Għala Għandna Bżonn is-Saltna t’Alla?
Fil-bidu tal-istorja tal-bniedem, il-Ħallieq tagħna, li jismu Ġeħova, kien l-uniku Mexxej. Hu mexxa bi mħabba. Hu għamel dar sabiħa, ġnien fl-Għeden, biex fiha jgħixu l-bnedmin. Ukoll, hu pprovdielhom abbundanza taʼ ikel. Flimkien maʼ dan, hu ta lill-bnedmin xogħol bi skop x’jagħmlu. (Ġenesi 1:28, 29; 2:8, 15) Il-bnedmin kienu se jgawdu l-paċi kieku baqgħu taħt it-tmexxija kollha mħabba t’Alla.
Il-Bibbja turi li anġlu ribelluż, li iktar tard ġie msejjaħ Satana x-Xitan, sfida d-dritt li Alla jmexxi. Hu ried jagħti x’jifhem li l-bnedmin kienu se jkunu iktar kuntenti mingħajr il-gwida u t-tmexxija t’Alla. B’dispjaċir, l-ewwel ġenituri tagħna, Adam u Eva, għamlu bħal Satana u rribellaw kontra Alla.—Ġenesi 3:1-6; Rivelazzjoni 12:9.
Minħabba li Adam u Eva rrifjutaw lil Alla bħala l-Mexxej tagħhom, huma tilfu d-dar tagħhom li kienet Ġenna u t-tama li jgħixu għal dejjem f’saħħa perfetta. (Ġenesi 3:17-19) Id-deċiżjoni tagħhom affettwat ukoll lit-tfal li kellhom. Il-Bibbja tgħid li minħabba li Adam dineb, “id-dnub daħal fid-dinja, u permezz tad-dnub il-mewt.” (Rumani 5:12) Id-dnub wassal għal riżultat traġiku ieħor: “Il-bniedem iddomina lill-bniedem bi ħsara għalih.” (Ekkleżjasti 8:9) Fi kliem ieħor, meta l-bnedmin imexxu lilhom infushom, dejjem se jkun hemm il-problemi.
TIBDA T-TMEXXIJA MILL-BNIEDEM
L-ewwel mexxej uman imsemmi fil-Bibbja kien Nimrod. Hu rribella kontra t-tmexxija taʼ Ġeħova. Minn żmien Nimrod ’l hawn, nies setgħanin abbużaw mill-awtorità tagħhom. Xi 3,000 sena ilu, is-Sultan Salamun kiteb: “Rajt id-dmugħ tal-maħqurin, imma ma kellhomx min ifarraġhom. U fuq in-naħa taʼ dawk li kienu jaħqruhom kien hemm il-qawwa.”—Ekkleżjasti 4:1.
Illum l-affarijiet ma nbidlux. Fl-2009, pubblikazzjoni tal-Ġnus Magħquda qalet li iktar ma jgħaddi żmien, tmexxija ħażina iktar qed titqies bħala “waħda mir-raġunijiet ewlenin tal-ħażen kollu fis-soċjetajiet tagħna.”
ŻMIEN BIEX ALLA JIEĦU AZZJONI
Id-dinja għandha bżonn mexxejja aħjar u tip taʼ gvern aħjar. U hekk wegħedna l-Ħallieq!
Alla waqqaf Saltna, jew gvern, li se tieħu post it-tmexxija kollha tal-bniedem, u “hi [biss] tibqaʼ wieqfa għal dejjem.” (Danjel 2:44) Din hi s-Saltna li miljuni taʼ nies ilhom jitolbu għaliha. (Mattew 6:9, 10) Imma Alla mhux se jmexxi dan il-gvern hu stess. Minflok, hu ħatar lil xi ħadd li għex bħala bniedem biex ikun il-Mexxej. Lil min għażel Alla?