A ZEOVA KASET SOAB SẼN SÕSD NE NEDA
A Zeova Kaset rãmbã tẽeda a Zezi bɩ?
Y sã n karem sõs-kãnga, y na n bãnga a Zeova Kaset rãmbã sẽn mi n sõsd ne nebã to-to. Mams-y wa a Zeova Kaset soab yʋʋr sẽn boond t’a Ãntoan sẽn kẽng n na n tɩ sõs ne rao yʋʋr sẽn boond t’a Toma.
NED SÃ N DAT N PAAM FÃAGRE, A SEGD N TẼ A ZEZI
A Ãntoan: Ne y yibeoogo, Toma. Y zak rãmba?
A Toma: M zak rãmb keemame.
A Ãntoan: M waa ne Gũusg Gasgã la Réveillez-vous ! wã seb-paal n na n kõ-yã. Mam miime tɩ sõs nins sẽn be b pʋsẽ wã na n yɩ-y-la noogo.
A Toma: Bark wʋsgo. Yãmb sẽn wa rũndã wã zemsame. Bala, m tara bũmb n dat n sok-y-yã.
A Ãntoan: Yell kae ye.
A Toma: Nindaarẽ, m da sõsda ne m tʋmd-n-taag a ye. M pẽga sɛb nins yãmb sẽn kõt-mã, la a yeelame tɩ m da le karem-b ye. Tɩ bala, a Zeova Kaset rãmbã pa tẽed a Zezi ye. Yaa sɩd bɩ?
A Ãntoan: Yãmb sẽn gũ mam sẽn yaa a Zeova Kaset soab n na n sokã zemsame. Bala, d sã n dat n bãng ned sẽn tẽed bũmb ningã, d sẽn sokd a soabã meng n são.
A Toma: Ma-me tagsda woto.
A Ãntoan: Sɩd-sɩda, a Zeova Kaset rãmbã tẽeda a Zezi. D kɩsa sɩd tɩ ned sã n dat n paam fãagre, a segd n tẽ a Zezi.
A Toma: Mam da tagsdame tɩ yãmb tẽeda a Zezi. La m tʋmd-n-taagã sẽn wa n yeel tɩ yãmb pa tẽed a Zezi wã, kɩtame tɩ m sãmbdẽ. Yãmb zɩ n gom rẽ yell ne maam ye.
A Ãntoan: Y sã n data, d tõe n karma Biiblã vɛrse-rãmb a wãn sẽn wilgd tɩ d segd n tẽ a Zezi. Yaa vɛrse-rãmb d sẽn minim n karemd d koe-moonegã sasa.
A Toma: Yell kae ye.
A Ãntoan: D reng n karem a Zezi meng goam nins sẽn be Zã 14:6. Yɩ a sẽn wa n sõsd ne a tʋm-tʋmd a ye la a togs gom-kãense. D karme: “A Zezi yeela yẽnda: ‘Mam yaa sore, la sɩda la vɩɩm. Ned ka tõe n ta m Ba nengẽ, a sã n ka mam maasem yĩng ye.’ “ Sã n yaa ne vɛrse kãnga, yaa ãnda maasem yĩng la d tõe n paam Ba wã zoodo?
A Toma: Yaa ne a Zezi maasem.
A Ãntoan: Yaa woto. A Zeova Kaset rãmbã tẽeda rẽ. La m bõos n sok-y wɛ. Wẽnnaam datame tɩ d sã n na n pʋʋs-a bɩ d pʋʋs ne ãnda yʋʋre?
A Toma: Ne a Zezi yʋʋre.
A Ãntoan: Yaa rẽ n kɩt tɩ m sã n na n pʋʋs fãa bɩ m pʋʋsd ne a Zezi yʋʋre. A Zeova Kaset rãmb a taabã fãa maanda woto.
A Toma: Mam da pa mi rẽ ye.
A Ãntoan: Vɛrse a to d sẽn tõe n karem yaa Zã 3:16. Vɛrse kãng tara yõod wʋsgo. Bala, a wilgda a Zezi sẽn wa tẽngã zugã võore. M bõos tɩ y karm-a.
A Toma: Be, b yeela woto: “Tɩ bõe, Wẽnnaam nonga dũniyã, hal tɩ b kõ b Biig sẽn ka to, tɩ ned ning fãa sẽn tẽed bãmb kõn sãam ye, la a na paam vɩɩm sẽn ka sɛta.”
