रोमकर यांना पत्र १२:१-२१
१२ त्यामुळे बांधवांनो, मी देवाच्या करुणेने तुम्हाला विनंती करतो, की तुम्ही आपली शरीरं+ जिवंत, पवित्र+ आणि देवाला स्वीकारयोग्य बलिदान म्हणून अर्पण करावीत. असं केल्यामुळे, तुम्हाला आपल्या विचारशक्‍तीने* पवित्र सेवा करता येईल.+
२ आणि यापुढे या जगाच्या व्यवस्थेचं* अनुकरण करू नका. तर आपली विचारसरणी बदलून स्वतःचं रूपांतर होऊ द्या;+ म्हणजे, देवाची चांगली, स्वीकारयोग्य आणि परिपूर्ण इच्छा काय आहे याची तुम्हाला खातरी पटेल.+
३ देवाकडून मिळालेल्या अपार कृपेने मी तुमच्यापैकी प्रत्येकाला सांगतो, की स्वतःला आपल्या योग्यतेपेक्षा मोठं समजू नका.+ तर देवाने प्रत्येकाला जितका विश्‍वास* दिला आहे, त्याप्रमाणे स्वतःबद्दल समंजसपणे विचार करा.+
४ कारण जसे आपल्या शरीरात बरेच अवयव आहेत,+ पण ते सगळे एकाच प्रकारचं काम करत नाहीत;
५ तसंच, आपणसुद्धा पुष्कळ असलो, तरी ख्रिस्तासोबतच्या ऐक्यामुळे एकच शरीर असून एकमेकांना जोडलेले अवयव आहोत.+
६ देवाच्या अपार कृपेने आपल्याला वेगवेगळी दानं मिळाली आहेत.+ म्हणून, जर भविष्यवाणी करायचं दान मिळालं असेल, तर आपल्याला दिलेल्या विश्‍वासाप्रमाणे आपण भविष्यवाणी करू या;
७ किंवा सेवेचं दान असेल, तर सेवा करत राहू या; किंवा ज्याला शिकवण्याचं दान मिळालं आहे, त्याने शिकवत राहावं;+
८ किंवा ज्याला प्रोत्साहन देण्याचं दान मिळालं आहे, त्याने प्रोत्साहन द्यावं.+ जो दान देतो,* त्याने ते उदारपणे द्यावं;+ जो नेतृत्व करतो,* त्याने ते मेहनतीने* करावं;+ आणि जो दया दाखवतो, त्याने ती आनंदाने दाखवावी.+
९ एकमेकांवर खऱ्‍या मनाने प्रेम करा.*+ वाइटाचा द्वेष करा+ आणि चांगल्याला धरून राहा.
१० भावाभावांसारखं प्रेम करून एकमेकांबद्दल आपुलकी बाळगा. एकमेकांचा आदर करण्यात पुढाकार घ्या.+
११ मेहनती* असा, आळशी असू नका.*+ पवित्र शक्‍तीद्वारे* आवेशी असा.+ यहोवाचे* दास होऊन त्याची सेवा करा.+
१२ आपल्या आशेमुळे आनंदी राहा. संकटात धीर धरा.+ प्रार्थना करत राहा.+
१३ पवित्र जनांच्या गरजा भागवायला हातभार लावा.+ पाहुणचार करत राहा.+
१४ तुमचा छळ करणाऱ्‍यांना आशीर्वाद देत राहा;+ आशीर्वादच द्या, शाप देऊ नका.+
१५ आनंद साजरा करणाऱ्‍यांसोबत आनंद साजरा करा; रडणाऱ्‍यांसोबत रडा.
१६ तुम्ही स्वतःबद्दल जसा विचार करता, तसाच इतरांबद्दलही करा. मोठमोठ्या गोष्टींचा विचार करू नका,* तर हलक्या समजल्या जाणाऱ्‍या गोष्टी करायला तयार असा.+ स्वतःच्या नजरेत बुद्धिमान होऊ नका.+
१७ वाइटाबद्दल कोणाचं वाईट करू नका,+ तर सगळ्यांच्या दृष्टीने* जे चांगलं ते करण्याकडे लक्ष द्या.
१८ शक्यतो, सगळ्यांसोबत होईल तितकं शांतीने राहा.+
१९ प्रिय बांधवांनो, सूड घेऊ नका, तर झालेल्या वाइटाबद्दल देवाला त्याचा क्रोध व्यक्‍त करू द्या.+ कारण असं लिहिलं आहे: “ ‘सूड घेणं माझं काम आहे, मी परतफेड करीन,’ असं यहोवा* म्हणतो.”+
२० पण, “तुझा शत्रू भुकेला असेल, तर त्याला खायला दे; तो तहानलेला असेल, तर त्याला पाणी दे; कारण असं केल्यामुळे तू त्याच्या डोक्यावर निखाऱ्‍यांचा ढीग रचशील.”*+
२१ वाइटाने जिंकला जाऊ नकोस, तर बऱ्‍याने वाइटाला जिंकत राहा.+
तळटीपा
^ किंवा “तर्कबुद्धीने.”
^ किंवा “सध्याच्या काळाचं.” शब्दार्थसूची पाहा.
^ किंवा “विश्‍वासाचा हिस्सा; वाटा”
^ किंवा “वाटतो.”
^ किंवा “पुढाकार घेतो.”
^ किंवा “आवेशाने.”
^ किंवा “तुमचं प्रेम ढोंगी नसावं.”
^ किंवा “आवेशी.”
^ किंवा “कामात टंगळमंगळ करू नका.”
^ शब्दार्थसूची पाहा.
^ किंवा “गोष्टींवर मन लावू नका.”
^ किंवा “नजरेत.”
^ म्हणजे, एखाद्याचं कठोर मन सौम्य करून त्याचा राग शांत करणं.
