1, 2. Bõe la Wẽnnaam na n tũnug ne a Rĩungã n maane, la bõe yĩng tɩ d kɩs sɩd tɩ Rĩungã na n waame?

YƲƲMD 31 soabã, a Zezi Kirist zĩnda tãng zug Kapɛrnaum noore, n zãms a karen-biisã tɩ b pʋʋs n yeel woto: ‘Bɩ yãmb soolem wa.’ (Mat. 6:10) Rũndã-rũndã, neb wʋsg maanda sãmb-sãmb ne Wẽnnaam soolmã bɩ a Rĩungã sã n sɩd na n waame. La tõnd yẽ kɩsa sɩd t’a Zeova na n deega d pʋʋsgã, n kɩt t’a Rĩungã wa.

² A Zeova raabã yaa a kɩt t’a zakã rãmb sẽn be saasẽ wã ne sẽn be-b tẽngã zugã fãa zemsd taaba. Yaa ne a Rĩungã maasem la a na n pids raab kãngã. (Ezai 55:10, 11) Sɩd me, a Zeova wilgame t’a rɩta naam rũndã-rũndã. Na maan yʋʋm koabga, bõn-kãsems n maande, n wilgd rẽ. Wẽnnaam maanda bõn-kãsemsã n kõt neb milyõ-rãmb sẽn sakd yẽ. (Zak. 14:9; Wil. 15:3) La d sã n yeel t’a Zeova wilgame t’a rɩta naam, yaa toor ne a Zezi sẽn yeel tɩ d pʋʋs n kos tɩ Wẽnnaam Rĩungã wa wã. Bõe n kɩt tɩ yaa toore, la wãn to la rẽ nafd tõndo?

3. a) Yʋʋm-bʋg la a Zeova kɩt t’a Zezi lebg Rĩma, la yɛ la a Zezi be n dɩt a naamã? b) Wãn to la y tõe n wilg ned t’a Zezi sɩnga a naamã rɩɩb yʋʋmd 1914? (Ges-y tẽngr vẽnegrã.)

³ Yʋʋmd 1880 wã sẽnese, Wẽnnaam nin-buiidã sɩngame n wʋmd bãngr-gomd a Daniɛll sẽn gʋls võore. A sẽn gʋls bãngr- gomdã taa yʋʋm 2500 rũndã. Ad a sẽn yeele: “Rĩm-dãmb kãens sẽn dɩt naam wakate, Wẽnnaam sẽn be yĩngrã na n kɩtame tɩ soolem sẽn ka tõe n sãam la buud a taab sẽn ka tõe n deeg zĩndi.” (Dan. 2:44) Yʋʋm wʋsg pʋgẽ, Biiblã Zãmsdbã mooname n wilg tɩ yʋʋmd 1914 pʋgẽ, bõn-kãseng n da na n maane. Yʋʋm-kãnga, neb wʋsg ra tagsdame tɩ beoog-daarã na n yɩɩ neere. Seb-gʋlsd a ye yeela woto: “Yʋʋmd 1914, nebã ra tẽedame tɩ vɩɩmã na n yɩɩ noogo.” La yʋʋm-kãng bala, dũni gill pipi zabrã sɩngame, tɩ Biiblã sẽn da yeel bũmb ningã pidsi. Biiblã ra goma kom, bãas la tẽn-digimdg sẽn na n zĩnd zĩig-zĩig yelle. Rẽ sẽn pidsã n paas Biiblã bãngr-goam a taab sẽn pidsã wilga vẽeneg t’a Zezi Kirist lebga Wẽnnaam Rĩungã Rĩm saasẽ yʋʋmd 1914. * A Zeova sẽn kɩt t’a Bi-riblã sẽn yaa Mesi wã lebg Rĩmã, a wilgame t’a rɩta naam.

4. Rĩungã Rĩm sẽn deeg a naamã, bõe la a reng n maane, la bõe la a maan rẽ poore?

⁴ Pipi bũmb Rĩungã Rĩm sẽn maan a naamã reegr poor yɩ a zab ne a Sʋɩtãan sẽn yaa a Ba wã bɛ-kãsengã. A Zezi ne a malɛgsã riga a Sʋɩtãan ne a zĩn-dãmbã saasẽ. Woto kõo sẽn be-b saasẽ wã sũ-noog wʋsgo, la kɩtame tɩ vɩɩmã lebg toog wʋsg dũniyã zugu. (Karm-y Wilgr 12:7-9, 12.) Rẽ poore, Rĩmã gesa a nebã sẽn be tẽngã zugã yelle. A sɩnga b remsgo, b zãmsgo, la a rems b sẽn da sigl to-to wã sẽn na yɩl tɩ b maan Wẽnnaam daabã. Bɩ d gom nin-kãensã sẽn sak a Zezi sor-wilgrã to-to wã yelle. B sẽn maanã yaa mak-sõng n kõ tõndo.

