Bijografija

KIF RAKKONTAT MINN DAVID Z. HIBSHMAN

“Jekk wasalt fit-​tmiem taʼ ħajti, tassew nittama li kont leali lejn Jehovah. Jien nitolbu biex jieħu ħsieb lil David tiegħi. Nirringrazzjak li tajtni lilu, Jehovah, u għaż-​żwieġ tagħna. Tassew meraviljuż, tassew hieni!”

Immaġina x’ħassejt meta wara li dfinna lil marti f’Marzu taʼ l-​1992, sibt din l-​aħħar nota fid-​djarju tagħha. Eżatt ħames xhur qabel, konna għadna kemm iċċelebrajna s-​60 anniversarju taʼ Helen fil-​ministeru full-time.

Għadni niftakar daqshekk ċar dakinhar fl-​1931, meta jien u Helen poġġejna bil-​qegħda fejn xulxin fil-​konvenzjoni f’Columbus, Ohio, fl-​Istati Uniti taʼ l-​Amerka. Helen kienet għadha lanqas biss għalqet l-​14-il sena, imma hi apprezzat is-​sinjifikat taʼ dik il-​ġrajja saħansitra ħafna iktar minni. L-​entużjażmu taʼ Helen għall-​ministeru ntwera ftit wara meta hi u ommha, li kienet armla, saru pijunieri, kif jissejħu l-​evanġelizzaturi full-time fost ix-​Xhieda taʼ Jehovah. Huma ħallew id-​dar komda tagħhom sabiex imorru jippridkaw fi nħawi rurali fin-​nofsinhar taʼ l-​Istati Uniti.

Il-​Wirt Kristjan Tiegħi

Fl-​1910, il-​ġenituri tiegħi flimkien maż-​żewġ uliedhom żgħar telqu mil-​lvant taʼ Pennsylvania u marru joqogħdu Grove City, fil-​parti tal-​punent taʼ l-​istat. Hemmhekk għamlu depożitu fuq dar modesta u saru membri attivi tal-​Knisja Riformata. Ftit taż-​żmien wara, mar iżurhom William Evans, Student tal-​Bibbja, kif kienu jissejħu x-​Xhieda taʼ Jehovah dak iż-​żmien. Missieri, li kellu biss madwar 25 sena, u ommi, li kienet ħames snin iżgħar minnu, qagħdu jisimgħu lil dan ir-​raġel mill-​aħjar minn Wales u stidnuh għall-​ikel. Huma ma damux ma ħaddnu l-​veritajiet tal-​Bibbja li kienu qed jitgħallmu.

Biex ikun eqreb tal-​kongregazzjoni, missieri ħa lill-​familja toqgħod madwar 40 kilometru ’l bogħod fil-​belt taʼ Sharon. Ftit xhur wara, fl-​1911  jew fl-​1912, missieri u ommi tgħammdu. Charles Taze Russell, l-​ewwel president tal-​Watch Tower Society, ta t-​taħdita tal-​magħmudija. Jien twelidt fl-​4 taʼ Diċembru, 1916, meta l-​ġenituri tiegħi diġà kellhom erbat itfal oħra. Mat-​twelid tiegħi, ġie mħabbar: “Għandna ħu ieħor x’inħobbu.” Għaldaqstant semmewni David, li jfisser “Maħbub.”

Meta kelli erbaʼ ġimgħat, ħaduni għall-​ewwel konvenzjoni tiegħi. F’dawk iż-​żminijiet bikrin, missieri u ħuti s-​subien il-​kbar kienu jimxu diversi kilometri għal-​laqgħat tal-​kongregazzjoni, waqt li ommi kienet tieħu lili u lil oħti u taqbad it-​tramm. Il-​laqgħat kienu jikkonsistu f’sessjonijiet taʼ fil-​għodu u taʼ wara nofs in-​nhar. Id-​dar, il-​konversazzjonijiet tagħna taʼ spiss kienu jiċċentraw fuq artikli taʼ It-​Torri taʼ l-​Għassa u The Golden Age, kif kien magħruf qabel Stenbaħ!

