BÕE la rao segd n maan t’a pagã yam gãand bãane? B wae n yeta kom-dibli wã tɩ rao tʋʋmd yaa a modg n paam ligd n ges a zakã rãmb yelle. La pagb kẽer tara teed wʋsgo, tɩ b yamã yaool n pa gãe bãan ye. B pʋd n yɛɛsdame menga. Wala makre, Ɛspayn pag a ye yʋʋr sẽn boond t’a Roza goma a sɩdã yelle, n yeel woto: “Yɩng rãmbã getame t’a yaa nin-bʋgsga, la zakẽ wã, a yaa nin-toaaga.” Nizeriya pag yʋʋr sẽn boond t’a Zoay me yeelame: “Pĩndã, mam sɩdã sã n yeel gomd tɩ mam pa sake, a yeta woto: ‘Mam sã n yeel fo bũmb fãa, f segd n maaname. Bala, mam yaa fo sɩda.’”

Wãn to la rao tõe n ges a zakã rãmb yell ne bʋgsem? Bõe la a tõe n maan t’a zakã yɩ bãan zĩiga, t’a pagã zĩnd ne “laafɩ”?—Rut 1:9.

Wẽnnaam nifẽ, pag ne rao yaa yembre. La a wilga Biiblã pʋgẽ tɩ pag ne rao pa yembr zak pʋgẽ ye. Biiblã wilgame tɩ pag sã n kẽ kãadem, a segd n saka “a sɩdã tõogo.” (Rom dãmba 7:2, MN) Sigls wʋsg yãkda ned t’a yaa taoor soaba. Wẽnnaam me yãka rao t’a yaa pag zu-soaba. (1 Korẽnt dãmba 11:3) Pʋg-sɩd segd n lʋɩɩ taoor a zakã pʋgẽ.

La wãn to la pʋg-sɩdbã segd n ges b zagsã yell wa Wẽnnaam sẽn datã? Biiblã yeela woto: “Bɩ y nong y pagb wa Kirist sẽn nong bãmb tẽedbã.” (Efɛɛz rãmba 5:25) Yaa sɩd t’a Zezi Kirist zɩ n kẽ kãadem ye. La a manesem sẽn da yaa to-to ne nebã tõe n sõng-y lame tɩ y yɩ sɩd-sõngo. Bɩ d gom rẽ yelle.

A Zezi ra kengda neb a taabã raood la a sõngd-ba. A sagla neb nins fãa sẽn namsde, la sẽn yɛ wã tɩ b wa yẽ nengẽ tɩ b na n paama yolsgo. (Matɩe 11:28, 29) A sãooga kẽer sẽn da kẽnd ne bãas n namsdẽ, la a zãms-b Wẽnnaam goamã tɩ keng b raoodo. Rẽnd pa lingr la neb wʋsg sẽn da nong a Zezi zĩigẽ, n kɩs sɩd t’a na n sõng-b lame wã ye.

 Pʋg-sɩdbã sẽn tõe n dɩk a Zezi togs-n-taar to-to. Sõngd-y y pagã ne a tʋʋmã. Pagb kẽer getame tɩ tʋʋmã yɩɩd-b lame. A Roza yeela woto: “Mam sɩdã nifẽ, mam yaa wa  tʋʋmd-biig bala.” La a Kuweku sẽn yaa rao sẽn kẽ kãadem tɩ yẽ ne a pagã noom ne taabã yeela woto: “Mam mi n kosa m pagã t’a wilg-m bũmb m sẽn tõe n maan n sõng-a. Mam sẽn nong-a wã yĩnga, m mi n yãka yam n sõng-a ne zakã pʋgẽ tʋʋmã.”

