1. Bõe yĩng tɩ d sã n dɩkd a Zezi togs-n-taar bɩ paasd tõnd ne a Zeova zoodã pãnga?

NAOOR wʋsgo, yaa neb nins d sẽn nandã togs-n-taar la d wae n dɩkdẽ. Hal pĩnd wẽndẽ n tãag rũndã, ninsaal ka be sẽn zems d na rɩk a togs-n-taar n ta a Zezi Kirist ye. Bõe yĩnga? Daar a ye, a yeela woto: “Ned ning sẽn yã maam, a yãa m Ba.” (Zã 14:9) Yaa t’a Zezi rɩka a Ba wã togs-n-taar bal kɛpɩ, tɩ d sã n bãng-a sõma, d bãngda a Zeova. Sẽn paase, d sã n dɩkd a Zezi togs-n-taare, d manegd n lebga a Zeova sẽn yaa yĩngr la tẽng Naabã zoa. Woto pa zu-zẽkr sɩda?

2, 3. a) Bõe yĩng t’a Zeova kɩt tɩ b gʋls a Zezi vɩɩmã kibar Biiblã pʋgẽ, la bõe la a rat tɩ d maane? b) Bõe yell la d na n gom sõs-kãngã la sẽn pʋgd-a wã pʋgẽ?

² A Zeova kɩtame tɩ b gʋls a Zezi vɩɩmã kibar Biiblã pʋgẽ. Bõe yĩnga? A ratame tɩ d bãng a Bi-riblã sõma, n tõog n dɩk a naoore. (Karm-y 1 Pɩɛɛr 2:21.) Biiblã yeelame tɩ d tũ a Zezi naoã. Rẽ wilgdame t’a Zeova ratame tɩ d ges a  Zezi sẽn da vɩ to-to wã, n dɩk a togs-n-taare. La a Zezi sẽn da yaa ned sẽn zems zãngã, a Zeova miime tɩ d pa tõe n dɩk a togs-n-taar tɩ zems kɛpɩ ye. A sẽn dat yaa d modg d sẽn tõe tɛka.

³ Bɩ d gom a Zezi zʋg-sõma kẽer yelle. Sõs-kãngã pʋgẽ, d na n goma a sik-m-mengã la a nimbãan-zoeerã yelle, tɩ sõsg ning sẽn pʋgdã pʋgẽ bɩ d gom a raoodã la a yamã yelle. D sã n wa gomd zʋg-sõng fãa yelle, d na n leoka sogsg a tã: Bõe n wilgd tɩ ned tara zʋg-kãnga? Wãn to la a Zezi wilg t’a tara zʋg-kãnga? Wãn to la d tõe n dɩk a togs-n-taare?

4. Bõe n wilgd tɩ ned yaa sik-m-meng soaba?

⁴ Bõe n wilgd tɩ ned yaa sik-m-meng soaba? Neb wʋsg tagsdame tɩ yaa neb nins sẽn ka pãngã, wall rabɛɛmbã n yaa sik-m-mens rãmba. La pa sɩd ye. Yɩ sik-m-meng soab baooda raoodo. Ned sẽn yaa sik-m-meng soab pa wukd a meng ye. D sã n dat n bɩɩs sik-m-menga, sɩngda ne d sẽn get d mengã to-to wã. Sebr a yembr yeelame tɩ “sik-m-meng yaa f sẽn na n miẽ tɩ f pa zem baa fʋɩ Wẽnnaam taoor ye.” Sẽn paase, d sã n yaa sik-m-meng soaba, d pa na n tagsdẽ tɩ d sãoo d taabã ye. (Rom 12:3; Fil. 2:3) Tõnd sẽn yaa neb sẽn pa zems zãnga, yɩ sik-m-meng soab pa nana ye. La d sã n tẽegd wakat fãa tɩ d pa zem baa fʋɩ Wẽnnaam taoore, la d rɩkd a Zezi togs-n-taare, d tõogd n yɩɩ sik-m-mens rãmba.

5, 6. a) Ãnda la malɛk-rãmbã naab a Mikayɛlle? b) Wãn to la a Mikayɛll wilg t’a yaa sik-m-meng soaba?