Nibbenefikaw minn Eżempji mill-​Aħjar

Ħafna pellegrini, kif kienu jissejħu dak iż-​żmien il-​kelliema li jivvjaġġaw, żaru l-​kongregazzjoni tagħna. Normalment kienu jqattgħu ġurnata jew tnejn magħna. Kelliemi minnhom li baqaʼ ċar f’moħħi kien Walter J. Thorn, li kien ftakar fil-​Ħallieq Grandjuż tiegħu ‘f’jiem żgħożitu.’ (Koħèlet 12:1) Meta kont għadni tifel, kont nakkumpanja lil missieri biex juri l-​“Photo-Drama of Creation,” preżentazzjoni viżiva u rekordjata f’erbaʼ partijiet fuq l-​istorja taʼ l-​umanità.

Għalkemm Ħuna Evans u martu, Miriam, ma kellhomx tfal, huma saru l-​ġenituri u n-​nanniet spiritwali għall-​familja tagħna. William dejjem indirizza lil missieri bħala “Ibni,” u hu u Miriam daħħlu l-​ispirtu taʼ l-​evanġelizzar fil-​familja tagħna. Kmieni fil-​bidu tas-​seklu 20, Ħuna Evans kien għamel vjaġġi lura lejn Wales sabiex iwassal il-​verità tal-​Bibbja fl-​inħawi madwar Swansea. Hemmhekk kien magħruf bħala l-​predikatur mill-​Amerka.

Fl-1928, Ħuna Evans telaq xogħlu u beda jippriedka fl-​għoljiet taʼ West Virginia. Iż-​żewġ ħuti subien il-​kbar, Clarence taʼ 21 sena u Carl taʼ 19-il sena, marru miegħu. L-​erbaʼ subien li aħna lkoll qattajna ħafna snin fil-​ministeru full-time. Fil-​fatt, kollha kemm aħna qdejna bħala indokraturi taʼ l-​ivvjaġġar tax-​Xhieda taʼ Jehovah f’żgħożitna. M’ilux ħafna, Mary, oħt ommi ż-​żgħira, li issa għandha ’l fuq minn 90 sena, kitbitli: “Kemm aħna lkoll grati li Ħuna Evans kellu ż-​żelu għall-​ministeru u ġie jżur Grove City!” Iz-​zija Mary hija persuna oħra li ilha tiftakar fil-​Ħallieq tagħha minn mindu kienet żagħżugħa.

Nattendu għall-​Konvenzjonijiet

Missieri u Clarence biss setgħu jattendu għall-​konvenzjoni storika f’Cedar Point, Ohio, fl-​1922. Madankollu, sa l-​1924 kellna karozza, u l-​familja kollha tagħna setgħet tmur għall-​konvenzjoni f’Columbus, Ohio. Aħna t-​tfal konna mistennijin li nużaw il-​flus li faddalna biex inħallsu għall-​ikliet tagħna matul it-​tmint ijiem tal-​konvenzjoni. Il-​ħarsa tal-​ġenituri tiegħi kienet li l-​membri kollha tal-​familja għandhom jitgħallmu kif imantnu lilhom infushom. Għalhekk konna nrabbu t-​tiġieġ, il-​fniek u anki n-​naħal, u aħna s-​subien kollha konna naqilgħu xi ħaġa tal-​flus billi nqassmu l-​gazzetti.

Meta wasal iż-​żmien għall-​konvenzjoni f’Toronto, il-​Kanada, fl-​1927, kellna ħu ieħor taʼ sitt xhur jismu Paul. Jien ġejt inkarigat li nibqaʼ d-​dar u nieħu ħsieb Paul bl-​għajnuna taʼ ziti Mary li kienet iżżewġet, waqt li l-​ġenituri tiegħi marru Toronto bit-​tfal l-​oħra. Bħala rigal ngħatajt għaxar dollari, li wżajthom biex nixtri libsa ġdida għalija. Aħna dejjem ġejna mħarrġin biex nilbsu sew  għal-​laqgħat u biex nieħdu ħsieb ħwejjiġna.

