩnga d maanda d sẽn tõe fãa n karemd sɛbã la d bʋgsd d sẽn karemdã zug bɩ? Woto na n sõng-d lame tɩ d tõog toogo, la d ket n tʋmd Wẽnnaam tʋʋmdã ne yẽesem rũndã-rũndã sẽn yaa toog wakatã.—Karm-y Yɩɩl Sõamyã 1:1-3; 35:28; 119:97.

12. Bõe n tõe n sõng-d tɩ d nong d sɛbã?

¹² D sã n tẽeg modgr ning b sẽn maand tɩ d paamd d sɛbã, d na n maneg n nong-b lame. Nand tɩ b yiis sebr wall b ning-a ẽntɛrnetã pʋgẽ, yaa tɩlae tɩ b maan vaeesgo, n gʋls sebrã, n karm-a n ges a sẽn dat remsg zĩis ninsi, n bao fot-rãmba, la b lebg-a ne buud-goam toor-toore. Yaa siglgã sull ning sẽn get sɛbã gʋlsg yellã n get tɩ b maand woto fãa. Filyall-dãmb nins sẽn tar masĩn-dãmbã maanda sɛbã, n toond-b tigims nins sẽn be bãmb babgẽ wã. Bõe yĩng tɩ b maand woto fãa? Yaa sẽn na yɩl t’a Zeova nin-buiidã paam zãmsg b tẽebã kengr yĩnga. (Ezai 65:13) Bɩ d fãa modg n dɩt sɛbã a Zeova siglgã sẽn kõt-dã yõodo.—Yɩɩl 119:27.

13, 14. Ãnd dãmb n be saasẽ n teend a Zeova siglgã, la wãn to la d tõe n dɩk b togs-n-taare?

¹³ A Zã yã a Zezi bõn-makr pʋgẽ t’a zao wed-mo-pɛɛlga, n na n zab ne a Zeova bɛɛbã. (Wil. 19:11-15) A leb n yãa sẽn paam-b vʋʋsem sõng zaeebã sʋk neb nins sẽn zoe n vʋʋg n kẽng saasẽ wã, la malɛgs sẽn zao wed-moos n pʋgd a Zezi. Rẽ wilgdame tɩ b teenda a Zezi sẽn yaa b taoor-lʋɩtã. (Wil. 2:26, 27) B sẽn maand woto wã, b kõta tõnd mak-sõng sẽn wilgd tɩ d segd n teela neb nins sẽn lʋɩt taoor a Zeova siglgã pʋgẽ wã.

¹⁴ Woto me, kʋʋn-kãsengã neb teenda Kiristã ba-biis nins sẽn ket tẽngã zugã tʋʋmdã ne b sũy fãa. (Karm-y Zakari 8:23.) Wãn to la tõnd ned kam fãa tõe n teel a Zeova siglgã? Bũmb a ye yaa d sẽn na n sakd taoor lʋɩtbã. (Heb. 13:7, 17) Rẽ sɩngda tõnd meng tigingã pʋgẽ. Sok-y y meng woto: “Rẽ yĩnga m sẽn gomd kãsem-dãmbã yell to-to wã wilgdame tɩ m waoogd-b lame, la tɩ m nanda b tʋʋmdã bɩ? Mam sagenda m kambã tɩ b waoogd-b la b kelgd b saglsã bɩ? Mam mi n sõsa ne m zakã rãmb n ges d sẽn tõe n kõ ligd ning n teel koɛɛgã b sẽn moond dũniyã gill zugã bɩ? (Yel. 3:9; 1 Kor. 16:2; 2 Kor. 8:12) Rẽ yĩnga m getame tɩ sõng n pɩɩs Rĩungã roog yaa zu-zẽkr bũmb bɩ?” A Zeova sã n ne tɩ d maanda woto n teend a siglgã, a kõt-d-la a vʋʋsem sõngã, tɩ rẽ na n kõ-d raood tɩ d tõog toog yaoolem wakatã pʋgẽ.—Ezai 40:29-31.