5. Bõe la a Zezi sɩng yʋʋmd 1914 n baas yʋʋmd 1919 wã?

⁵ A Zezi sẽn dig a Sʋɩtãan ne a zĩn-dãmbã saasẽ wã poore, a Zeova kɩtame t’a wa ges a nebã, la a rems-ba. No-rɛɛs a Malaki gomã rẽ yelle. (Mal. 3:1-3) Yɛlã sẽn yɩ to-to wã wilgdame tɩ remsgã sɩnga yʋʋmd 1914, n baas yʋʋmd 1919 wã. * D sã n dat n yɩ a Zeova zakã neba, d segd n yɩɩ pʋ-peelem dãmb la yɩlma. (1 Pɩɛ. 1:15, 16) D segd n laka d mens ne ziri tũudmã la politikã yɛla.

6. Bõe la tʋm-tʋmdã maand n sõngd tõndo, la bõe yĩng tɩ rẽ tar yõod wʋsgo?

⁶ Rẽ poore, a Zezi sẽn yaa Rĩmã yãka neb sull tɩ b lebg “tʋm-tʋmd sẽn tũud sɩd la sẽn tar yam.” Tʋm-tʋmd kãng ra na n sõnga neb tɩ b bãng Wẽnnaam la a raabã sõma. Nin-kãens yaa b rãmb nins fãa sẽn naag taab n yaa “yãgr a yembr” t’a Zezi get b yellã. (Mat. 24:45-47; Zã 10:16) Yʋʋmd 1919 wã tɛka, tʋm-tʋmd sẽn tũud sɩd la sẽn tar yamã maanda a sẽn tõe fãa n tʋmd a tʋʋmdã, n get “zakã fãa” yell sõma. A kõta tõnd bũmb nins fãa d sẽn dat sẽn na yɩl tɩ d tẽebã tall pãnga. Bõn-kãens kɩtame tɩ d maneg n kɩs sɩd tɩ d segd n yɩɩ yɩlem bũmba fãa pʋgẽ. A Zeova ratame tɩ d yɩ yɩlem tũudmã wɛɛngẽ, manesmã wɛɛngẽ, tagsgã pʋgẽ, la a rat me tɩ d yĩngã yɩ yɩlemde. Tʋm-tʋmdã le zãmsda tõnd d sẽn tõe n moon koɛɛgã sõma to-to. Koɛɛgã mooneg la tʋʋmd ning sẽn tar yõod n yɩɩdã. Yãmb maooda y pãng tɛk n dɩt tʋm-tʋmdã sẽn maand bũmb ninsã nafa bɩ?

7. Tʋʋm-bʋg la a Zezi sɩng tẽngã zugu, la b na n kell n tʋma tʋʋm-kãng n tãag wakat bʋgo?

⁷ A Zezi sẽn wa n sɩng a tʋʋmdã tẽngã zugã, a yeela woto: “Yaa tɩlae tɩ mam moon Wẽnnaam soolem koe-noog tẽns a taab me, tɩ bõe, b tʋma maam bõn-kãng  yĩnga.” (Luk 4:43) Yʋʋm a tã la pʋɩ-sʋk pʋgẽ, ra yaa koɛɛgã mooneg bal n pak-a. A wilga a karen-biisã b sẽn segd n moon to-to, n yeele: “Bɩ y kẽng n moon n yeel tɩ [“saasẽ,” MN] soolem kolgame.” (Mat. 10:7) A Zezi vʋʋgrã poore, a yeelame t’a karen-biisã ra na n moona koɛɛgã n ta “dũniyã tɛk fãa.” (Tʋʋ. 1:8) A pʋlmame me t’a ra na n teel-b-la tʋʋmdã pʋgẽ hal n tãag wakatã saabo.—Mat. 28:19, 20.