Sakemm wasal iż-​żmien għall-​konvenzjoni memorabbli fl-​1931, f’Columbus, Ohio, Clarence u Carl kienu żżewġu u kienu qed jagħmlu x-​xogħol taʼ pijunier man-​nisa tagħhom. Kienu jgħixu għalihom f’dar li setgħet tinġarr minn post għall-​ieħor u li kienu għamluha huma stess. Carl kien iżżewweġ lil Claire Houston minn Wheeling, West Virginia, u kien għalhekk li jien kont bil-​qegħda ħdejn l-​oħt iż-​żgħira taʼ Claire, Helen, fil-​konvenzjoni taʼ Columbus.

Il-​Ministeru Full-Time

Jien iggradwajt mill-​iskola sekondarja fl-​1932 meta kelli 15-il sena, u s-​sena taʼ wara ħadt karozza wżata għand ħija Clarence, li kien qed jagħmel ix-​xogħol taʼ pijunier fis-​South Carolina. Applikajt għas-​servizz taʼ pijunier u bdejt naħdem flimkien maʼ Clarence u martu. Helen sadanittant kienet qed tagħmel ix-​xogħol taʼ pijunier f’Hopkinsville, Kentucky, u ktibtilha għall-​ewwel darba. Fit-​tweġiba tagħha, hi staqsietni: “Int pijunier?”

Fl-ittra tiegħi—li Helen żammitha sa mewtha kważi 60 sena wara—weġibtha: “Iva, u nittama li nkun nistaʼ nibqaʼ għal dejjem.” F’dik l-​ittra, jien għedt lil Helen li kont qed inqassam il-​ktejjeb The Kingdom, the Hope of the World lill-​membri tal-​kleru u lill-​imħallfin fl-​inkarigu tiegħi taʼ l-​ippridkar.

Fl-1933, missieri għamilli tinda fuq ir-​roti—karavan twil 2.4 metri u wiesgħa 2 metri, bil-​ħitan tal-​kanvas miġbudin madwar travi weqfin dojoq u b’tieqa quddiem u oħra wara. Dak kien il-​post umli tiegħi għall-​erbaʼ snin taʼ wara bħala pijunier.

F’Marzu taʼ l-​1934, jien, Clarence u Carl, in-​nisa tagħhom, Helen u ommha, u oħt il-​mara taʼ Clarence—tmienja b’kollox—tlaqna lejn il-​punent sabiex nattendu għall-​konvenzjoni ġewwa Los Angeles, California. Xi wħud minnhom rikbu u raqdu fil-​karavan tiegħi. Jien kont norqod fil-​karozza, waqt li l-​oħrajn krew xi kmamar. Peress li kellna xi problemi fil-​karozza, wasalna Los Angeles fit-​tieni ġurnata mis-​sitt ijiem tal-​konvenzjoni. Hemmhekk, fis-​26 taʼ Marzu, jien u Helen fl-​aħħar stajna nissimbolizzaw id-​dedikazzjoni tagħna lil Jehovah permezz tal-​magħmudija taʼ l-​ilma.

Fil-konvenzjoni, Joseph F. Rutherford, li dik il-​ħabta kien il-​president tal-​Watch Tower Society, iltaqaʼ personalment mal-​pijunieri kollha. Hu inkuraġġiena, billi qalilna li konna ġellieda qalbiena tal-​verità tal-​Bibbja. F’dik l-​okkażjoni kien sar provvediment biex tingħata għajnuna finanzjarja lill-​pijunieri sabiex ikunu jistgħu jkomplu fil-​ministeru tagħhom.