⁵ Wãn to la a Zezi wilg t’a yaa sik-m-meng soaba? Wẽnnaam Biigã sẽn wa n be saasẽ n yaa malɛk sẽn tar pãngã, a wilgame t’a yaa sik-m-meng soaba. A sẽn wa n be tẽngã zugã me, a kell n yɩɩ sik-m-meng soaba. Bɩ d gom makr a wãn sẽn wilgd rẽ yelle.

⁶ A sẽn get yɛlã to-to wã. A Ziid sebrã goma bũmb a Zezi sẽn maan nand t’a wa tẽngã zug yelle. (Karm-y Ziid 9.) B boola a Zezi tɩ malɛk-rãmbã naab a Mikayɛlle, n yeel t’a ‘zaba ne Sʋɩtãanã, n wẽ no-koeemd a Moiiz kũumã poorẽ.’ Tẽeg-y t’a Moiiz kũumã poore, a Zeova mum-a-la a toore, tɩ ned pa bãng sẽn yɩ zĩig ningã ye. (Tõo. 34:5, 6) Tõe t’a Sʋɩtãan sẽn da rat yaa rɩk a Moiiz kũumã n kõ Israyɛll nebã. Bala, rẽ ra tõe n yɩɩ sabab tɩ b waoog a Moiiz kũumã. La baa sẽn da yaa bũmb ning la a Sʋɩtãan da rat n maane, a Mikayɛll talla raoodo, n kɩɩs-a. Sebr a yembr yeelame tɩ gom-biis nins b sẽn lebg tɩ ‘zabe,’ la ‘wẽ no-koeemdã’ bilgda neb sẽn kɩɩsd taab bʋ-kaoodb taoore, la tɩ tõe tɩ rẽ wilgdame t’a Mikayɛll yeelame t’a Sʋɩtãan pa tar sor n na n dɩk a Moiiz kũumã ye. La malɛk-rãmbã naab miime t’a pa tar sor n na n kao bʋʋd ye. Rẽ n so t’a bas yellã ne a Zeova sẽn yaa bʋ-kaood sẽn ka to wã. Rẽnd baa a Sʋɩtãan sẽn bao a Mikayɛll noorã, a pa sak n maan bũmb a sẽn pa tar sor n na n maan ye. Woto pa sik-m-meng sɩda?

7. Wãn to la a Zezi no-goamã la a tʋm-tʋmdɩ wã wilg t’a yaa sik-m-meng soaba?

⁷ A Zezi sẽn wa n moond koɛɛgã tẽngã zugã, a no-goamã la a tʋm-tʋmdɩ wã wilgame t’a sɩd yaa sik-m-meng soaba. A no-goamã. A zɩ n gom n bao yʋʋr ye. A sẽn da rat bal yaa a Ba wã  paam waoogre. (Mark 10:17, 18; Zã 7:16) A zɩ n paoog a karen-biisã ye. A ra nand-b lame, n wilgdẽ t’a kɩs-b-la sɩda, la a pẽgd-b b zʋg-sõma wã yĩnga. (Luk 22:31, 32; Zã 1:47) A tʋm-tʋmdɩ wã. A Zezi yãka yam n pa bao bũmb wʋsg ye. (Mat. 8:20) A ra sakd n tʋmda tʋʋm neb a taabã sẽn pa rat n tʋme. (Zã 13:3-15) A kõo mak-sõng sakrã wɛɛngẽ me, n wilg t’a yaa sik-m-meng soaba. (Fil. 2:5-8) A Zezi pa wa wuk-m-mens rãmbã sẽn pa rat n sulg b mens n sak ned baa a ye wã ye. A sika a meng n sak Wẽnnaam raabã, hal n sak n ki. Pa vẽeneg t’a Zezi sẽn yaa ninsaal Biigã ra “yaa nin-nana” sɩda?—Mat. 11:29.

8, 9. Wãn to la d tõe n wilg tɩ d yaa sik-m-mens rãmba?