8. Wãn to la Rĩmã keng a nebã sẽn be tẽngã zugã raood tɩ b moon koɛɛgã?

⁸ Yʋʋmd 1919 wã tɛka, ‘Wẽnnaam soolem koe-noogã’ maneg n paama pãnga. (Mat. 24:14) Rĩmã sẽn dɩt naam saasẽ wã tigma neb sul-bil tẽngã zugu, n dems-b tɩ b lebg sõma Wẽnnaam nifẽ. Nin-kãens saka a Zezi noorã. A yeelame tɩ b moon dũniyã gill zugu, n wilg tɩ Wẽnnaam Rĩungã Rĩm sɩnga naam dɩɩb saasẽ. (Tʋʋ. 10:42) Wala makre, yʋʋmd 1922 bõn-bɩʋʋng kiuugã pʋgẽ, na maan neb tus pisi sẽn yaa Rĩungã poorẽ dãmb n tigim taab Sedaar Põent sẽn be Ohio, Etazĩni soolmẽ wã. Tigis-kãng wakate, saam-biig a Rutherford sõsa ne nebã, n gom Rĩungã yelle, hal tɩ b sũy yɩ noogo. A sõsgã sasa, a wa n yeela woto: “Rĩmã rɩta naam masã! Yãmb yaa a koe-taasdba. Woto yĩnga, moon-y-yã, moon-y-yã, moon-y Rĩmã la a rĩungã.” Vẽkembeoogã, kɛlgdbã neb tus a yi n kẽng zak-zak n moon koɛɛgã, hal n moon n ta kilo 72 zĩigẽ. Rao a ye sẽn zĩnd be yeela woto: “Mam pa na n tol n yĩm sõsdã sẽn sagl-d tɩ d moon Rĩungã, la kʋʋngã sẽn tall yẽesem ningã ye.” Neb wʋsg sẽn zĩnd tigis-kãsengẽ wã me tagsda woto.

9, 10. a) Lekoll bʋs la b maan sẽn na yɩl n sõng koe-moondba? b) Wãn to la lekoll kãens naf yãmb mengã?

⁹ Yʋʋmd 1922 tɩ neb tus piig la yopoe la zak n moond Rĩungã koɛɛg tẽns 58 pʋsẽ. Baasgo, ra yaa tɩlae tɩ b paam zãmsgo. A Zezi sẽn wa n be tẽngã zugã, a kõ a karen-biisã noy takɩ, n wilg b sẽn segd n moon koɛɛg ningã, zĩig ning b sẽn segd n moonã, la b sẽn segd n moon to-to. (Mat. 10:5-7; Luk 9:1-6; 10:1-11) Rũndã-rũndã me, a Zezi kɩtame tɩ neb nins fãa sẽn moond koɛɛgã paamd zãmsgo, la bũmb nins sẽn yaa tɩlae sẽn na yɩl tɩ b tʋm b tʋʋmdã sõma. (2 Tɩm. 3:17) A Zezi tũnugda ne tigingã n zãmsd a poorẽ dãmbã tɩ b moond koɛɛgã. Wala makre, a kɩtame tɩ b maand Wẽnnaam tʋʋmdã lekoll tigims tus koabg la piig la a ye la zakã pʋsẽ. Lekoll kãng maasem yĩnga, koe-moondb milyõ a yopoe la zakã mi b tʋʋmdã sõma, n tõe n moon ned buud fãa koɛɛgã sõma, la b zãms-a Biiblã tɩ yɩ-a noogo.—Karm-y 1 Korẽnt dãmb 9:20-23.

¹⁰ Wẽnnaam tʋʋmdã lekoll sẽn yãk a toogo, lekoll-dãmb a taab n be kãsem-dãmbã yĩnga, so-pakdbã, rakõapã, sẽn  kẽ-b kãadmã, Betɛll-rãmbã yel-gɛtb ne b pagbã, tigims sul la distrik yel-gɛtbã ne b pagbã, la misioneer-dãmbã yĩnga. * Kiris-neb n naag taab n maan Biiblã zãmsg lekoll sẽn kẽ-b kãadmã yĩng tɩ b sũur yɩ noogo, tɩ b gʋls n yeel woto: “Zãmsg ning d sẽn paamã kɩtame tɩ d maneg n nong a Zeova, la kɩt tɩ d paam minim n tõe n sõng d taabã.”