15. Bõe yĩng tɩ d segd n ket n maood sẽn na yɩl n maan sẽn yaa tɩrga?

¹⁵ D sã n dat n tõog toog la d sakd a Zeova siglgã sor-wilgrã, d segd n modgdame tɩ d manesmã fãa “tat Zu-soabã yam.” (Ef. 5:10, 11) La d sẽn yaa pãn-komsem dãmbã, n paas a Sʋɩtãan ne a dũniyã sẽn wat ne makr toor-toorã kɩtame tɩ yɩl n tõog n maan sẽn yaa tɩrg pa nana ye. D miime tɩ daar fãa, yãmb sʋkã, kẽer segd n maoa ne b pãng fãa sẽn na yɩl n kogl zood ning b sẽn tar ne a Zeova wã. La bãng-y tɩ woto kɩtame t’a maneg n nong-y-yã. Bɩ y ra tol n koms raood ye! D manesmã fãa sã n tat a Zeova yam, d sũur na n noomame. Sẽn paase, d na n tõog n basa d yam tɩ d sẽn tũud-a wã pa na n yɩ zaalem ye.—1 Kor. 9:24-27.

16, 17. a) D sã n wa maan yel-wẽn-kãsenga, bõe la d segd n maane? b) Yam bʋg la d tõe n dɩk a Anne kibarã pʋgẽ?

¹⁶ La d sã n wa maan yel-wẽn-kãsenga, bõe la d segd n maane? D bao sõngr tao-tao. D sã n bao n na n solg yellã, a na n maneg n zẽname. Tẽeg-y t’a Davɩɩd wilgame tɩ yẽ sẽn wa n sĩnd n pa vẽneg a yel-wẽnã, ra namsd-a-la wʋsgo. (Yɩɩl 32:3) Ned sã n maan yel-wẽn-kãseng n bao n na n solge, a pa na n le tar sũ-noogo, la tõe meng tɩ sãam a zoodã ne a Zeova. La “sẽn sak-a n vẽneg a yell la a bas-a na n paama nimbãan-zoeere.”—Yel. 28:13.

¹⁷ A Anne * kibarã wilgda rẽ. A bɩ-bɩɩlem wakate, a yɩɩ wakat fãa so-pakda, la a wa n sɩnga tʋʋm-wẽns maanego. Woto kɩtame t’a sũur-kasetã ra ningd-a taale. Ad a sẽn yeele: “Mam da pa le tar sũ-noogo, n kẽnd n namsdẽ.” A Anne manesem yɩɩ wãna? A yeelame tɩ daar a yembre, tigsg sasa, b sõsa Zak 5:14, 15 goamã zugu. Kɩtame t’a bãng t’a segd n tɩ kosa kãsem-dãmbã sõngre. Baa sẽn pa yɩ nana ne-a wã, a maana woto. A yeelame tɩ yɩɩ wa yẽ sẽn da bẽede, t’a Zeova kõ-a tɩɩm ning sẽn tõe n tɩp-a wã. A paasa woto: “Tɩɩmã volb pa yɩ nana ye. La a sãoog-m lame.” Rũndã-rũndã, a Anne le tũuda a Zeova ne yẽesem, t’a sũur-kasetã pa ningd-a taal ye.

18. Bõe ne bõe la d segd n mao ne d pãng fãa n maane?

¹⁸ D ra tol n yĩm tɩ d sẽn paam n yaa a Zeova siglgã neb yaoolem wakatã yaa zu-zẽkr ye. Woto yĩnga, bɩ tõnd ne d zagsã rãmb ket n maand d sẽn tõe fãa n kẽnd tigissã n pa vaandẽ, n moond koɛɛgã ne yẽesem, la d rɩt d sɛbã yõodo. Sẽn paase, d teend d taoor lʋɩtbã la d mao tɩ d manesmã fãa tat a Zeova yam. D sã n maand woto, d sakda a Zeova siglgã sor-wilgri. D pa na n tol n yɛ ne tʋʋm-sõma maaneg me ye.