⁸ Wãn to la d tõe n dɩk a Zezi togs-n-taare, n yɩ sik-m-mens rãmba? D sẽn get yɛlã to-to wã. D sã n yaa sik-m-mens rãmba, d miime tɩ pa bũmb fãa la d tar sor n na n maan ye. Rẽ n so tɩ d pa na n kaood d taabã bʋʋd ye. D pa na n wɩt-ba, wall d tagsdẽ tɩ b pa maand bũmbã fãa ne pʋ-peelem ye. (Luk 6:37; Zak 4:12) D sã n yaa sik-m-meng soaba, d pa na n yɩ ‘nin-tɩrg wʋsgo,’ rat n yeel tɩ d pa na n getẽ tɩ d sãoo neb nins minim sẽn pa ta tõndã, wall sẽn pa tʋmd-b tʋʋm nins d sẽn tʋmd tigingã pʋgẽ wã ye. (Koɛ. 7:16) Kãsem-dãmb nins sẽn yaa sik-m-mens rãmbã pa get tɩ b sãoo b tẽed-n-taasã ye. B tagsdame tɩ ‘nebã fãa yɩɩda bãmba.’—Fil. 2:3; Luk 9:48.

⁹ D gom saam-biig a Walter Thorn yelle. Yʋʋmd 1894, a lebga tigims sull yel-gɛta, n tʋm tʋʋm-kãng yʋʋm wʋsgo. La b wa n kɩtame t’a tɩ tʋmd zĩig siglgã sẽn tar Niuyork soolmẽ wã, tɩ saam-biis be be n gʋʋnd rũms la b koaada. Saam-biig a Thorn tɩ gʋʋnda noose. A yeelame t’a sã n da wa tags tɩ b segd n kõo yẽ tʋʋmd sẽn são rẽ, a yeta a meng woto: “Fo sẽn yaa wubsg fĩ-fĩi n pa zem baa fʋɩ wã, foo la ãnda n wukd f menga?” (Karm-y Ezai 40:12-15.) Woto pa sik-m-meng sɩda?

10. Wãn to la d tõe n wilg ne d no-goamã la d tʋm-tʋmdɩ wã tɩ d yaa sik-m-mens rãmba?

¹⁰ D no-goamã. D sã n yaa sik-m-meng soaba, d no-goamã na n wilgda rẽ. (Luk 6:45) D sã n wa sõsd ne d taabã, d pa na n gomd bũmb nins d sẽn tõog n maanã yell bal ye. (Yel. 27:2) D na n gomda bõn-sõma nins d tẽed-n-taasã sẽn maandã yelle, la d pẽgd-b b zʋg-sõma wã yĩnga. (Yel. 15:23) D tʋm-tʋmdɩ wã. Kiris-neb nins sẽn yaa sik-m-mens rãmbã pa baood n lebg nin-kãsems dũni-kãngã pʋgẽ ye. B basda bũmb kẽer baoobo, n sakd n tʋmd tʋʋm neb a taabã sẽn pa nande, b sẽn mi tɩ tʋʋm-kãens tõe n sõng-b lame tɩ b tʋm a Zeova tʋʋmdã wʋsgã yĩnga. (1 Tɩm. 6:6, 8) Sẽn yɩɩd fãa, d sã n yaa sakdba, d wilgdame tɩ d yaa sik-m-mens rãmba. D sã n dat n sakd “taoor dãmbã” tigingã pʋgẽ, la d sakd a Zeova siglgã saglsã, yaa tɩlae tɩ d yɩ sik-m-mens rãmba.—Heb. 13:17.

11. Wãn to la ned wilgd t’a yaa nimbãan-zoɛta?

¹¹ Wãn to la ned wilgd t’a yaa nimbãan-zoɛta? Nimbãan-zoeer ne nonglem tũuda taaba. Biiblã wilgame  t’a Zeova la a Zezi kõo mak-sõng nimbãan-zoeerã la nonglmã wɛɛngẽ. (Luk 1:78; 2 Kor. 1:3; Fil. 1:8) Sebr a yembr yeelame tɩ nimbãan-zoeer pa f sẽn na n yã ned sẽn namsd tɩ f sũur sãamã bal ye. A paasame tɩ ned sẽn yaa nimbãan-zoɛt sã n yã a to sẽn namsde, a soabã yell pak-a lame, t’a rat n maan bũmb n sõng-a t’a vɩɩmã yɩ sõma. Rẽnd nimbãan-zoeer kɩtdame tɩ d rat n sõng d taabã.

