“F sã n dat n sɩd bãng Wẽnnaam, bɩ f tũ a Zeova Kaset rãmbã.” M sẽn wʋm gom-kãngã wã ling-m lame. Sasa kãngã m da sɩnga Biiblã zãmsg ne a Zeova Kaset rãmbã sẽn nan pa kaoose. La sẽn na yɩl tɩ y bãng sẽn ling-mã võore, m na n togs-y-la m kibarã.

 M doga Quezaltepeque sẽn yaa El Salvador tẽng a yembrã. Tõnd ra yaa kamb 15 tɩ maam la yoob-n-soabã. M doagdbã ra wubda maam n dat tɩ m yɩ pʋ-peelem-soab la m sakd laloa wã. Sẽn paase, a Leonardo ne a Zeova Kaset rãmb a taab n da mii n wat n zãmsd tõnd Biiblã. La m toog ra kae ne zãmsgã, tɩ m da maand wẽng woo wẽng bala. M sẽn wa n tar yʋʋm 14, m sɩnga ra-yũur la dorg rɩkr ne m karen-bi-taase. B basa lekollã yembr-yembr n tɩ naag bi-bees sulli, tɩ m dɩk b mak-wẽngã togs-n-taare. D ra sõsda soayã zut n bõosdẽ la d zuud ligd n daad dorgã ne rãamã.

 Yaa bi-beesã sull n lebg m zak neba. M da tẽedame tɩ yaa tɩlɛ tɩ m kell n maan sɩd ne-ba. Wala makre, daar a ye, m sullã pʋgẽ bi-bɛɛg n da rɩk dorg tɩ loog n zab ne mam yak a ye. B zabrã sasa, m yakã maoome n tõog m zoa wã la a bool Polɩɩs-rãmba. M sũurã yikame tɩ m sɩng m yakã mobil pãbr ne bãn-bedr n dat t’a bas m zoa t’a looge. M yakã sẽn yã tɩ m sãamda mobilã ne a vɩta-rãmbã n paasdẽ wã, a bõos-m lame tɩ m base, la m zãgsame.

 M sẽn wa n tar yʋʋm 18, tõnd zaba ne polɩɩs-rãmbã. M sẽn wa n dat n lob bõmb d sẽn maan d toorã, m pa bãng sẽn yɩ to-to la bõmbã pugsg m nugẽ ye. M sẽn tẽr bal yaa m nugã sẽn sãam tɩ m lʋɩ n sobgã. M sẽn nek logtor-yirã, m bãngame tɩ m rɩtg nugã fiuugame tɩ m rɩtg tʋbrã pa le wʋmdẽ ye. Sẽn paase, m rɩtg nifã me ra pa le ne sõma ye.

 Baa ne m sẽn poglã, m sẽn yi logtor-yirã poor bala, m leba bi-beesã sullẽ. Rẽ poore, polɩɩs-rãmbã yõka-m lame n pag bãens-roogo. Pʋgẽ be, m zoodã ne sullã bi-beesã pãng maneg n paasame. Daar fãa d ra bee ne taaba, sẽn sɩng ne yibeoog no-soakã sasa d sẽn dɩk d marizuana wã hal n wa tãag d gõeem wakate.

 M sẽn wa n be bãensã roogẽ, a Leonardo wa n kaag-m lame. D sẽn wa n sõsd ne taabã, a yãa tatuuas sẽn be m rɩtg kangã zug t’a tees n sok-m yaa. “ Fo mii tatuuas a tãabã võor bɩ? M leok-a lame tɩ n-ye. B võor yaa “yoobo, dorge, la rok ne rolle,” sẽn yaa mizigs buudã. La a Leonardo yeelame yaa: “Ne maam, b võor yaa logtor-yiri, bãens-roogo, la kũum. Fo zoe n zĩnda logtor-yiri, n be bãens roogẽ masã. F mii sẽn pʋgdã.”

 A Leonardo sẽn yeel bũmb ningã kẽ-m lame. A ra tara bʋʋm. M sẽn da vɩ to-to wã wilgdame tɩ m da tuuda m meng yaoogo. A Leonardo kos-m lame tɩ m zãms Biiblã ne yẽ, tɩ m sake. Bũmb ning m sẽn zãmsã kɩtame tɩ m toeeme. Wala makre, Biiblã yetame tɩ “tũud-n-ta-wẽns sãamda minim-sõamyã.” (1 Korẽnt rãmbã 15:33) Dẽnd, pipi bũmb m sẽn da segd n maan yaa bao zo-rãmb a taaba. Rẽ n so tɩ m bas m bi-be-taasã tigs kẽnde, la m sɩng a Zeova Kaset rãmbã tigs kẽnd bãensã roogẽ. A Zeova Kaset rãmbã tigiss sasa, m bãnga ned a ye b sẽn pag bãens-roogẽ wã sẽn boond t’a Andrés sẽn deeg lisg n lebg a Zeova Kaset soaba. A boola maam tɩ m wa naaga n dɩk no-soaka. Rẽ poore, m le pa rɩk marizuana yibeoog ye. A Andrés ne maam da vaeesda daar vɛrse wã yibeoog fãa.