A Ãntoan: Y bark wʋsgo. Yãmb sɩng n mii vɛrse kãngã bɩ?
A Toma: N-ye, b wae n karemd-a-la tõnd wẽnd-doogẽ wã.
A Ãntoan: Neb wʋsg sɩd mii vɛrse kãnga. A Zezi yeelame tɩ Wẽnnaam sẽn nong tõndã, a paka sor tɩ d tõe n paam vɩɩm sẽn ka sɛta. La a wilgame tɩ bõe la d segd n maane?
A Toma: D segd n tẽ a Zezi.
A Ãntoan: Yaa sɩda. Sẽn na yɩl n paam vɩɩm sẽn ka sɛtã, d segd n tẽe Biig sẽn ka to wã sẽn yaa a Zezi Kiristã. Yaa woto la b wilg Gũusg Gasgã seb-neng a 2. Be, b wilga b sẽn yiisd-a wã võore, n yeel t’a “sagenda nebã tɩ b tẽ a Zezi Kiristi, bala yẽ n sak n ki sẽn na yɩl tɩ tõnd tõog n paam vɩɩm sẽn ka satã, leb n yaa yẽ la Wẽnnaam Rĩungã Rĩma.”
A Toma: Rẽnd yãmb sɛbã meng wilgdame tɩ y tẽeda a Zezi
A Ãntoan: Woto bal kɛpɩ.
A Toma: La bõe yĩng tɩ neb kẽer yetẽ t’a Zeova Kaset rãmbã pa tẽed a Zezi?
A Ãntoan: M pa mi b sẽn tik bũmb ningã vẽeneg ye. La tõe tɩ yaa neb a taab n yeel-b woto. Wall yaa b tũudmã taoor-dãmb n yeel-ba.
A Toma: Tõe me tɩ yaa yãmb sẽn yet tɩ y yaa a Zeova Kaset rãmbã, n pa yet tɩ y yaa a Zezi Kaset rãmbã la b sẽn tagsd tɩ yãmb pa tẽed a Zezi wã.
A Ãntoan: Tõe tɩ b tika rẽ me.
A Toma: La bõe yĩng tɩ yãmb gomd a Zeova yell wʋsg woto?
“MAM WILGA BÃMB YÃMB YƲƲRE”
Anthony: Pipi, d tẽedame tɩ d segd n pʋta Wẽnnaam yʋʋrã sẽn yaa Zeova wã, wa a Biig a Zezi sẽn da maandã. D karem a Zezi sẽn yeel bũmb ning Zã 17:26. Rẽ t’a ra pʋʋsda a Ba wã. M bõos tɩ y karm-a.
A Toma: Be b yeela woto: “Mam wilga bãmb yãmb yʋʋre, la mam na n le wilga bãmba, tɩ yãmb sẽn nong maam ne nonglem ningã zĩnd bãmb pʋsẽ, tɩ mam me pa ne bãmba.”
A Ãntoan: Yaa sõma. A Zezi yeelame tɩ yẽ wilga a karen-biisã Wẽnnaam yʋʋre. Bõe yĩng t’a maan woto?
A Toma: M pa mi ye.
A Ãntoan: D karem vɛrse a to tɩ sõng-do. Yaa Tʋʋm 2:21. Be b yeelame: “La ned ning fãa sẽn pʋʋsd ne Zu-soabã yʋʋr na n paama fãagre.” Sẽn na yɩl n paam fãagre, d segd n pʋʋsa ne Zu-soabã yʋʋr sẽn yaa Zeova wã. Y pa tagsd t’a Zezi ra mii rẽ sɩda?
A Toma: N-ye.
A Ãntoan: Rẽnd bũmb a ye sẽn kɩt t’a Zezi wilg a karen-biisã Wẽnnaam yʋʋrã yaa a sẽn dat tɩ b paam fãagrã. Yaa rẽ n kɩt tɩ tõnd me gomd a Zeova yell wʋsg woto wã. D tagsdame tɩ tara yõod tɩ d wilg nebã Wẽnnaam yʋʋrã, tɩ sẽn dat-bã tõe n pʋʋs ne yʋ-kãnga.