12. Bõe n wilgd t’a Zezi ra zoeta nebã nimbãanega, la a nimbãan-zoeerã kɩtame t’a maan bõe?

¹² Wãn to la a Zezi wilg t’a yaa nimbãan-zoɛta? A nimbãan-zoeerã naaga ne tʋʋma. Yaa vẽeneg t’a Zezi ra zoeta nebã nimbãanega. A sẽn wa n yã a zoa a Maari ne neb a taab sẽn yãbd a Lazaar kũumã poorã, yẽ me “yãbame.” (Karm-y Zã 11:32-35.) Rẽ poore, a nimbãan-zoeerã kɩtame t’a vʋʋg a Lazaar wa a sẽn da vʋʋg pʋg-kõorã bi-riblã. (Luk 7:11-15; Zã 11:38-44) A Zezi sẽn zoe a Lazaar nimbãaneg n vʋʋg-a wã, kɩtame t’a wa paam n naag neb nins sẽn saagd n na n kẽng saasẽ wã. Sẽn deng rẽ, daar a ye, neb kʋʋng n wa a Zezi nengẽ, tɩ b ‘nimbãaneg yõk-a.’ Rẽ kɩtame t’a ‘sɩng n zãms-b bũmb wʋsgo.’ (Mark 6:34) Neb nins sẽn tũ bũmb nins a Zezi sẽn zãms-bã vɩɩm lebga sõma. Rẽnd a Zezi nimbãan-zoeerã pa sũur pʋgẽ bũmb bal ye. Kɩtame t’a maan bũmb n sõng neb nins sẽn namsdã.—Mat. 15:32-38; 20:29-34; Mark 1:40-42.

13. Wãn to la a Zezi ra gomd ne nebã? (Ges-y sõsgã sɩngrẽ fotã.)

¹³ A no-goamã. A Zezi nimbãan-zoeerã kɩtame t’a ra gomd ne nebã ne bʋgsem, sẽn yɩɩd fãa b sẽn da namsd-b rãmbã. A Ezai ra togsa bãngr-gomde, tɩ tʋm-tʋmd a Matɩe wilg tɩ yaa a Zezi yell la a gomda. A ra yeelame: “Yẽ ka na n kaoog tã-wĩig sẽn gõd ye. Yẽ ka na n kiis fɩtl peend bugum sẽn yaa bilf ye.” (Ezai 42:3; Mat. 12:20) Woto rat n yeelame tɩ bõe? A Zezi ra gomda ne bʋgsem, n belsd neb nins b sẽn mak ne tã-wĩig sẽn gõde, la fɩtl peend bugum sẽn dat n ki wã. A ra moonda koe-noogã, n wilgd “sũ-sãoong rãmbã” tɩ manegr n wate. (Ezai 61:1) A boola neb nins sẽn ‘yɛ la sẽn tʋk zɩɩb sẽn yaa zɩsgã’ tɩ b wa yẽ nengẽ, tɩ b na n paama “vʋʋsgo.” (Mat. 11:28-30) A sõnga a karen-biisã tɩ b bãng tɩ b ned kam fãa yell paka Wẽnnaam, baa b rãmb nins dũniyã nebã sẽn pa nandã.—Mat. 18:12-14; Luk 12:6, 7.

14. Wãn to la d tõe n wilg tɩ d zoeta d taabã nimbãanega?

¹⁴ Wãn to la d tõe n dɩk a Zezi togs-n-taar n yɩ nimbãan-zoɛtba? Sɩngda d sũurẽ wã. Biiblã yeelame tɩ d segd n yɩɩ nimbãan-zoɛtba, baa rẽ sã n baooda modgre. Wẽnnaam datame tɩ kiris-nebã ‘lebg nin-paalse,’ tɩ rẽ baood tɩ b yɩ nimbãan-zoɛtb me. (Karm-y Kolos rãmb 3:9, 10, 12.) Wãn to la y tõe n wilg tɩ y zoeta y taabã nimbãanega? Biiblã yeelame tɩ y pelg y pʋs n nong-ba. (2 Kor. 6:11-13) Ned sã n wa togsd yãmb a zu-loɛɛg bɩ y maag y meng n kelg-a. (Zak 1:19) Rẽ poore, bɩ y sok y meng woto: ‘Sã n da yaa maam n tar zu-loe-kãnga, m sũur pa na n sãam sɩda? Bõe la m na n dat tɩ b maan n sõng-ma?’—1 Pɩɛ. 3:8.