11. Baa a Sʋɩtãan sẽn zabd ne koe-moondbã, bõe yĩng tɩ b tʋʋmdã ket n kẽngd taoore?

¹¹ A Sʋɩtãan sẽn yaa bɛ wã nee modgr ning tõnd sẽn maand n moond koɛɛgã la d zãmsd nebã Biiblã. A sẽn dat yaa koɛɛgã mooneg ra kẽng taoor ye. Rẽ n so t’a maand a sẽn tõe fãa n dat n gɩdg koe-moonegã, la a zabd ne neb nins sẽn moond koɛɛgã. La a Sʋɩtãan modgrã pa na n tol n yãk neng ye. Bala a Zeova kɩtame t’a Biigã “yɩɩd rĩm-dãmbã fãa, la noyã fãa, la pãens fãa, la naam fãa.” (Ef. 1:20-22) A Zezi sẽn yaa Rĩmã tũnugda ne tõ-kãng n kogend a karen-biisã la a wilgd-b sore, tɩ b ket n maand a Ba wã raabo. * Rĩungã koɛɛgã mooneg ket n kẽngda taoore, tɩ neb milyõ-rãmb sẽn yaa pʋ-peelem dãmb paamdẽ tɩ b zãmsd-b a Zeova raabã. D sẽn paam n naagd n tʋmd tʋʋm-kãngã sẽn tar yõod wʋsgã sɩd noom-d lame.

12. Yʋʋmd 1914 tɛka, wãn to la a Zezi rems a nebã sẽn sigl to-to wã?

¹² A Zezi sẽn sɩng a naamã rɩɩb yʋʋmd 1914 tɛka, a remsa a nebã sẽn da sigl to-to n maand a Ba wã raabã. (Karm-y Ezai 60:17.) Wala makre, yʋʋmd 1919 wã, b yãka tʋʋmdã taoor lʋɩt tiging fãa pʋgẽ, t’a na n lʋɩt koɛɛgã mooneg taoore. Yʋʋmd 1927 wã tɛka, b sɩngame n yit hat fãa n moond koɛɛgã zak-zaka. Yʋʋmd 1931 wã, bũmb n maan tɩ koe-moondbã yẽesem paase. Yʋʋm-kãnga, a Zeova nin-buiidã wilgame tɩ b ratame tɩ b boond-b t’a Zeova Kaset rãmb wa Biiblã sẽn wilgã. (Ezai 43:10-12) Yʋʋmd 1938 wã tɛka, pa le yaa tiging fãa neb n yãkd a taoor lʋɩt ye. Lebga Biiblã sẽn yetã zug la a Zeova siglgã tikd n yãkd nin-kãense. Yʋʋmd 1972 tɛka, pa le yaa nin-yɛng n get tiging fãa yell ye. Lebga kãsem-dãmb sulli. B sagla saam-biisã fãa tɩ b bao n yɩ neb sẽn tar minim n tõog n ges tigingã neb sẽn yaa “Wẽnnaam piisã” yelle. (1 Pɩɛ. 5:2) Yʋʋmd 1976, Siglgã taoor lʋɩtb lebga sul a yoobe, tɩ yaa sul-kãens n get Rĩungã tʋʋmdã nens fãa yell  dũniyã gill zugu. A Zezi kell n remsa a poorẽ dãmbã, tɩ bilf-bilfu, b sẽn sigl to-to wã zemsd ne Wẽnnaam daabã.

13. Wãn to la Rĩungã sẽn maan bũmb ninsã nafd yãmba?

¹³ Vẽenega, Mesi wã sẽn sɩng a naamã rɩɩb na maan yʋʋm koabg rũndã wã, a zoe n maana bũmb wʋsgo. Makre, a remsa neb tɩ b lebg sõma a Zeova yʋʋrã yĩnga. A wilgd-b-la sor tɩ b moond koɛɛgã tẽns 239 pʋsẽ, la b zãmsd neb milyõ-rãmb a Zeova raabã. A sõnga neb milyõ a yopoe la zak tɩ b zemsd taaba. Yaa neb sẽn sakd-a ne b sũy fãa, la sẽn maand a Ba wã raab ne yamleoogo. (Yɩɩl 110:3) A Zeova sɩd tũnuga ne a Rĩungã n maan bõn-kãsemse. La bõn-kãsems sẽn yɩɩd rẽ la a na n maan beoog-daare.

14. a) D sã n pʋʋsd Wẽnnaam n kotẽ t’a kɩt t’a Rĩungã wa, yaa bõe la d kota? b) Yʋʋmd 2014 vɛrse wã yetame tɩ bõe, la bõe yĩng tɩ rẽ zemse?