Edukazzjoni għal Ħajjitna Kollha

Meta rritornajna mill-​konvenzjoni taʼ Los Angeles, aħna lkoll xandarna l-​messaġġ tas-​Saltna lil nies f’kontej sħaħ tas-​South Carolina, Virginia, West Virginia, u Kentucky. Snin wara, Helen kitbet dwar dak iż-​żmien: “Ma kien hemm l-​ebda kongregazzjoni li stajna nistrieħu fuqha, u l-​ebda ħbieb li setgħu jgħinuna, għax konna tabilħaqq stranġieri f’art stramba. Imma issa naf li kont qed nieħu edukazzjoni. Kont qed insir sinjura.”

Hi staqsiet: “X’tistaʼ tagħmel waħda żagħżugħa bil-​ħin tagħha meta tkun ’il bogħod minn ħbiebha u minn darha? Insomma ma kienx daqshekk taʼ dwejjaq. Lanqas biss niftakar li xi darba kont imdejqa. Kont naqra ħafna. Qatt ma nqasna li nżommu mal-​qari u l-​istudju tagħna tal-​letteratura bbażata fuq il-​Bibbja. Bqajt qrib t’ommi, waqt li tgħallimt kif inħaddem il-​flus li kellna, nixtri, nibdel ir-​roti tal-​karozza, insajjar, inħit, u nippriedka. M’għandi l-​ebda ndiema u lesta li nerġaʼ nagħmel kollox mill-​ġdid.”

 Helen u ommha kienu ferħanin li jgħixu f’karavan żgħir f’dawk is-​snin, għalkemm ommha kellha dar sabiħa. Wara l-​konvenzjoni f’Columbus, Ohio, fl-​1937, is-​saħħa t’omm Helen marret għall-​agħar, u kellha tidħol l-​isptar. Hi mietet fl-​inkarigu tagħha ġewwa Philippi, West Virginia, f’Novembru taʼ l-​1937.

Niżżewġu u Nkomplu bis-​Servizz

Fl-​10 taʼ Ġunju, 1938, jien u Helen iżżewwiġna f’ċerimonja sempliċi fid-​dar fejn kienet twieldet hi f’Elm Grove, ħdejn Wheeling, West Virginia. L-​għażiż Ħuna Evans, li kien introduċa l-​verità lill-​familja tiegħi snin qabel ma twelidt jien, għamlilna t-​taħdita taż-​żwieġ. Wara t-​tieġ, jien u Helen ippjanajna li nirritornaw għax-​xogħol taʼ pijunier fil-​lvant taʼ Kentucky, imma b’sorpriża kbira, ġejna mistidnin li nagħmlu x-​xogħol taż-​żona. Dan ix-​xogħol kien jinvolvi li nżuru gruppi tax-​Xhieda taʼ Jehovah fil-​punent taʼ Kentucky u f’partijiet taʼ Tennessee sabiex ngħinuhom fil-​ministeru tagħhom. B’kollox, fil-​postijiet kollha li żorna kien hemm biss madwar 75 proklamatur tas-​Saltna.

F’dak il-​perijodu, in-​nazzjonaliżmu kien ħassar il-​mentalità taʼ ħafna wħud, u jien kont qed nistenna li niġi arrestat minħabba n-​newtralità Kristjana tiegħi. (Isaija 2:4) Madankollu, grazzi għar-​rekord tiegħi taʼ l-​attività taʼ l-​ippridkar, irċivejt klassifikazzjoni mill-​kumitat li kien jibgħat lin-​nies għall-​militar li ppermettietli nkompli fil-​ministeru full-time.