15. Ned sã n paam sũ-sãanga, wall a tar zu-loeese, bõe la d tõe n maan n sõng-a?

¹⁵ D tʋm-tʋmdɩ wã. D sã n yaa nimbãan-zoɛtba, d na n sõngda d taabã. Sẽn yɩɩd fãa, b ned sã n wa maan kaalem, wall b sã n wa tar zu-loeese. La bõe la d tõe n maan n sõng-ba? Rom dãmb 12:15 yeelame tɩ d “yãb ne neb nins sẽn yãbdã.” Naoor wʋsgo, neb nins sũy sẽn sãamã sẽn dat n yɩɩd yaa d sẽn na n wilg tɩ b yell pak-d lame, pa d sẽn na n wilg-b b sẽn segd n maan ye. Saam-bi-poak a yembr bi-pugl n maan kaalem, t’a tẽed-n-taas tɩ keng a raoodo. A yeela woto: “Mam zo-rãmbã sẽn wa m nengẽ n naag-m n yãbã, yɩ-m-la noogo.” D tõe n maana bũmb a taab me n wilg tɩ d zoeta d taabã nimbãanega. Wala makre, d tõe n sõnga pʋg-kõor n maneg a roogo, wall d tɩ rɩk kiris-ned sẽn kʋʋl n kẽng tigsga, koɛɛgã moonego, pa rẽ bɩ logtor yiri. Baa yaa bõn-kɩdg la d maan n sõng d tẽed-n-taaga, tõe n naf-a-la wʋsgo. (1 Zã 3:17, 18) La sẽn yɩɩd fãa, yaa d sẽn na n moond koɛɛgã ne yẽesem la d wilgd tɩ d zoeta d taabã nimbãanega. Bũmb pa be d sẽn tõe n maan tɩ naf pʋ-peelem dãmbã n yɩɩg d sẽn na n moon-b koɛɛgã ye.

16. Bõe la d tõe n yeel n keng neb nins sũy sẽn sãamã raoodo?

¹⁶ D no-goamã. D sã n zoet d taabã nimbãanega, na n kɩtame tɩ d ‘belsd sũ-sãoong rãmbã.’ (1 Tes. 5:14) Bõe la d tõe n yeel n keng b raoodo? D tõe n wilg-b lame tɩ b yell pak-d lame. D tõe n goma b zʋg-sõma wã yelle, la bũmb toor-toor b sẽn maan tɩ wilgdẽ tɩ b tara minim me yelle. D tõe n tẽeg-b lame t’a Zeova sẽn bool-b tɩ b lebg a Biigã karen-biisã, wilgdame tɩ b tara yõod a nifẽ. (Zã 6:44) D tõe n tẽeg-b lame me t’a Zeova geta a nin-buiidã yelle, la t’a “pẽnegda neb nins sũy sẽn sãamã,” la a fãagd “sũ-pa-noom dãmbã.” (Yɩɩl 34:19) D sã n gomd gom-noodo, tõe n sɩd kenga neb nins sũy sẽn sãamã raoodo.—Yel. 16:24.

17, 18. a) Wãn to la a Zeova rat tɩ kãsem-dãmbã ges a piisã yelle? b) Bõe yell la d na n gom sõsg ning sẽn pʋgdã pʋgẽ?

¹⁷ A Zeova ratame tɩ kãsem-dãmbã ges a piisã yell ne bʋgsem. (Tʋʋ. 20:28, 29) Yaa bãmb n segd n zãms-b la b keng b raoodo. (Ezai 32:1, 2; 1 Pɩɛ. 5:2-4) Rẽnd kãsem-soab sẽn yaa nimbãan-zoɛt pa na n weoog a tẽed-n-taasã ye. A pa na n modgd-b tɩ b tũ yẽ raabo, wall a ningd-b taal sẽn na yɩl tɩ b maan tɩ yɩɩg b pãng ye. A na n sõnga a tẽed-n-taasã tɩ b paam sũ-noogo, la a kɩs sɩd tɩ b sẽn nong a Zeova wã, b na n maana a raabã ne b sũur fãa.—Mat. 22:37.

¹⁸ D sã n bʋgs a Zezi sik-m-mengã la a nimbãan-zoeerã zugu, na n kɩtame tɩ d rat n dɩk a togs-n-taare. Sõsg ning sẽn pʋgdã pʋgẽ, d na n goma a Zezi raoodã la a yamã yelle.