¹⁴ Baa a Zeova sẽn kɩt t’a Biig a Zezi Kirist lebg Rĩungã Rĩm yʋʋmd 1914, d miime t’a Zeova nan pa leok d sẽn pʋʋsd-a n kotẽ t’a kɩt t’a ‘soolmã wa’ wã ye. (Mat. 6:10) Biiblã reng n togsame t’a Zezi na n ‘dɩɩ naam a bɛɛbã sʋka.’ (Yɩɩl 110:2) Ninsaalbã goosneema-rãmbã sẽn be a Sʋɩtãan nugẽ wã ket n kɩɩsda Rĩungã naam. D sã n pʋʋsd Wẽnnaam n kotẽ t’a kɩt t’a Rĩungã wa, d kotame t’a kɩt tɩ Mesi wã ne a na-rɩt-n-taasã wa sãam ninsaalbã naam, la neb nins fãa sẽn pa sakd Rĩungã. Rẽ n na n pids Daniɛll 2:44 goamã. Be, b yeelame tɩ Wẽnnaam Rĩungã “na n wãa soolem-kãens fãa tɩ b menem.” A na n sãama nanambs nins fãa sẽn yaa Rĩungã bɛɛbã. (Wil. 6:1, 2; 12:18–13:18; 19:11-21) Bõn-kãensã maanegã ta n saame. Rẽnd zemsame tɩ yʋʋmd 2014 vɛrse wã tik Matɩe 6:10 goamã sẽn yet tɩ: “Bɩ yãmb soolem wa.” Bala a Zezi sẽn sɩng a naamã rɩɩb saasẽ wã yʋʋm koabg la woto.

15, 16. a) Kiristã naam sẽn na n kaoos yʋʋm tusrã sasa, bõe n na n maane? b) A Zezi naamã saabẽ, bõe la a na n maane, la wãn to la rẽ na n pids a Zeova raabã?

¹⁵ Rĩm a Zezi sã n sãam Wẽnnaam bɛɛbã poore, a na n loba a Sʋɩtãan ne a zĩn-dãmbã bog-zulung pʋgẽ tɩ b pa be yʋʋm tusri. (Wil. 20:1-3) A Sʋɩtãan ne a zĩn-dãmbã pa na n le tõog n belg nebã ye. Rẽnd a Zezi ne a na-rɩt-n-taasã na n tõog n sõnga ninsaalbã tɩ b rɩ a Zezi maoongã yõodo. B na n menesa bũmb nins fãa a Ãdem yel-wẽndã sẽn wa ne wã me. Rĩmã na n vʋʋga neb milyõ-rãmba, la a kɩt tɩ b zãms nin-kãensã dũniyã gill zug tɩ b bãng a Zeova. (Wil. 20:12, 13) Dũniyã tõr fãa na n lebga arzãn wa Edɛn sẽn da yaa to-to wã. Sẽn na n sak-b Wẽnnaamã fãa na n lebga neb sẽn zems zãnga.

¹⁶ Kiristã naam sẽn na n kaoos yʋʋm tusrã saabẽ tɩ raab ning a Zeova sẽn sɩng n tar ne tẽngã pidsame. Wakat kãnga, a Zezi na n lebsa Rĩungã a Ba wã. (Karm-y 1 Korẽnt dãmb 15:24-28.) Pa na n le yɩ tɩlae tɩ sɛ-yõkd zĩnd a Zeova ne a kambã sẽn be tẽngã zugã sʋk ye. Wẽnnaam kom-dibli wã sẽn be saasẽ, la a kambã sẽn be tẽngã zugã fãa na n zemsda taab n yaa b Ba a Wẽnnaam zakã rãmba.

17. Bõe la yãmb yãk yam n na n maan Rĩungã yĩnga?

¹⁷ Rĩungã naamã sẽn sɩng yʋʋm koabgã tɛka, bõn-kãsems nins a sẽn maanã wilgda vẽeneg t’a Zeova ket n dɩta naam, la tɩ raab ning a sẽn sɩng n tar ne tẽngã na n pidsame. Bɩ d kell n tũ a Zeova ne d sũur fãa, la d moond Rĩmã ne a Rĩungã, n kɩs sɩd t’a Zeova na n deega d kosgã ka la bilfu, n kɩt t’a Rĩungã wa.