Meta bdejna l-​ministeru taʼ l-​ivvjaġġar, kważi kulħadd ikkummenta dwar iż-​żgħożija tagħna. F’Hopkinsville, Kentucky, oħt Kristjana laqgħet lil Helen b’tgħanniqa kbira u staqsietha: “Tiftakarni?” Fl-​1933, Helen kienet tatha xiehda fil-​ħanut li kellu r-​raġel tagħha fir-​raħal. Hi kienet tgħallem id-​duttrina fl-​iskola taʼ kull nhar taʼ Ħadd, imma wara li qrat il-​ktieb li kienet ħallitilha Helen, qamet bil-​wieqfa quddiem il-​klassi tagħha u talbet skuża għall-​fatt li kienet għallmithom twemmin mhux Bibliku. Wara li rriżenjat mill-​knisja, hi bdiet tipproklama l-​veritajiet tal-​Bibbja fil-​komunità tagħha. Jien u Helen qdejna fil-​punent taʼ Kentucky għal tliet snin, u kemm-il darba qgħadna għand dik l-​oħt u r-​raġel tagħha.

F’dak iż-​żmien kellna assembleat lokali żgħar, u A. H. Macmillan ġie jaqdi f’waħda minnhom. Hu kien qagħad fid-​dar tal-​ġenituri taʼ Helen meta kienet għadha żgħira, u għalhekk, matul il-​konvenzjoni hu għażel li joqgħod magħna fil-​karavan tagħna taʼ 5 metri tul, fejn kellna sodda żejda. Hu wkoll kien ftakar fil-​Ħallieq Grandjuż tiegħu f’jiem żgħożitu, billi kien iddedika ħajtu lil Jehovah fl-​1900, meta kellu 23 sena.

F’Novembru taʼ l-​1941, ix-​xogħol taʼ l-​ivvjaġġar ġie sospiż għal ftit, u jien ġejt inkarigat bħala pijunier f’Hazard, Kentucky. Għal darb’oħra, ħdimna maʼ ħija Carl u martu, Claire. Hawnhekk, Joseph Houston, in-​neputi taʼ Helen, ngħaqad magħna u beda x-​xogħol taʼ pijunier. Hu kompla fil-​ministeru full-time għal kważi 50 sena, sakemm miet għal għarrieda b’attakk tal-​qalb fl-​1992, waqt li kien qed jaqdi lealment fil-​kwartieri dinjin tax-​Xhieda taʼ Jehovah ġewwa Brooklyn, New York.

Fl-1943 intbgħatna lejn Rockville, Connecticut. Hawn kien qisu dinja oħra għalija u għal Helen għax konna drajna nippridkaw fin-​naħa tan-​nofsinhar. F’Rockville, Helen kienet tikkonduċi regolarment iktar minn 20 studju tal-​Bibbja fid-​djar kull ġimgħa. Eventwalment, krejna kamra modesta bħala Sala tas-​Saltna, u ġie organizzat in-​nukleu taʼ kongregazzjoni żgħira.

Waqt li konna qed naqdu f’Rockville, ġejna mistidnin biex nattendu l-​ħames klassi taʼ l-​Iskola taʼ Gilgħad (Watchtower Bible School of Gilead) f’South Lansing, New York. B’ferħ, skoprejna li Aubrey u Bertha Bivens, li konna għamilna ħbieb magħhom meta konna pijunieri f’Kentucky, kienu se jkunu studenti magħna fil-​klassi.

L-​Iskola u l-​Inkarigu Ġdid Tagħna

Għalkemm konna għadna żgħar, il-​biċċa l-​kbira taʼ l-​istudenti fil-​klassi magħna kienu ferm iżgħar. Iva, huma kienu qed jiftakru fil-​Ħallieq Grandjuż tagħhom f’żgħożithom. Il-​gradwazzjoni tagħna kienet f’Lulju taʼ l-​1945, eżattament meta t-​Tieni Gwerra Dinjija kienet waslet fi tmiemha. Waqt li konna qed nistennew għall-​inkarigi missjunarji tagħna, ħdimna mal-​Kongregazzjoni taʼ Flatbush ġewwa Brooklyn, New York. Fl-​aħħar, fil-​21 t’Ottubru, 1946, flimkien maʼ sitt studenti oħra  tal-​klassi tagħna, inkluż il-​koppja Bivens, sifirna lejn id-​dar ġdida tagħna fil-​Belt taʼ Gwatemala, il-​Gwatemala. F’dak il-​perijodu, kien hemm inqas minn 50 Xhud taʼ Jehovah f’dak il-​pajjiż kollu taʼ l-​Amerka Ċentrali.