 Sullã bi-bees bãnga tao-tao tɩ m toeemdame. Rẽ kɩtame tɩ bi-beesã sullã taoor-soab a ye yeel-m t’a rat n sõsa ne-ma. M da yɛɛsdame. M da pa mi a sẽn da na n maan-m bũmb ninga, a sã n bãng m sẽn dat n maanã ye. Bala ra yaa toog tɩ ned yi bi-beesã sull pʋgẽ. A yeelame yaa: “Tõnd yãame tɩ fo basa tõnd tigissã waoong n kẽnd a Zeova Kaset rãmbã tigissã. Bõe la f magd n na n maane?” M togs-a lame tɩ m dat n kell n zãmsa Biiblã la m toeeme. A yeela maam tɩ bi-beesã sull pa na n maan-m bũmbu, m sã n wilg tɩ m sɩd rat n lebga a Zeova Kaset soaba, la ling-m lame. A paasame tɩ “f sã n dat n sɩd bãng Wẽnnaam bɩ f tũ a Zeova Kaset rãmbã. D tẽedame tɩ f na n basa tʋʋm-wẽnsã. M sũur yaa noog ne foom. F rɩka so-sõngã. A Zeova Kaset rãmbã tõe n sɩd sõnga foom. M zãmsa Biiblã ne-b Etazĩni, la m doagdb kẽer yaa a Zeova Kaset rãmba. Ra yɛɛs ye. Ket n zãmsd Biiblã.” M da ket n yɛɛsdame, la m sũur ra yaa noog wʋsg me. M da ya wa liuul b sẽn pak n base. M da wʋmda a Zeezi goama võore: “Yãmb na n bãnga sɩdã, la sɩdã na n yiisa yãmb yembdẽ.”​—Zã 8:32.

 Mam zo-kʋd kẽer n kõ-m dorg n na n mak-ma. Sɩda, sasa kẽere, m sakd n deeg n yũume. La kaoosg zugu, m pʋʋsa naoor wʋsg ne m sũur fãa, n wa tõog n bas tʋʋm-wẽnsã.​—Yɩɩn-sõamyã 51:12, 13.

 M sẽn wa n yi bãensã roogẽ wã, neb wʋsg ra tagsdame tɩ m na n lebg n sɩnga tʋʋm-wẽnsã, la m pa le lʋɩ a pʋgẽ ye. M zo-rãmbã wa n kɩsa sɩd tɩ m toeemame. La bʋko, m bɛɛbã pa kɩs sɩd ne rẽ ye.

 Daar a ye m sẽn wa n yi koe-moonego, bi-bees sull a to neb n gũbg maam ne m tũud-n-taag zĩig pʋgẽ ne bug-raad n dat n kʋ-ma. M tũud-n-taagã wilg-b-la ne bʋgsem la ne raood tɩ mam le pa bi-bees sull ned ye. La m maoome n kell n yals bãane. B sẽn pãb maam la b keoog-m tɩ m da le wa zĩ-kãngã poore, b suya b bug-raadã la b bas-d tɩ d looge. Biiblã sɩd sõng-m lame tɩ m toeeme. Sã n da yaa pĩndã, m da na n bao n doka m sũuri. La masã m sak n tũuda Biiblã saglg sẽn be 1 Tesalonik rãmb 5:15: “Gũus-y tɩ yãmb ned baa a ye ra lebs ned wẽng wẽng yĩng ye. La bɩ y maand taab neer wakat fãa, la y maand nebã fãa neere.”

 M sẽn lebg a Zeova Kaset soab tɛka, m maoome n na n yɩ pʋ-peelem soaba. La pa yɩ nana ye. La baa ne rẽ fãa, ne a Zeova sõngre, la ne Biiblã sagls la ne m zo-rãmbã sõngre, m tõogame. M pa rat n le leb m pĩnd vɩɩmẽ wã ye.​—2 Pɩyɛɛr 2:22.

 M da nonga nen-kɛglem tɩ m sũurã yikd tao-tao. M kɩsa sɩd tɩ m sã n da pa toeeme, m pa na n ket n vɩ masã ye. M sẽn zãms bũmb nins Biiblã pʋgẽ wã kɩtame tɩ m toeeme. M basa m tʋʋm-wẽnsã. M zãmsa m sẽn tõe n bao laafɩ to-to ne m pĩnd bɛɛbã. (Luk 6:27) Masã m paama zo-rãmb sẽn tõe n sõng-m tɩ m bɩɩs zʋg-sõma. (Yel-bũnã 13:20) M vɩɩma yaa noogo, la m miẽ tɩ manegr n wate, tɩ m tũud Wẽnnaam a sẽn sak n kõ-m sugr ne wẽng ning fãa m sẽn da maanã.​—Ezayi 1:18.

 Yʋʋmd 2006, m paama zu-noog n kẽng Rĩungã tʋʋmd lekoll sẽn pa kẽ-b kãadem yĩnga. Yʋʋm a wãn poore, m paama pag m sẽn nong tɩ d kẽ kãadem, la d naag taab n wubd d bi-puglã. Masã m zãmsda neb Biiblã tɩ b bãng saglsã sẽn sõng maamã. M leb n yaa kãsem-soab tigingã pʋgẽ, la m sõngd kom-bɩɩsã tɩ b ra tudg n yãk yam wa mam sẽn da yãk yam ning m sẽn da yaa bi-bɩɩg wa bãmbã ye. Masã m pa le tuud m meng yaoog ye. M sẽn maand bũmb ningã na n sõng-m lame tɩ m wa paam vɩɩm sẽn kõn sa wã Wẽnnaam sẽn pʋlem Biiblã pʋgẽ wã.