A Toma: Mam pa wʋmd bũmb ning sẽn kɩt tɩ nebã segd n pʋʋs ne Wẽnnaam yʋʋrã võor ye. Baa b sã n pa pʋt a yʋʋrã, b sã n pʋʋsdẽ, b miime tɩ yaa Wẽnnaam la b pʋʋsda.
A Ãntoan: Neb wʋsg tagsda woto. La Wẽnnaam sẽn vẽneg tõnd a yʋ-peellã, kɩtame tɩ d tõe n bao a zoodo.
A Toma: Mam pa wʋmd y gomdã võor sõma ye.
A Ãntoan: D rɩk makre: Ra pa tɩlae tɩ b wilg a Moiiz yʋʋrã Biiblã pʋgẽ ye. B ra tõe n yeelame bal tɩ rao ning sẽn welg mog-miuugã ne Wẽnnaam pãnga, wall rao ning Wẽnnaam sẽn kõ tõod piigã. Yaa woto me ne a Nowe. B ra tõe n yeelame tɩ rao ning sẽn ka koglg tɩ yẽ ne a zakã rãmb la rũmsã kẽ n põsã. Baa a Zezi menga, b ra tõe n yeelame bal tɩ sẽn yi-a saasẽ n wa ki nebã yel-wẽnã yĩngã. Bɩ bõe?
A Toma: B ra tõeeme.
A Ãntoan: La Wẽnnaam kɩtame tɩ b gʋls nin-kãensã yʋyã Biiblã pʋgẽ. Rẽ kɩtame tɩ d sã n karemd b kibayã bɩ kẽed-do. Baa d sẽn zɩ n yã a Moiiz, a Nowe wall a Zezi wã, d sẽn mi b yʋyã kɩtame tɩ d miẽ tɩ b sɩd zĩndame.
A Toma: Mam ra zɩ n tags n tees be ye. La y gomdã yaa sɩda.
A Ãntoan: Yãoã me yaa bʋʋm sẽn kɩt t’a Zeova Kaset rãmbã nong n pʋt Wẽnnaam yʋ-peellã. D rat n sõnga nebã tɩ b kɩs sɩd tɩ Wẽnnaam a Zeova beeme, la tɩ b tõe n paama a zoodo. Sẽn paase, d wilgda nebã tɩ b sã n dat fãagre, b segd n tẽ a Zezi. Y sã n data, d na n karma vɛrse sẽn wilgd rẽ.
A Toma: Yell kae ye.
A Ãntoan: Tõnd zoe n karma Zã 14:6. Be, a Zezi yeelame tɩ yẽ “yaa sore, la sɩda la vɩɩm.” Bɩ d karem a Zezi goam nins sẽn be Zã 14:1 wã masã. M bõos tɩ y karme.
A Toma: Be, b yetame: “Da sak-y tɩ yãmb sũyã sãam ye. Bɩ y tẽ Wẽnnaam, la bɩ y tẽ maam me.”
A Ãntoan: Rẽ yĩnga y tõe n yeelame tɩ tẽeb hakɩkã yaa y sẽn na n tẽed a Zezi, wall y sẽn na n tẽed a Zeova bɩ?
A Toma: Ayo. A Zezi yeelame tɩ d segd n tẽe Wẽnnaam ne yẽ me.
A Ãntoan: Yaa woto. La d miime tɩ d sã n yeel tɩ d tẽeda Wẽnnaam la a Zezi, pa sek ye. D sẽn vɩ to-to wã me segd n wilga rẽ.
A Toma: Yaa woto bal kɛpɩ!
A Ãntoan: La wãn to la ned tõe n wilg t’a tẽeda Wẽnnaam la a Zezi? Y sã n data, d tõe n sõsa rẽ zug nindaare. *
A Toma: Koɛɛg kae ye.
Tõe tɩ bũmb n be Biiblã pʋgẽ tɩ y rat n wʋm a võore. Pa rẽ bɩ bũmb la a Zeova Kaset rãmbã tẽeda, wall bũmb la b maanda, tɩ y rat n wʋm a võore. Sã n yaa woto, y tõe n soka a Zeova Kaset soaba. A na n leoka y sogsgã ne yamleoogo.
^ sull 60 Y sã n dat kibay n paas bɩ y karem Biiblã sɩd yetame tɩ bõe? sebrã sak 12. A Zeova Kaset rãmbã n yiis-a.
Ned sã n dat n paam fãagre, a segd n tẽ a Zezi
