Ad bʋʋm a wãn sẽn kɩt t’a Zeova Kaset rãmbã pa kẽngd zabrã:

1.   Tõnd sakda Wẽnnaam. Biiblã yeelame tɩ Wẽnnaam nin-buiidã na n “dɩka b zabr sʋʋsã n kud wãgse,” la tɩ b “kõn leb n zãms zabr sẽn zabd to-to ye.”—Ezayi 2:4.

2.   Tõnd sakda a Zeezi. A Zeezi yeela tʋm-tʋmd a Pɩyɛɛr woto: “Lebs f sʋʋgã n sui a wʋʋgẽ. Bala, neb nins fãa sẽn na n zab ne zabr sʋʋga, zabr sʋʋg n na n kʋ-ba.” (Matye 26:52) Dẽnd a Zeezi wilgame t’a karen-biisã pa na n kẽes b toog zab pʋsẽ ye.

    A Zeezi karen-biisã tũuda a saglga n pa kẽed politikã yɛlẽ tɩ wilgdẽ tɩ b “ka dũni neb ye.” (Zã 17:16) B pa gɩdgd sodaas tɩ b ra tʋm b tʋʋma, wall b gɩdg ned t’a ra kẽ sodaar ye.

3.   Tõnd nonga nebã. A Zeezi sagla a karen-biisã tɩ b ‘nong taaba.’ (Zã 13:34, 35) Dẽnd b na n yɩɩ saam-biis sẽn be dũniyã gill zug n nong taaba, n pa na n sak n zab taab ye.—1 Zã 3:10-12.

4.   Tõnd rɩkda pipi kiris-nebã togs-n-taare. Sebr a yembr yeela woto: “A Zeezi pipi karen-biisã pa kẽes b meng zab la sodaar pʋsẽ ye.” Bala b ra getame tɩ b sã n maan dẽ, b “pa na n tõog n tũ a Zeezi saglgã n nong taaba, la b nong b bɛɛbã ye.” Woto me, Alemayn bãngd a Peter Meinhold yeela woto a Zeezi karen-biisã wɛɛngẽ: “Ned pa tõe n yaa kiris-neda, la a le yaa sodaag ye.”

 A Zeova Kaset rãmbã sõngda nebã, la b zãad b meng sõma tẽng ning pʋg b sẽn vɩ wã tɩ sõngdẽ tɩ bãan beẽ. D sakda tẽngã pãn-soaadbã tɩ wilgdẽ tɩ d tũuda Biiblã sagl-kãensã:

•   “Bɩ ned fãa sak pãn-soaadb sẽn yɩɩd-a.”—Rom-dãmbã 13:1.

•   “Bɩ y lebs Sezaar bũmb ning sẽn yaa Sezaar dẽnda, la y lebs Wẽnnaam bũmb ning sẽn yaa Wẽnnaam dẽnda.”—Matye 22:21.

 Dẽnd d sakda noor ning sẽn wilgd tɩ d yao lampo-rãmbã, la d sakd goosneema wã n sõngdẽ tɩ bãan beẽ.