A Zezi ra yaa wʋmda, la nimbãan-zoɛt me. Pag a ye la bãag ra namsd na maan yʋʋm 12. A sẽn wʋm t’a Zezi tõe n maana yel-soalmã, a yeela a meng woto: “Mam sã n tõog n sɩɩs bãmb fuugã bala, mam na n paama maagre.” A ra bee bʋʋm. A sẽn kolg n sɩɩs a Zezi fuugã, a paama laafɩ zĩig pʋgẽ. Baa sẽn zĩnd-b be wã kẽer sẽn da tõe n tags tɩ pagã sẽn maanã pa zemsã, a Zezi bãngame tɩ yellã ra looga a nugu. * A maaga a yĩng n yeel-a woto: “M biiga, . . . kẽng ne laafɩ n paam f meng ne bãag ning sẽn tar foomã.” A Zezi pa paoog pagã, wall a zab-a ye. A sẽn yeel bũmb ningã wilgdame t’a miime tɩ bãagã ra namsd-a lame.  Woto, a wilgame t’a yaa nimbãan-zoɛta.—Mark 5:25-34.

Pʋg-sɩdbã sẽn tõe n dɩk a Zezi togs-n-taar to-to. Y pagã yam sã n wa pa be a menga, y segd n yɩɩ wʋmda, la y maan sũ-mar ne-a. Bãng-y tɩ pa a yell ye. Wala makre, a Rikardo yeelame tɩ wakat kẽere, a pagã sũur yikda tao-tao. A paasame: “M sã n wa yã tɩ yaa woto, m gũusdame n da wa yeel bũmb n sãam a sũur n paas ye.”

A Zezi ra wae n sõsda ne a karen-biisã. A ra pelgda a pʋg n sõsd ne-ba. Daar a ye, a yeel-b-la woto: “Bũmb nins fãa mam sẽn wʋm m Ba nengẽ wã, mam togsa yãmba.” (Zã 15:15) Yaa sɩd t’a Zezi ra mi n baoo zĩig n pʋʋs a yembre, la a bʋgse. La a ra wae n togsda a karen-biisã bũmb nins sẽn pak-a. Yʋng ning b sẽn yõk-a wã, a yeel-b-la vẽeneg t’a sũur sãama wʋsgo. (Matɩe 26:38) Baa a karen-biisã sẽn da mi n maan bũmb tɩ sãam a sũurã, a zɩ n muk n pa le gomd ne-b ye.—Matɩe 26:40, 41.

Pʋg-sɩdbã sẽn tõe n dɩk a Zezi togs-n-taar to-to. Pelgd-y y pʋg n sõsd ne y pagã. Pagb kẽer yetame tɩ b sũur pa noom ne b sɩdbã manesem ye. Bala, b sã n be neb sʋka b nonga sõsga, la b sã n wa be yiri, b pa gomd ye. La a Ana wilgame t’a sɩdã sã n pelg a pʋg n sõs ne yẽnda, noom-a-la wʋsgo. Ad a sẽn yeele: “Rẽ kɩtdame tɩ mam neẽ t’a sɩd nong-m lame, la kɩt tɩ ma-me maneg n nong-a.”

Y sũur sã n wa yik ne y pagã bɩ y ra muk ne-a sẽn na yɩl tɩ zab-a ye. Pag a ye yeela woto: “Mam sɩdã sũur sã n mi n yik ne-mã, a mukdame n maan rasem n pa gom ne-m ye. Rẽ kɩtdame tɩ m ningd m meng taale, la m tagsdẽ t’a pa nand-m ye.” La rao a ye sẽn boond t’a Edwin yẽ modgd n dɩkda a Zezi togs-n-taare. A yeelame: “M sũur sã n mi n yiki, m pa gomd zĩig pʋgẽ ye. La m gũusdame n getẽ, n baood wakat d sẽn tõe n gom rẽ yelle, n maneg yellã.”

A Zoay sẽn yaa pag ning yell d sẽn gom sɩngrẽ wã wa n mikame t’a sɩdã toeemame. La yɩ a sẽn sɩng Biiblã zãmsg ne a Zeova Kaset rãmbã n toeem-a. A Zoay yeela woto: “A lebga nin-bʋgsga, n modgd n dɩkd a Zezi togs-n-taar sẽn na yɩl n lebg sɩd-sõngo.” Neb milyõ-rãmb sẽn kẽ kãadem me paamdame tɩ b zãmsd-b Biiblã tɩ nafd-ba. Yãmb me ratame tɩ b zãms-y Biiblã bɩ? Y tõe n kosa a Zeova Kaset soab t’a zãms-y Biiblã zaalem.