F’April taʼ l-​1949, ftit minna l-​missjunarji ntbgħatna lejn Quetzaltenango, it-​tieni belt fil-​qjies u l-​importanza fil-​pajjiż. Din il-​belt tinsab iktar minn 2,300 metru ’l fuq mil-​livell tal-​baħar, u l-​arja muntanjuża hi friska u ċara. Helen fissret fil-​qosor l-​attività tagħna hawnhekk, billi kitbet: “Kien il-​privileġġ tagħna li nippridkaw f’diversi bliet u villaġġi. Konna nqumu madwar l-​erbgħa taʼ fil-​għodu u naqbdu tal-​linja (li taʼ spiss kien ikollha bħal purtieri tal-​kanvas li tistaʼ ttellagħhom u tniżżilhom minflok twieqi) lejn belt ’il bogħod. Hemmhekk konna nippridkaw għal madwar tmien sigħat qabel nirritornaw fil-​għaxija.” Illum hemm diversi kongregazzjonijiet f’ħafna minn dawn il-​postijiet, inkluż sitta fi Quetzaltenango.

Ma damx ma kien hemm sejħa għal missjunarji biex jaqdu f’Puerto Barrios fuq il-​Kosta tal-​Karibew, it-​tielet mill-​akbar bliet fil-​Gwatemala. Il-​koppja Bivens, li tant konna nħobbu u li konna qdejna magħhom għal ħames snin fil-​Gwatemala, kienu fost dawk li marru f’dan l-​inkarigu ġdid. Il-​firda kienet waħda taʼ niket u ħalliet ċertu vojt f’ħajjitna. Billi bqajna jien u Helen biss fid-​dar missjunarja, morna noqogħdu f’appartament żgħir. Fl-​1955, jien u Helen aċċettajna inkarigu ġdid fil-​belt taʼ Mazatenango, li kienet iktar tropikali. Ħija ż-​żgħir Paul, u martu Dolores, li ggradwaw mill-​Iskola taʼ Gilgħad fl-​1953, kienu qdew hemmhekk ftit qabel ma morna aħna.

Sa l-​1958 kellna ’l fuq minn 700 Xhud, 20 kongregazzjoni, u tliet circuits fil-​Gwatemala. Jien u Helen erġajna ħadna sehem fix-​xogħol taʼ l-​ivvjaġġar, billi konna nżuru gruppi żgħar taʼ Xhieda u diversi kongregazzjonijiet, inkluż dik fi Quetzaltenango. Imbagħad, f’Awissu taʼ l-​1959, ġejna mistidnin biex nirritornaw lejn il-​Belt taʼ Gwatemala, fejn konna ngħixu fl-​uffiċċju tal-​fergħa. Jien ġejt inkarigat li naħdem fil-​fergħa, waqt li Helen baqgħet fis-​servizz missjunarju għal 16-il sena oħra. Imbagħad, hi wkoll bdiet taħdem fl-​uffiċċju tal-​fergħa.

Iżjed Barkiet

Snin ilu kien qisu li kont dejjem jien l-​iżgħar wieħed fost dawk li jaqdu lil Jehovah. Issa taʼ spiss inkun l-​ixjeħ, kif kien fil-​każ meta attendejt l-​iskola tal-​fergħa f’Patterson, New York, fl-​1996. Sewwa sew bħalma rċivejt tant għajnuna f’żgħożiti minn uħud akbar, kien il-​privileġġ tiegħi f’dawn l-​aħħar għaxriet taʼ snin li ngħin ħafna żgħażagħ li jixtiequ jiftakru fil-​Ħallieq tagħhom f’żgħożithom.

