Kun Af il-Fatti
Il-Problema
Spiss il-preġudizzju jkun ibbażat fuq informazzjoni żbaljata. Ara l-eżempji li ġejjin:
-
Dawk li jimpjegaw lin-nies jemmnu b’mod żbaljat li n-nisa mhumiex kwalifikati għal xogħlijiet xjentifiċi jew tekniċi.
-
Madwar elf sena ilu, il-Lhud ġew akkużati b’mod falz li vvalenaw il-bjar u xerrdu l-mard. Matul il-ħakma Nazista, il-Lhud reġgħu ġew akkużati. Imma din id-darba f’li kkaġunaw il-kriżi ekonomika fil-Ġermanja. B’hekk, il-Lhud saru vittmi taʼ preġudizzju estrem, u ftit minnu għadu magħna sal-lum.
-
Ħafna nies jikkonkludu b’mod żbaljat li kull persuna b’diżabilità hija mdejqa jew irrabjata.
Nies li jemmnu affarijiet bħal dawn isibu eżempji li jappoġġaw il-preġudizzju tagħhom. U huma jaħsbu li kull min ma jaqbilx magħhom huwa injorant.
Prinċipju mill-Bibbja
“Mhux tajjeb li wieħed ma jkollux għarfien.”—PROVERBJI 19:2.
Xi jfisser? Jekk ma nkunux nafu l-fatti, se nieħdu deċiżjonijiet ħżiena. Jekk nemmnu dak li jgħidu n-nies minflok ma nemmnu l-fatti, aħna se niġġudikaw lil oħrajn ħażin.
Li Nafu l-Fatti Kif Se Jgħinna?
Meta nsiru nafu n-nies sew, m’aħniex se nemmnu l-affarijiet foloz li nies oħrajn jgħidu
dwarhom. U meta nirrealizzaw li l-affarijiet negattivi li n-nies jgħidu dwar ċertu grupp ma jkunux veri, m’aħniex se nemmnu malajr dak li nisimgħu.Dak li Tistaʼ Tagħmel
-
In-nies iħobbu jpoġġu lil gruppi taʼ nies f’keffa waħda. Imma tajjeb niftakru li ħafna minn dak il-grupp ma jkollhomx kwalitajiet ħżiena.
-
Ftakar li int jistaʼ ma jkollokx l-informazzjoni kollha dwar oħrajn.
-
Ipprova ġib il-fatti minn sors li tafda fih.