Jehovah jkompli jitfaʼ xita taʼ barkiet fuq il-​poplu tiegħu hawnhekk fil-​Gwatemala. Fl-​1999 kien hemm iktar minn 60 kongregazzjoni fil-​Belt taʼ Gwatemala. U fit-​tramuntana, fin-​nofsinhar, fil-​lvant, u fil-​punent, hemm ferm iktar kongregazzjonijiet u eluf taʼ proklamaturi taʼ l-​aħbar tajba tas-​Saltna t’Alla. Dawk li kienu inqas minn 50 proklamatur tas-​Saltna meta konna wasalna aħna madwar 53 sena ilu, issa żdiedu għal iktar minn 19,000!

Grat għal Ħafna Affarijiet

Ħadd ma jgħix ħajja mingħajr problemi, imma dejjem nistgħu nitfgħu ‘t-​tagħbija tagħna fuq il-​Mulej.’ (Salmi 55:​22, KŻ) Hu taʼ spiss isostnina permezz taʼ l-​appoġġ taʼ mseħbin kollhom imħabba. Per eżempju, ftit snin qabel ma mietet, Helen tatni bħala rigal plakka ġo gwarniċ żgħir li fuqha kellha mnaqqax it-​test Bibliku taʼ Lhud 6:10: “Alla m’hux se jkun hekk inġust li jinsa dak li intom għamiltu u l-​imħabba li wrejtu lejn ismu meta qdejtu u għadkom taqdu lill-​qaddisin.”

 Parti min-​nota mwaħħla tagħha taqra: “Għażiż tiegħi, m’hemm kważi xejn li nistaʼ nagħtik, ħlief IMĦABBTI KOLLHA . . . Din l-​iskrittura tassew hija xierqa għalik, u nitolbok biex tqegħedha fuq l-​iskrivanija tiegħek, mhux għax tajthielek jien, imma għax tapplika għalik fis-​snin twal tiegħek taʼ servizz.” Sal-​lum, din il-​plakka għadha fuq l-​iskrivanija fl-​uffiċċju tiegħi fil-​fergħa tal-​Gwatemala.

Jien ilni naqdi lil Jehovah minn żgħożiti, u issa fis-​snin avanzati tiegħi, nirringrazzja lil Jehovah għas-​saħħa tajba li għandi li tippermettili nżomm id-​dmirijiet li jien inkarigat li nagħmel. Hekk kif nagħmel il-​qari regulari tal-​Bibbja, taʼ spiss niltaqaʼ maʼ xi skritturi illi naħseb li kieku l-​maħbuba tiegħi Helen kienet timmarkahom fil-​Bibbja tagħha. Dan ġie f’moħħi meta erġajt qrajt Salm 48:15 [48:​14, NW]: “Dan hu Alla! Alla tagħna għal dejjem taʼ dejjem. Hu jmexxina [“sakemm immutu,” NW]!”

Huwa l-​pjaċir tiegħi li naqsam m’oħrajn il-​viżjoni tal-​jum taʼ l-​irxoxt meta n-​nies mill-​ġnus kollha taʼ żmien l-​imgħoddi se jkunu qed jilqgħu lill-​maħbubin tagħhom lura mill-​mewt f’dinja ġdida. Xi prospett hu dan! Kemm se jixxerred dmugħ taʼ ferħ hekk kif niftakru li Jehovah hu tabilħaqq dak Alla “li jfarraġ lill-​umli”!—2 Korintin 7:6.

[Stampa f’paġna 25]

Min-​naħa taʼ fuq tax-​xellug skond l-​arloġġ: Ommi, missieri, iz-​zija Eva, u ħuti Carl u Clarence, fl-​1910

[Stampi f’paġna 26]

Maʼ Helen fl-​1947 u fl-​1992